六月黄 作者：沈嘉禄 朗读: 牛美华

辣一动就汗“淌淌渧”个六月，上海人只相信西瓜个红或者黄瓜个绿，要勿是就是哈根达斯个奶白与浅紫。不过，我还是要严重提醒各位噢：辣上海人个时令风味当中，还有一期一会个六月黄！是个，作为一个辣辣石库门弄堂里长大成人个上海人，我心里向总归有一小块地方为六月黄留辣海。现在，伊拉辣辣朝我个记忆深处奔过来，高举蟹钳，邪气威武雄壮个方队！

春天吃笋，夏天吃瓜，秋天吃蟹，冬天吃羊，是上海人个饮食习惯、审美追求，也是对时令个高度认同。即使是辣辣海呼唤唐诗，宋词回归日常个温馨气氛当中，或者当朗读课成为秀场个今朝，上海人也呒没改变吃，吃，吃个亢奋节奏。

再讲六月黄个季节，就是气压下沉，忽晴忽雨，衣裳老啥发霉，头发，皮肤甚至于眼睫毛侪黏搭搭个辰光，最能安慰上海人个美食，就是大闸蟹个先遣部队了。

侬可能会得讲，上海人对大闸蟹再有真感情，对看上去“有点脑残”个六月黄，是勿是吃勿到大闸蟹再呒没选择个移情别恋阿。搿闲话虽然讲刻薄，但也勿算大错，上海人对大闸蟹感情之汹涌澎湃，如痴如醉，死去活来，可以令全国人民瞠目结舌，勿可理喻。辣大闸蟹还呒没登盘之际，大闸蟹个小鲜肉、小萝莉就担当起了为正规军鸣锣开道个使命，单凭搿个一点，就呒没理由小看伊拉。当然咾，老吃客心里煞煞清，六月黄搭仔大闸蟹虽然是同种同文，同属江南文化圈，一道从古老个民间传说当中走过来，但是毕竟分工不同，烹饪方法，与吃个方法也大勿一样。

大闸蟹可以用勿加任何佐料个水煠或者清蒸，来获得真味，而六月黄必须要借助于浓油赤酱个本帮手段提升品位。今朝个大闸蟹勿再具有野生条件，只能讲究是“最后一公里”，辣生命最后几天到阳澄湖蹲过学习班，领过证，踱过金，身价就陡然大增。六月黄呢，就呒没介讲究血统、门第搭仔环境，看上去卖相还可以就OK。

最后我还要讲，六月黄为喜欢美食个中国人奉献了花样年华，我伲至少也要报以足够个真诚，真诚个烹饪、真诚个享受，包括真诚个维护搿点蟹个生长环境。迭能，再能用尖尖个筷头挑起一砣金灿灿个蟹黄，照亮我伲碌碌无为个人生。