啊！上海弄堂 作者：钱乃荣 朗读：牛美华 ----上海岁月寻踪之四
啊！上海弄堂（上） 作者：钱乃荣； 朗读：牛美华
----上海岁月寻踪之四
外国人到了上海以后，上海个房子发生了老快个变化。辣辣19世纪60年代个辰光,三上三下或者两上两下个、门旁边有一圈石头条框个“石库门”新式砖木结构住房已经开始造辣辣公共租界脱仔法租界浪向，辰光勿长就有交关“里弄房子”建造起来了。上海最早个里弄是建辣1872年个“兴仁
39 37482 39 14940 0 0 3343 0 0:00:11 0:00:04 0:00:07 3343”,造辣现在个北京东路(北界)、宁波路(南界)、河南中路(西界)当中。上海个弄堂房子实际浪是江南民居脱仔西方公寓式住宅个“中西合壁”, 购物、居住、出行、治安方便,有老多长处个。其中一方天井、一间客堂,就融合了传统民居个特征。到20世纪20年代以后，又有大批个“新式里弄”出现，建造外型进一步参照西式洋房，有“矮墙”、“铁门”、“小花园”、“阳台”、煤卫设备咾啥，成为“新里里弄”、“花园里弄”、“公寓里弄”。
从19世纪末到20世纪中叶，上海至少有七、八成个居民住辣弄堂里，“弄堂”是上海百姓生活个天地，上海海派建筑群居住环境独具一格、中西结合，以“里、坊、邨”咾啥作为后缀为各条大小弄堂取名, 像“兴仁里、万宜坊、明德邨”咾啥，弄堂名称用词习惯上侪欢喜用“德、仁、惠、乐、文、义、慈、祥、庆、吉、兴、寿、康、福、裕”咾啥定名，从用词浪向，就看到当年大家个吉祥观念、慈爱观念、康乐观念告崇德观念。
有得一座座整幢个“小花园洋房”，也分布辣辣比较宽个弄堂里，住房条件参差各别。交关新式里弄，卫生间里有抽水马桶浴缸，灶披间有煤气装置，还曾经有暖气或冷热水龙头，有个有前后天井，前门个天井里可以种花种树。而“石库门”弄堂往往要倒马桶，生煤炉。还有一眼条件老推扳个穷人跻身之地，有个是土砖搭起个简陋房屋，甚至还有像“滚地龙”搿能个地方。
弄堂实际浪是中西融合辣辣上海创新个、便利个居住建筑形式。辣一整块block里，有个是几条横弄堂由一条比较大个直弄堂贯穿，两头出口通到马路。居民一排一排个分布居住辣一道，弄堂个墙壁相连较多，既有安全感，又构成一个内环境，弄堂里向往往成为一个小个社区，一个弄堂里个小囡常常辣一道白相，大人也忙时勿见闲时见，低头勿见抬头见，大家侪有几分熟悉，有个长住个老人还可以讲出搿条里弄里向每家每户个老底子个事体，如数家珍。有个弄堂还有一个弄堂特有个风气，大弄堂口有个公用电话亭，有个卖零碎常用品个“烟纸店”，有个还有一爿小个剃头店。更加有人情味个是，弄堂口就直角连接牢马路，沿马路一连开满了各种邪气实用个生活用品小店，商店里个物事适者自然分布。搿眼居民需要个店铺，交关是做小本生意个，假使辣辣烧小菜辰光临时酱油、盐、糖用完了，奔出弄堂竟可以马上买回来接下去拿小菜烧下去。
勿像北京老多个地方，商店离开居住楼老远个，工人新村是成排成堆大面积建设，有个辣里向头个家庭，要走到马路浪需要十分钟一刻钟，走到有集中个店铺地方还有老长个一段路，葛咾勿得勿每家人家必备一部脚踏车，夜里绑辣辣楼梯旁边。据说，刚刚解放辰光北京要造大量个居住房，是用上海搿能介个模式还是苏联个模式，有过争论，当时当然是苏联模式取胜。
而上海个两条横马路之间个block，就是脱巴黎、伦敦市里个大小是差勿多个，马路个宽狭脱仔弹格路个路面也脱西欧相同，里弄就囥辣辣繁华个街道之间。
几条相近弄堂就形成了一个行政社区，设立居民委员会。20世纪50年代初，居委会活动比较活跃，宣传婚姻法、妇女解放，有奖储蓄，组织里弄识字班、扫除文盲，组织每周六个学习读报。我记得阿拉里弄是居委会主任自家用上海话读报个，一到辰光就摇铃请大家到伊个屋里向客堂间坐下来参加学习，搿个辰光闲居个家庭妇女多，所以愿意出来为大家做事体个人也多，大家叫伊拉为“某大姐”。还有里弄黑板报，有个弄堂还有报栏。每周一趟弄堂大扫除，冲水扫地，里弄干部一道出来带头打扫。到1956年以后事体更加多，因为常常有突击运动，像除四害集中捉蚊子，药老虫，除臭虫，打麻雀，消灭蟑螂，帮助孤老打扫卫生咾啥。当时也集思广益搞活动，活动花样也交交关关，一到节日像“五一”、“十一”，弄堂口就挂灯笼结彩带，各处弄堂侪有，有点比赛啥人个节日气氛浓个味道。社区有各种演出，当时有一点活跃分子，或者学得一技之长个，也会出来表演，像变戏法，唱沪剧、越剧。我记得有趟借用学堂操场搭台演戏，戏法变起来，唱整场个《碧落黄泉》、《楼台会》咾啥。我当时老是等节日来到，轧辣大人堆里坐辣长凳浪向看戏，第一趟听到沪剧介好听，看到戏法介稀奇，从小就弄出兴趣来了。我记得有一次夜里向个居委活动有一个人拿弄堂里个一些积极分子个姓名穿插到一段庆祝国庆个文章里，第二天还用毛笔抄出来，请大家猜，猜出来个可领奖，可见50年代辰光啊，弄堂居民个互相熟悉程度。组织活动卖力个干部会得到上级奖状，伊拉老看重了。诗人邵洵美个夫人是盛宣怀个孙女也算得是名媛，伊担任过居委干部，还得到过奖状。后来就勿对了，一眼眼强调“千万勿要忘记阶级斗争”，一点过去或者家庭历史有眼“问题”个，搿眼人侪拨换下来了，大家之间也开始变得要“防一脚”了。”
居委干部也常常挨家挨户检查卫生，查有勿有蟑螂。拉开抽屉，看到个侪是宣传画片，封面翻烂脱个连环图画，工作手册，一点可能当作“资产阶级香风臭气”之类个东东，譬如过去个电影明星画报、解放前留下来个“黄色唱片”，侪老早已经囥之夭夭了。禁牌辰光，里弄干部到各家去看看阿里一家过年还缺少年货，有啥困难，正好碰着退休老妈妈辣八仙桌浪围辣海，台浪摊了绒毯，辣轻悠悠个筑方城，一位老太太打破僵局，对干部笑笑讲：阿拉辣“学习144号文件”（麻将一共有144张）！
词语解释：
144号文件：麻将一共有144张。
啊！上海弄堂（下） 作者：钱乃荣； 朗读：牛美华
----上海岁月寻踪之四
弄堂是海派世相个载体，老难一眼洞穿。
弄堂里向顶有生态个是小朋友个弄堂游戏。我从小会做个各种童年游戏，侪是辣弄堂里学会个。搿个辰光，弄堂里小孩老多个。因为各家个家教勿一样，有一堆小囡拨人家称为“野蛮小鬼”，也有文雅小囡个一圈，各有分布；有个是两条弄堂勿一样，大家会寻合意个地方去合群。有个大弄堂还有小囡王，邪气有义气，带领一帮人，帮助有困难个小囡屋里做家事，有常时则成事勿足败事有余，调皮捣蛋，增添麻烦。一到下半天四五点钟啊，弄堂里就是小八腊子个世界。
小个小囡有“笃笃笃，卖糖粥，三斤蒲桃四斤壳”个游戏，大点个小囡有踢毽子、跳绳咾啥，男小囡踢小橡皮球，官兵捉强盗，女小囡跳橡皮筋、造房子，男个女个一道白相个有“马铃打”（falling down）、“司到扑（stop）”，搿两个侪是来自西方个游戏。还有着象棋、五子棋、围棋、陆战棋搭打扑克。有辰光搁起铺板四方大战白相得痛快淋漓，夜饭也勿要吃了。男小囡还常常打弹子、刮香烟牌子，搿两样侪会弄得两手墨黜黑，姆妈是勿拨我去加入个。一旦落雨了，就唱起来“落雨喽，打样喽，小八腊子开会喽！”逃到有威信个小囡屋里向，接下去换种内容白相下去一直到尽兴。搿个辰光各种花样个游戏棋康乐棋咾啥，辣小台子浪图纸一摊就可以白相起来，有眼棋子像蛇梯棋咾啥也是开埠后从西方传来个。一到秋天，有个小鬼头就翻墙拆砖照手电筒捉䟅
童年个记忆弥足珍贵，而大部分个快乐侪辣弄堂里度过，多条弄堂曲折、宽窄勿一样，又四通八达，是大追逃个“官兵捉强盗”脱仔“
大个小人有辣弄堂里溜冰个，我就常常着了跑冰鞋辣弄堂里来来去去，所以后来到农村去走湿泥田埂，掌握平衡交关好，勿会拨乡下小囡嘲笑“扒蹋一跤，烂泥吃饱！”
热天暑假里，4点钟汏好浴就开始白相着棋咾啥游戏了，一到夜里，大家侪从屋里走出到弄堂里乘风凉，辣弄堂路灯下头一堆一堆个人，另是一番风景。日里台上游戏多，夜里围坐游戏多，有边唱儿歌边白相各种游戏个，输脱了要“打千千万万记，现在辰光来不及”个，有猜谜谜子个，有大人来脱阿拉讲“红手绿手”或者鬼故事个，吓得勿敢摸黑回去睏觉。也有谈心个，轧朋友谈恋爱个。后来辣刚刚有黑白电视机辰光，一般个家庭侪买勿起，大家就拎了矮凳到断头个弄堂里去排排坐一道看电视，也交关闹猛。辰光晏了乘风凉还勿过念头个，就躺辣竹榻浪向一觉睏到天亮。
弄堂还是女人个世界。下班回到屋里，大家常庄辣家后门口告邻舍隔壁茄山河搭讪头，互相之间侪熟悉对方个性格告为人。弄堂往往也是上海女人个活动天堂。上海女人崇尚“家政”，辣“买汏烧”方面做得邪气精致，反复讨论研究实验，当一门学问来处理，“邻舍隔壁”、“姊妹道里”常常辣弄堂或者灶头间里互相推介切磋示范。交关叫“某家姆妈”个，侪是“全职太太”，对内是“玉皇大帝”，对外是“公关部长”，是里外“一把手”。还有一点“大家闺秀”，出得厅堂，下得厨房。伊拉侪崇尚礼仪，懂得传统，懂得夫妻相敬如宾，懂得告各方面人际关系交际，是丈夫个贤内助，言语温和，举止文雅，着装得体，常带微笑，彬彬有礼。是伊拉带动了弄堂个大气。交关女小囡从小学会辣绒线衫浪绣十字花，会“挑花绣花”，辣“绒线生活”浪向交流式样。一角洋钱一团线用钢针可以自家勾袜子脱仔织出各种花头，既节省又好美化自家。当然喜欢“戳壁脚”个女人也有，张家长李家短讲人家坏话；也有一种“百有份”个人，大家称之“百搭”，样样事体侪来轧一脚，成事勿足，败事有余。大家侪会鄙视伊。“上路”脱仔“识相”是上海人行为个准则，“拎得清”脱仔“有派头”是弄堂里人人最欣赏个品质。弄堂里个邻居之间相帮修马桶、排电线、做沙发、印照片……评说家常杂事，传播小道新闻，传呼电话间也往往成为互通弄堂新闻个交谈场所，啥个资本家开始落实政策了，插队落户青年啥个条件好回沪了，啥个单位开始加工资啦，侪从这间小房子里传出来。
弄堂门口有小书摊，是小朋友欢喜看书交流个地方。弄堂旁边个“柴爿小吃担”，只要侬需要叫一客，就会辣几分钟里向拿一碗鲜味可口个小馄饨送到侬门浪来。突然停电了，马上可以到弄堂口个烟纸店里买支蜡烛回来。冷天，老年人辣辣弄堂口边谈家常边晒太阳，晒被头㫰衣裳；大热天里向，吊井水冰西瓜。断头个弄堂还是学生子背书温课个好地方。埃个看管弄堂、管理垃圾车个工人，还辣辣弄堂个尽头开垦出一小块烂泥地，种了药草，为居民治小病。辣弄堂幽静个辰光，远处假使飘来方便居民个悦耳个叫卖声，搿个是最沁心个小调了。
代表一个城市个魅力个，是伊个街区生活，而往往勿是搿眼皇家、宗教建筑告机关中心。搿点代代相传个市俗民风，就辣辣上海弄堂个深处。
弄堂里有从小一道长大个玩伴，有同性异性个深交，有真正个性格合群个朋友，互相熟悉家庭底细脱仔习性。几个出窠兄弟，几个结拜姐妹，一道拉琴唱戏曲，弹吉他，结伴一道去同一浴室，一道去看戏听书，通宵去买电影票，买《上影画报》，买明星照片、歌片，换年历片，传连环画，一本小书辣弄堂里传来传去传到封面落脱封底磨破。
过年了，弄堂里家家户户热气腾腾，轧来轧去高高兴兴，有辰光亲眷团聚也只好各家轮班，今朝侬屋里亲朋来，明朝我屋里拜年去，房间也好让出来拨邻居摆圆台，椅子酒杯也好借过去聚餐。搿个就是弄堂里个邻里关系。最令人感动个是，辣副食品告消费品供应邪气紧张，样样需要排长队个日脚里，为了全家，为了“阿拉老头子”，为了“两个小出老”，弄堂里个妇女个个是起早摸黑打冲锋个勇士。啥人买到了好小菜，就家家邻舍侪通知一下；搿趟是侬帮我带啥菜，下趟我帮侬去排队，有常时辣队伍里多摆一只篮头、照看一只凳子。我母亲第一趟中风辣陌生头掼倒，就是拨辣旁边个邻居一把拉牢，马上送医院抢救脱险；我个太太阑尾炎突发，也是我个邻居推了脚踏车送到医院。碰到“文革”患难辰光，连一向养尊处优个资本家太太，也会“独当一面”，挺身排除万难，辣邻舍个帮助关心下勿慌勿忙度难关。即使辣“红色恐怖”一个下半日可以洗劫一空个抄家日脚里，当“红卫兵”用大卡车装满一车“财物”开到弄堂口，弄堂口个一个老皮匠会跳起身来张开两手揦牢车子：“㑚勿作兴个！天气冷了叫人家哪能过冬？”“革命小将”拨伊个行为感动，从卡车浪掼下来一只箱子。伊进屋叫出儿子一道拿箱子抬到遭难者个天井门口放下。
啊！搿个就是上海个弄堂，搿个就是上海个市民。
上海弄堂是商业社会带来个，脱农业社会文化勿同。上海滩本来就是开放个，伊个人口来自五湖四海，伊个住户勿分贵贱勿分职业，辣弄堂里呒没上级下级，只要能够付清房钿侪好住个，是各管各个松散自由人。辣辣上海可以讲各种语言脱仔方言，语言多元，文化多元。就像上海顶早个“石库门”弄堂从英租界开始造起，体现了中西融合个建筑风格一样，连上海个衣食住行名称也带着点外来元素。从英租界开始造个大路通行载人马车个“马路”开始，上海就辣马路个两边编了号码，建造了一个个弄堂，使用脱“road 、lane、house”音近个“路、弄、号”，取代了过去上海脱仔上海之外个城镇通用个“街、巷、宅”个后缀。上海个弄堂是中西融合造起来个，上海弄堂个文化是典型个海派文化。
上海搿个国际性个都市勿是像其他地方搿能抱团成堆告居住，官员归官员，学者归学者，按团体认同；各管各个上海人，是以上海文化来认同个，而唯一维系上海人身份个标志，搿就是上海话了。搿个是一种文化认同，我赞成易中天教授辣辣《读城记》里向个分析。
上海人高度认同上海话。因为只有上海话方才是搿块地域个族群文化个维系纽带，认同基础。上海话当中有上海个市俗民风、都市文明，积淀辣海上海人个生活习惯，上海人行为、处事个宗旨，凝聚了工作作风、休闲情趣、弄堂情结、生活秩序脱仔游戏规则，还有上海人个习性：识相、上路、活络、煞根、会白相、门槛精、派头大、上台面、桥归桥、勿领盆、拎得清，等等。
上海人辣外地相逢，一开口讲上海话，勿论等级，勿论身份，侪会老快个以共同认同个上海文化而合群，带到伊面去个一个个“小上海”，即使辣上海人侪走光了以后还会存在，搿个就是从弄堂里走出来个上海人个魅力所在。
所以上海人搿能念念勿忘弄堂，上海人搿能重视传承上海话！
词语解释：
䟅
猜谜谜子：猜谜语。
百有份：（件件事）都要插足。
上路：做事通情达理；够朋友，讲义气。
识相：1.安分；知趣；冒犯。2会看别人神色行事。.
拎得清：很能领会，很灵敏。
出窠兄弟：从小在一起玩耍一同长大的朋友。
辣陌生头：冷不防，突然。
勿作兴：不应该；道德上过不去。
活络：灵活。
煞根：过瘾，彻底痛快，厉害的，令人满足的。
门槛精：很精明。
上台面：人的举止谈吐落落大方。
桥归桥：1.各归各地算清楚；2.互不关联。
勿领盆：1.不买账；力争比上超过对方；对压力、强势、威胁等不服、不怕。2.不服输。