ལྡོང་འཇིགས་སྲས་ཀྱི་སྙན་ངག་ཚན་པ་གསུམ།
གཡུ་ཡི་ཉམས་དགའ།
ལྡོང་འཇིགས་སྲས།
ང་རང་ཤོག་བྱ་མེད་པའི་ལམ་ཁ་དེར།།
འཕུར་བསྐྱོད་ཡང་ཡང་བྱས་ཀྱང་འབྲས་མ་སྨིན།།
ཅི་ལྟ་གཟིགས་ཀྱིས་ཕྲ་བུའི་ཁུང་བུ་ལ།།
སྟོང་བུའི་ལྟ་སྤྱོད་ལྟ་བུའི་གཡུར་འཁྱུག་གམ།།
ཚོར་བ་རླུང་ལ་ལྡེག་འདྲའི་བུ་ཁུངས་ནས།།
སྒྲ་བརྒྱ་ལྡུར་བཞིན་གཅོད་པའི་ལེ་ཆུང་ཡང་།།
གཡུ་ཡིའི་གླིང་ག་རྩེན་པའི་དཀྲོལ་ཐང་ནས།།
བདག་གཞན་ཉམས་དགའ་མཐའ་རུ་ཕྱིན་པར་སྨོན།།
ཚུལ་མཐའ་མི་མངོན་ལྗགས་ཀྱི་གར་སྟབས་ནས༎
འཆད་རྩོད་རྩོམ་པའི་རིག་བློར་དགའ་འཁྱུད་ནས།།
ཐལ་སྒྲ་ཆེན་པོས་ས་ཆེན་དགུ་བསྐོར་ནས།།
རྫོགས་པ་མཐའ་རུ་ཕྱིན་པའི་ཉམས་ལ་འཇུས།།
སྣང་སྟོང་ཆོས་ཉིད་གསར་བུའི་རྟོག་ཡོན་དེར།།
སྐལ་བ་འོད་ཀྱིས་བསྒྲུབ་པའི་སྐལ་བཟང་གིས།།
སྐྱེ་དགུས་ཚོགས་ལ་འཐར་ཐུག་ཞི་བསལ་གྱིས།།
ཐར་བ་ཐམས་ཅད་སྨིན་པའི་སར་བསྒྲོད་ཤིག།
2020~~1~~3~~ཉིན།
。
ཆོས་རྗེ་ལགས།
_____ལྡོང་འཇིགས་སྲས་ནས།
ཞེན་ཆགས་སེམས་ཀྱི་དད་འདུན་དེ།།
ཚོར་བ་སྐྱེན་པོའི་ཐང་གཞུང་ནས།།
གོམས་གསལ་ཡིད་ཀྱི་དབང་ཤེས་བཞིན།།
བསུབ་པ་མེད་ཅིང་རྒུད་པ་མེད།།
སྨོན་ལམ་ཆེན་པོས་ཡིད་བཞིན་ནོར།།
དགོས་པའི་དོན་ཀུན་འགྲུབ་མཛད་དེ།།
སྣང་སྟོང་ཉམས་པའི་མཛེས་སྐྱེམ་ནས།།
ལེགས་བཤད་བསྟན་པའི་དགྱེས་མགོན་བྱེད།།
བསྟན་དང་བསྟན་པའི་གཞི་ཡང་རྩེན།།
འོད་དཀར་འཁྱུག་མུའི་འགྲོ་དྲུག་འདེགས།།
གཞུ་དབྱངས་ལྷོད་པོའི་དག་ཁམས་སུ།།
དྲིན་ལྡན་དད་པའི་ཞབས་ཀྱིས་སྐྱོང་།།
ང་ནི་སྟོན་རླུང་རྒོད་པོའི་ཁར།།
བགྲམ་ཐང་ཆགས་པའི་འཇག་སྐྱ་དེ།།
ཡིན་ཡང་དད་པའི་རིན་ཆེན་ནོར།།
ནམ་ཡང་ཁྱོད་ལ་འབུལ་བས་འདུད།།
20_20_1_15_བླ་རུང་ནས་ལྡོང་འཇིགས་སྲས་ཀྱིས་སོ།།
དགུན་རྒྱ་སྟག
_____ལྡོང་འཇིགས་སྲས་ནས།
སྣང་བའི་མེ་ལོང་ངོས་སུ།།
དྭངས་བའི་ཉི་ཟེར་གསལ་ཡང་།།
དྲན་དྲན་ཞེ་ལ་ཐོགས་པའི།།
དབྱར་ལྗོངས་སྒེག་མོ་དྲན་གི།
རྩྭ་སྐྱའི་འཇག་ཐང་པང་གི།
འཇག་མ་མཁོ་དགོས་མང་ཡང་།།
མཛེས་མཛེམ་མགོ་ལྕོག་ལྡེམ་པའི།།
འདབ་གྲོལ་པད་མོ་ཡིད་བརྐུས།།
དགུན་ཁ་ཙག་གིས་བསྡམས་པས།།
ཙག་རླུང་བསེར་བུ་ལྡང་དྲགས།།
འཇམ་མཉེན་ལུས་ཀྱི་དུད་པས།།
སྐྱིད་ཆུ་ལམ་མེར་བཀྲ་འམ།།
ཁ་གཏམ་ལུས་ཀྱི་དབུ་བ།།
མ་ཤི་གསོན་པ་དབྱེ་མེད།།
མཆོད་མེ་འོད་ཀྱི་དུད་པས།།
ནམ་ཞིག་གསོན་པ་གྲུབ་བམ།།
གངས་རྒྱུད་མི་བོ་གང་གིས།།
ཡིད་འོང་སྟོད་ལ་བཏགས་པའི།།
གངས་རྒྱན་མགོ་བོ་མེ་ཏོག།
དགུན་རླུང་སྐྱ་བོས་ལྡག་གམ།།
2020__—1__—29_—ཉིན།
༄༅། །སྐུ་ཉིད་གངས་ཅན་རིག་མཛོད་འཕྲིན་སྟེགས་སུ་ཕེབས་པར་དགའ་བསུ་ཞུ།