སྤྱོད་པའི་རིམ་པ་དེ་དག་གི་དོན་བསྡུ་ན། དང་པོ་གནའ་དེང་གི་རིག་གནས་སློབ་གསོ་འདི་འཕེལ་རྒྱས་སུ་བཏང་སྟེ་མི་རིགས་སྤྱི་ལ་རིག་གནས་ཀྱི་དཔངས་ཚད་ལྡན་པ་དང་།
ཁྱད་པར་ཆེད་ལས་ཀྱི་མཁས་པ་མང་ཙམ་སྐྱེད་སྲིང་བྱེད་ཐུབ་ན་མི་རིགས་རང་ཉིད་སྟོབས་ལྡན་ཞིག་ཏུ་གྱུར་ནས་ཆོས་དང་འཇིག་རྟེན་གྱི་བྱ་བ་གང་ཡང་སྒྲུབ་ནུས་པ་ཞིག་ཏུ་འགྱུར་གྱི་ཐམས་ཅད་བླུན་པོ་ཁྱུ་གཅིག་ཏུ་སོང་ཚེ་ཡར་རྒྱས་ཀྱི་རེ་བ་མེད་པས་སློབ་གསོ་ལ་ནན་ཏན་བྱ་དགོས། དེ་ཡང་རང་རིགས་ཀྱི་རིག་གནས་དང་ཡུལ་ལུགས་ལ་གཙིགས་སུ་མ་བཟུང་ན་ཇི་ལྟར་མཁས་ཀྱང་རིམ་བཞིན་རིགས་གཞན་ཞིག་ཏུ་གྱུར་ནས་ཕ་མེས་ཀྱི་རིགས་དེའི་མིང་དོན་གཉིས་ཀ་བོར་བས་མི་རིགས་ཀྱི་ལོ་རྒྱུས་མཇུག་རྫོགས་པར་འགྱུ ར་བས་ཤིན་ཏུ་བག་ཟོན་བྱ་བ་གལ་ཆེ༑ ཡང་གལ་ཏེ་མི་རིགས་ཀྱི་ངོ་བོ་མ་བོར་བ་ཙམ་ཡོད་ཀྱང་འབྱོར་བ་ཅི་ཡང་མེད་པའི་དབུལ་པོ་ཡི་དྭགས་ཀྱི་ཡུལ་ལྟ་བུ་ཞིག་ཏུ་གྱུར་ན་དབུལ་ཕོངས་ཀྱི་སྔུག་བསྔལ་ཉམས་སུ་མྱོང་བ་ལས་བདེ་སྐྱིད་ཀྱི་འཚོ་བ་ཞིག་མི་འོང་། བོད་མི་དམངས་སྤྱིའི་འཚོ་བ་ཡར་རྒྱས་མ་བྱུང་ན་གང་ཟག་འགའ་རེ་བདེ་བ་ཙམ་གྱིས་མི་འོང་བས་ཐུན་མོང་དུ་འབད་བརྩོན་བྱ་དགོས། ལར་གནས་སྐབས་ཐམས་ཅད་དུ་བོད་མི་རིགས་སྤྱིའི་དོན་ལ་བསམ་བློ་གཏོང་རྒྱུ་འདི་ཅི་བས་ཀྱང་གལ་ཆེའོ། །
དེ་ལྟར་བསམ་པ་བཟང་པོ་གཞན་ལ་འཚེ་བ་སྤོང་འདོད་དང་། ཕན་པ་བསྒྲུབ་འདོད་ཀྱིས་བོད་ཆོལ་ཁ་གསུམ་ན་གནས་པའི་མིའི་འགྲོ་བ་མ་ཟད་རང་རེ་དང་མཉམ་དུ་གནས་པའི་འབུ་སྲིན་རི་དྭགས་ཡན་ཆད་ཀྱང་འཚེ་བ་མེད་པར་བདེ་བའི་ངང་དུ་གནས་པ་ཞིག་དང་། དཀོན་མཆོག་ལ་དད་པ་དང་ལས་འབྲས་ལ་ཡིད་ཆེས་ཀྱིས་དགེ་བ་བསྒྲུབས་ཏེ་ཚེ་ཕྱི་མ་ལ འང་འགྲོ་ལམ་ཡོད་པ་ཞིག་བྱ་རྒྱུ་དང་། ཡ་རབས་ཀྱི་སྤྱོད་པ་བཟང་པོ་སྤྱི་དང་ཁྱད་པར་དུ་དེང་དུས་དགོས་པ་སྐབས་སུ་བབ་པའི་བྱ་བ་གོང་དུ་བཤད་པ་དེ་རྣ མས་བསྒྲུབས་ཏེ་རང་རེ་ལ་ཚེ་འདིའི་བདེ་སྐྱིད་ཡོད་པར་མ་ཟད་མ་འོངས་པའི་བུ་རབས་ཚ་བརྒྱུད་དང་བཅས་པ་ལའང་ཚེ་འདི་ཕྱི་གཉིས་ཀར་བདེ་སྐྱིད་ཀྱི་མདུན་ལམ་ཡོད་པ་ཞིག་བྱ་རྒྱུ་ལ་ནི་བོད་མི་ཐམས་ཅད་ཀྱིས་བསམ་བློ་གཏོང་འོས་པ་ཞིག་དང་། བྱ་བ་བསྒྲུབ་དགོས་པ་ཞིག་ཡིན་པས་གངས་ཅན་གྱི་སེར་སྐྱ་ཕོ་མོ་རྒན་གཞོན་ཡོངས་ལ་ལྷག་བསམ་རྣ མ་པར་དག་པས་དེ་སྐད་གསོལ་བ་འདེབས་པ་ལགས་སོ། །
བྱམས་བརྩེའི་འོད་ཁྱིམ་འཕྲིན་སྟེགས་སུ་ཕེབས་བསུ་ཞུ།
རང་གི་གསོན་གཞན་ལ་བརྒྱུད་སྐུར་གནང་རོགས།