[麦唐作]土豆泥

素材、朗读、图片：唐厂长

文字：麦小姐

歌曲：周华健《亲亲我的宝贝》

过好年之后，有一日，我囡儿一本正经脱我讲：“爸爸，侬啥辰光好烧只菜拨我吃吃[口伐]？”伊今年快读两年级了，难难般般脱我提啥要求，外加还是搿种吃个高头个要求。葛末我就问伊唻：“侬想爸爸帮侬烧点啥吃吃呢？”“土豆泥！”啥？！土豆泥啊！除脱埃爿“白头发老头子饭店”，其他地方或者家常小菜，我像啥还真个呒没碰着过迭只“老鬼三”唻！

我平常是勿大开伙仓个，一般侪是到老个埃搭去吃，实话实讲，自家烧菜末，基本浪向也就是中学水平。不过，既然小人开了口，我也想尽量满足伊。勿就是土豆泥嘛，问问朋友同事，辣网浪向查查，好像也呒啥难个。主料大家侪晓得了，最好再准备眼牛奶脱黄油。配料末，根据自家个口味，侬可以就搿能清打清个吃，也可以加点青豆、番麦子、胡萝卜丁，增加色面脱口感。当然，盐是肯定要摆眼个，否则就一点味道也呒没了，乃末我呢，还会得撒一点点胡椒粉用来提香。

我先去超市买了两只大小中中叫、品相光生点个洋山芋，回来汏清爽。上镬蒸前头，最好用小刀先辣洋山芋个表皮浪向划个几条杠杠，搿能蒸熟之后剥皮就便当点了。蒸个过程大概需要半个多钟头，等个辰光，可以拿配料准备准备。番麦子脱青豆侪有买现成个，只要汏汏清爽就可以了。胡萝卜末稍许复杂点，汏好，还要切成小方丁。

洋山芋一般蒸个四十分钟左右就差勿多了，侬假使吃勿准，也可以用根筷子凿凿看伊个软熟程度。等伊稍为冷冷就好剥皮了。利用搿一歇歇个辰光，趁镬子里向刚刚蒸过洋山芋个水还烫勒盖，也覅浪费，可以拿刚刚准备好个配料摆勒里向汆一汆，汆好之后，用漏勺[扌律]干水分撩出来。

挨下去要准备好只空碗，碗底呢最好先铺个两片黄油，蒸熟个洋山芋摆辣上头，用硬质点个不锈钢调羹拿伊揿碎揢烂。洋山芋个余热正好可以让黄油烊脱，再倒点牛奶进去，乃末就好一道搅拌了。牛奶可以先少加点，觉着厚末，再逐点逐点加，搿能勿会一记头弄了忒薄。拌个过程是需要点耐心个，为了口感细洁，最好是尽量拌了和一眼。要拌到哪能再算好了呢？我学到个经验是，拿根筷子插到碗里，拔出来个辰光，如果筷头浪会得着一点点土豆泥呢，葛末就算拌到位了。

好像到现在为止我还呒没加过调味，覅极覅极，喏，等土豆泥[扌周]好末，就可以加盐了。脱加牛奶一样个，先少眼，拌和之后尝尝看味道，淡末再加。如果侬欢喜胡椒粉个辛辣，也可以撒点进去，再拌拌和。接下去就好装盆了。寻只底平一点个盆子盖辣碗高头，然后拿只碗倒扣过来，手势脱倒扣肉或者八宝饭差勿多。当然，假使侬对“拗造型”勿大讲究个说话，直接辣碗里舀来吃也是呒没问题个。最后还有阿拉刚刚前头准备好个配料----青豆、番麦子、胡萝卜丁，可以拿伊拉拌勒土豆泥里向，也可以像浇头一样盖勒土豆泥高头，搿就随侬欢喜了。

好了，今朝唐厂长脱大家分享了我自家亲手做土豆泥个过程，至于味道哪能末，反正我囡儿是蛮买账个啦！

（20180312）

我们近期还发过：

【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》及《上海话小词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。

本公众号发布内容（包括文字、音频及未注明“来自网络”的图片）皆为原创，作者保留对作品的著作权。未经授权允许，不得擅自转载。

如有需要转载或其他工作邀约：

可添加微信号：Leslie_0207 

或邮件：[e-mail]

多谢您的支持和欢喜！