广东人已经Hea到，连Hea字都唔识写？
广东终于入秋成功，呢几日天气都非常清凉，间唔中仲有几滴雨水，真系非常适合Hea，啊，唔系，系返工！
不过话时话，其实Hea下又冇咩嘅，Hea下Hea下又落班了，Hea住做又可以等下星期继续做，又真系几爽。（阿咩从远处向我发射穿墙光波）
相信各位自己友嘅“Hea下之道”，一定已经到咗炉火纯青嘅地步（系就认咗佢，唔好怕丑），人人都识讲“Hea”，但系唔系人人都识得写呢？到底“hea”又有冇正字呢？
“Hea”系香港流行用语，亦系最能高度概括广东人气质嘅一个词。
“Hea”音可能源于客家或潮州音，呢个词语大约喺二十世纪九十年代末开始流行，到咗1997年，香港摇滚乐队Beyond喺《请将手放开》专辑内嘅《游戏》歌词入面已出现呢个用语：
宁愿继续游戏
别糟蹋剩馀既自己
跟班friend Hea到天光
找几段光阴一起荒废
……
亦有话系Beyond成员用嚟形容树獭神态嘅用语，因为佢哋都系台山人，所以亦可能系台山嗰边嘅发音（详情可参看《Hea的正写就是Hea》一文）。
再到二十一世纪初，果汁饮品利宾纳（Ribena）喺广告中使用呢个词语：手提利宾纳，出街hea嘅指定饮品。
自此之后，“Hea”开始发围，越嚟越多人知道并且使用。甚至乎连王杰嘅热门歌曲嘅歌词都一度畀人改成：可以Hea的话，不会喐。
再到后嚟黄伟文喺自己出版嘅书《俗loud》中，将“Hea”音创造出喺“辶”上作“喜”：
但此字争议较大，喺古粤语嘅本意有用手“翻”同“找”嘅意思（所以使用“辶”作为偏旁系有误嘅），使用语境与粤语常用嘅“揾”相近。但古粤语喺生活当中随着使用语境不断变化，其含义也会不断引申和变化。
到底“Hea”有冇正字？网络上众说纷纭：迤、呬、嬉、憩、愒、歇、戏……个个都讲得出大条道理。
更有一个说法“Hea”源自英文嘅hang around，意指：游荡。除此之外，“lounge around”也可以解释到“Hea”嘅由来，意为很悠闲地或懒洋洋地消磨时间。所以“Hea”可能就系写作“Hea”。
由于“Hea”出世得比较迟，所以想要喺字典度搵到同音字都比较困难，所以，极有可能，佢嘅正字就系佢自己！（凡事冇绝对，或者迟啲真考究到出嚟！）
而到底咩情况下可以使用“Hea”，佢喺唔同嘅意境之下，又有唔同嘅解释，例如：
①
例句：不如出嚟Hea吓。（不如出来打发时间）
意为：漫无目的地打发时间，通常是指消遣或聊天。
②
例句：你个人好Hea。（你的为人很不认真）
意为：态度不认真或无所事事。
③
例句：你Hea住嚟玩嘅。（你玩都玩得不认真的）
意为：有敷衍的意思。
但其实，喺粤语之中，除咗“Hea”之外，原来仲有几个古古怪怪嘅“斋识讲，唔识写”嘅词。
第一个一定要讲一下呢个“Pea”。佢并唔系英文嘅“豌豆”。喺表达上，佢同“Hea”意思相近，一般只作为形容词使用，形容他人态度散漫、不认真。
例句：你冇噉Pea喇！（你不要那么颓废）
而除咗“科学地”探讨如何形容“蛇王”之外，仲有佢，专门嚟形容老世对我爱嘅“鞭策”：
“Chur”，既可以作为动词，也可以作为形容词，例如：
①
例句：今日星期五，老世真系Chur到我尽，好攰啊！
意为：形容事情很辛苦很困难，令人喘不过气来。
②
例句：为咗可以攞到呢个项目，日日Chur尽都要砌掂佢！
意为：全心全意、尽全力去做一件事，或者为一样嘢付出。
③
例句：个同事，日日Chur我要我帮佢呢样，帮佢嗰样！
意为：不断问人嘢、要人帮自己做嘢。
④
例句：通处亦禁烟 冇得Chur你仲掂唔掂（林海峰《劲歌金曲》）
意为：食烟嗰阵大啖吸气
而之前，仲有一个红咗好一段日子嘅——
喺2010年TVB嘅万千星辉颁奖典礼上，司仪郑裕玲要求最后五强嘅最佳男主角竞逐者作出chok样，而当时嘅人气偶像林峰“表演”Chok样时表现最好（因为就系佢嘅老本行！），因此佢被传媒誉为第一代“Chok王”。一齐嚟感受下咩叫Chok喇：
▲马明心目中嘅“Chok”样
啊，唔好意思，放错咗，系呢个先啱：
其后，chok一词就风靡网络传媒并且被大众广泛使用，成为咗潮语，更演变成林峰其中一个专有名词。但系近年来，常常被解释为使人窒息，慢慢演变成一个贬义词喇。
但其实，呢个字系有正字嘅，写作“擢”，粤拼为：zok6。不过大多数人（特别系香港地区）都系用Chok较多，所以甚少有人知道正字点写。
唔识写嘅字有好多，但创造力系无穷无尽嘅！
其实喺粤语之中，仲有好多我哋成日讲但系未必识得写嘅字；而且因为受到香港嘅影响，有好多都系由英语翻译而成，例如：的士、揸Fit人之类……
最近《牛津字典》将“add oil”新增入字典之中，话唔埋有一日以上嘅粤语词，都会好似当年嘅点心（Dim sum）一样被收录入字典之中，再次成为一种文化输出。
最后，等吖鸭送个经典视频畀大家
庆祝一下，星期五嘅到来！
▲《新紮师妹》
各位自己友
你哋仲有边个识讲唔识写嘅字词？
或者边个你觉得存在异议嘅字词？
快啲留言同大家分享一下喇！
往期精选