晚来天欲雪，共食菜饭否？

今年个冷天来得早也类得急，霜也朆大打，雪已经来哉。

一到大冷天，人就懒哉，赛过只煨灶猫。实梗冷漓漓个天，作兴只有一碗菜饭，再会得让人有劲道吧。

菜饭，顾名思义，就是菜搭饭个结合体。当然啦，苏州人个菜饭弗单单有菜，有饭，还要放咸肉个，搿勒也叫咸肉菜饭。

 菜  是菜饭个精华 

伲用个是大菜，打过霜个大菜，也叫青菜。搭北方个统称弗一样，江南地区讲着个“青菜”是一只品种菜，白菜个改良品种，古称“菘”。

李时珍《本草纲目·菜一》里就有记载：“菘即今人呼为白菜者，有二种。一种茎圆厚微青，一种茎扁薄而白…”

茎圆厚微青个“菘”经过江南人个改良，就变成功仔现在生青碧绿个青菜哉。

烧菜饭，最好要用“矮脚青”，该个是本地青菜个一只品种。菜身矮，叶爿厚，包得紧，矮兜兜生生青，圆孛伦登个，搿勒叫俚“矮脚青”。

打过霜个“矮脚青”菜梗头浪个肉头厚实，颜色鲜泽，吃口好，滋味浓，苏州人讲“霜打个青菜赛羊肉”。

 饭  是菜饭个灵魂 

“白米饭”是江南人的主食，勒海六千年门前，苏州人就已经种植食用粳稻哉，唯亭草鞋山遗址出土个炭化粳稻就是最好个证明。

稻米个品种也多，总个来讲有粳，籼，糯三种。糯米大家侪晓得，黏性香软，一般用来做糕团个；籼米吃口干硬，现在弗大常吃哉；而粳米味道香，吃口韧，是烧菜饭个不二选择。

本地粳米吃口更加绵软，弗易夹生，搿勒无不大镬灶头个城里人家烧菜饭，一般侪用本地粳米。有辰光为仔让菜饭更加软糯，也有人家会得镶一滴滴糯米进去。

 咸肉  是菜饭个点缀 

苏州人讲“小雪盐菜，大雪盐肉”。肉，要用上好个五花肉，切成功三节头阔个条状，着仔盐花均匀个搓勒肉浪，然后放勒缸里，压好石头盐。

烧菜饭个咸肉弗能多，一般切成小丁，最好拖点壮肉，烧个辰光还能煸出点油，吃勒海更加肥笃笃。

 猪油  是菜饭个秘方 

一抄猪油一碗饭，再是苏州人搭冷天厮守个原因。

猪油一般要用猪板油熬，用小火慢慢叫烧，熬到出油，水分全部蒸发，镬子里个板油侪变成功黄颜色个油渣，就好捞出来哉。

实梗熬出来个猪油，乳白饱满，晶莹剔透，拌一抄勒菜饭里，吃得人满嘴留香。

烧菜饭个辰光也要注意，咸肉、青菜要先勒铁镬子里鋍一鋍，然后再搭新米一淘进锅烧。

刚出锅个菜饭，每一粒米浪侪染仔青菜个色泽，着仔咸肉个咸鲜，蒸腾个热气下泛仔莹润个光。碧玉夹柔珠，间或胭脂红，猪油一拌，更像着仔色一样个鲜活起来，让人食指大动。

老法头苏州人屋里侪有焐窠，焐窠焐出来个菜饭韧纠纠，肥笃笃，来得个好吃。假使勒乡下头个大灶头浪烧，还有一层得底个饭䊓，就更加香哉。

立冬过后，新米收获，大菜打霜，新雪初降辰光，弗来一碗菜饭尝尝？

文 | 予安

版 | 予安

图片来自网络

  往期导读