到白老师画室去——《顶级作家》之拾柒
果然，第二天出太阳了，冷是冷着点，但是天气晴朗，阳光灿烂。顶级作家爬起来辰光快十二点钟了，伊牙齿伐刷，面伐揩，中饭也想伐着切，就急吼拉吼1发微信帮Apple刚，今朝天气好，有太阳，出来兜兜伐？
过了两分钟，手机响了一记，Apple微信回复伊刚，今朝啊，现在太早了点伐？天噶亮，月亮还没出来，侬伐是刚要等月亮出来再来看我吗？
顶级作家烧好开水，冲了杯雀巢三合一咖啡，回复apple刚，月亮啊，月亮勒勒我心里。
Apple回伊，看伐出，侬只男宁蛮花呃嘛，闲话蛮会刚。个么，好呃呀，反正我今朝荡了窝里厢，正好没啥事体做。
顶级作家一看，哈开心，伊微信语音刚，格能好伐，下半天，阿拉早点出来，我先带侬到巨鹿路，到白老师画室去白相相，伊只露台老漂亮呃，阿拉到伊露台高头去晒晒太阳，爬爬屋顶，看看法租界，再顺带便弄杯咖啡切切。
Apple语音回复伊刚，好呀。随后又问伊，白老师是啥人啦。从来没听侬刚起过。
顶级作家刚，白老师是我一个朋友，伊是个画家，但是伊伐肯好好画画，白相心思哈重。最近好像勒勒学烧菜，还拜了两个师傅，伊刚伊拉师傅是苏浙汇呃主厨，专攻淮扬菜，烧菜哈好切，刀工哈好，豆腐干丝斩了像棉纱线样细，一根伐断。再看看白老师，豆腐干丝斩得来像麻绳一样，粗了一天世界。
Apple刚，侬格人老戳气2呃闹，嫑老是背后刚人家坏闲话呀，大家侪是朋友，要多鼓励人家，支持人家。顶级作家刚，搓3伊就是支持伊，骂伊就是鼓励伊，懂伐？Apple刚，侬老戳克4呃。
顶级作刚，碰了巧点，白老师夜里有朋友来切饭，阿拉还好混顿夜饭切切。Apple刚，一歇歇刚人家烧了伐好切，一歇歇要混人家一顿饭切切，哪能噶沙坑5啦。
微信里，伊拉约好下半天两点钟勒巨鹿路富民路口碰头。
两点钟还没到，顶级作家就到了路口，因为冷，四周分外显得洁净。梧桐树下，伊停好脚踏车，撑好撑脚架，从袋袋里摸出一包香烟，抽出来一根，叼了嘴巴朗，又从袋袋里摸出一只打火机，咔嚓咔嚓打了好几记，只看到火星，打伐出火，伊一看，没气了。册那，伊随手掼了旁边只垃圾桶里，乃香烟夹勒勒耳朵高头，抬头看牢马路对面。
因为是周末，马路朗厢车子伐多，路朗厢人也伐多，走起路来侪是笃悠悠笃悠悠呃。
马路对过上街沿高头，一个美女勒勒等红灯，伊个子高挑，身材苗条，一头直发，微风吹过，拂起几根发丝飘过面孔，一副太阳镜搁勒头顶高头。伊穿了一件oversize的白色卫衣，上头画了老大只蝴蝶，肩胛朗斜披了一件烟灰羊绒衫，两只袖子勒勒胸前打了只结，一条迷彩紧身健美裤，屁股微微翘起，性感十足，脚朗穿一双咖啡颜色平跟高筒皮靴。伊左手拿了只手机，右手拿了杯咖啡。
从富民路开过来一部擦头6，右转弯开进巨鹿路，卷起地朗几片梧桐树树叶。
顶级作家看到了上街沿高头呃Apple，伊差点没认出来，格只漂亮女人就是Apple。顶级作家放下抱在胸前的两只手，往前走了两步，停下来，用右手托牢自家呃下巴，远远看牢Apple。
红灯闪了几记，绿灯一亮，Apple左右看看，迈开脚步，慢慢走过斑马线，朝伊走过来。
巨鹿路富民路口有一只老弄堂，叫光华里，是一条1930年造呃老弄堂，五排联排整栋新式里弄，两层楼高，每套房子侪有天井，有露台，房子层高三米八，朝向好，采光好，冬暖夏凉。弄堂伐长，能看到尽头的围墙，弄堂也伐宽，车子进去掉不了头，只能原路倒出来，伐小心还要擦到墙壁，碰特漆水，老伐方便呃。白老师工作室就勒勒格条弄堂最后一排，门牌号码是十四号，据说，旁边十三号是电影明星蝴蝶呃故居。
弄堂口有一只过街楼，上头住了一家人家，从窗口穿出来两根竹竿，搁勒上街沿梧桐树树干朗，一根竹竿朗搭了两条被头，还有一根竹竿朗晾了几件衣裳，还有两只女人胸罩，滴滴答答勒勒滴水。Apple抬头看了看，绕开了走过去，伊跟了顶级作家后头走进弄堂。
过街楼下头，弄堂口右边有一只灶披间7，灶披间旁边有一只水斗，一个苏北阿姨勒勒水斗旁边汰青菜，伊穿了件蓝颜色呃工作服，戴了副红颜色袖套，工作服背后头印了四个字“日盛清洁”。苏北阿姨看到伊拉进来，甩了甩手，别过头用苏北话问，到啦块？找啦一勾？
顶级作家看看伊，边走边刚，阿拉到十四号，寻白老师。
苏北阿姨没再问，用手朝里指了指，别转头继续汰青菜。
沪语注释
1.急吼拉吼：着急。
2.戳气：讨厌。
3.搓：招惹。
4.戳克：刁钻。
5.沙坑：抠门，小气。
6.擦头：出租车。
7.灶披间：厨房。
识别二维码，关注公众号，观看更多文章。
历史文章：