异域风情 | 苏州人在海外，梁云舟看疫情期间的西班牙（苏州话）【转发】
The following article is from 苏白学堂 Author 予安欢喜苏州话
2019年开始，我们推出了一个访谈形式的栏目，邀请不同的朋友来聊一聊他们的经历，让大家听一听不同人口中的吴语故事！
吴人云 | 20年第06期 | 梁云舟
我们能为方言做些什么？
这个命题很大又很小，也许你说只能从自己做起多说多讲，也许有人说我要创作一本方言作品出版普及。
今天我们一起来看看，苏白小编 梁云舟 看 疫情期间的西班牙。
予安：大家好，伲吴人云长远朆搭大家碰头则，今朝呢伲请着葛是伲西班牙葛小编梁云舟搭大家一淘来做一期讲座。那末俚呢登勒西班牙登仔长远则，也搭大家推荐仔吃葛电影各色各样葛物事，但不过今年碰着该个疫情呢转弗转来，好，梁云舟倷搭大家打葛招呼吧。
梁云舟：哎，大家好我是梁云舟，呃今年登勒西班牙弗好转来也是蛮作孽葛。所以搿个予安喊仔呢我就讲该个物事蛮好孛相葛，所以来跟大家讲讲西班牙葛情况。
予安：嗯，倷啥辰光去西班牙葛？捺亨会想着去该个国家葛？
梁云舟：我是14年去西班牙葛，哀完全是碰巧，看见仔葛广告然后再有该个思路葛。
予安：也赛过去读本科？
梁云舟：欸，是高中毕业然后去读本科。
予安：也长远则啘，搿末搿点年数登勒搿搭点阿想屋里葛呢？
梁云舟：想屋里末肯定想葛啘，譬方讲我已经六年朆吃着搿个九雌十雄葛大闸蟹则。一日到夜吃六月黄。
予安：实勒阿是因为想屋里勒开始搭伲该葛苏州闲话葛项目勒啥物事侪开始做起来葛？
梁云舟：该个该个倒是有是有，但不过比较少，应该讲是完全是，完全是因为是兴趣勒海该搭。
予安：嗯，欢喜苏州闲话？
梁云舟：是葛是葛。
予安：搿末倷搿个像倷现在勒海西班牙，今年伲一月份开始有该只疫情搿末，唔笃搿歇辰光开始葛辰光西班牙阿有啥个端正点啥个物事啊啥个？弗讲西班牙人就是倷自家曾阿做点啥个准备勒啥个？因为搿歇辰光国内结棍但不过外国无不啥个。
梁云舟：欸，是葛。搿辰光国内（疫情）刚刚起来葛辰光，伲还讨论过勒，伲讲该个（新冠）国内应该就是正常葛流感勒啥个估计就马上就会好葛。朆想着搿场严重所以也朆买啥个物事，就是稍微备仔点搿个酒精啊啥个，后首来末就开始缺则。
西班牙三八节女权游行时大量感染
予安：那末嘴套勒啥个侪朆弄？
梁云舟：侪朆弄侪朆弄，呃嘴套勒啥呢，我倒是本身自家花粉过敏勒啥个，呃带过去点葛，还好区得有该点。还好还好。欸，刚刚开始辰光是挡过去则。
予安：嗯，那末，倷该个整过勒海西班牙葛辰光曾阿碰着啥影响呢？我觉着因为西班牙有一枪是欧洲最严重葛国家末，唔笃既然该个物事也缺搿个物事也缺，再加情况实梗严重倷生活曾阿受着啥个影响
梁云舟：生活影响肯定是大得弗得了葛，搿个譬方讲我准备去处理银行账户葛问题啊，或则去政府办公勒啥物事经，侪弗好弄。那末西班牙人倷也晓得葛，跟唔笃讲网浪向办公该种物事经，就是讲讲而已根本没有效率葛
因办理返乡证人员过多，而未能回国
予安：我懂葛，我懂葛。搿末倷搿个生活浪向阿有搿葛譬方讲吃啊着啊，阿有短缺勒啥葛呢？
梁云舟：生活浪向吃着还好，嗯，就是过得去。唔笃葛搿个食物供应勒啥个侪是正常葛。
予安：嗯，就是医疗物品勒啥弗够？
梁云舟：欸，对。开始辰光，搿个国内新闻里向也有报道葛，就是医疗用品弗够。
予安：嗯。外加我记得搿歇辰光，最早葛辰光，欧洲人吧，弗单单西班牙，就是对中国戴口罩葛人，就有点弗大……捺亨讲呢，唔笃就觉着戴口罩是生病人，搭伲中国人葛概念是弗一样葛。乃末做仔点行为也弗大好，对华人勒啥侪弗大友好葛。俉笃曾阿碰着过该种情况？
梁云舟：呃，我弗好讲得忒细啦，就是以我一个大学生葛角度来看葛说话，唔笃西班牙人对我还是蛮好葛。譬方讲上网课葛辰光，两三月份辰光，唔笃还关心我屋里向人捺亨勒啥个。搿歇辰光弗是中国葛疫情是最结棍葛嘛？
第一次疫情期间戒严的中心城区
予安：嗯，一开始总葛来讲还可以啦，阿是啊？那末，我看现在西班牙疫情又反弹则呀，啥个一日天要一万得啦？俉笃现在到底啥个情况啦？
梁云舟：伲现在该个情况末就是，好弗容易唔笃搿个六月份辰光，六月份辰光实际浪是控制牢则，因为前头两个多号头葛搿个管控。但不过呢，西班牙人自由散漫嘛，该个物事经，唔笃为仔快点恢复经济，恢复正常葛生活状态末，唔笃就放开来则，放开来仔过后末就再也管弗牢则。
7月以来的疫情数据，来源《el pais》
7月以来的西班牙全国感染情况，来源《el pais》
予安：作孽，真葛作孽。搿末倷接下来阿有啥个打算呢？阿端正转来，还是继续登勒搿搭读书还是捺亨说法？
梁云舟：我接下来葛说话，肯定是马上等我该个今年毕业脱，毕业脱就准备转来则，因为国外实在是现在忒危险则。那末有空呢，我还准备做一期西班牙疫情期间葛视频，来搭大家再详细葛讲讲西班牙捺亨第二次爆发葛该个疫情。
予安：嗯，好葛呀。
梁云舟：反正西班牙现在是弗捺亨好登则。
予安：豪稍转来吧，豪稍转来吧。
梁云舟：豪稍转来，豪稍转来。
予安：好葛呀，反正就希望倷整个身体浪向自家当心点。因为伲勒海国内已经侪差弗多则，唔笃搿搭点赛过亦是复发勒啥个，总归还是有点危险葛，自家当心点。乃反正伲苏州闲话葛活动、项目倷侪还是可以参加葛，该个嘦得有网络就弗碍紧。那末最后阿有啥个要想搭大家再讲讲葛？一句闲话，结束。
梁云舟：最后，疫情期间嘛，还是祝大家身体健康，最最重要就是身体健康。
予安：嗯，身体健康，也祝你身体健康。好，那伲今朝扯扯呢，就大约摸张到该搭则，接下来梁云舟也讲葛，俚要搭大家再讲一讲西班牙详细葛情况，伲到辰光会有再推送葛，大家可以关注关注。好葛，今朝就到该搭，再会。
梁云舟：欸，大家可以再关注关注，再会。
总有人问我们，我想保护和传承方言，但是我可以做些什么？希望在这个栏目里你们的困惑和疑问可以得到解答。
| 本栏目不定期更新，讲述我们身边的吴语故事 |
排版 | 予安
嘉宾 | 梁云舟
图片 | 梁云舟
往期导读
往期推荐