འབྲོག་པའི་བློ་གྲོས་ལ་བརྟེན་ནས་རྩྭ་ཐང་ཉམས་གསོ་བྱ།
ཚང་མ་བདེ་མོ།ངའི་མིང་ལ་དབྲ་ཁྱུང་དཔལ་བཟང་ཟེར།ངའི་ཕ་ཡུལ་ནི་སི་ཁྲོན་མཛོད་དགེ་ཡིན་ལ།ང་ནི་བོད་པ་ཞིག་ཡིན།ངས་དེ་རིང་ཚང་མར་མཉམ་སྤྱོད་བྱེད་རྒྱུའི་ཁ་བྱང་ལ་འབྲོག་པ་ཡོད་པའི་ས་ཁུལ་དུ་རྩྭ་ཐང་ཡོད་དགོས་ཞེས་པ་དེ་ཡིན།ངས་ཅིའི་ཕྱིར་མིང་འདི་ལྟ་བུ་ཞིག་བཏགས་པ་ཡིན་ནམ་ཟེར་ན།རྒྱུ་མཚན་ནི་ངས་ལོ་ངོ་བཅུ་ལྷག་གི་རིང་ལ་ཕ་ཡུལ་དུ་རྩྭ་ཐང་བྱེ་འགྱུར་དུ་འགྲོ་བའི་གནས་ཚུལ་དེ་བཅོས་སྐྱོང་བྱེད་སྐབས་རྩྭ་ཐང་དང་ནོར་ལུག ད་དུང་འབྲོག་པ་ནི་ཕན་ཚུན་ལ་ཁ་འབྲལ་ཐབས་མེད་པའི་སྐྱེ་ཁམས་མ་ལག་ཞིག་ཡིན་པ་གསལ་བོར་རྟོགས་པ་རེད།
འདི་ནས་ངས་ཚང་མར་མཛོད་དགེ་མཚམས་སྦྱོར་ཞིག་བྱེད།མཛོད་དགེ་ནི་རྒྱལ་ཡོངས་ནས་མཐོ་སྒང་གི་འདམ་གཞུང་ཆེས་ཆེ་ས་དེ་རེད།
འབྲུ་ཆུའི་བརྒྱ་ཆའི་སུམ་ཅུ་དེ་མཛོད་དགེ་འདམ་གཞུང་ས་ཁུལ་ནས་ཐོན་པ་རེད།ཉིན་འགའི་སྔོན་ཏུ་ང་ཡིས་གསར་འགྱུར་ཞིག་ལ་བལྟས་པ་ཡིན།དེའི་ནང་དུ་འདི་ལྟ་བུ་ཞིག་བརྗོད་བཞིན་ཡོད་པ་རེད།དེ་བས་ཀྲུང་གོ་ཡོངས་ལ་མཚོན་ན་རྨ་ཆུ་ནི་ཧ་ཅང་གལ་ཆེན་ཞིག་རེད།ངས་དང་ཐོག་ཕ་ཡུལ་དུ་རྩྭ་ཐང་བྱེ་འགྱུར་དུ་འགྲོ་བའི་གནས་ཚུལ་དེ་བཅོས་སྐྱོང་བྱེད་སྐབས་རྒན་པ་མང་པོ་ཞིག་གིས་ཀྱང་ང་དང་མཉམ་དུ་རྩྭ་ཐང་ཅིའི་ཕྱིར་བྱེ་འགྱུར་དུ་འགྲོ་བའི་རྒྱུ་མཚན་སོགས་འཚོལ་ཞིབ་བྱས་པ་རེད།ང་རང་སློབ་ཆེན་འགྲིམས་དུས་སུའང་རྩྭ་ཐང་བྱེ་འགྱུར་བྱེད་པའི་གནས་ཚུལ་དེར་དོ་ཁུར་བྱས་མྱོང་པ་ཡིན་ལ།ངས་དུས་རྒྱུན་ཐོས་པ་ནི་འབྲོག་པ་མང་ཚོགས་ཀྱིས་ཕྱུགས་འཚོ་དྲགས་པ་དེ་རེད།འདི་ནི་རྩྭ་ཐང་བྱེ་འགྱུར་བྱེད་པའི་རྒྱུ་མཚན་ཆེས་སླ་བ་ཞིག་ཡིན་པར་བསམ་མོད།འོན་ཀྱང་རྒན་པ་དེ་དག་དང་མཉམ་དུ་གནས་ཚུལ་འཚོལ་ཞིབ་བྱེད་དུས་ད་དུང་རྒྱུ་མཚན་གཞན་མང་པོ་ཞིག་ཡོད་པ་ཤེས།
རྩྭ་ཐང་ནི་སྤྱིར་བཏང་དུ་དབྱར་ས་དང་དགུན་ས་གཉིས་སུ་བཀར་ཡོད།དབྱར་ས།ཁྱེད་ཀྱིས་ལྟོས་དང་།འདིའི་ཕྱོགས་སུ་ས་མུའུ༡༠༠༠ལྷག་བྱེ་འགྱུར་བྱས་ཡོད་ལ།གན་གྱི་ཕྱོགས་སུ་ས་མུའུ་༥༠༠༠ལྷག་བྱེ་འགྱུར་བྱས་ཡོད་པ་རེད།འདི་རུའང་ས་མུའུ་༣༠༠༠བྱེ་འགྱུར་བྱས་ཡོད་པ་རེད།གལ་ཏེ་མིའི་རིགས་ཀྱིས་བྱེད་ཐབས་ཅི་ཡང་མ་བཙལ་ཚེ་རྩྭ་ཐང་རིམ་བཞིན་ས་མུའུ་༡༠༠༠༠ཡང་ན་༢༠༠༠༠བྱས་ནས་བྱེ་ཐང་དུ་འགྱུར་ངེས་པ་རེད།ངས་རྩོམ་ཡིག་ཞིག་གི་ནང་དུ་འདི་ལྟ་བུ་ཞིག་མཐོང་མྱོང་།གལ་ཏེ་མཚོ་བོད་མཐོ་སྒང་གི་སྐྱེ་ཁམས་ལ་བཅོས་སྐྱོང་བཟང་བོ་ཞིག་བྱེད་མ་ཐུབ་ཚེ།སའི་གོ་ལ་ཡོངས་ཀྱི་བྱེ་ཐང་གི་འབྱུང་ཁུངས་གཙོ་བོ་ནི་མཚོ་བོད་མཐོ་སྒང་ཡིན་པ་རེད།
ངས་༢༠༡༠ལོའི་དགུན་ཁར་པར་རྒྱབ་པའི་དགུན་ས།དགུན་གཅིག་ལ་བྱེ་རླུང་གཡུག་ནས་གྱང་འདི་འང་གཡོག་པ་རེད།དྲང་པོར་བཤད་ན།འབྲོག་ཁུལ་གྱི་ཁང་བའི་མཐོ་ཚད་ནི་གྱང་འདི་ལྟ་བུ་ཞིག་ཀྱང་མེད་པས།གལ་ཏེ་མུ་མཐུད་དུ་འདི་ལྟར་ཕྱིན་ཚེ་བྱེ་མས་སྡེ་བ་ཡོངས་གཡོག་པའི་ཉེན་ཁ་ཆེ་བ་རེད།དེ་རིང་ངས་འདི་རུ་ཁྱེད་ཚོར་མཉམ་སྤྱོད་བྱེད་པ་ནི་ང་ཚོ་དང་ཐག་ཧ་ཅང་རིང་བའི་ཧྥེ་གླིང་ས་ཁུལ་གྱི་གཏམ་རྒྱུད་མ་ཡིན་པར།ང་ཚོ་དང་བར་ཐག་ཆེས་ཉེ་བའི་ཕ་ཡུལ་གྱི་གཏམ་རྒྱུད་རེད།འདི་རུ་ང་ཚོའི་གཉེན་ཉེ་དང་གྲོགས་པོ།ཕ་མ་སོགས་ཡོད་པ་རེད།འདིའང་ང་རང་ཕྱིར་ཕ་ཡུལ་དུ་ལོག་པའི་རྒྱུ་མཚན་ཡིན།ང་ཚོས་རྩྭ་ཐང་གླེང་བཞིན་ཡོད་པ་རེད།ཚོང་པ་ཞིག་ལ་མཚོན་ན་རྩྭ་ཐང་ནི་ཁེ་བཟང་ལེན་པའི་གོ་སྐབས་ཞིག་ཡིན་སྲིད་ལ།ཡུལ་སྐོར་བ་ཞིག་ལ་མཚོན་ན་རྩྭ་ཐང་ནི་སྤྲོ་གསེང་བྱེད་སའི་གནས་ཤིག་ཡིན་ཀྱང་སྲིད།ཡིན་ནའང་འབྲོག་པ་མང་ཚོགས་ཤིག་ལ་མཚོན་ན་རྩྭ་ཐང་ནི་ཁོ་ཚོའི་ཁྱིམ་གཞི་རེད།ངའི་ཁྱིམ་གཞི་ལ་གནད་དོན་བྱུང་ཚེ་ང་རང་འཁྱམ་པོར་འགྱུར་ངེས་པ་རེད།
ང་རང་རྩྭ་ཐང་གི་སྣང་ཚུལ་ཞིག་ལ་ཧ་ཅང་དགའ་བོ་ཡོད།དེ་ནི་རྩྭ་ཐང་དུ་རྟ་བཞོན་རྒྱུ་དེ་རེད།བྱིས་པ་འདི་ཡིས་གཟུགས་ཆུང་བས་རྟ་ལ་ཞོན་མི་ཐུབ་མོད།འོན་ཀྱང་ཁོ་རང་ལ་སེམས་ཁྲལ་ཅི་ཡང་མེད་པ་རེད།རྒྱུ་མཚན་ཁོའི་སྤུན་ཟླས་ཁོ་ལ་རོགས་རམ་བྱེད་ངེས་པ་རེད།རྟ་ལ་ཞོན་ནས་རྩྭ་ཐང་དུ་ཕྱུགས་ཟོག་འཚོ་སྐྱོང་བྱས་ཆོག་པར་མ་ཟད།གླུ་ལེན་པ་དང་འཚོ་བ་རོལ་ཆོག ཕྱོགས་འདི་ནས་བསམ་བློ་བཏང་ཚེ་འབྲོག་པ་ལ་མཚོན་ན་རྩྭ་ཐང་ནི་ཧ་ཅང་གལ་ཆེན་ཞིག་རེད།
རྩྭ་ཐང་བྱེ་འགྱུར་དུ་འགྲོ་བའི་རྒྱུ་མཚན་ཅི་ཡིན་ནམ་ཞེ་ན།རྒན་པ་ཞིག་གིས་གསུངས་དོན།ལོ་ངོ་བཞི་བཅུའི་ཡར་སྔོན་མཛོད་དགེ་ས་ཁུལ་དུ་འདམ་གཞུང་མང་པ་དང་།དབྱར་ཁ་འདམ་གཞུང་དུ་ཕྱུགས་ཟོག་འཚོ་སྐྱོང་བྱེད་མི་ཐུབ་མོད།འོན་ཀྱང་དགུན་ཁ་རྩྭ་སྐྱེས་པ་ཧ་ཅང་མཐོ་བས་ཕྱུགས་ཟོག་འཚོ་སྐྱོང་བྱེད་པར་ཤིན་ཏུ་འཚམས་པ་རེད།ཡིན་ནའང་ཆེད་མཁས་པ་ལ་ལས་དབྱར་དུས་སུའང་འདམ་གཞུང་དུ་ཕྱུགས་ཟོག་འཚོ་སྐྱོང་བྱེད་དགོས་པའི་བསམ་འཆར་བཏོན་པས་ཆུ་ཡུར་བརྐོས་ནས་སྐམ་སར་བཏང་བ་ཡིན་ལ།སྐབས་དེར་དེ་ནི་དཔེ་བཟང་ཞིག་ཡིན་ཡང་སྲིད་མོད།འོན་ཀྱང་ད་ལྟ་དེ་ཡིས་ཆུ་དང་སྐྱེ་དངོས་ལ་གནོད་པ་ཆེན་པོ་ཐེབས་པ་རེད།འདིའང་རྩྭ་ཐང་བྱེ་འགྱུར་དུ་འགྲོ་བའི་རྒྱུ་མཚན་ཞིག་རེད།
ཞིང་ལས་རིག་གནས་ཀྱི་བསམ་ཕྱོགས།རྩྭ་ཐང་དུ་ཞིང་ས་བཏབ་པ་དེའང་རྩྭ་ཐང་བྱེ་འགྱུར་དུ་འགྲོ་བའི་རྒྱུ་རྐྱེན་གཙོ་བོ་ཞིག་རེད།
ད་དུང་གཏེར་ཁ་སྔོག་འདོན་བྱེད་པ་དེའང་རྩྭ་ཐང་བྱེ་འགྱུར་དུ་འགྲོ་བའི་རྒྱུ་རྐྱེན་ཞིག་རེད།
ད་དུང་རྒྱུ་རྐྱེན་ཞིག་ཡོད་པ་ནི་རྩྭ་ཐང་གི་སྙིང་རྗེ་བའི་སྲོག་ཆགས་ཨ་བྲ་ཟེར་བ་དེ་རེད།ཆེད་མཁས་པ་མང་པོ་ཞིག་འབྲོག་ཕྱོགས་སུ་ཐོན་དུས་རྩྭ་ཐང་ལ་མཛེས་སྡུག་ལྡན་པར་མ་ཟད།ཕྱུགས་ཟོག་ལ་འཕེལ་ཁ་རྒྱས་ཡོད་པ་མཐོང་བ་ཡིན་མོད།འོན་ཀྱང་ཆེད་མཁས་པ་ཚོས་ལྟ་ཞིབ་བྱེད་དུས་རྩྭ་ཐང་དུ་ད་དུང་སྲོག་ཆགས་ཆུང་ཆུང་འདི་འདྲ་མང་པོ་ཞིག་གིས་རྩྭ་ཟ་བཞིན་ཡོད་པས།དེ་ནི་རྩྭ་ཐང་གི་གནོད་པ་ཡིན་པར་བསམ་ནས་ག་ས་གང་དུ་དུག་གཏོར་ནས་ཨ་བྲ་མེད་པར་བྱས་པ་རེད།འདི་ལ་ཕལ་ཆེར་ལོ་ངོ་ཉི་ཤུ་ནས་སུམ་ཅུ་ལྷག་གི་ལོ་རྒྱུས་ཡོད་པ་རེད།དོན་དངོས་སུ་བཤད་ན་རྩྭ་ཐང་དུ་ཨ་བྲ་ཁ་ཟས་བྱེད་པའི་སྲོག་ཆགས་སྣ་ཁ་ཕལ་ཆེར་༣༨ཡོད་པ་རེད།དེ་དག་གི་ནང་དུ་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་དང་རིམ་པ་གཉིས་པའི་སྲུང་སྐྱོབ་སྲོག་ཆགས་ཀྱང་ཡོད་པ་རེད།
འོན་ཀྱང་དུག་གསོད་བྱེད་པའི་ཐབས་ལ་བརྟེན་ནས་ཁོ་ཚོའི་སྐྱེ་དངོས་མ་ལག་ལ་གཏོར་བརླག་བྱས་པ་རེད།དེ་བས་ཨ་བྲའི་འཕེལ་ཚད་སྔར་ལས་ཇེ་མཐོར་སོང་བ་ཡིན་ལ།དེ་འང་རྩྭ་ཐང་བྱེ་འགྱུར་དུ་འགྲོ་བའི་རྒྱུ་རྐྱེན་ཞིག་ཏུ་གྱུར་པ་རེད།
ད་དུང་རྒྱུ་རྐྱེན་ཞིག་ཡོད་པ་ནི་ལྕགས་ར་རེད།སྡེ་བ་དང་སྡེ་བའི་བར་ལ་ལྕགས་ར་འཐེན་ཡོད་པར་མ་ཟད།ཁྱིམ་ཚང་རེ་རེ་ལའང་ལྕགས་ར་འཐེན་ཡོད་པ་རེད།འདི་ཡིས་ཕྱོགས་གཅིག་ནས་སྐྱེ་དངོས་སྣ་མང་རང་བཞིན་ལ་གནོད་པ་ཆེན་པོ་ཐེབས་སྲིད་པ་རེད།ཕྱོགས་གཞན་ཞིག་ནས་དུས་ཚིགས་བཞི་བོར་ཕྱུགས་ཟོག་གནས་གཅིག་ཏུ་འཚོ་སྐྱོང་བྱས་ཚེ་ཕྱུགས་ཟོག་འཚོ་སྐྱོང་བྱས་པ་ཐལ་དྲག་པའི་གནས་ཚུལ་འབྱུང་ངེས་པས་འདིའང་རྩྭ་ཐང་བྱེ་འགྱུར་དུ་འགྲོ་བར་འབྲེལ་བ་ཆེན་པོ་ཡོད་པ་རེད།
ང་ཚོས་ཐེངས་དང་པོར་རྩྭ་ཐང་བྱེ་འགྱུར་བྱེད་པ་དེ་བཅོས་སྐྱོང་བྱེད་དུས་ཅི་ཡང་མི་ཤེས་པ་རེད།དེའང་སྐྱོན་མེད།སི་ཁྲོན་ཞིང་ཆེན་རྩྭ་ཐང་ཚན་རིག་ཞིབ་འཇུག་ཁང་དང་མཛོད་དགེ་ནགས་ལས་ཅུའུ་ཡི་ཆེད་མཁས་པ་དག་གདན་འདྲེན་བྱས་ནས་རྩྭ་གང་འདྲ་ཞིག་འདེབས་པ།དུས་ནམ་ཞིག་ལ་འདེབས་པ།ཇི་ལྟར་འདེབས་པ་སོགས་འབྲོག་པ་མང་ཚོགས་ལ་ཟབ་སྦྱོང་བྱེད་དུ་བཅུག་པ་ཡིན།
ཆེད་མཁས་པ་ཡིས་ང་ཚོར་རྩྭ་འདེབས་པའི་ཐབས་ལམ་གཉིས་ཁྲིད་པ་རེད།གཅིག་ནི་ས་སློག་ནས་རྩྭའི་འབྲུ་གུ་འདེབས་རྒྱུ་དེ་རེད།གཉིས་ནི་རྩྭའི་འབྲུ་གུ་གང་སར་གཏོར་རྒྱུ་དེ་རེད།འོ་ལེ།འདི་ནི་ཅུང་སླ་མོ་རེད།གླུ་དབྱངས་ལེན་ཞོར་དང་ཁ་བརྡ་བྱེད་ཞོར་རྩྭ་འབྲུ་གཏོར་ཆོག་པ་རེད།ཡིན་ནའང་གནད་དོན་ཞིག་ཡོད་པ་ནི་རྩྭ་འབྲུ་བརྒྱ་ཆའི་དགུ་བཅུ་མེད་པར་གྱུར་འགྲོ་བ་རེད།རྒྱུ་མཚན་ཅིའི་ཕྱིར་ཞེ་ན།ཕྱོགས་གཅིག་ནས་རླུང་གཡུག་ཏེ་ཁུར་འགྲོ་བ་དང་།ཕྱོགས་གཞན་ཞིག་ནས་མཐོ་སྒང་གི་ཉི་དྲོད་ཤིན་ཏུ་ཆེ་བས་རྩྭ་འབྲུ་སྐམ་འགྲོ་བ་རེད།འདི་ནི་གནད་དོན་ཚབས་ཆེན་ཞིག་རེད།
ཉིན་ཞིག་ལ་ང་ཚོས་རྩྭ་ཐང་བྱེ་འགྱུར་བཅོས་སྐྱོང་བྱེད་དུས་བུད་མེད་གཉིས་ཀྱིས་ཁ་བརྡ་བྱེད་བཞིན་པ་ཐོས།ཁོ་གཉིས་ཀྱིས་བཤད་དོན་རྩྭ་འབྲུ་བྱེ་ཐང་དུ་གཏོར་རྗེས་དེའི་སྟེང་ནོར་ལུག་ཡར་འདེད་མར་འདེད་བྱས་ཚེ་རྩྭ་འབྲུ་ས་འོག་ཏུ་སྦས་ཐུབ་པར་མ་ཟད།རྩྭ་འབྲུ་རླུང་གིས་འཁུར་པ་དང་ཉི་མས་སྐམ་པ་སོགས་ཀྱི་གནས་ཚུལ་སྔོན་འགོག་བྱེད་ཐུབ་པ་རེད།སྐབས་དེར་ངའི་སེམས་སུ་དེ་ནི་ཐབས་ལམ་བཟང་པོ་ཞིག་རེད་བསམ་ནས།ང་ཚོས་ལོ་རེར་དེ་ལྟར་ཚོད་ལྟ་བྱས་པ་ཡིན།
ང་ཚོའི་ཕ་ཡུལ་དུ་མཉམ་ལས་ཁང་ཞིག་བཙུགས་པ་ཡིན་ལ།སྡེ་བ་རེ་རེས་མཉམ་ལས་ཁང་རེ་བཙུགས་ནས་རྩྭ་ཐང་བྱེ་འགྱུར་བཅོས་སྐྱོང་བྱས་པ་ཡིན།སྡེ་བ་ཚང་མས་རེས་འཁོར་ནས་རྩྭ་ཐང་བྱེ་འགྱུར་བཅོས་སྐྱོང་བྱེད་བཞིན་ཡོད་ལ།ཐབས་ལམ་འདི་ལོ་རེ་རེར་བཀོལ་སྤྱོད་བྱས་ནས་རྒྱུན་འཁྱོངས་བྱེད་བཞིན་ཡོད་པ་ཡིན།
ང་ཚོས་ཕ་ཡུལ་གྱིས་རྩྭ་ཐང་བྱེ་འགྱུར་བཅོས་སྐྱོང་བྱེད་དུས་ཐོག་མར་ལྕགས་ར་ནས་འགོ་བརྩམ་པ་ཡིན་ལ།བྱ་འགུལ་མཇུག་རྫོགས་པའི་བར་དུ་ཚང་མ་མཉམ་དུ་བསྡད་ཡོད་པ་ཡིན།
དེ་ནས་རྩ་འདེབས་རྒྱུ་དེ་རེད།རྩྭ་ཐང་དུ་རྩྭ་གང་ཡང་བཏབ་ཆོག་པ་ཡིན་ནམ།དེ་འདྲ་ཞིག་མ་ཡིན་ཏེ།མཚོ་བོད་མཐོ་སྒང་གི་ས་གནས་ཀྱི་རྩྭ་རིགས་ཧ་ཅང་ཉུང་བས།ང་ཚོས་ཕྱི་རྒྱལ་གྱི་རྩྭ་རིགས་མང་པོ་ནང་འདྲེན་བྱས་པ་ཡིན།ང་རང་སྐྱེ་ཁམས་རིག་པ་བ་མིན་པས།དེའི་སྐོར་གྱི་གནས་ཚུལ་དེ་འདྲ་མི་ཤེས་མོད།འོན་ཀྱང་གཞུང་ལུགས་ལྟར་ན་ཕྱི་ནས་ཡོང་བའི་སྐྱེ་དངོས་རིགས་ལ་གནོད་པ་ཡོད་པ་ནི་སྨས་མ་དགོས་པ་ཞིག་རེད།དེ་བས་ང་ཚོས་ད་ལྟ་ས་གནས་དེ་གའི་རྩྭ་རིགས་འདེབས་ཀྱིན་ཡོད་པ་ཡིན་ལ།རྩྭ་འབྲུའི་ཐོན་ཁུངས་གཙོ་བོ་ནི་རྩྭ་ཐང་ཚན་རིག་ཞིབ་འཇུག་གླིང་དང་ས་གནས་དེ་གའི་འབྲོག་པ་མང་ཚོགས་ཀྱིས་འཚོལ་སྡུད་བྱས་པ་སོགས་ཡིན་པར་མ་ཟད།ད་དུང་ངའི་ཨ་མས་ཀྱང་ལོ་ངོ་བརྒྱད་དགུ་ལྷག་ལ་རྩྭ་འབྲུ་འཚོལ་སྡུད་བྱས་ནས་ང་ཚོར་མཁོ་སྤྲོད་བྱེད་བཞིན་ཡོད་པ་རེད།
ཕྱོགས་གཞན་ཞིག་ནས་བཤད་ན།ང་ཚོས་རྩྭ་འདེབས་པ་ནི་རེ་བ་འདེབས་པ་དང་གཅིག་ཡིན་ལ།སེམས་ཁམས་འདི་འདྲ་ཞིག་གི་འོག་ནས་རྩྭ་བཏབ་ཚེ་སྐྱེས་ཐོན་པ་དེའང་རེ་བ་རེད།ཁྱེད་ཚོས་ང་ཚོར་དོ་ཁུར་བྱེད་མྱོང་ནའང་སྲིད།དོ་ཁུར་བྱེད་མ་མྱོང་ནའང་སྲིད།གང་ལྟར་ང་ཚོས་རྩྭ་ཐང་བྱེ་འགྱུར་བཅོས་སྐྱོང་བྱེད་དུས་ཐེངས་གཉིས་པ་བྱེ་འགྱུར་དུ་འགྲོ་བ།ཐེངས་གསུམ་པ།ཐེངས་བཞི་བ་སོགས་མང་པོ་ཞིག་ཡོད་སྲིད་པ་རེད།རྒྱུ་མཚན་ཅིའི་ཕྱིར་ཞེ་ན།
ང་ཡིས་བལྟས་ན་འཚོ་བཅུད་དང་ལུད་རྫས་ཀྱིས་མ་འདང་ནའང་སྲིད།དོ་དམ་ལ་གནད་དོན་བྱུང་པ་ཡིན་ནའང་སྲིད།ང་ཚོས་ལུད་རྫད་ཕྱི་ནས་ཉོ་དུས་རིན་གོང་ཧ་ཅང་མཐོ་བས་ཉོ་མི་ཐུབ་པ་རེད།ཡིན་ནའང་སྐྱོན་མེད།ང་ཚོ་ལ་ནོར་ལུག་གི་ལུད་རྫས་ཡོད་པ་རེད།
དོན་དངོས་སུ་བཤད་ན་ལས་ཁུངས་དང་ཀུང་སི་གང་ཡིན་ཡང་རྩྭ་ཐང་བཅོས་སྐྱོང་བྱེད་སྲིད་མོད།འོན་ཀྱང་ཁོ་ཚོའི་དོ་དམ་གྱི་ཁྲོད་རྩྭ་ཐང་དེ་རང་བྱུང་རྩྭ་ཐང་དུ་གཏོང་དགོས་ཚེ།འབྲོག་པ་མང་ཚོགས་ལས་གཞན་སུས་ཀྱང་སྒྲུབ་མི་ཐུབ་པ་རེད།རྒྱུ་མཚན་ཅིའི་ཕྱིར་ཟེར་ན།ཁྱེད་ཚོས་ལྟོས་དང་ང་ཚོས་ཇི་ལྟར་དོ་དམ་བྱེད་བཞིན་ཡོད་པ་རེད།ང་ཚོས་ཀྱང་ཕྱུགས་བཀག་བྱེད་བཞིན་ཡོད་པ་ཡིན།དབྱར་ཁ་དང་དགུན་ཁ།ད་དུང་དཔྱིད་ཁ་སོགས་ལ་ཕྱུགས་བཀག་བྱེད་བཞིན་ཡོད།ཕྱུགས་བཀག་བྱས་ཚེ་ཕན་ནུས་ཞིག་ཡོད་པ་ནི་ཕྱོགས་གཅིག་ནས་བྱེ་ཐང་དུ་རྩྭ་སྐྱེས་རྗེས་རླུང་གཡུག་དུས་རྩྭ་འབྲུ་མང་པོ་ཞིག་དེ་ཡི་ནང་དུ་འཚང་ནས་འདུག་པ་དང་།ཕྱོགས་གཞན་ཞིག་ནས་འདིའི་སྐོར་གྱི་འབྲས་བུའང་རླུང་གིས་ཁུར་མི་འགྲོ་བར་རྩྭ་གསེབ་ཏུ་ལྷུང་ངེས་པ་རེད།ཡིན་ནའང་འབྲས་བུ་མང་པོ་ཞིག་ད་དུང་ཕྱི་རོལ་ཏུ་ཡོད་པ་རེད།ལོ་རེའི་དཔྱིད་ཀར་ས་ཆུ་དྲོས་པ་དང་མཉམ་དུ་ང་ཚོས་ཕྱུགས་ཟོག་དེད་ནས་རྩྭ་ཐང་དུ་འགྲོ་དགོས་ལ།འབྲས་བུ་གཞན་དག་ཕྱུགས་ཟོག་གི་རྨིག་རྗེས་དང་ཁུ་ལུ་སོགས་ལ་འབྱར་ཡོང་ནས་རྩྭ་ཐང་དུ་འཐོར་བར་ཕན་པ་རེད།
ད་ལྟ་ང་ཚོས་སྔ་གཞུག་གི་འདྲ་པར་ཞིབ་བསྡུར་ཞིག་བྱེད།
༢༠༡༠ལོ་ནས་ད་ལྟའི་བར་ཏུ་འབྲོག་པ་མང་ཚོགས་༡༣༠༠ལྷག་རྩྭ་ཐང་བྱེ་འགྱུར་བཅོས་སྐྱོང་ཡི་ཁྲོད་ཞུགས་པ་དང་།ང་ཚོས་མཉམ་དུ་ས་མུའུ་༡༣༠༠༠ལྷག་ལ་བཅོས་སྐྱོང་བྱས་ཟིན་པ་རེད།ཕྱོགས་གཅིག་ནས་བཤད་ན་བྱེ་ཐང་སྤང་ལྗོངས་སུ་བསྒྱུར་ཚེ་འབྲོག་པ་མང་ཚོགས་ཀྱི་ཁྱིམ་གཞི་གསར་སྐྲུན་བྱས་པ་ཡིན་ནའང་སྲིད།ཕྱོགས་གཞན་ཞིག་ནས་བཤད་ན་འདི་ནི་ཚེ་སྲོག་གི་ཁྱིམ་གཞི་ཞིག་རེད།བྱེ་ཐང་ལྗང་མདོག་ཅན་ཏུ་བསྒྱུར་ཚེ་བྱིའུ་དང་ཕྱེ་མ་ལེབ་སོགས་ཕྱིར་འཕུར་ཡོང་སྲིད་པ་རེད།ཐེངས་ཤིག་ལ་ང་ཚོས་འདི་རུ་ཁྲུང་ཁྲུང་སྐེ་ནག་འགའ་མཐོང་མྱོང་པ་ཡིན།ང་ཚོའི་མཛོད་དགེ་ནི་ཁྲུང་ཁྲུང་སྐེ་ནག་གི་ཕ་ཡུལ་ཡིན་པས།འབྲོག་པ་མང་ཚོགས་མང་པོ་ཞིག་གི་རྩོལ་བ་ལ་བརྟེན་ནས་ཁྲུང་ཁྲུང་སྐེ་ནག་གི་ཁྱིམ་གཞི་གསར་སྐྲུན་བྱ་སྲིད།
ད་ལྟ་འཛམ་གླིང་ཡོངས་ཀྱིས་སྐྱེ་དངོས་སྣ་མང་རང་བཞིན་བརྗོད་བཞིན་ཡོད་པ་རེད།སྐྱེ་དངོས་སྣ་མང་རང་བཞིན་ནི་ཚེ་སྲོག་ཡིན་ལ།ཚེ་སྲོག་ནི་སྐྱེ་དངོས་སྣ་མང་རང་བཞིན་རེད།ད་ལྟ་འཛམ་གླིང་ཡོངས་ཀྱི་སྐྱེ་དངོས་སྣ་མང་རང་བཞིན་མང་པོ་ཞིག་ཡེ་ནས་མེད་པར་གྱུར་སོང་བ་རེད།སྐྱེ་དངོས་སྣ་མང་རང་བཞིན་གྱི་ཉམས་གསོ་ནི་ང་ཚོས་ཕྱུགས་ཟོག་འཚོ་སྐྱོང་བྱེད་པ་ལ་བརྟེན་ནས་སྒྲུབ་བཞིན་ཡོད་པ་ཡིན།ང་ཚོའི་སྲོལ་རྒྱུན་རིག་གནས་ཁྲོད་འདི་ལྟ་བུའི་སྐྱེ་དངོས་སྣ་མང་རང་བཞིན་ཡོད་པ་རེད།མཚོ་བོད་མཐོ་སྒང་གི་རིན་ཐང་ནི་ཐོན་ཚད་ལ་ལྟ་དགོས་པ་མ་ཡིན་པར་ཁོ་ཡི་སྐྱེ་དངོས་སྣ་མང་རང་བཞིན་ལ་ལྟ་དགོས་པ་རེད།སྲོལ་རྒྱུན་ཁྲོད་ང་ཚོས་ས་ལག་མཐིལ་ཙམ་གྱི་སྟེང་དུ་སྐྱེ་དངོས་སྣ་ཁ་བདུན་ནས་ཉི་ཤུ་ཙམ་རྙེད་ཐུབ་ལ།དེ་ཡིས་རྩྭ་ཐང་ཧ་ཅང་བདེ་ཐང་ཡིན་པ་མཚོན་ཡོད་པ་རེད།
ང་ཚོས་དུས་ཡུན་རིང་པོར་བྱ་བ་འདི་ལྟ་བུ་སྒྲུབ་པས་གྲུབ་འབྲས་ཀྱང་བཟང་བོ་ཐོན་པ་རེད།ད་ལྟ་ང་ཚོས་སྲིད་གཞུང་དང་སློབ་གྲྭ།ད་དུང་འབྲོག་ཁུལ་སོགས་སུ་ཉམས་མྱོང་མཉམ་སྤྱོད་བྱེད་བཞིན་ཡོད་པ་ཡིན།
སྐབས་རེར་མི་ལ་ལས་ང་ལ་ཁྱེད་ནི་རྩྭ་ཐང་བྱེ་འགྱུར་བཅོས་སྐྱོང་བྱེད་པའི་དཔའ་བོ་རེད་ཟེར་མོད།འོན་ཀྱང་ངའི་སེམས་སུ་ཆེས་གསལ་ཐག་ཆོད་པ་ནི་ང་ནི་འབྲོག་པ་ཞིག་ཡིན་པ་དེ་རེད།
ང་ཆུང་དུས་སུའང་ཕུག་བསམ་མང་པོ་ཡོད།ལོ་འདི་གར་རྩྭ་ཐང་བྱེ་འགྱུར་བཅོས་སྐྱོང་བྱས་པ་ཡིན་ལ།ན་ནིང་ངའི་མི་ཚེའི་ལྟ་ཚུལ་ལ་འགྱུར་ལྡོག་ཆེན་པོ་ཞིག་བྱུང་བ་ཡིན་རེད།ང་གློ་བུར་དུ་གཉིད་ལས་སད་པའི་ཚོར་སྣང་ཞིག་སྐྱེས།ང་རྒས་འདུག ངའི་བུ་མོ་ད་དུང་ལོ་ན་ཧ་ཅང་ཆུང་བས་ངས་སེམས་སུ་ན་ཟུག་བཟོད་གླགས་མེད་པ་ཞིག་སྐྱེས་པ་ཡིན་མོད།འོན་ཀྱང་ཕྱོགས་གཞན་ཞིག་ནས་བལྟས་ན་ང་རང་ཧ་ཅང་དགའ་བ་རེད།རྒྱུ་མཚན་ནི་ང་རང་དུས་དང་རྣམ་པ་ཀུན་ཏུ་ཁྱིམ་མི་དང་ལྷན་དུ་ཡོད་པར་མ་ཟད།ཁོ་ཚོ་དང་མཉམ་དུ་ཁྱིམ་གཞི་གསར་སྐྲུན་བྱེད་བཞིན་ཡོད་པ་རེད།དོན་དངོས་སུ་རྩྭ་ཐང་གི་དོ་དམ་ནི་ཕྱུགས་ཟོག་འཚོ་སྐྱོང་བྱེད་པའི་དོ་དམ་ཡིན་ལ།མ་འོངས་པར་རྩྭ་ཐང་དོ་དམ་བྱེད་དགོས་ཚེ།ངེས་པར་དུ་མི་མང་པོ་ཞིག་དགོས་པ་རེད།ན་གཞོན་མང་པོ་ཞིག་དགོས་པ་རེད།རིག་གནས་ཡོད་པའི་ན་གཞོན་མང་པོ་ཞིག་དགོས་པ་རེད།
དུས་རབས་ཀྱི་འགྱུར་ལྡོག་དང་བསྟུན་ནས་ན་གཞོན་མང་པོ་ཞིག་གིས་མཐོ་རིམ་སློབ་གསོ་མྱོང་བའི་ཆེད་དུ་སློབ་གྲྭར་སོང་བ་རེད།ཁོ་ཚོས་འཛམ་གླིང་ཡོངས་ཀྱི་ལོ་རྒྱུས་རེ་ཤེས་སྲིད་མོད།འོན་ཀྱང་ཕ་ཡུལ་གྱི་ལོ་རྒྱུས་མི་ཤེས་པ་རེད།དེ་བས་ང་ཡིས་ཕྱིར་ཕ་ཡུལ་ལ་ལོག་ཞེས་པའི་བྱ་འགུལ་ཞིག་སྤེལ་བ་ཡིན།
བྱ་འགུལ་འདི་ནི་ཅི་ཞིག་རེད་ཞེ་ན།ང་ཚོའི་ཕ་ཡུལ་གྱི་སློབ་ཆེན་སློབ་མ་དང་ལས་བྱེད་པ།ད་དུང་འབྲོག་པ་མང་ཚོགས་ལ་ཕ་ཡུལ་གྱི་འགྱུར་ལྡོག་དང་ལོ་རྒྱུས་སོགས་བཤད་ནས་ཁོ་ཚོར་ཕ་ཡུལ་ངོ་ཤེས་སུ་འཇུག་རྒྱུ་དེ་རེད།ཅིའི་ཕྱིར་ཁོ་ཚོར་ཕ་ཡུལ་ངོ་ཤེས་སུ་འཇུག་དགོས་པ་རེད་ཟེར་ན།ཁྱེད་ཀྱིས་མིང་ལ་བལྟས་ནས་རིམ་གྱིས་ཕ་ཡུལ་ངོ་ཤེས་དུས།ཁྱེད་ཀྱིས་རིམ་བཞིན་ཕ་ཡུལ་གྱི་རིན་ཐང་ཤེས་པ་ཡིན་ལ།ཁྱེད་ཀྱིས་ཕ་ཡུལ་གྱི་རིན་ཐང་ཤེས་དུས་ཁྱེད་རང་དེ་ལ་དགའ་སྲིད་པ་རེད།ཁྱེད་རང་དེ་ལ་དགའ་དུས་མ་འོངས་པར་བྱ་བ་ཅི་སྒྲུབ་ཡང་ཁྱེད་ཀྱིས་རེ་བ་མང་པོ་ཞིག་ཁྱེར་ནས་ཕྱིར་ཕ་ཡུལ་དུ་ལོག་ངེས་པ་རེད།འདི་ལ་བརྟེན་ནས་མ་འོངས་པ་ན་ན་གཞོན་མང་པོ་ཞིག་གིས་མཉམ་དུ་ཁྱིམ་གཞི་སྲུང་སྐྱོབ་བྱ་བ་དང་ཆབས་ཅིག རེ་བ་ལའང་སྲུང་སྐྱོབ་བྱ་ངེས།ཚང་མ་ཐུགས་རྗེ་ཆེ།
དགེ་རྒན་དཔལ་བཟང་ལགས།ང་ཡིས་ཁྱེད་རང་ཕ་ཡུལ་དུ་ལོག་པའི་གཏམ་རྒྱུད་ལ་ཉན་འདོད།
ང་རང་ཕ་ཡུལ་དུ་ལོག་པ་ནི་ཕལ་ཆེར་རྟ་ཞིག་ལ་འབྲེལ་བ་ཡོད་པ་རེད།ང་ཆུང་དུས་སུ་ངེད་ཚང་གི་ནོར་བོར་སོང་བས་ཨ་ཕས་ང་རང་བཙལ་དུ་འགྲོ་རུ་བཅུག་པ་ཡིན་ལ།ང་ལམ་ལ་ཆས་དུས་ཨ་ཕས་ང་ལ་ས་ཁྲ་བྲིས་ནས་ས་གང་ན་འདམ་གཞུང་ཡོད་ཚུལ་དང་ས་གང་ན་ཆུ་ཕྲན་ཡོད་ཚུལ།སུ་ཚང་གི་ཁྱི་བཙན་ཚུལ་སོགས་བཤད་ནས་ང་ལ་ལམ་གྱི་མཛུབ་སྟོན་བྱས།ང་ཡིས་ཨ་ཕས་བཤད་པ་ལྟར་རྟ་ཞོན་ནས་བཙལ་བ་ཡིན།ཐབས་ལམ་འདི་ལ་བརྟེན་ནས་ང་ཡིས་ཕ་ཡུལ་གྱི་རི་ཆུ་ལ་རྒྱུས་ལོན་བྱུང་བ་ཡིན་ལ།དུས་དེ་ནས་བཟུང་ང་ཡིས་གོ་སྐབས་ཡོད་ཚད་དམ་འཛིན་བྱས་ནས་ཕ་ཡུལ་གྱི་ཆེད་དུ་བྱ་བ་ཞིག་སྒྲུབ་པར་བརྩོན་ལེན་བྱེད་བཞིན་ཡོད།དེ་བས་ཡར་སྔོན་ང་ཡིས་ཁོར་ཡུག་སྲུང་སྐྱོབ་བྱེད་པའི་ལས་ཁུངས་ཞིག་ཏུ་བྱ་བ་ལས་འགོ་བརྩམ་པ་ཡིན་ལ།ལོ་ངོ་ལྔ་ཙམ་ལ་བྱ་བ་སྒྲུབ་རྗེས་ཕྱིར་ཕ་ཡུལ་དུ་ལོག་པ་ཡིན།
ངས་སྒྲུབ་པའི་བྱ་བ་ཡོད་ཚད་མ་འོངས་པར་ཕ་ཡུལ་དང་སློབ་ཆེན་པའི་བར་ལ་འབྲེལ་བ་ཟབ་མོ་ཞིག་འཛུགས་པའི་ཆེད་དུ་ཡིན།ད་ལོ་ཕྱིར་ཕ་ཡུལ་དུ་ལོག་པ་ཞེས་པའི་བྱ་འགུལ་ཁྲོད་ཞུགས་པའི་སློབ་ཆེན་སློབ་མ་གཉིས་སློབ་མཐར་ཕྱིན་པ་ཡིན་ལ།ཁོང་གཉིས་ཀྱིས་ཨ་ལ་ཧྲན་གྱི་ལས་གཞི་ཞིག་རེ་ཞུ་བྱས་ནས་གླ་ཕོགས་ཀྱི་གནད་དོན་ཐག་གཅོད་བྱས་རྗེས་དཔེར་ན་རྩྭ་ཐང་བྱེ་འགྱུར་བཅོས་སྐྱོང་ལྟ་བའི་བྱ་བ་སྒྲུབ་བཞིན་ཡོད་པ་རེད།དང་པོ་ནི་རིམ་གྱིས་ཕ་ཡུལ་གྱི་རི་ཆུ་རིག་གནས་ལ་རྒྱུས་ལོན་བྱེད་པ་དང་ཆབས་ཅིག ཕ་ཡུལ་ལ་རོགས་རམ་གང་འདྲ་བྱེད་དགོས་པ་དང་ཕ་ཡུལ་ལ་རིན་ཐང་གང་འདྲ་ཡོད་པ་ཤེས་དགོས་པ་དེ་རེད།གཉིས་པ་ནི་ཁྱེད་རང་ཕྱིར་ཕ་ཡུལ་དུ་ལོག་དུས་གོ་སྐབས་ཡོད་ཚད་ཕྱིར་ཕ་ཡུལ་དུ་འཁྱེར་རྒྱུ་དེ་རེད།འདི་ནི་སློབ་ཆེན་སློབ་མ་དག་གི་རྣམ་པ་མི་འདྲ་བའི་སྒོ་ནས་ཕྱིར་ཕ་ཡུལ་དུ་ལོག་སྟངས་ཤིག་རེད་དོ།།
ཡིག་སྒྱུར་མཁན།དབྱངས་ཅན་ལྷ་མོ།
རྩོམ་སྒྲིག་མཁན།དབྱངས་ཅན་ལྷ་མོ།
本文翻译自“扎琼巴让：用牧民的智慧修复草原，让有牧民的地方就要有草原“感谢作者和 CC讲坛授权雪境将此文翻译为藏文！
དབྲ་ཁྱུང་དཔལ་བཟང་དང་འབྲེལ་ཡོད་ཀྱི་བརྙན་གཞན་ལ་གཟིགས་འདོད་ཚེ་འདི་ནས་མནན་ཆོག 脚步视频｜扎琼巴让的治沙之道
如果您恰好是三江源当地老百姓或是本地兽医，希望你可以扫描下方二维码，参与野生动物救助的调查问卷，帮助我们找到最优的解决方案。
欢迎大家扫描填写【三江源地区野生动物救助的问卷调查】
也欢迎您扫码支持雪境的野生动物救助众筹项目
帮助我们让每一个生命都能共享雪山圣境