庄行的羊肉烧酒（文字） 作者 高明昌 朗读：牛美华

庄行的羊肉烧酒

         作者  高明昌   朗读：牛美华

现在市民喜欢享受美食时尚，我伲此地也有迭能一句闲话叫“到庄行吃羊肉烧酒去”，迭个已经成为“到奉贤，去休闲”最扎劲个理由。迭项活动、迭个体验，交关品尝过庄行羊肉烧酒个人，一进新春就开始相互联系了：埃，今年阿里啊天去庄行？迭些人拿吃羊肉烧酒当作聚拢朋友个纽带；能够约三五知己去庄行跑一趟，伊拉也想要个愉快个话头。时下，“羊肉烧酒，我吃过唻，吃了好几趟唻”迭种个人，讲话中气十足。大家心里都明白：吃了羊肉烧酒，有时就等于自己已经拥有了时尚，拥有了文化，也拥有了历史一样个。

其实呀吃羊肉烧酒还是蛮辛苦个，因为要䟿个早起赶路个，近个要驱车几里，远个要几十里、甚至上百里。迭个也邪气正常个，不辛苦付出个感觉是呒没味道个，吃羊肉烧酒也是迭能个。其实赶早本来呢也就蛮有意思个，既看到了大热天清早浪响天宇个样子，也看到了路浪响人个活动，一饱眼福个。事实呢？即使侬是赶早了，也不一定算是最早个。来到了潘垫羊肉广场，近万平方米个大型停车场老就是人头晃动了，所有个排档、所有个大圆台、八仙桌，边沿上侪立满、坐满了人，真正个是叫宾客如云。刚开席，有些人已经光着上身，壮实个背浪响汗珠辣辣滴下来，嘴里向还直呼“爽”字。还有个桌头，举杯欢盏，吆五喝六，声震旁桌，招来了无数个看客。所有个客人，也不管性别，认得个与不认得个，看到了大家侪互相点个头，问个话，辣辣短辰光里伊拉侪成为了一家人。看着就晓得，实际浪吃羊肉烧酒，是辣辣享受一种集市个氛围。

羊肉烧酒好吃，与烧个关系也是交关大个，侬可以看到农家灶头：一座农家四眼灶浪，四只大锅子冒了热气，迭个辰光个羊肉已经焖炖了近两个钟头了；烧柴，也是以竹片为主个，用迭能样了个柴烧火，火头可以做到两点：一是特别个均匀，二是特别个旺。

  从取柴到烧，庄行羊肉个制作工艺始终是本土个，迭个也是庄行羊肉烧酒个特点。也称人文吃法。吃羊肉烧酒，每个人各有各个吃法。庄行个羊肉烧酒可以辣辣现时现场里做到：侬喜欢啥个 就挑啥个 就吃啥个。想要吃眼汤话，就喝汤浓汁白、香气扑鼻个羊头汤。“据说”，喝了迭个汤，胜过服十帖膏方，虽然讲说是据说，但养生功效确实存在个；想补元气个，就吃皮酥、肉嫩、味道鲜个热气白切羊肉；想润肺，提气，养神的，就吃嫩、脆、香个羊脚爪、羊尾巴；想补肝、明目、益肾个，就吃羊肝、羊肺、羊肚、羊肾。那么想一样不漏忒个，就干脆吃个全羊，或者吃个羊杂；想吃白切，想吃红烧，只要侬讲，只要侬开口，要啥有啥，而且不消几分钟就特侬端上来，送到侬面前，保侬想到、看到，看到、吃到。

本文《新民晚报》2015年7月2日刊载，《奉贤报》同月7日刊载，《东方城乡报》同月10日刊载，上海市农委政务网同月转载。

文章来源： 高明昌原创散文（公众号：gmcdswsj）

作者简介：高明昌，上海市奉贤区青村镇海边村人，中学语文高级教师，上海市作家协会会员，散文作家