《爱情神话》——不管几岁，爱情万岁
今朝上半天有点冷，阴司刮搭。中郎厢开始出太阳了，暖涅点了。
切好中饭，白老师开了部电动车勒勒安福路高头，牌照是沪B1224，伊脚踏车好几天没踏，一看，没气了。伊出门辰光走了急，头盔也忘记戴了，口罩也没戴，冷了呱呱抖，还好戴了副手套。伊怕辰光来伐及，伊约了李小姐勒巨鹿路画室碰头。
巨鹿路光华里弄堂口，伊乃车子停了棵梧桐树下，撑好撑脚架，从袋袋里摸出一根香烟，叼了嘴巴朗，从另外只袋袋摸出打火机，打了好几记，没打出火，伊一看，娘呃冬菜，没气了，随手掼了旁边只垃圾桶里。
伊刚刚到画室，李小姐就勒勒楼下揿门铃。
门一开，只看到，李小姐立了门口，伊兜了件黑颜色披风，腰朗两根带子飘了左右两边，戴了顶黑颜色渔夫皮帽子，一副太阳眼镜架了头顶朗，一双黑颜色高跟皮鞋，两只跟哈高，哈细，像两把刀一样戳了水门汀朗。
李小姐四十岁出头了，看上去还是蛮年轻呃。伊皮肤雪白粉嫩，近腔把，下巴有点尖了，一只面孔显得更噶小了，一双娇滴滴、滴滴娇呃大眼睛眼显得更嘎大了，长得来像电影明星马伊琍一样，自有妩媚处。伊格种娇小呃身材是最伐显老呃一种，越长越年轻，一只小腰永远纤瘦。
两楼画室，两人坐定，李小姐嗲悠悠问，白老师，啥事体啦，急吼拉吼呃要碰头。
白老师笃笃定定刚，马上要圣诞节了，我想圣诞节夜里请侬看电影。
李小姐刚，油~~，我还以为啥大事体来，看只电影搞了噶紧张组撒啦。
白老师点了根香烟，刚，格只电影蛮好看呃，侪是刚上海话呃，演员也侪是上海人，而且，电影里厢也有个白老师。
李小姐刚，奥，是伐？啥电影啦？
白老师刚，格只电影名字叫《爱情神话》，是一个九〇后美女导演邵艺辉呃作品，女主角是我偶像，马伊琍。
李小姐刚，就是格只电影啊，我晓得呃呀，最近朋友圈里侪勒勒发格只电影呃宣传片，还有主题歌，伐要太灵奥，我老想去看呃，因为男主角是光头徐峥。
白老师跷跷大拇指刚，老卵！
李小姐刚，我伐要太欢喜徐峥奥。
白老师收起大拇指刚，册那!
识别二维码，关注公众号，观看更多文章。
历史文章：
Send to Author