《兮洋小文》------过生日 作者：徐亦 朗读：牛美华
《兮洋小文》------过生日 作者：徐亦
朗读：牛美华
词语解释：囥 <动> 藏。
生日，每年一次，年年侪有，人人均等。讲到过生日，倒是有着勿同个期待。我伲60后搿一代人，更加是有着深深个感悟。
从小辰光算起，一直到去读大学，生日啊就是一碗面，配上仔浓油赤酱个红烧肉，或葱香扑鼻个烤大排，屋里条件好眼，讲究点个，或鸡汤，或配几碗小菜，整个楼道里啊侪是香喷喷个味道，馋老水也出来了。学生辰光，自己是勿记自己生日个，而父母亲辣早一两天就开始念叨，到了生日搿天啊总会像变戏法一样个变出面来，而一幢楼层隔壁邻舍，母亲会让我伲每户送上一碗面去，端着伊种蓝边白瓷个大碗，感觉像啥是一家人一样个亲近。埃种豪气，埃种快乐，整个迷漫了少年个心境，浸润了少年个成长。
到了读大学个辰光，生日就是一封信或者一个包裏。每到生日前后埃个几天，总是满满个期待。每天一下课，就望邮政代办处跑，总归有得收获个：父母寄来个包裹，女朋友厚厚个情书，阿姐寄来个问候。包裏拆了，寝室里相大家分享；情书囥起来，夜深人静辰光打着手电筒慢慢细品；阿姐们个信要小心拆封了，里向头啊总夹着5元、10元个纸币。生日辰光享受着搿些，心里涌起个总是满满个幸福感。
待等到了工作辰光，生日就是一份沉甸甸个心意了。军大毕业，下了基层，去连队，带兵训练。那年夏天，淮北个天气恶热，高温灼烤着大地，看人像雾里看花，氤氲蒸腾。长了娃娃面孔个通讯员到教导队来寻我，讲指导员请我回连队一趟。傍晚，暑气稍退，交待好工作，回连队。到了连部，娃娃面孔通讯员正等着，讲：去家属院。进门，指导员边剥蒜头边招呼讲：来来，坐。台子上六只菜，一碗汤。一转身，阿嫂端出一锅子面，讲：阿嫂手艺勿大好，将就着拨侬过个生日。喔唷，鼻子突然一酸呀，马上接过阿嫂手里锅子讲：谢谢阿嫂。端酒盅，祝谢语。闲话之间，心里酸酸甜甜个涌起暖意。伊个辰光过生日，感觉到个就是阿嫂像母亲一样个关切。
到了现在迭个年龄啊，勿讲究了，或者一家人，或者一个人，吃碗面，也就算过完生日了。甚至有辰光，勿逢五进拾个整数日脚，就勿提起过生日迭个话由了，黙黙个想想，了无痕迹个度了庆生个日脚。
只是，辣辣心里头隐隐叫一直想着个，还是埃碗面、埃个包裹、埃封信、埃顿阿嫂个“生日宴”。
倒是现在个小朋友们，父母搭爷爷奶奶、外公外婆，六大带一小，为小囡过生日，到外头酒家饭店吃生日宴个到处侪是。就是勿晓得哦，搿些小囡长大了以后，有几个能记牢长辈个生日，并为之操办做生日个。
其实啊，生日，就是个出生日。而这个日脚，是父亲个勿定心日，母亲个受难日脚，家族个希望日脚，人类个延续日脚。
过生日，是庆祝，是感恩，更是生活个继续。日脚过好了，是最好个过生日。
只是现在，再怎么过，总呒没了“埃碗面、埃封信、埃个包裹、埃顿阿嫂个“生日宴”辰光个感觉了。。。。。。。
能寻回来
写于2017年7月生日时