朗读| 五脏庙活鬼求儿，三家村死人出世
《何典》第一回节选
勒辣喫个扎劲个辰光，活鬼講：“伲夫妻两家头，一钿勿用，两钿勿花，喫辛喫苦，做下来個点人家。现在年纪一大把，子女也呒没。倒要大呼小叫个喫啥寿酒，個勿是买咸鱼放生，死活侪勿知个嘛？”形容鬼听仔就講：“虽然是講好儿子养勒三十前，㑚两家头还至于七老八十岁，要小人也来得及，忧愁伊做啥？前日仔伲伊塔来勒個新死亡人，伊话阳间有個求儿子个方法：倘望呒没儿子，只消到庙里向去烧香拜佛，捐点铜钿，就好养着勒，真蛮灵验的。姐夫为啥勿去试试看？”
……
活鬼到鬼店里去买仔眼香烛，又叫勒条船，收捉仔多趟。到仔明朝，活鬼就叫鬼囡先拿眼行李搬勒船浪，一面端仔早饭。碰巧形容鬼也到了船头，遂让大家喫饱仔清水白米饭，叫鬼囡跟仔一道。形容鬼伸出脚，踏勒船浪，条船只晃转来了，差扳仔拿船踏沉脱勒，连忙拔起脚，講：“姐夫，哪恁较個条船介晃个啦？”活鬼看了笑，講：“还亏侬做了阴间秀才！哪恁孟子講个话自家侪忘记脱了？”形容鬼講：“啥言话，我倒记勿得了。”活鬼講：“孟子講个：然（船）而勿王（晃）者，未之有也。一条介小个船，侬虎头虎冲踏上去，教伊哪恁勿晃？”形容鬼笑了，講：“我虽做了秀才，伊眼四书五经，侪还畀先生去勒，何里还记得？”
*本段为《何典》第一回，“五脏庙活鬼求儿，三家村死人出世”，为了便于朗读，改成了现代上海话，和原文有出入。
勒辣：在
伲：我们
做人家：指节约省钱
㑚：你们
两家头：两个人
前日仔：前天
伊：第三人称，指他/她/它
伊塔：那边
眼：些，这些，那些
差扳仔：差点儿
然而勿王者：“船”和“然”，“晃”和“王”在上海话里同音。
虎头虎冲：冒冒失失
侪：全
畀：给
《鬼趣图》清 罗聘
作品介绍
《何典》：清代张南庄著吴语白话小说。小说名取自“语出何典”。写阴间的大鬼小鬼，在其中代入对人间的戏谑讽刺。张南庄在小说中署名过路人，生前著有诗文十卷皆佚失，独有这本十回小说《何典》存世。
朗读 | 朱洵