苏州文化 | 予安欢喜苏州话：多少乡音，都凝固在陆郎中笔下【转发】

点击蓝字

关注我们

清嘉庆廿三年（1818年），阊门内下塘一户大人家迎来仔一个新生命。下人来报，夫人养仔个小少爷，陆郎中听仔来得个快活。

陆该个姓勒海苏州一直是个大姓，三国孙吴大将陆逊火烧刘备七百里连营，西晋陆机《平复帖》名家法帖流传至今，南北朝陆探微以书入画，唐朝陆龟蒙闲情小品。

△《归去来兮辞》陆探微

陆郎中屋里也弗例外，望前五代出过一个状元郎陆肯堂，官一径做到皇帝侍读，搿勒买下仔崇真宫桥下塘个一间大宅，从此以后，陆家后人就侪住勒该搭。

陆家家学渊源深厚，诗史文赋精通，还晓医理，慢慢叫以儒入医，到陆郎中该搭，已经几代行医哉。

陆家小少爷取名懋修，字九芝，小辰光也跟仔夫子学四书五经，熟读经典，诗词文赋样样侪精。一路顺风顺水长起来，讨家小，养儿子。因为中医家学耳濡目染，慢慢叫俚倒也子承父业，当起仔郎中，还勒阊门内下塘开仔个小米行，专门赈济穷人。

△ 陆懋修画像及作品

但不过普通百姓个日脚再安逸，也抵弗过时代个风雨，清皇朝已经走到仔坍圮个边缘。长毛入境祸乱江南个辰光，陆懋修不得不带仔家眷，辗转上海。

还好俚有一手好医术，深研《素问》，精内经、伤寒之学，沪上个日脚过得也弗算忒推板，慢慢叫医名鹊起，积累仔大量一手临床资料。几年以后，俚写成仔著名个医学丛书《世补斋医书》。

△《世补斋医书》

飘摇个时事朆挡牢陆家后人个勤耕不辍，同治十三年（1874年），陆家亦出仔一个状元，大清王朝个第一百零一位状元，苏州城个着末一个状元，陆润庠，也是陆懋修陆郎中个儿子。

儿子登科，进京为官，就拿爷娘一淘接到仔京城，行医救人一世人生个陆懋修总算好歇歇哉。但不过忙忙碌碌个日脚过惯仔，着生头里停下来也有点弗适应，陆郎中就亦当笔写书，拿一生个医学经验搭个人见解记仔下来。世人说俚“长于著述,至老不倦”。

△ 苏州城最后一个状元陆润庠

勒陆懋修个诸多著作当中，有一本倒是与众不同。封面题“恩简堂课本”“《乡音字类》重申识”字样，定稿于“丁丑五月”，从俚生卒年月推算，应该是光绪三年（1877年），卷首有作者自序两篇：

乡音之不同，亦犹方言之各异也。不独各直省之大不相同，即一省中之府、厅、州、县亦大有不同。是近在郡邑中，亦时有不甚相同者。此编名曰《乡音字类》，可独就我苏州本城言之，竟不能通用于附近城郊之各乡也，而于他乡，自不待言也。见者幸勿笑吾囿于一隅也。丁丑五月九芝记。

是编始仅欲集时音习见之字，张而纂及五经中字，又以次而纂及十三经中字，然已不免挂漏之讥矣。推所愿，则恨不并《文选》中字而集之。自患心烦神疲，恐此愿终不得偿耳。兹我后起，因此编作嚆矢，于此扩而充之，将天下宣读之字尽数编入，以成大观，则犹余之所愿也。九芝又记。

搿一年陆郎中时年五十有九，已近花甲。作兴是应乡人邀请，作兴是有感于乡音相异，俚提笔集五经、十三经里七千多字，经多次修改后定稿《乡音字类》。

就是实梗一本不同于俚其他医学著作个名不见经传个课本，成为仔现存个惟一一本综合反映十九世纪中叶苏州闲话读书音系统个珍贵资料。

《乡音字类》兜兜转转，拨南京图书馆收入，一直到2008年再拨发现，著文，投稿拨《方言》杂志。该个就是李军个论文《<乡音字类>所反映的十九世纪中叶苏州话读书音》，掀开仔两个世纪门前苏州闲话读书音个面纱，也串起仔一百年来个吴地乡音。

但不过陆懋修还是有遗憾个，因为年事已高，俚朆能拿《文选》里个字侪收集整理出来。只能寄希望于后来人，拿天下字侪汇编成册，以成大观。

前人所寄，我辈应为，方言也就是勒海实梗个曲折蜿蜒里传承个吧。

（转自：“苏白学堂”公众号）

图文编辑|王丽华

审读|林诺舟

责任编辑|老甘

投稿邮箱|[e-mail]