苏北阿姨翻毛腔——《顶级作家》之拾捌
伊拉两个人朝弄堂里厢走，刚走没几步，一部电动车从后头开过来，慢慢停了灶披间旁边，熄火，一个中年男人，头上戴了只蓝颜色头盔，从车子朗下来。
男人把透明有机玻璃面罩往头顶上一推，刚刚想把头盔拿下来，只听到背后头苏北阿姨用苏北话对牢男人乱骂：里（你）这勾死鬼，里还晓得家来啊。
闲话还没刚好，苏北阿姨拉么生头1拎起汰青菜呃血血红呃塑料面盆，朝格只男人掼过去，一边掼一边骂，我辣死里勾妈妈。只听到嘭一记，面盆正好掼了格只男人头盔朗，男人身上溅了交关水。
顶级作家头子活络，反应快，腰一弯，头颈一缩，往旁边让了一让。Apple还没反应过来，几滴水溅到了Apple面孔朗。
男人一吓，往后退了几步，大叫一声，啊油，八德命欧！脚底一滑，四脚朝天掼勒地朗厢，一只头盔飞了老远，吓得一只白猫喵呜一记从墙角窜到围墙朗，逃特。
顶级作家豪扫2拉牢Apple往旁边退了几步，面盆落了地朗转了好几圈，停下来，倒扣勒勒地朗厢。
苏北阿姨两只眼睛瞪了老老大，一只戴了袖套呃手插勒腰朗厢，格只腰看上去蛮粗呃。伊气得来啊噗啊噗，喉咙哈尖，刚，我叫里死鬼，里不服气，啊？一个晚上不家来，乖乖隆地咚，找死啊。
伊用另外一个手指牢男人，刚，不家来就不家来，拉勾（哪个）要里家来，有本事把钱拿家来，什尼（什么）东西，三个号头了，一分钱不往家里拿，切饭还要提要求，早上要喝咖啡，切饭要切三文鱼，红烧肉不够，还要加鲍鱼，辣尼玛，鲍你个头，里以为里是画画滴白老师啊，你会画画吗?你会烧饭吗？什尼本事都没得，样样都不会。
苏北阿姨只手勒勒空气中乱抖，继续刚，家里的情况里不是不晓得，冬天切咸菜，夏天切瓜皮，难般难般咸菜炒漏丝（肉丝）。
苏北阿姨刚法刚法眼泪水差点落下来，伊又刚，我们苏北老家有句老话是这样讲，钱不家来人家来，人不家来钱家来，钱不家来，人也不家来，我就带人家来。
Apple勒勒旁边听了戆特，最后一句伊哪能也听伐懂，伊看看顶级作家，问，苏北阿姨勒勒刚啥啦，我哪能听也听伐懂。
顶级作家刚，伊拉男人昨涅夜里没回来，勒勒外头搓麻将，伊伐开心了，翻毛腔了，伊勒骂伊拉男人。伊刚，侬没本事赚钞票回来，伐搭界，勒勒窝里伐要出去混；如果侬伐想勒勒窝里厢，伐搭界，钞票交回来；如果侬钞票赚伐回来，人也伐想勒勒窝里厢，也伐搭界，我就带别呃男人回来。
Apple听了哈哈乱笑，刚，晓得了，三只伐搭界。其实苏北阿姨刚了蛮有道理啦，对没花头呃男人就应该格能样子。
顶级作家点点头，没响，但是伊心里厢伐大买账。
再看格只男人，伊慢慢从地朗厢爬起来，一面拍屁股高头呃灰，一面老难为情呃看看Apple，用苏北话刚，小菇凉，对不住，对不住。
Apple有点尴尬，笑笑刚，侬是伐大好，哪能好夜里伐回来，侬再伐回来，纳3老婆要外头寻方向了。
男人听了，更加难为情了，摇摇头刚，我老婆刀子嘴豆腐心，不会滴，不会滴。
男人拎起面盆走到苏北阿姨旁边，刚，好喽好喽，不要生气喽，青菜我来洗，饭我来烧。
男人弯腰拿起落勒地朗厢呃青菜，对苏北阿姨刚，我这辈子，就你这么一勾女人。我这勾人，你啊不是不晓得，冬天做保安，夏天看大门，难般难般打点小麻将。现在的日子不像以前好过喽，以前是一过星期三，日子就打弯，现在是，一过星期三，急得头头转哪。
男人从袋袋里摸出三张一百块，两张五十块，两张廿块头，还有一把赖头分，往苏北阿姨袋袋里一塞，刚，里看看，里看看，四百多块钱，都是赢得来的，我全部交八你。
苏北阿姨摸摸袋袋，气消特交关，伊刚，我对你好，你也要对我好；我对你不好，你也要对我好；你对我好，我就会对你更嘎好。手往房间里一指，刚，台子上有咸菜炒漏丝。
男人问，啊有排骨啊？
苏北阿姨刚，漏就是排骨，排骨就是漏。
沪语注释
1.拉么生头：突然。
2.豪扫：赶快。
3.纳：你们。
识别二维码，关注公众号，观看更多文章。
历史文章：