姑苏文化（音频）| 予安：花香玳玳（苏州话）【转发】

（转自“苏白学堂”公众号）

园子里个玳玳花开哉，

小折折里隐勒叶爿间，花香倒是一阵阵个。

今年个年势弗大好，

日脚过得木知木觉，闻着花香再发现，春天到哉。

勒苏州，玳玳花搭白兰花、茉莉花合称三花，盛产勒虎丘、长青一带。花期从每年个五月里到八月里，玳玳花最早，白兰花次之，茉莉花稍微要晏点。

白兰花香清，茉莉花香雅，侪是常见个香花。每年天暖热起来个辰光，卖花娘娘就会得勒路边叫卖。白兰花用铁丝一串两朵，好挂勒钮头浪、提包浪，茉莉花一般侪做成功手钏，或者香包。

搭俚笃比起来，玳玳花就弗大常见哉，作兴倷看见仔也认弗出来。

玳玳花花型弗大，花开五爿，叶爿厚，颜色白，星星点点囥拢勒绿叶当中。有人讲，像煞是橘子花，确实，玳玳花就是柑橘属个，搭橘子花是姊妹。

玳玳花小归小，存在倒是感极强个。花香得肆意，招蜂引蝶，赛过一个有脾气个娇小姐。还是花苞个辰光就有一阵阵个香气散发开来，等到开翻，更加袭人。

花谢脱个辰光也蛮有个性，五爿叶子挨一挨二特光，只挺下来当中个一根花蕊头。而就勒该根花蕊头浪，会得结出一只玳玳柚。

假使倷弗去采俚，玳玳柚会得过冬，一脚结到开年春天。勒同一根丫杈浪亦开出新个玳玳花，结玳玳柚，两代果实生勒同一棵树浪。实勒，有人讲，玳玳花就是因为果实代代相继而得名个。

变黄个玳玳柚勒树丫杈浪好挂多年，假使倷弗去碰俚，到第二年或者第三年亦会得返青，来得个有劲。搿勒，玳玳花也叫回青橙。

玳玳花好泡茶，美容养颜，玳玳柚能入药，治疗积食，就是现在像煞弗多见哉。

其实骨仔，从明嘉庆年间起，苏州虎丘山塘一带因为人文地理搭仔水陆便利，就成为仔整个江南地区个花木贸易中心。清朝画家蒋宝龄有诗云：“蘋末风微六月凉，画船衔尾泊山塘。广南花到江南卖，帘内珠兰茉莉香。”讲个就是当时个辰光个花市胜景。

也就因为花木贸易个繁盛，勒虎丘山塘一带，诞生仔独特个花神崇拜。先后起仔四座花神庙，勒每年花神娘娘生日个辰光还有百花赏红个习俗。而勒民间也是家家人家，遍植香花，再常见个就是“三花”哉。《元和县志》里就有实梗个描述“山塘映清溪，人家种花树”。

但不过因为搬迁等原因，现在个花市已经弗见，花农也侪转业，要觅三花，是要废一番功夫哉。

据说虎丘要恢复花神庙，弗晓得到辰光阿能重现花市盛景，寻一朵玳玳青柚。

还好伲屋里个玳玳花还勒肆意个开，花香一阵阵个，搭月季芍药竞芳颜。

文 | 予安

版 | 予安

转自：“苏白学堂”公众号

本期编辑|木子棉、怡宝

审读|吴婷

责任编辑|老甘

投稿邮箱：[e-mail]

往期导读