འོད་མཚན་བརྗོད་པ་རྒས་གཞོན་ཀུན་ལ་འཚམ།
ལེའུ་བདུན་པ།
ནང་པ་སངས་རྒྱས་པའི་འཆི་ཁའི་བྱམས་སྐྱོང་།
བླ་མ་ཡིད་བཞིན་ནོར་བུའི་ཞལ་སྔ་ནས་འོད་མཚན་བརྗོད་སྐབས་གཞོན་ནུ་ཟུང་གི་སེམས་པ་མཉེས་གཤིན་པོར་གྱུར་ནས་ཉིན་མཚན་མེད་པར་ཕན་ཚུན་ཡིད་ལ་དྲན་པ་ལྟ་བུའི་སྒོ་ནས་བདེ་བ་ཅན་གྱི་ཞིང་ཁམས་དང་རྒྱལ་བ་འོད་དཔག་མེད་ཀྱི་ཡོན་ཏན་ཡིད་ལ་བྱས་ན་བདེ་བ་ཅན་དུ་སྐྱེ་ཁོ་ཐག་ཡིན་ཞེས་གསུངས་སོ། །
སློབ་དཔོན་ཆེན་མོ་དབྱིང་ཀོང་གིས་འོད་མཚན་བརྗོད་པ་ལ་དབྱེ་ན་བཞི་ཡོད་དེ་མཚན་བརྗོད་པ་དང་གཟུགས་སྒོམ་པ། ཡིད་ལ་བྱེད་པ། བདེན་པ་མཐོང་བ་བཅས་སོ། །ཆོས་བཞི་པོ་འདི་ལས་དང་པོ་མཚན་བརྗོད་པ་ཉིད་ཐུན་མོང་གི་གདུལ་བྱར་འཚམ་ཞིང་འཁྱེར་ཡང་བདེ། གོལ་ས་ལ་མི་ལྷུང་བའམ་མི་འཇུག་ཅེས་གསུངས།
བདེན་པ་མཐོང་བའི་མཚན་བརྗོད་པ་ནི་རྒྱལ་བ་འོད་དཔག་མེད་ཀྱི་ཆོས་ཀྱི་སྐུ་བསྒོམ་པ་ལ་ཟེར་ཞིང་ཡིད་ལ་བྱེད་པའི་མཚན་བརྗོད་པ་ནི་རྒྱལ་བ་འོད་དཔག་མེད་ཀྱི་མཚན་དང་དཔེ་བྱད་བསྒོམ་པ་ལ་བྱ། གཟུགས་སྒོམ་པའི་མཚན་བརྗོད་པ་ནི་ཐང་གའམ་འོད་དཔག་མེད་ཀྱི་སྐུ་བརྙན་ལ་བརྟེན་ནས་བསྒོམ་པ་ལ་བྱ། མཚན་བརྗོད་པའི་མཚན་བརྗོད་པ་ནི་རྒྱལ་བ་འོད་དཔག་མེད་ཀྱི་མཚན་བརྗོད་པ་ལ་ཟེར་རོ། །
སློབ་དཔོན་ཆེན་མོའི་མཚན་བརྗོད་པའི་རིགས་འདི་བཞི་ལས་མཚན་བརྗོད་པའི་མཚན་བརྗོད་པ་འདི་འཁྱེར་བདེ་ཞིང་རིག་གནས་མེད་པ་རྣམས་ལ་ཡང་ཕན་ཆེ་བར་དགོངས་སོ།
རྒྱ་ནག་ལ་གཏམ་རྒྱུད་འདི་སྐད་ཅིག་ཡོད།
བཙུན་པ་དེས་ཤིང་སྐུ་ཆུང་བའི་དུས་སུ་རྩེད་གྲོགས་ཤིག་ཡོད། ཕྱིས་སུ་ཆེ་བར་ཕྱིན་གྱིས་རྟག་ཏུ་སྣོད་བཟོ་པ་བྱས། ཁོ་མོ་ན་བཞི་བཅུ་ཙམ་ལ་སླེབས་སྐབས་མི་ཚེ་ཤིན་ཏུ་སྡུག་བསྔལ་བར་སྙམ་ནས་བཙུན་པ་ཏིས་ཤིང་གི་མདུན་སར་རབ་ཏུ་བྱུང་།
རིག་གནས་མེད་པ་དང་ལོ་ན་ཡང་རྒས་པའི་རྐྱེན་གྱིས་བྱ་བ་གཞན་སྒྲུབ་མི་ནུས་པས་བཙུན་པ་ཏིས་ཤིང་གིས་དགོན་ཆུང་རྙིང་ཧྲུལ་དུ་གྱུར་པ་ཞིག་བཙལ་ཞིང་དགེ་བསྙེན་ཞིག་ཟ་མ་གཡོ་བར་བཀོད་སྒྲིག་བྱས། ད་དུང་ཁོ་ལ་འདི་སྐད་སྨྲས། ཁྱོད་ཀྱིས་རྒྱལ་བ་འོད་དཔག་མེད་ཀྱི་མཚན་ཁོ་ན་བརྗོད་པར་གྱིས། ངལ་བས་དུབ་ན་ངལ་གསོ་གྱིས། ངལ་གསོ་བྱས་ཟིན་རྗེས་སླར་ཡང་མཚན་རྗོད་ཅིག འདི་ལྟར་དུས་ཀུན་ཏུ་མཚན་བརྗོད་པར་བྱེད་ནུས་ན་མ་འོངས་པ་ན་ཕན་ཆེན་པོ་འབྱུང་ངེས་ཞེས་གསུངས།
ཁོ་ནི་སྒོ་བའི་ངག་ལ་ཉན་པའི་མི་ཞིག་ཡིན་པས་ལོ་གསུམ་ལ་མཚམས་དམ་པོར་བསྡད་ནས་བློ་རྩེ་གཅིག་གིས་འོད་མཚན་བརྗོད་པ་རེད།
ཉིན་ཞིག ཁོ་དགོན་པ་ལས་བྲལ་ནས་གཉེན་ཉེ་གྲོགས་པོ་སོགས་ལ་ཡིད་གུས་པས་ལྟ་བར་ཕྱིན། དགོང་ཁར་ཕྱིར་སླེབས་རྗེས་ཟ་མ་གཡོ་བའི་དགེ་བསྙེན་རྒས་པ་དེར་སང་ཉིན་ང་ལ་ཟ་མ་གཡོ་མི་དགོས་ཞེས་སྨྲས།
དགེ་བསྙེན་རྒས་པ་དེའི་བསམ་པ་ལ་བླ་མ་ལོ་གསུམ་ཙམ་དུ་ཕྱི་རོལ་ཏུ་མ་སོང་བས་དེ་རིང་མཛའ་གཅུགས་ལྡན་པའི་གྲོགས་པོ་ལ་ལྟ་བར་ཕྱིན་པས་ཕལ་ཆེར་སང་ཉིན་མགྲོན་དུ་འབོད་མཁན་བྱུང་བས་ང་ལ་ཟ་མ་གཡོ་མི་དགོས་སྨྲས་པ་ཡིན་རྒྱུ་རེད་སྙམ།
ཕྱི་ཉིན་དྲོ་ཟས་ཟོས་ཟིན་རྗེས་དགེ་བསྙེན་རྒས་པ་དེ་དགོན་པར་བླ་མ་མཇལ་དུ་སོང་བས་སྒེའུ་ཁུང་འགྲམ་དུ་འགྲེངས་ནས་ཚེ་འཕོས་པ་མཐོང་།
མི་དེས་དག་ཞིང་པའི་མདོ་སྡེ་རྣམས་ལ་སློབ་སྦྱོང་བྱེད་མ་མྱོང་ཞིང་ཡིད་ལ་སྒོམ་མི་ཤེས་ཀྱང་ཕྱིར་མི་ལྡོག་པའི་དད་པ་བརྟན་པོས་མཐར་སྐྱེ་འཆི་ལ་རང་དབང་འབྱོར་བ་རེད།
ང་རང་ཆུང་དུས་ནས་ཀྱང་འདི་འདྲའི་གནས་ཚུལ་མཐོང་སྐྱོང་། ལ་ལས་སངས་རྒྱས་དང་བྱང་ཆུབ་སེམས་དཔའི་སྐུ་བརྙན་རྣམས་སོ་སོར་ངོས་མི་ཟིན་པར་འདུག དཔེར་ན་སྒྲོལ་མ་ཉེར་གཅིག་གི་ཕྱག་མཚན་དང་ཕྱག་རྒྱ་སོགས་སྣ་ཚོགས་སུ་ལྡན་པས་དབྱེ་བ་ཕྱེད་པར་དཀའ། ངའི་ཨ་ཕ་ལྟ་བུས་སངས་རྒྱས་ཤཱཀྱ་ཐུབ་པ་དང་སངས་རྒྱས་འོད་དཔག་མེད་གཉིས་ཀྱི་དབྱེ་བ་མི་འཁྲོལ། སངས་རྒྱས་ཤཱཀྱ་ཐུབ་པས་ཕྱག་གཡོན་མཉམ་བཞག་བདུད་རྩིའི་ལྷུང་བཟེད་འཛིན་ཞིང་སངས་རྒྱས་འོད་དཔག་མེད་ཀྱིས་ཕྱག་གཉིས་མཉམ་བཞག་བདུད་རྩིའི་ལྷུང་བཟེད་འཛིན་ཡང་ཁོང་གིས་རྟག་ཏུ་གསལ་བོར་མི་ཕྱེད། ཡིན་ཡང་དུས་རྒྱུན་བདེ་བ་ཅན་དུ་སྐྱེ་བ་ལ་ཡིད་མོས་གུས་ཆེན་པོ་ཡོད་པ་དང་འཆི་བའི་སྐབས་ཀྱང་འོད་མཚན་རྗོད་བཞིན་ཚེ་འཕོས་ཤིང་འཆི་དུས་ཀྱི་རྣམ་འགྱུར་སོགས་ལ་བལྟས་ན་བདེ་བ་ཅན་དུ་སྐྱེས་ཡོད་སྲིད། དེ་དང་འདྲ་བར་ལོ་ལོན་གཞན་འཆི་བའི་སྐབས་སུ་ཡང་འདི་འདྲའི་གནས་ཚུལ་མི་ཉུང་བ་བྱུང་ཡོད་འདུག
སྟོན་པ་བཅོམ་ལྡན་འདས་ཀྱིས་ཤེས་རབ་ཆེན་པོ་མི་ལྡན་ཡང་མོས་གུས་ཤུགས་ཆེན་ལྡན་པའི་མི་རྣམས་བདེན་པ་མཐོང་སླ་ཞིང་བདེ་བ་ཅན་དུ་ཡང་སྐྱེ་སླ་ཞེས་གསུངས།