泰山文具店 作者：钱乃荣 朗读：丁迪蒙 上海岁月寻踪之七（上）
泰山文具店 作者：钱乃荣 朗读：丁迪蒙
上海岁月寻踪之七（上）
辣淮海中路瑞金一路个转弯角子浪，50年代开始有一家“泰山文具店”，我个青少年岁月，脱搿爿文具店结下了勿解之缘。
我是1956年个夏天考取辣瑞金一路浪向个向明中学个。搿年开学，我姆妈陪我去报到，第一趟走进了搿家气派相当大个文具店里，买了一枝永生牌钢笔脱仔一本学生日记簿，还选了一只可以摆学生证、里向附了几张通讯纸头个皮夹子，从此，我就开始了我个中学生涯。
后来，我辣学堂里需要用个练习簿、拍纸簿、日记簿、工作簿咾啥侪一概辣搿家文具店买个，数学浪向用个圆规、三角尺、量角器、计算尺，化学个量杯、元素周期表，侪到泰山买。因为我欢喜写毛笔字告画图，所以大、中、小楷毛笔、画笔、马利牌水彩颜料、米老鼠蜡笔、炭条、彩色粉笔，从读中学开始侪辣搿搭买。搿家文具店还辣右面专设了一个纸张部，白报纸、铅画纸、牛皮纸、蜡光纸、皱纸、彩色纸、红纸头、硬柏纸、蜡纸咾啥，我统统侪辣搿搭买，而且从此见识了介许多种类个纸张，辣试使用当中，扩展了我个勿少兴趣，像用红纸头写起对联来，用硬柏纸做活动日历板，用彩色纸布置节日房间。初中二辰光，我伲班级办起了《班级周报》，所需要用个大个白报纸、稿笺纸老啥各种彩色美工材料，侪是辣搿搭买个。有常时阿拉写到一半，一种颜料用光，或者红粉笔写光了，可以奔出校门到泰山去买回来接下去做。
泰山文具店设辣搿搭，真是合理布局，旁边有向明中学、晓光中学咾啥共四只中学，还有小学，难怪文具店里一批批学生来来去去，生意交关兴隆。50年代个上海书店、文具店开得老多、老大，还有剧场、书场、电影院、工人文化宫，老多，老闹猛，足见上海文化个繁荣。
跟牢我个读书进程，我常庄去搿家文具店买文具。记得辣初中一年级我读《自然地理》课个辰光，我高高兴兴个买了一只王馀记文具厂出品个鹅牌“指南针”，搿只指南针个质量之高，表面个玻璃、里向个刻度到今朝还明澈得像新个一样，每趟我出国或者到港台，我侪带辣海，用了半个多世纪，拨我带来了极大个方便。1957年，我又辣搿搭买了一只元昌牌368订书机，经常使用，一直用到现在，一趟也呒没坏过。由此足见，迭个辰光上海产品石刮挺硬优质之一斑。
辣上课上到“地球运动和地图”个辰光，我盯牢了文具店里新到个地球仪，看得勿愿意离开，结果对母亲横讲竖讲，硬劲要了钞票来，买了一只当时价格蛮贵个、漂亮个地球仪搬回屋里，开创了我自家决定买大物事个首趟记录。搿个地球仪一直珍藏到80年代。因为球面浪向个地图面貌已经大变，勿再适用了再厾脱，不过附带个一本编写得邪气详细个“地球仪说明书”却还保存至今，现在翻开看看，还能见到当年厂家办事作风个认真，汇总知识个扎实。
由于我爱好气象观测，我还辣泰山文具店买了温度计、干湿度计脱最高最低温度计咾啥仪器。
到了国庆节，泰山文具店里一派节日气氛，墙浪向挂辣海交关各种花式个两头对挂个彩花纸带，便宜来死，我就去选买了两种挂辣我个房间里，带来了节日个喜庆。
辣每年元旦告春节前，店里个一两个显目个柜台里向，摆满了各式个贺年片。当年卖贺年片个地方是老少个，图案告色彩往往老单调，但是泰山文具店个贺年片总归是有点特别，货源多，式样美，图画新型或者精致，除了“恭贺新禧”祝辞，有个还加上佳句，像“祝新年‘三好’”、“喜上眉梢”、“上林春色”、“把青春献给祖国”；有个画图是用水彩笔手工直接画个，每张各有勿同，就有了选择个乐趣；有画国画山水花鸟个，也蛮有水平。我每年侪会选买一眼既便宜又有意思个贺年片，写好有时代色彩个名言，赠送拨知心好友，同时也得到同学个回赠，一年年理好，珍藏辣海。五、六十年代，因为贺年片稀少，反而使我珍藏到现在。到我初中毕业个辰光，搿搭还有小型个、里向有各色彩页个“纪念册”，请各位同学、好友留言，留言当中/留下来个侪是当年个社会气息脱同窗个心声。
我还收集到了交关辣泰山文具店买来个书签，长方形个、下方尖角形个，还有圆个，有个周围还绕满了彩色丝线，框线里镶嵌了风景照片或者戏剧剧照。还有一眼书签浪向还有画上去个彩色画图。
投稿邮箱：llz978@126.com
“学上海话”二维码 扫一扫关注 长按二维码关注