སྙིང་གཏམ་ཡིད་ཀྱི་འཁྲི་ཤིང་་སྒྲ་ཡིག་གཉིས་ཆ་ཚང་། བསྟན་འཛིན་ནོར་བུ།

དྷཱིཿ  སྙིང་གཏམ་ཡིད་ཀྱི་འཁྲི་ཤིང་ཞེས་བྱ་བ།

 རབ་འབྱམས་རྒྱལ་ཀུན་སྤྲོ་བསྡུའི་བྱེད་པོ་མཆོག །དཔག་ཡས་ཞིང་དུ་རྒྱལ་སྲས་སེམས་དཔའི་ཚུལ། །བདག་གི་སྐྱབས་གཅིག་མི་ཕམ་ཆོས་རྗེ་ཡིས། །དོན་བརྒྱུད་ཕ་ཕོག་ཁྱེད་ལ་སྩོལ་གྱུར་ཅིག །དལ་ཅིག་གསོན་དང་སྙིང་འདྲའི་མཛའ་གཅུགས་ཀྱེ། །ཤིན་ཏུ་རྙེད་དཀའི་དལ་འབྱོར་མཆོག་རྙེད་ཅིང་། །ཟབ་རྒྱས་གདམས་པའི་ཆོས་དང་འཕྲད་དུས་འདིར། །ཕྱི་མར་ཕན་པའི་ལྷ་ཆོས་མ་བསྒྲུབས་ན། །དབང་མེད་ངན་སོང་གནས་ལ་འཕྱན་སྐབས་སུ། །འགྱོད་པའི་མེ་དཔུང་སྙིང་ལ་མཆེད་ཏ་རེ། །སྤངས་རྟོགས་མ་ལུས་མཛོད་ལ་དབང་འབྱོར་བའི། །རྒྱལ་བའི་གོ་འཕང་ཚེ་འདིར་བསྒྲུབ་འདོད་ཀྱང་། །མཐུན་རྐྱེན་མཐའ་དག་ཚང་བ་ཉིད་ལགས་པས། །ནོར་བུའི་གླིང་ནས་སྟོང་ལོག་མ་བྱེད་ཨང་། །སང་གི་དུས་དང་ཕྱི་མའི་ལས་སྣང་གཉིས། །སྔོན་ལ་གང་འབྱུང་སུ་ལ་ཅི་ཆ་ཡོད། །བློ་སྣ་བསྟུངས་ལ་དམ་ཆོས་མ་བསྒྲུབས་ན། །འཆི་བདག་དྲུང་དུ་ཐོན་དུས་ཡ་རེ་ང་། །གཞོན་ནུའི་དུས་ནས་དེ་རིང་ཡན་ཆོད་དུ། །མི་དགེའི་ལས་དང་བག་མེད་ཁོ་ན་ལས། །བློ་གཏད་ཁེར་བའི་དགེ་བ་སྣ་གཅིག་ཙམ། །མ་འགྲུབ་བདག་འདྲར་གྱུར་ན་སྡུག་པོར་འདུག །དགྲ་འདུལ་གཉེན་སྐྱོང་ཆོས་བརྒྱད་སྒྲུབ་འདོད་ཀྱིས། །ཚེ་གང་འདས་ཀྱང་ཕན་པ་འདུག་གམ་སོམས། །ཚེ་སྔོན་འཁོར་སྒྱུར་གོ་ས་མང་ཐོབ་ཀྱང་། །ད་ལྟ་བསམས་ན་མདང་སུམ་རྨི་ལམ་དང་། །ཇི་ལྟར་བསམས་ཀྱང་ཁྱད་པར་མི་འདུག་པའི། །ཚུལ་འདིས་འདི་སྣང་མཐའ་དག་མཚོན་ནུས་ཕྱིར། །བག་མེད་སྤངས་ནས་བྱང་ཆུབ་སྒྲུབ་རེ་རན། །ལོ་བརྒྱ་ལོན་དུས་ས་སྟེང་འགྲོ་ཀུན་ཚོགས། །གཅིག་ཀྱང་མི་ལྷག་འཆི་བའི་ལམ་འགྲོ་ན། །རྙེད་བདེ་གྲགས་བསྟོད་མཁའ་དང་མཉམ་སྲིད་ཀྱང་། །ཡུན་ཐུང་ངེས་པ་མེད་ལ་སུ་ཞིག་ཆགས། །ས་སྟེང་ཡོ་བྱད་བདག་གཅིག་ལ་དབང་ཡང་། །ཆོག་ཤེས་མི་སྲིད་སླར་ཡང་འདོད་པས་གདུང་། །དེ་ཕྱིར་ལྟོ་འགྲང་ལྷགས་སྐྱོབ་ཙམ་ཞིག་ལས། །ཟས་ནོར་མ་འཚོལ་གོང་མའི་རྗེས་སུ་སྙོགས། །གཞན་བསྟོད་ཁོ་ན་དོན་དུ་གཉེར་བའི་བློས། །ཧ་ཅང་བརྩོན་པའི་ལུས་ངག་དགེ་སྦྱོར་གྱིས། །འཕྲལ་ཡུན་ཕན་བདེའི་དབུགས་དབྱུང་འབྱུང་དཀའ་བས། །ལྷ་ཆོས་གཙོ་བོ་རང་གི་སེམས་ཐུལ་ཅིག །བློ་ལྡོག་རྣམ་བཞི་ཆོས་ཀྱི་རྩ་བ་སྟེ།།འདི་ཉིད་རྒྱུད་ལ་མ་སྦྱར་ཐ་མལ་ལ། །ཐོས་བསམ་དགྲར་ལངས་ཆོས་སྤང་ལས་ངན་རྒྱུ། །སྒོམ་པ་ཚེ་འདིར་ཞེན་པའི་གསོས་སུ་འགྱུར། །དེ་ཕྱིར་ཟབ་ཟབ་མཐོ་མཐོའི་ཆོས་རྣམས་ལ། །དང་པོའི་དུས་ནས་མཐོ་རྙབ་མི་སྔ་བར། །འཁོར་བར་ཞེན་ཆགས་ལྷོད་པོར་མ་གྱུར་པར། །སྙིང་གི་བཅུད་དུ་འདི་ཉིད་བསྟེན་པར་རིགས། །རིན་ཆེན་བྱང་སེམས་སྲས་བཅས་རྒྱལ་བའི་ལམ། །མ་ལུས་ཕན་དང་བདེ་བའི་འབྱུང་གནས་མཆོག །བརྒྱད་ཁྲི་བཞི་སྟོང་ཆོས་ཀྱི་ཉིང་ཁུ་སྟེ། །ཉམས་ལེན་མཐིལ་དུ་འདི་ཉིད་ཁོ་ན་མཛོད། །སྤྱིར་ན་རྒྱལ་བའི་ཆོས་ཚུལ་མཐའ་དག་ཀྱང་། །གདུལ་བྱ་འདུལ་བའི་ཐབས་སུ་གསུངས་པའི་ཕྱིར། །ས་དགེ་བཀའ་བརྒྱུད་ཇོ་ནང་བཀའ་གདམས་སོགས། །གང་ལ་བསླབས་ཀྱང་བྱང་ཆུབ་ཐོབ་ངེས་མཛོད། །ཀུན་གྱི་གནད་འདུས་ཀུན་ལས་ཁྱད་འཕགས་པའི། །ཡང་གསང་སྙིང་ཐིག་རྒྱུད་ལུང་མན་ངག་ཚོགས། །ཐུགས་ཀྱི་དཔལ་བེའུའི་བཅུད་དུ་བསྟེན་པར་མཛོད། །ཐེག་དགུའི་ཡང་རྩེ་མན་ངག་གནད་གསང་འདི། །ཤེས་རབ་མཁའ་ལྟར་ཡངས་ཤིང་བརྩོན་པའི་རྒྱུན། །བར་མེད་ཆུ་བོའི་རྒྱུན་བཞིན་བསྟེན་ནུས་དང་། །བླ་མའི་བྱིན་རླབས་འཕོས་པ་མ་གཏོགས་པར། །སྟེས་དབང་འཕྲལ་བྱུང་ཚུལ་དུ་རྙེད་མི་ནུས། །དེ་ཕྱིར་མདོ་སྔགས་རིག་གཞུང་མཐའ་དག་ལ། །ཐོས་བསམ་སྒོམ་པ་ཁྱད་དུ་མི་གསོད་ཅིང་། །བཀའ་དྲིན་ཐོབ་པའི་དྲིན་ཆེན་བླ་མ་ལ། །སྙིང་དང་མིག་ལས་ལྷག་པའི་མོས་པ་དང་། །ཁྱད་པར་རིག་སྟོང་འོད་གསལ་ཆོས་སྐུའི་ཞལ། །མ་ནོར་མངོན་སུམ་སྟོན་པར་མཛད་པ་དེར། །སྐྱོན་བྲལ་ཡོན་ཏན་རྫོགས་པའི་སངས་རྒྱས་སུ། །དངོས་སུ་མཐོང་བའི་དད་གུས་སྐྱེད་ཅིག་ལགས། །མི་རྟོག་རྩེ་གཅིག་གཟུགས་མེད་ཏིང་ངེ་འཛིན། །གསལ་བ་ཕྱོགས་སུ་མ་ལྷུང་གཟུགས་ཁམས་རྒྱུ། །གང་ཤར་ངོ་ལ་བལྟ་བ་འདོད་པའི་སེམས། །འདི་གསུམ་ལས་འདས་སྒོམ་པ་ཉིན་སྐར་འདྲ། །མཐའ་བཞི་ཡེ་སྟོང་དབུ་མ་ཆེན་པོ་དང་། །མ་བསྒོམས་རང་བབས་བཞག་པའི་ཕྱག་རྒྱ་ཆེ། །རང་རིག་ཁོ་ཐག་ཆོད་པའི་རྫོགས་པ་ཆེ། །དབྱེར་མེད་ཉམས་སུ་ལེན་རྣམས་སྐལ་བ་བཟང་། །ཡང་ཅིག་གསོན་དང་སྙིང་གི་དུམ་བུ་ལགས། །ཟས་ནོར་འཚོལ་བའི་གར་དབྱངས་ཐིག་སོགས་དང་། །བཤད་སྒྲུབ་གཟུགས་བརྙན་སྙན་གྲགས་ཕྱིར་བརྩོན་པའི། །དོན་ཆུང་གཡེང་བའི་རྒྱུ་ཀུན་གྱི་ནར་བོར། །རང་སེམས་འདུལ་དང་གཞན་སེམས་བསྲུང་བ་འདི། །རྒྱལ་བའི་ཆོས་ཚུལ་ཀུན་གྱི་གནད་དོན་ཏེ། །དཀོན་མཆོག་དཔང་བཞག་རང་སེམས་ཚད་བཙུགས་ལ། །ཉམས་ལེན་མ་མང་མདོ་འགག་འདི་ལ་དྲིལ། །སྙིང་དང་ངེས་པར་འདྲ་བའི་སྙིང་གྲོགས་དེས། །སྙིང་གཏམ་དགོས་ཞེས་སྙིང་ནས་བསྐུལ་བའི་ཚེ། །སྙིང་པོའི་དོན་གནད་སྙིང་ལ་གང་ཤར་རྣམས། །བཅོས་བསྒྱུར་སྤངས་ནས་ཐོལ་བྱུང་ཚུལ་དུ་བྲིས། །གྲང་རླུང་འབྲེལ་བས་བར་སྣང་མོག་པོར་གྱུར། །ཁྲག་རླུང་འབྲེལ་བས་ལུས་ཁམས་འཁྲུགས་རྐྱེན་གྱིས། །གཡོ་བའི་ཀུན་རྟོག་རྣལ་དུ་མ་ཕེབས་པས། །ཚིག་དོན་སྐྱོན་གྱིས་གང་རྣམས་བཟོད་པར་གསོལ། །རང་ཅག་སྐྱེ་དང་ཚེ་རབས་ཐམས་ཅད་དུ། །བླ་མ་འཇའ་ལུས་རྡོ་རྗེས་རྗེས་བཟུང་ནས། །ནམ་མཁའ་སྲིད་དུ་བསྟན་དང་འགྲོ་ཀུན་གྱི། །དཔལ་ཡོན་སྤེལ་བའི་བྱེད་པོ་མཆོག་ཏུ་སྨོན། །ཞེས་སྙིང་གྲོགས་སྒོམ་སྒྲུབ་ཉམས་ལེན་ཆུ་བོའི་རྒྱུན་བཞིན་བསྟེན་པ་པདྨའི་མཚན་ཅན་གྱི་ངོར་ངག་དབང་བློ་གྲོས་མཚུངས་མེད་པས་རབ་རྒྱལ་ཆུ་ཡོས་ཟླ་ཚེས་ལ་བྲིས་པ་དགེ །

                              ༡༢༧

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

འདི་ནས་ལན་གཅིག་གནོན་རོགས།👇