六月六晒衣节 改编：丁迪蒙 朗读： 牛美华

晒衣节又名晒虫节，意思是拿小虫子晒煞脱，衣裳老啥就勿会蛀脱了。伊辣中国可谓是历史久远。

现今个媒体上，“晒”迭个字用途邪气广大，晒幸福啦，晒恩爱啦，语义带了点调侃，也带了点自嘲嘲人。细想伊个来历，像煞搭民间个晒衣节有关。

记得，小辰光，辣阴历六月初六前后，姆妈总归要拿大橱、箱子里向个所有衣裳侪抱到晒台浪去晾晒，锦缎、丝绸、棉麻老布，拿只晒台照得五颜六色。我个任务呢，是守好晒台，搿搭翻翻，伊面弄弄，拿鸟轰脱，勿让伊拉射鸟污。夜快头收衣裳，我轻轻叫讲拨姆妈听：邻居个女婿张了嘴巴抬头看了老半天，还伸出手节末头辣数。姆妈总归听得老开心。现在想来，晒衣节勿也是辣晒小康嘛？

搿一天，老底子官府晒官袍，读书人晒书籍，和尚晒经卷。旧上海个搿一日，全城个裁缝侪汇集辣城隍庙，为城隍老爷晒衣、洗涤神器老啥。等搿眼事体了结，大家还可以到广场个庙会去买物事、到戏场去看看戏文。

搿个活动南北朝辰光是辣七月初七进行个。大概是侬历六、七月之间，梅雨刚刚过去，正好是晒衣裳、晒被头、晒书本、晒鞋袜个好辰光，辣大热天个毒太阳下头暴晒，可以去霉、防蛀，因此晒衣又叫做晾霉。