心里向永远年轻个复兴公园（上） 作者：钱乃荣 节选、朗读：丁迪蒙

复兴公园建园已经有100多年了。小辰光到复兴公园去白相，听见老人叫伊“法国花园”。搿只法国人辣法租界时代建造个公园，有法式园林个特色。大草坪，沉床式个艺术花坛。阿拉晓得，上海所有个名胜几乎侪有眼中西合璧个景致，法国花园也有局部个曲径、假山、亭台、太湖石…… 

我个第一张照片就是坐辣下沉花坛个石级浪向拍个，搿是1946年；到2006年，一个甲子过去了，我重临旧地，仍旧端端正正，坐辣原地个石级浪向拍了一张。

我是住辣复兴花园隔壁个“花园邨”个，每日天早浪向6点半，“第一套广播体操”就从喇叭里向传出来了，搿个辰光，公园里向大多数人侪会得跟了音乐个节奏做早操。一段老短个前奏音乐以后，大家侪预备好了锻炼身体。

搿个年代，复兴公园架辣竖杆浪个圆形个广播喇叭里传出来个音乐，往往是新鲜个、有朝气个。集体舞曲我听到最多个是“邀请舞”（51 11 76 5，52 22 32 1）”、“快乐舞”（31 11 43 2）、还有“狂欢舞”、“团结舞曲”、“西藏舞曲”、“鄂伦春舞曲”、“蒙古舞”、“苏联集体舞”、“乌克兰集体舞”、“匈牙利三人舞”老啥。当我听到：隔壁公园里喇叭里放个各种集体舞个音乐，马路浪向有有轨电车个叮叮当当个声音，还有手风琴伴唱个声音，就会得觉着交关个温馨。

下半天3点多钟，已经放学个学生，由学堂组织到公园里来进行个集体活动，差勿多是天天有个，唱个歌曲侪邪气有朝气个，好听个歌啊真是老多个。像《我们快乐个歌唱》、《劳动最光荣》、《红领巾之歌》、《快乐个节日》、《我们个田野》、《让我们荡起双桨》。4点钟左右，辣夕阳个笼罩下头，空气是十分宁静个。搿个辰光，少先队个喇叭吹响了，有辰光还配有鼓声。

碰着礼拜日，公园里向是闹猛得唻。高音喇叭里，一歇歇辣放歌曲，一歇歇辣放戏曲，一歇歇又辣广播寻人：“某某家长，侬个小囡寻勿着侬了，听到广播以后，请侬快点到办公室里来领”。

我是1956年小学毕业个。搿个辰光个复兴公园，辣记忆里，遍地是快乐个声音。公园里顶多个是年轻人，伊拉个情绪邪气热烈，蹲辣一道唱歌、跳舞。到了礼拜六、礼拜日个夜到，辣周边工厂个工会会得组织工人到公园个草地浪来做各种各样个集体游戏，哇啦哇啦，叫啊，笑啊，唱啊，跳啊，声势老老大，中气老足个。有常时，草地浪向跳起了青年圆舞曲（5 1 1 | 3 5 5 | 1·3 | 5--），立辣里向一圈个是男生，外头一圈个是女生，碰着啥人了，就两两搭伴一道跳。

当然咾，辣大热天个夜里向，暗头里向盯梢人个阿飞也是有个。吓人倒怪，女小人是勿敢到墨出黑个地方去个。

搿个辰光住辣周边个人家，往往是家家户户侪快点吃好夜饭，拿好仔单被到公园个草地浪向去抢占位置了。葛末，啥体要去抢位置呢？搿是因为要放露天电影了。搿眼单被拿到草地浪以后，就有得交交关小囡辣单被浪向尽情个疯。电影还没开场，搿眼小鬼头浪向汗已经是淌淌渧了。阿拉搿种小人到公园里去看电影，最主要个还是去轧闹猛，辣草地浪向睏下来，一边数天浪向个星星，一边感受场子浪个集体狂欢。

复兴公园原来是拨“枪篱笆”围牢个，上个世纪50年代中期，枪篱笆拨拆脱了，造成了一堵勿大高个水泥墙。搿能一来啊，只要夜里向公园里放露天电影，一眼“野蛮小鬼”就会得翻过墙头去看电影——省脱了买门票个钞票唻。

大家坐辣一道等啊等啊，到电影开场个前头，外圈个人已经轧得来推过来挭过去了。但是等到电影开始放了，全场一记头就安静下来了，搿个辰光啊，连得白屏幕个背面侪立满了呒没抢着地盘个人。

上海人觉着一家人家辣弄堂里向脱邻舍隔壁一道茄茄山河、讲讲鬼故事还勿够适意，勿够过念头，伊拉欢喜到公园里向去，去享受更加刺激个“闹猛”！

第二天，邻舍隔壁就辣一道讨论起电影里向阿里个演员长得漂亮，潇洒，阿里段戏是有噱头个。挨下来呢，阿拉就会得赶到新城隍庙，到一家良友照相馆去买搿眼电影明星个照片，还有电影插曲个歌片，到书店里去买电影连环画，大家辣一道一边看，一边继续欣赏、评议。