[申情申音]谈“山海经”
作者：唐位位
改编、朗读、摄影：麦小姐
[改编版]
记得我小辰光，有一个邻居住了8号里，头发白了一半，脚末有眼跷，看到人家总归是一面孔笑，笑得相当理亏，就像自家欠人家多，还人家少一样——搿是文化大革命吃轧头，天天扫弄堂扫出来个后遗症——但是一双手伸出来雪雪白，节头骨笔笔直，虽然走路走大勿平，腰板倒是直骨挺硬。
伊拉屋里向一直老闹猛个，我也欢喜跟了阿叔、孃孃个屁股后头去孛相。伊对阿拉搿排小鬼头一视同仁，看见我就讲：“来啦，来谈谈‘山海经’。”
“阿跷爷叔”搿只称呼，是从文革小将嘴巴里“阿跷”个叫法延续下来个，伊笑纳，一眼火气也呒没，文绉绉个人，粗俗个绰号，也算是一种“混搭风格”。伊拉屋里，留声机开辣海，有一支巴松辣里向迓迓叫个吹，丝绒一样个质感，只音色，真像是从储藏室里搬出来个老红木家生，拿灰尘一眼眼掸脱，就慢慢叫显出了包浆，赛过下半天灰色个天空突然旺出日头来，弄得一房间个人只只耳朵痒丝丝，心思也侪活络起来了。
6号里个“乌贼鱼”讲起伊辣辣黑龙江碰着个小姑娘：“皮肤雪雪白，头发金黄，蓝眼睛，我当是伊外国人来，想勿到一口北方言话，我看了戆脱了，伊问我借了一本小说书，到现在也呒没还拨我……”
“迭个是混血儿，有罗宋人个血统，漂亮、智商高，有艺术气质，”一头讲，“阿跷爷叔”一头吹了吹氽了玻璃杯表面个茶叶，吃了一口，郑重其事个讲下去，“还好，小姑娘就借了侬一本小说书，假使伊欢喜侬个说话，葛末，侬肯定是回勿转来了。”
“回勿转来就回勿转来，假使伊吃煞我爱煞我，葛末，就算一辈子勿回上海，我也情愿个！”
“乌贼鱼”个眼神飘了起来，本来想拿眼神光穿过木格窗角落头个蜘蛛网，一直飘出去，飘到云里向。结果，半当中拨另外一条光线接牢，木知木觉，两条眼神辣辣虚空里打了一只活结——原来缚牢伊个，是对过楼浪个珊珊，似笑非笑，眼睛里向汪起一面湖水……
留声机里，巴松吹好了，一管箫，呜哩呜哩个吹起来，听得人神智无知，恨勿得魂灵头也跟牢仔搿根高高低低个声线，飘到某一个荒无人烟个地方……
“讲桩杀人悬案拨㑚听听好伐？”3号里个“扁头”开腔了，我刚刚辣辣眼闭瞌[目充]，辣末生头背脊骨一冷，魂灵头又归位了，“我辣辣贵池钢铁厂个辰光，有一个同事拨人家杀脱了。阿拉厂辣深山老林里向，搿位老兄半夜里中班下班，辣辣山路浪走，一个人也呒没，只有一只野猫，伊走到阿里就跟到阿里……”
“慢慢叫，慢慢叫，”我正好听得最扎劲个辰光，“阿跷爷叔”发调头了，“侬迭只故事慢慢叫再讲，小朋友辣辣，侬再讲下去要吓死囡囡个，侬看呀，连得珊珊也已经吓得来面孔夹[面尞]势白了。”
“我要听个呀，我勿吓个！”珊珊强烈要求听下去，“‘乌贼鱼’，侬坐过来眼呀，否则我要吓个呀。”
“我也要听，我也要听，我胆子老大个！”我越是吓越是要听，外加正好要紧关子，哪能好停下来呐？
“囡囡乖噢，”“阿跷爷叔”变戏法一样剥了一粒酒心巧克力摆辣我嘴巴里，面孔倒是蛮严肃个，弄得我勿敢再响，“搿排事体小姑娘听了夜到要做乱梦个，假使侬半夜里吓得哭醒，㑚姆妈要来搭我寻相骂个呀。葛么，侬下趟就勿好再到此地来孛相唻。侬还要听[口伐]？要听，我就叫‘扁头爷叔’讲下去好唻……”
“覅听，覅听，嘶……”我表态还来勿及表清爽，嘴巴里酒心巧克力个汁水倒是流出来了。因为伊个糖分实在忒足，流到一半流勿动了，辣下巴浪向荡法荡法，嘴巴里末，一股高粱味道滑到喉咙口，稍为还带了眼中药个香气。现在回想起来，我敢肯定，自家埃趟吃着个是竹叶青口味个酒心巧克力。
“好，现在我要拨㑚听一只新曲子——比才个《阿莱城姑娘》当中个《小步舞曲》，是用长笛吹个。”“阿跷爷叔”一头宣布，一头跷到留声机旁边。
留声机里吹箫个朋友歇搁了……
只看到一束银光辣眼门前一晃，随后，山泉一样清澈个声音流了出来……
【作者后记】
《山海经》：先秦重要古籍，是一部记载我国地理、植物、动物、矿物、巫术、宗教、医药、民俗个神话奇书。
谈“山海经”实际浪就是茄山河。一帮人坐辣辣，天南地北，东奇西怪，文艺爱情，神话灵异，想到啥讲到啥，让自家个思想天马行空，实在是忒享受了。可惜，现代社会空谈勿吃香了，我末，也只有空想想老早谈“山海经”个辰光了。
搿能个辰光，弄堂里向大部分人侪辣辣睏中觉，只有“阿跷爷叔”屋里向谈“山海经”个朋友醒勒海。西晒个日头一歇歇就晒进来了，坐辣背光个地方，“阿跷爷叔”个面孔越来越看勿清爽，大人喊小人“吃夜饭”个声音倒越来越响亮……
要转去了，一下半天个辰光过了忒快，让我想到一句老言话 “春宵一刻值千金”，比喻勿恰当就勿恰当好了，反正搿就是我真实个心情。
[原文]
记得我小辰光，有一个邻居住了8号里，头发白了一半，脚么有眼跷，看到人家总归是一面孔笑，笑得相当理亏，就像自家欠人家多，还人家少一样——搿是文化大革命吃轧头，天天扫弄堂扫出来个后遗症——但是一双手伸出来雪雪白，手指头笔笔直，走路走弗平，腰板倒直骨挺硬。
伊拉屋里向一直老闹猛个，我也欢喜跟了阿叔、嬢嬢屁股后头去白相。伊对阿拉搿牌小鬼（音ju）头一视同仁，看见我就讲：“来啦，来谈谈山海经。”
阿跷爷叔——文革小将嘴巴里“阿跷”个叫法一直延续下来，伊笑纳，一眼火气也呒没，文绉绉个人，粗俗个绰号，也算是一种混搭风格——阿跷爷叔屋里，留声机开了嗨，有一支巴松辣里向，迓迓叫个吹，丝绒一样个质感，音色就像从储藏室里搬出来个老红木家生，灰尘一眼眼掸脱，慢慢叫就看见了包浆，赛过下半天，灰色个天空，突然开太阳了，弄得一房间个人只只耳朵痒丝丝，心思侪活络起来。
6号里个乌贼鱼讲起伊辣辣黑龙江碰着个小姑娘：“皮肤雪雪白，头发金黄，蓝眼睛，我当是伊外国人来，想弗到一口北方闲话，我看了戆脱了，伊问我借了一本小说书，到现在也没还畀我……”
“迭个是混血儿，有罗宋人个血统，漂亮、智商高，有艺术气质，”一头讲，阿跷爷叔一头吹了吹浮了玻璃杯表面个茶叶，吃了一口，郑重其事个讲，“还好，小姑娘就借了侬一本小说书，假使伊欢喜侬个说话，葛么，侬肯定回弗转来了。”
“回弗转来就回弗转来，假使伊吃煞脱我爱煞脱我，个么我情愿一辈子弗回上海。”
乌贼鱼个眼神飘了起来，本来想拿眼神光穿过木格窗角落头个蜘蛛网，一直飘出去，飘到云里向，结果，半当中畀另外一条光线接牢，木知木觉，两条眼神辣辣虚空里打了一只活结——过街楼浪个珊珊，似笑非笑，眼睛里向汪起一面湖水……
留声机里，巴松吹好了，一管箫呜呜咽咽吹起来，听个人神智无知，魂灵头侪飘到荒无人烟个地方……
“讲桩杀人悬案畀倷听听好伐？”3号里个扁头开腔了，我刚刚辣辣眼皮嗑充，辣末生头背脊骨一冷，魂灵头又归位了，“我辣辣贵池钢铁厂个辰光，有一个同事畀人家杀脱了。阿拉厂辣辣深山老林里，搿老兄半夜里向中班下班，辣辣山路浪走，一个人也呒没，只有一只野猫，伊走到何里跟到何里……”
“慢慢叫，慢慢叫，”我正好听得最扎劲个辰光，阿跷爷叔发调头了，“侬迭只故事慢慢叫再讲，小朋友辣辣，侬讲下去要吓死囡囡个，侬看，连得珊珊也已经吓得面孔夹獠斯白了。”
“我要听个呀，我弗吓个！”珊珊强烈要求听下去，“乌贼鱼，侬坐过来眼呀，否则我要吓个呀。”
“我也要听，我也要听，我胆子老大个！”我愈是吓愈是要听，外加正好要紧关子，哪能好停下来呐？
“囡囡乖，”阿跷爷叔变戏法一样剥了一粒酒心巧克力摆到我嘴巴里，面孔倒是蛮严肃呃，弄得我弗敢再响，“搿牌事体小姑娘听了夜到要做乱梦个，假使侬半夜里吓得哭醒，倷姆妈要来搭我寻相骂个，葛么，侬下趟就勿好到此地来白相了。侬还要听伐？要听，我就叫扁头爷叔讲下去好来……”
“覅听，覅听，嘶……”我来勿及表态，嘴巴里酒心巧克力个汁水流出来了，因为糖分实在忒足，流到一半流弗动了，辣下巴浪荡法荡法，嘴巴里一股高粱味道滑到喉咙里，稍微带眼中药个香气。现在回想起来，肯定吃到个是竹叶青口味个酒心巧克力。
“好，现在我要畀倷听一只新曲子——比才《阿莱城姑娘》当中个《小步舞曲》——长笛吹个。”阿跷爷叔一头宣布，一头跷到留声机旁边。
留声机里吹箫个朋友歇阁了……
随后，一束银光眼面前一晃，山泉一样清澈个声音流了出来……
【写在后头】
《山海经》：先秦重要古籍，是一部记载我国地理、植物、动物、矿物、巫术、宗教、医药、民俗的神话奇书。
“谈〈山海经〉”实际浪就是茄山河。一帮人坐辣辣，天南地北，东奇西怪，文艺爱情，神话灵异，想到啥讲到啥，让自家个思想天马行空，实在是忒享受了。可惜，现代社会空谈弗吃香了，我只有空想老早谈《山海经》个辰光了。
搿恁个辰光，弄堂里向大部分人侪辣辣睏中觉，只有阿跷爷叔屋里向谈山海经个朋友醒了嗨。西晒个阳光一歇歇就晒进来了，坐了背光处，阿跷爷叔个面孔越来越看弗清爽，大人喊小人“吃夜饭”个声音倒越来越清晰……
转去个辰光到了，下半天过得忒快，让我想到一句老古话 “春宵一刻值千金”，比喻弗恰当就弗恰当好了，反正是我真实个心情。
2013-3-15
我们近期还发过：
【申情申音】本栏目以沪语朗读为主打，文字来源可原创，也可选取其他老师的优秀文章进行适度改编（尽量取得原作者的授意，如暂未能及时联络得上，也将尊重其原文著作）。
申音悠悠，好文共赏。
本公众号发布内容（包括音频及未注明“来源”的文字、图片）皆为原创，作者保留对作品的著作权。未经授权允许，不得擅自转载。
如有需要转载或其他工作邀约：
可添加微信号：Leslie_0207
或邮件：leslie_0207@163.com
多谢您的支持和欢喜！