པདྨ་བཀའ་ཐང་། ཞལ་འདོན་པ། མཁན་གང་བསམ་ལྷུན་གྲུབ། སྒྲ་དང་ཡི་གེ 54-55

54༽ཁྲི་སྲོང་ལྡེའུ་བཙན་གྱི་རྒྱལ་སྲིད་བཟུང་བའི་ལེའུ།

55༽བོད་ཀྱི་རྒྱལ་པོས་ཐུགས་དགོངས་བཏང་ཞིང་བློན་འབངས་ལ་གདམ་ང་བསྐུར་བའི་ལེའུ།

པདྨ་བཀའ་ཐང་། ཞལ་འདོན་པ། མཁན་གང་བསམ་ལྷུན་གྲུབ།

༥༤། ཁྲི་སྲོང་ལྡེའུ་བཙན་གྱི་རྒྱལ་སྲིད་བཟུང་བ།

དེ་ནས་བལ་ཡུལ་ཚ་བ་ཚ་ཤོད་བྱོན༔ ཆུ་མིག་བྱང་ཆུབ་རིང་མོ་ཞེས་བྱ་བ༔ དགུན་ཡང་མེ་ཏོག་སྐྱེ་དེར་སྒྲུབ་པ་མཛད༔ དེ་དུས་སེམས་ཅན་སྲོག་ལ་དབང་བྱེད་པའི༔ ས་བདག་ཆེན་མོ་མཆེད་བཞི་དམ་ལ་བཏགས༔ ཕུར་པའི་བཀའ་སྲུང་བསེ་མོ་མཆེད་བཞིར་གསོལ༔ དེ་ནས་ཀོ་ཤ་ཙནྡན་གླིང་དུ་བྱོན༔ ཕུལླ་ཧ་རིའི་བྲག་ཕུག་ཐུགས་དམ་བཞུགས༔ སྲོད་ལ་ཕྱག་ན་རྡོ་རྗེའི་ལུང་བསྟན་བྱུང་༔ ཚེ་གཅིག་སངས་རྒྱས་བདུད་ཀྱི་བར་ཆོད་འབྱུང་༔ དེ་ཟློག་རྒྱལ་པོའི་ཁབ་ཀྱི་ནུབ་ཕྱོགས་ཀྱི༔ དུར་ཁྲོད་ཆེན་པོའི་ལྷོ་ནུབ་མཚམས་ཤིག་ན༔ དུར་ཤིང་ནག་པོའི་ཚལ་ནས་དངོས་གྲུབ་ལོང་༔ ལུང་བསྟན་བྱུང་ནས་གནམ་སྟོང་ནུབ་མོ་བྱོན༔ མེ་འབར་གསེབ་ན་ལྕགས་ཀྱི་སྡིག་པ་ནི༔ མགོ་དགུ་རྭ་ནི་བཅོ་བརྒྱད་ཡོད་པ་ཞིག༔ དཔྲལ་བ་རེ་ལ་མིག་ནི་གསུམ་གསུམ་ཡོད༔ མི་བཟད་འཇིགས་པ་དེ་ལ་ཕྱག་མཆོད་བྱས༔ སང་དགོང་ཤོག་ཅིག་དངོས་གྲུབ་སྦྱིན་ནོ་གསུངས༔ ཕྱིན་དུས་རྡོ་བ་གྲུ་གསུམ་ཞིག་འདུག་ནས༔ དེ་བཀོག་དོང་ནས་བསེ་ཡི་སྒྲོམ་བུ་བྱུང་༔ བལྟས་པས་ཕུར་པའི་ཆོས་འདུག་གཟིགས་པས་མཁྱེན༔ མིག་རེ་ལས་ནི་ཐེག་པ་རེ་རེ་བྱུང་༔ རྭ་རེར་ཐེག་པ་རེ་རེ་བཅོ་བརྒྱད་བྱུང་༔ དེ་ནས་རྒྱ་གར་རྡོ་རྗེ་གདན་དུ་ནི༔ རྒྱལ་པོ་ཉི་མ་སེང་གེས་གདན་དྲངས་བཞུགས༔ དེ་ནས་བོད་དུ་གདན་དྲངས་བྱོན་ཚུལ་ནི༔ བོད་ཀྱི་རྒྱལ་པོ་ཁྲི་ལྡེ་གཙུག་བརྟན་གྱིས༔ རྒྱ་ནག་རྩིས་ཀྱི་བཀའ་བབས་གདན་དྲངས་ནས༔ རྩིས་སྨན་གཉིས་ཀྱིས་བོད་ཁམས་སེམས་ཅན་བསྐྱངས༔ རྒྱ་མོ་གྱིམ་ཤང་ཀོང་ཇོ་ཁབ་ཏུ་བཞེས༔ བོད་ལ་ཕན་པའི་གཙུག་ལག་སྡེ་དགུ་འབྱོངས༔ བོད་ཁམས་འཕགས་པ་འཇམ་དཔལ་གདུལ་བྱར་གཟིགས༔ རྒྱལ་པོ་ཡབ་ཡུམ་ཕོ་བྲང་བྲག་དམར་ན༔ གཟིམས་པའི་ལྷུམས་སུ་རྒྱ་ནག་རྩེ་ལྔ་ནས༔ འཇམ་དཔལ་ཐུགས་ནས་འོད་ཟེར་སྣ་ལྔ་འཕྲོས༔ གྱིམ་ཤང་རྨི་ལམ་ཉི་མ་ཤར་བ་དང་༔ མཛེས་སྡུག་ཁྱེའུ་ལྷུམས་སུ་ཞུགས་པ་རྨིས༔ ས་གཞི་ཐམས་ཅད་འོད་ཀྱིས་གང་བ་དང་༔ ཡིད་བཞིན་ནོར་བུའི་ཆར་པ་བབ་པ་རྨིས༔ རྨི་ལམ་རྒྱལ་པོའི་སྙན་དུ་གསོལ་བ་ཡིས༔ རྒྱལ་པོ་ཤིན་ཏུ་དགྱེས་ནས་རིམ་གྲོ་བྱས༔ ལུས་ནི་མི་བདེ་མེད་པར་འགུལ་བར་བྱེད༔ ཤེས་པ་གསལ་ཞིང་ལུས་པོ་ཡང་བ་དང་༔ ཉོན་མོངས་མེད་ཅིང་སེམས་བདེ་ཉམས་དགར་གྱུར༔ ཟླ་དགུ་ངོ་བཅུ་ཕོ་བྲང་བྲག་དམར་དུ༔ རྟ་ལོ་དཔྱིད་ཟླ་ར་བ་སྟག་ཟླའི་ཉིན༔ སྐར་མ་རྒྱལ་གྱི་ནམ་ལངས་ཉི་ཤར་དྲོས༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་འཁྲུངས༔ རྒྱ་ནག་མཁས་པ་བི་རྗེ་བཙན་པ་ཡིས༔ གབ་རྩེ་བཏིང་ནས་བཟང་ངན་བརྩིས་པའི་ལུང་༔ རྒྱ་ཡི་གཙུག་ལག་སྤོར་ཐང་ཁྲ་མོ་ལས༔ དཔལ་འབར་མི་ཡི་འཁྲུངས་དཔེ་རྩིས་སུ་ཤར༔ སྨེ་བ་དགུ་འགྱུར་སྤར་ཁ་བརྒྱད་འཆར་གྱི༔ ཁ་དམར་བཞིན་ན་རྒྱལ་པོའི་ཅི་བསམ་འགྲུབ༔ སོ་ནི་དུང་སོ་འཁོར་མ་ཡོད་པ་ལ༔ སྐྲ་ལོ་མཐོན་མཐིང་སྤྱི་གཙུག་གཡས་སུ་འཁྱིལ༔ ཤིན་ཏུ་མཛེས་པ་ལྷ་ཡི་བུ་ཞིག་འདྲ༔ ཕུན་སུམ་ཚོགས་པའི་ལོ་པཎ་ཐམས་ཅད་སྡུད༔ འཆད་གྲ་སྒོམ་གྲ་ཆོས་ཀྱི་བསྟན་པ་ཆགས༔ རྒྱ་བོད་གཉིས་བར་ཆོས་ཀྱི་ཟམ་པ་འཛུགས༔ ཞེས་གསུངས་མཚན་ཡང་ཁྲི་སྲོང་ལྡེའུ་བཙན་བཏགས༔ དགུང་ལོ་བཅུ་གསུམ་ལོན་ནས་ཡབ་གཤེགས་ཏེ༔ བཅོ་ལྔའི་ལོ་ལ་རྒྱལ་པོར་མངའ་གསོལ་ནས༔ བཙུན་མོ་ཚེ་སྤོང་བཟའ་ནི་དམར་རྒྱན་དང་༔ འབྲོ་བཟའ་བྱང་ཆུབ་སྒྲོན་གཉིས་ཁབ་ཏུ་བཞེས༔ ལོ་བདུན་བར་དུ་ཇག་དམག་དཔོན་བྱས་ནས༔ ཕྱི་ཡི་སོ་བསྲུངས་ནང་གི་སོ་ཚིས་མཛད༔ བཅུ་བདུན་ལོ་ལ་ཆོས་ཀྱི་བསམ་པ་སྐྱེས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཁྲི་སྲོང་ལྡེའུ་བཙན་སྐུ་འཁྲུངས་ཤིང་རྒྱལ་སྲིད་བཟུང་བའི་ལེའུ་སྟེ་ང་བཞི་པའོ༔ ༔

༥༥། བོད་ཀྱི་རྒྱལ་པོས་ཐུགས་དགོངས་བཏང་ཞིང་བློན་འབངས་ལ་གདམ་ང་བསྐུར་བ།

དེ་ནས་ཡབ་མེས་ཀུན་གྱི་ཐང་ཡིག་བལྟས༔ ཡབ་མེས་ཐོ་ཐོ་སྙན་བཙན་སྐུ་རིང་ལ༔ དམ་པ་ཆོས་ཀྱི་དབུ་བརྙེས་རྒྱལ་པོར་བྱོན༔ ཕྱག་ན་རྡོ་རྗེའི་སྤྲུལ་པའི་རྒྱལ་པོར་འདུག༔ སྤང་སྐོང་ཕྱག་རྒྱ་མདོ་སྡེ་ཟ་མ་ཏོག༔ དགེ་བ་བཅུ་དང་ལས་འབྲས་རྣམ་པར་འབྱེད༔ མུ་དྲའི་རྟེན་འབྲེལ་ཕྱག་རྒྱ་མདོ་སྔགས་གཉིས༔ བསྟན་པ་གཉིས་ལྡན་བོད་དུ་བྱུང་ནས་འདུག༔ གཉན་པོ་གསང་བར་མཚན་གསོལ་བོད་ཁམས་བསྐྱངས༔ དེ་ནས་རྒྱལ་རབས་ལྔ་སོང་ལྷ་ས་རུ༔ རྒྱལ་པོ་སྲོང་བཙན་སྒམ་པོའི་སྐུ་རིང་ལ༔ དམ་པ་ཆོས་ཀྱི་སྲོལ་བཏོད་རྒྱལ་པོར་བྱོན༔ སྤྱན་རས་གཟིགས་ཀྱི་སྤྲུལ་པའིརྒྱལ་པོར་འདུག༔ ཁྲ་འབྲུག་ལྷ་ས་ར་མོ་ཆེ་དང་ནི༔ འཕྲུལ་སྣང་གཙོ་བྱས་མཐའ་འདུལ་ཡང་འདུལ་གྱི༔ གཙུག་ལག་ཁང་ནི་བརྒྱ་དང་རྩ་བརྒྱད་བཞེངས༔ ཇོ་ཤཱཀ་མི་བསྐྱོད་རྡོ་རྗེས་གཙོ་བྱས་པའི༔ ལུགས་མ་རང་བྱོན་རྡོ་སྐུ་མང་གདན་དྲངས༔ གསུང་རབ་དཀོན་ཅོག་སྤྲིན་གྱིས་གཙོ་བྱས་ནས༔ པདྨ་དཀར་པོ་ཙྪིནྡྷ་མ་ཎི་དང་༔ ཏོག་དང་གྲ་ལྔ་ལ་སོགས་བོད་དུ་བྱུང་༔ བདག་གིས་བསྟན་གཉིས་དར་རྒྱས་གཏོང་དགོས་སྙམ༔ གཙུག་ལག་ཁང་ཞིག་བཞེངས་པར་འབངས་དང་བགྲོས༔ ནང་བློན་དེ་སྐད་བགྱི་བ་མི་འཚལ་བར༔ དེ་མིན་གཞན་ཞིག་གདམ་ང་བསྐུར་དང་ཟེར༔ རྗེ་ཡི་ཞལ་ནས་བློན་འབངས་ཐམས་ཅད་ཉོན༔ ང་ནི་དཔེ་སྲོལ་ལས་ཐབས་ཤིག་བྱེད་པས༔ ཁྱེད་རྣམས་གདམ་ཀ་བསྐུར་གྱི་གང་སླ་གྱིས༔ གཙང་བོ་ཟངས་ཀྱི་སྦུབས་སུ་འཇུག་དང་གཅིག༔ བསམ་ཡས་ཧས་པོ་རི་ཡི་རྩེ་མོ་ནས༔ ཞང་པོའི་ཡུལ་མཐོང་ཤེལ་གྱི་མཆོད་རྟེན་བརྩིག༔ ཝ་ལུང་གྲོག་པོ་གསེར་ཕྱེས་འགེངས་དང་གསུམ༔ གཙུག་ལག་བྲེ་ཞབས་ཙམ་ཞིག་བརྩིག་གམ་འདོམས༔ བློན་འབངས་རྣམས་ཀྱིས་མི་འགྲུབ་གདམ་ཀ་ཟེར༔ གཙང་པོ་ཟངས་ཀྱི་སྦུབས་སུ་འཇུག་པ་བས༔ ཟངས་ཁལ་ཙམ་ཡང་དཀོན་པས་མི་འགྲུབ་བོ༔ ཤེལ་གྱི་མཆོད་རྟེན་ཞང་ཡུལ་རྒྱ་མཐོང་བས༔ ཤེལ་ཕྲེང་བཟང་པོ་བརྒྱ་ཚར་འགྲུབ་པར་དཀའ༔ ཝ་ལུང་གྲོག་པོ་གསེར་ཕྱེས་འགེངས་པ་བས༔ གསེར་གྱི་ཁང་ཚངས་ཙམ་ཡང་མི་འགྲུབ་བོ༔ དེ་གསུམ་གང་ཡང་མི་འགྲུབ་འཇོག་པར་ཞུ༔ གཙུག་ལག་ཁང་ཞིག་བཞེངས་པར་གསོལ་བ་ལས༔ དེ་ཉིད་མ་ཚར་བར་དུ་བྱེད་པར་གསོལ༔ དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ བླ་མཁྱེན་བི་རྗེ་བཙན་པར་མངའ་གསོལ་ནས༔ བོད་ཡུལ་ལུང་པའི་ས་དཔྱད་གང་ལེགས་བཙལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོས་ཐུགས་དགོངས་བཏང་ཞིང་བློན་འབངས་ལ་གདམ་ང་བསྐུར་བའི་ལེའུ་སྟེ་ང་ལྔ་པའོ༔ ༔

བྱམས་བརྩེའི་འོད་ཁྱིམ་འཕྲིན་སྟེགས།

ང་ཚོ་འགྲོ་བ་མི་ཡིན་པ་དང་སྤྱི་ཚོགས་ལ་བརྟེན་ནས་གནས་ཡོད་པས།   མི་རེ་རེར་སྤྱི་ཚོགས་དང་འགྲོ་མིའི་བདེ་སྐྱིད་ཀྱི་ཆེད་དུ་ཡང་དག་པའི་བྱ་བ་བྱེད་རྒྱུའི་འགན་ཡོད།   གང་ཞེ་ན།   འབྱུང་གྱུར་གྱི་མིའི་རང་གཤིས་བཟང་པོ་ཞི་བདེའི་ཚོར་སྣང་ལྡན་པ་ཞིག་བྱུང་ན་ཚང་མ་ལ་ཁེ་བཟང་ཆེ་བ་སྨོས་མི་དགོས་མོད།  དེའི་ཕྱིར་ངེད་༼བྱམས་བརྩེའི་འོད་ཁྱིམ་༽གྱིས་བརླན་པའི་འཇིག་རྟེན་གསར་པའི་འཕྲིན་སྟེགས་ནང་(དུས་རབས་ཀྱི་ཅོང་བརྡས་)ཞིང་འབྲོག་གཉིད་ལས་སློང་ངེས་ན་འདིར་ཕེབས་པར་དགའ་བསུ་དང་གུས་འདུད་གྲངས་མེད་ཞུ་བཞིན་ཡོད།

གསལ་བཤད།

སྤྱི་སྟེགས་འདིར་རིན་ཐང་ཆེ་བའི་གཏམ་བཤད་དང་། ལོ་རྒྱུས་ངོ་སྤྲོད། གསོ་རིག་ལས་འཕྲོས་པའི་གལ་ཆེའི་འཕྲོད་བསྟེན་ཤེས་བྱ།  ཡུལ་ལུང་གོམས་སྤྱོད་ངོ་སྤྲོད།   ཡུལ་སྐོར་ཟིན་ཐོ། ཡ་མཚར་དངོས་བྱུང་སྐོར། ནང་ཆོས་དང་མཚན་རིག་ལས་འཕྲོས་པའི་ཀུན་སྤྱོད་དང་ལྟ་གྲུབ་སྐོར།  ད་དུང་འཆད་ཁྲིད་གལ་ཆེན་སོགས་འགོད་ཀྱིན་ཡོད་པས་རིན་ཐང་ཅན་རེ་ཡིས་རྒྱབ་སྐྱོར་ཡོང་བར་བཀའ་དྲིན་སྙིང་ནས་ཞུ།

འཕྲིན་སྟེགས་གཙོ་སྐྱོང་པས།

སྤྱི་སྟེགས་སུ་མི་སྒེར་དང་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ།  མྱུར་དུ་ང་ཚོར་འབྲེལ་གཏུགས་གྱིས་དང་དྲྭ་ངོས་ནས་བསུབ་ངེས་ཡིན།

版权为原著所有，著有侵犯到您的权益，请您与我们联系，我们将立即删除

སྤེལ་ཟིན་པ་དག་ལ་གཟིགས་འདོད་ན།⬇️