གླིང་དཀར་དཔའ་བོའི་ཀི་སྒྲ།
ཀ་དག་སྤྲོས་མཐའ་བྲལ་བའི་ཀློང་ཡངས་ནས།།
རྩ་བརྒྱུད་བླ་མ་ཡི་དམ་བསང་ལ་བྱོན།།
མི་མངོན་ཆོས་ཀྱི་དབྱིངས་ཀྱི་དཀྱིལ་འཁོར་ནས།།
ཆོས་སྐྱོང་མ་གཟའ་དམ་གསུམ་བསང་ལ་བྱོན།།
སྐུ་མཁར་སེང་འབྲུག་སྟག་རྩེའི་ཕོ་བྲང་ནས།།
གླིང་དཀར་རྒྱལ་བློན་དམག་ཚོགས་བསང་ལ་བྱོན།།
རི་བྲག་གངས་དང་ས་གཉན་ཆུ་མིག་ནས།།
ཡུལ་འདིའི་ལྷ་ཀླུ་གཞི་བདག་བསང་ལ་བྱོན།།
དེ་ལྟར་མཆོད་བསྟོད་བཀའ་ཡི་གཉེར་གཏད་ནི།།
ཁྱབ་བདག་བླ་མའི་སྐུ་ཚེ་རབ་བརྟན་ཅིང་།།
མཛད་པ་འཕྲིན་ལས་འགྲོ་དོན་མཐར་རྒྱས་ཏེ།།
ཐེག་ཆེན་ཆོས་སྒྲས་ས་གསུམ་ཁྱབ་པར་ཤོག།
སངས་རྒྱས་བསྟན་པ་དར་ཞིང་རྒྱས་པ་དང་།།
དེ་འཛིན་འདུས་སྡེའི་བསླབ་གསུམ་མཐར་ཕྱིན་ཏེ།།
ཐོསབསམ་སྒོམ་གསུམ་འཆད་རྩོད་རྩོམ་གསུམ་་གྱིས།།
ལུང་རྟོགས་བསྟན་པའི་རྒྱལ་མཚན་སྒྲེང་བར་སྨོན།།
སྦྱིན་པའི་བདག་པོའི་འགལ་རྐྱེན་ཀུན་ཞི་ནས།།
མཐུན་རྐྱེན་ཚེ་དང་བསོད་ནམས་དཔལ་འབྱོར་དང་།།
བུ་ཚའི་གང་བྱས་བྱ་བ་ལམ་འགྲོ་ཞིང་།།
མི་ནོར་ཆོས་གསུམ་འཛོམས་པའི་བཀྲ་ཤིས་ཤོག།
སྟག་ལྟར་ངར་བའི་རླུང་རྟ་ཡར་བསྐྱེད།།
སེང་ལྟར་འགྱིང་བའི་རླུང་རྟ་ཡར་བསྐྱེད།།
ཁྱུང་ལྟར་འཕུར་བའི་རླུང་རྟ་ཡར་བསྐྱེད།།
འབྲུག་ལྟར་ལྡིར་བའི་རླུང་རྟ་ཡར་བསྐྱེད།།
དཀོན་མཆོག་སྲིད་ཞུའི་མགྲོན་མཆོད་ཚོགས་གཉིས་རྫོགས།།
མགོན་པོ་ཡོན་ཏན་མགྲོན་མཆོད་འཕྲིན་ལས་སྒྲུབས།།
རིགས་དྲུག་སྙིང་རྗེའི་མགྲོན་མཆོད་ངན་འགྲོ་སྟོངས།།
ལན་ཆགས་མགྲོན་མཆོད་བུ་ལོན་བྱང་གྱུར་ཅིག།
ཅེས་བསང་འབོད་བཀྲ་ཤིས་དཔལ་འབར་འདི་ནི་བོད་ཆུ་ཡོས་ལོ་ཟླ་ལྔ་བའི་ཚེས་བཅོ་ལྔ་འཛམ་གླིང་སྤྱི་བསང་ཆེན་མོའི་ཞོགས་པར་གླིང་གསེར་བའི་ཉི་འབུམ་དར་ཡག་ཁོང་ཨོ་རྒྱན་པདྨ་འབྱུང་གནས་ཀྱི་སྐུར་ཟ་ཧོར་རྒྱལ་བོའི་རྣམ་པར་བྱོན་ཏེ་ཀ་དག་ཆོས་དབྱིངས་ཆེན་མོ་ནས་ཟག་མེད་བདུད་རྩི་བསང་གི་མཆོད་པ་ནམ་མཁའ་བར་སྣང་ས་གཞི་ཐམས་ཅད་ཡོངས་སུ་ཁྱབ་པའི་བསང་མཆོད་རྒྱ་ཆེན་པོ་འབུལ་བཞིན་བསང་འབོད་ལེགས་ཚོགས་ཆར་འབེབས་འདི་ལྟར་གསུང་སྙམ་སྐབས་རིང་མོ་ཞིག་ནས་སྤུན་གྲོགས་པ་སངས་ལགས་ཀྱི་བསྐུལ་མ་བྱས་པ་གློ་བུར་དྲན་པའི་རྐྱེན་བྱས་ཏེ་པདྨ་འཇིགས་མེད་ཕྱོགས་ལས་རྣམ་རྒྱལ་གྱིས་ཡི་གེ་བྲིས་ཏེ་རེ་ཞིག་གསང་རྒྱ་བྱས་ནས་དེ་རིང་མ་ཚོགས་མཁའ་འགྲོ་འབུམ་གྱི་དུས་ཆེན་ལ་སྤེལ་བ་དགེའོ།།
ཅེས་བོད་ཆུ་ཡོས་ལོས་ཟླ་ལྔ་བའི་ཚེས་བཅོ་ལྔ་སྟེ་ཁྱབ་བདག་བླ་མའི་གདན་ས་ནས་འཛམ་གླིང་སྤྱི་བསང་ཆེན་མོར་མཆོད་པའི་ཞོགས་ཁར་བླ་མ་མཆོག་གསུམ་ལ་མཆོད་པ་དང་། ཆོས་སྐྱོང་སྲུང་མ་ལ་འཕྲིན་བཅོལ། གླིང་དཀར་དཔའ་བརྟུལ་དང་ཡུལ་ལྷ་གཞི་བདག་ལ་བཀའ་གཉེར་གཏད་ཏེ་བསང་མཆོད་གླིང་དཀར་དཔའ་བོའི་ཀི་སྒྲ་འདི་ཉིད་གུས་སློབ་པདྨ་འཇིགས་མེད་ཕྱོགས་ལས་རྣམ་རྒྱལ་གྱིས་སྨོན་པའོ།།