​ང་ལ་གླུ་ཞིག་ལེན་དུ་ཆུགས། རྩོམ་པ་པོ། ལྡོང་ཡོན་ཏན་རྒྱ་མཚོ།

དོ་ཁུར་དང་བརྒྱུད་སྐུར་རེ་གནང་རོགས།

ང་ལ་མ་གླུ་ཞིག་ལེན་དུ་ཆུགས། 

ལྡོང་ཡོན་ཏན་རྒྱ་མཚོ།

   ང་ནི་ང་སྟེ་ཤཱཀྱའི་དགེ་སྦྱོང་ཞིག དེའི་ཕྱིར། གླུ་གར་དང་རྩེད་འཇོའི་འཇིག་རྟེན་གྱི་ཕ་རོལ་ནས་མིག་ཟུང་རྐང་རྩེའི་མེ་ཏོག་ལ་གཏད་དེ་འགྲོ་དགོས་པ་ཤིན་ཏུ་བདེན། འོན་ཀྱང། ངའི་མགྲིན་པ་ལོངས་སྤྱོད་འཁོར་ལོའི་རྩ་འདབ་སོ་གཉིས་པོ་སྒོམ་སྟོབས་ཀྱིས་མ་གྲོལ་ཡང་སྦྱངས་སྟོབས་ཀྱིས་ལྷོད་སོང་བའི་སྤྲོ་དགའ་བསམ་ན། སྐད་གསེང་མཐོན་པོས་གླུ་རེ་བླང་ན་འདོད། ངའི་ཁོར་ཡུག་དང་ངའི་འཇིག་རྟེན་གྱི་ཚོགས། ང་ལ་གླུ་ཞིག་ལེན་དུ་ཆུགས། གནམ་ས་གའུ་ཁ་སྦྱོར་གྱི་གུར་ཁང་ཡངས་པོར་ཕྱེ་ཞིག བདག་གི་མགྲིན་པར་བཞི་ལྷག་དྲུག་ཅུའི་འགྱུར་ཁུགས་མི་ཚང་རུང། སྲིད་པ་ཆགས་པའི་གླུ། ལྷ་ཀླུ་མཆོད་པའི་མགུར། སྤྲེལ་སྲིན་མཐུན་པའི་གཞས། ཡོད་ཚད་མཚོ་ལྡན་མའི་རྒྱུད་དྲུག་པི་ཝང་གི་ལྡེམ་འཁྱུག་དང་འགྲོགས་ཏེ། ཞང་ཡ་རེ་ལོ་ཡི་ངག་རྩལ་ཞིག་ངོམ་ན་དགའ་བ་བརྒྱ་ལྡན་གྱི་དང་རྩེ་རེད།

འདོ་རིག་རྟ་ཕོའི་འཚེར་སྐད། ཐུལ་དཀར་འབྲི་མོའི་ངུར་དབྱངས། ཚེར་མོ་ལུག་གི་འབའ་སྒྲ། མཐོ་སྒང་གི་དབྱངས་རྟ་བརྒྱ་ཕྲག་མཉམ་དུ་བསྡེབས་ཏེ། མགོ་ནག་བོད་པ་ཚང་གི་སླད་མ་འདྲེས་པའི་འཚོ་བ་དྭངས་མོ་ལྷང་ལྷང་གླུ་རུ་བླངས་ན་ཇི་འདྲའི་སྙན། གླུ་ཞིག་ལེན་དུ་ཆུགས་དང། ང་གླུ་གར་རྒྱ་མཚོའི་ཕ་ས་ནས་འཚར་ལོངས་བྱུང་བའི་ཁུ་བྱུག་སྔོན་མོ་ཡིན་ཡ། ས་སྒང་རིལ་མོ་ཆུང་ནས་ཆུང་དུ་འགྲོ་བཞིན་པའི་དུས་རབས་གསར་བའི་མཁའ་དབུགས་ཁྲོད། དམིགས་བྱ་ཞིག་གི་ཆེད་དུ་སུས་ཀྱང་འཐོབ་འོས་པ་མང་བོ་སྐྲ་ལོ་བཞིན་ལྟག་རྒྱབ་ཏུ་འཕངས་ཏེ་གཅིག་ལས་གཅིག་མགྱོགས་ཀྱི་འགྲན་རྩོད་ལ་ཚེ་སྲོག་ཕྲ་མོའི་མཆོད་པའང་འབུལ་ཕོད་པ་ལྟར། ངས་ཀྱང་རང་ལ་དབང་ངེས་པའི་གཏེར་མཛོད་དུ་མ་སྣང་མེད་དུ་བསྐྱུར་ཏེ། ཁ་ལྕེ་མཉེན་མོ་སྐམ་རག་བར་དུ། མགྲིན་པ་ཡངས་མོ་འགག་རག་བར་དུ། ཨ་ཡིག་སྲོག་ཏུ་འཕོས་པའི་རྫི་གླུ་འདིའི་རྒྱབ་ལྗོངས་བཙལ་ནས་རྙེད་བྱུང། མ་གཞིར་སེམས་པ་ཡོད་ཚད་ཁ་དོག་མི་གཅིག་པའི་རླུང་སྐར་རེ་རེ་ཡིན་ངེས་ན། བྱ་རྒྱལ་ཁྱུང་གི་འཕུར་སྟངས་ལའང་ཆར་སྡོད་བྱེའུ་ཡན་ཆོད་ཀྱིས་གླེང་བརྗོད་མི་འདྲ་བ་རེ་ཡོད་སྲིད་མོད། ངས་ཁྲོམ་པའི་འདུ་སྒོ་གླུ་ཡིས་ཕྱེས་ཉིན་ནས། སྤྱི་གཙུག་བདེ་ཆེན་འཁོར་ལོ་ཀུན་བཟོད་སྒེག་མོའི་རྒྱན་དུ་འགོད་དགོས་རུང། ཞུམ་པ་དང་ནོངས་འགྱོད་ཀྱི་མིག་ཆུ་སྔ་མོ་ནས་བཙན་གྱིས་བསྐམས་ཟིན།

ང་ལ་གླུ་ཞིག་ལེན་དུ་ཆུགས། གནའ་བོའི་ཅོང་སྒྲ་དང་དུང་སྒྲས་ངའི་གླུ་སྒོ་མ་འགོག གསར་དར་རོལ་མོ་དང་གླུ་རྟ་ཐན་ཐུན་གྱིས་ངའི་གླུ་གདངས་མ་བསླད། ང་ལ་ང་ཡི་གླུ་སྐད་དང་གླུ་ཚིག་ཡོད་དགོས་ལ་ཡོད་ཀྱང་སྲིད། ངས་ལུང་རྟོགས་ཆོས་སྒྲ་སྙན་མོའི་རོ་བཅུད་མྱོང་བཞིན་ལི་ཁྲིའི་ཆུ་གཏེར་གྱི་འཇིངས་སུ་རྩེན་ཡུན་རིང་བས། ང་ཨ་ཅེ་མཚོ་ལྡན་མས་སྒེག་འཛུམ་གྱིས་བསླུས་ཏེ་ལྷོ་ཕྱོགས་རྒྱ་མཚོའི་སྒྲ་དབྱངས་ཀྱི་འགྱུར་ཁུགས་བཙལ་སྟངས་མཚར་བས། དཔའ་བོ་རྡོ་རྗེའི་དགྱེས་གླུ། ཤེས་རབ་ཡེ་ཤེས་ཀྱི་དབང་གླུ། ཟག་མེད་ལོངས་སྤྱོད་ཀྱི་ཚོགས་གླུ། མི་ལ་བཞད་པའི་རྡོ་རྗེ་དང་དཔལ་ཚོགས་དྲུག་རང་གྲོལ་གྱི་ཉམས་གླུ། བླ་མ་ཡི་དམ་སྤྱན་འདྲེན་པའི་གླུ། མཆོད་པའི་གླུ། བསྟོད་པའི་གླུ། བསྐུལ་བའི་གླུ། ཨ་ལ་ལ། ལ་ལ་ཧོ། མགྲིན་པ་དུང་གི་འཁོར་ལོ་ན་གླུ་སྣ་མི་གཅིག་ཁྲི་མ་འབུམ། ངོ་མ། དབེན་པའི་ལྷིང་འཇགས་དཀྲོགས་པའི་གླུ་བ་སྟོང་ཐུབ་འབུམ་ཐུབ་དེ་སུ་ཞིག་རེད་འདུག  ངུར་སྨྲིག་གསར་བའི་འཇིག་རྟེན་འདི་ནས་མ་མཐའ་དམངས་གླུའམ་ཆོས་གླུ་མགོ་སྔ་ཚང་མོ་རེའང་ལེན་མ་ཐུབ་ན། བཞུད་ཟིན་པའི་མེས་པོ་དག་གི་ལང་ཚོའི་ཞབས་རྗེས་ཇི་ལྟར་འཚོལ། གཅེས་སྲོག་གི་མཆོད་པ་སྙིམ་རྩེར་བཏེགས་པའི་དཔའ་བོ་དཔའ་མོའི་ཚོགས་ལ་མི་བརྗེད་དྲན་པའི་རྟེན་གྱི་རྡོ་རིང་སུ་ཡིས་འཛུགས། ང་ཚོས་ནམ་ཡང་དུས་རབས་ཀྱི་གླུ་བ་ཡིན་པའི་ཁ་ཕོ་མཐོན་པོ་རེ་སྒྲོག་གིན་ཡོད་པ་མིན་ནམ། ངས་བསམ་གྱིན་བསམ་གྱིན་གླུ་རེ་བླང་ན་འདོད། མགྲིན་པ་གཟེངས་སུ་བཏེགས་ཏེ་བླང་ན་འདོད། ཞེན་ཆགས་ཀྱིས་བླང་ན་འདོད། སྡང་སེམས་ཀྱིས་བླང་ན་འདོད། གླུ་སྐད་ནམ་མཁའི་མཐའ་རུ་ཁྱབ་ཅིང་རྒྱ་མཚོའི་གཏིང་དུ་སིམ་རྗེས་ཀྱང་ཤུགས་དྲག་གིས་ལེན་ངེས།

ཁྱེད་ཚོས་གསོན་དང་ངས་གླུ་ཞིག་ལེན། གླུ་ཚིག་འདི་རྒས་སླ་བའི་གླུ་བ་ཞིག་ལ་བརྐུས་པ་མིན། གླུ་སྐད་འདི་རང་ཚུགས་མེད་པའི་གླུ་བ་འཁྱམ་པོ་ཞིག་ལ་གཡར་བའང་མིན། ཐོག་མཐའ་མི་རྙེད་པའི་འཁོར་བའི་ཀློང་ནས་ཚིག་བསྒྲིགས་ཤིང་སྨྲ་བསམ་བརྗོད་འདས་ཀྱི་ཞིང་ཁམས་ནས་གདངས་བརྩམས་པའི་གླུ་གཞས་སྙན་མོ། ཆུ་བཞི་སྒང་དྲུག་གི་ནམ་མཁར་ལྷང་ལྷང་གྲག་དུས། དགའ་བའི་ཐལ་མོ་རྡོབས་དང་རང་ཉིད་ཀྱང་དབྱངས་ལྡན་མའི་གླུ་བ་བློར་འབབ་ཅིག་ཏུ་མི་འགྱུར་བའི་ངེས་པ་མེད། ངའི་གླུ་ལ་ངོ་མཚར་བའི་གཏམ་རྒྱུད་ཤིན་ཏུ་མང་།  ཟས་སུ་སིལ་ཏོག་བརྟེན་ཅིང་གོས་སུ་ཤིང་ལོ་གྱོན་པའི་གདོད་མའི་དུས་ཤིག་ལ། བསམ་བློའི་ཆུ་ཚད་དམའ་བའི་སྤྲ་མི་ཚོས་རང་བྱུང་ཁོར་ཡུག་ལས་རྙེད་པའི་ཞེད་སྣང་མང་བོའི་ཡིད་འགྱུར་གནོན་མ་ཚུགས་པར། མིང་ཚིག་གི་རང་སྐྱ་མི་ཐུབ་པའི་དབྱངས་འགྲོས་རྐྱང་རྐྱང་ཞིག་གི་ས་བོན་བཏབ་པ་སྙན་མོ་གླུ་འདིའི་འགོ་ཁུངས་ཡིན། བློན་ཆེན་གཉལ་བ་སྣང་གྲགས་ལ་བློ་རིག་གསལ་བའི་སྐུ་སྲས་དེ་འཁྲུངས་རྗེས་གངས་རིའི་གླུ་ཡིས་རླུང་རྟ་ཡར་འཕུར་ཞིག་གི་གཤོག་སྣེ་ཟིན་ཏེ། དབྱངས་གསལ་སོ་བཞི་གླུ་རུ་བླངས་པས་རང་སྐྱ་མི་ཐུབ་པའི་དབྱངས་འགྲོས་དེ་ལའང་བློས་མི་དཔོག་པའི་རང་དབང་ཐོབ། སྐབས་ཤིག་ལ་སྟོད་རྒྱ་གར་ནས་ཐོན་པའི་ཆུ་ཤེལ་དྭངས་མོའི་མེ་ལོང་ཞིག་གི་མཛད་འཕྲིན་དཔལ་ས་སྐྱའི་ཡུལ་ནས་ཆུ་གཏེར་བརྡོལ་བ་བཞིན་འཕྱུར་ཏེ་གླུ་ལ་གླུ་ཡི་གཞུང་ལུགས་ཆགས། བགྲང་བྱ་དུ་མའི་རྗེས་ཤིག་ལ་མི་འཇིགས་སེང་གེའི་ང་རོའི་གླུ་སྒྲ་ཐོག་མ་བོད་རང་ས་ནས་རླུང་ལ་བསྐུར་བས་གླུ་བ་གླུ་མས་སཱ་ལའི་སྨན་ལྗོངས་འདི་ཡང་དོག་པོར་བསྒྲུབས་མྱོང་ཟེར།  ངའི་གླུ་ངག་གི་གཏམ་རྒྱུད་འདི་ལྟར་རིང་བས་ང་ནམ་ཡང་རང་ཚུགས་ཐུབ་པའི་གླུ་བ་གཙང་མ་ཡིན།

སྤྱིར་སྒྱུ་རྩལ་གྱི་སྟངས་སྟབས་རེ་རེར་མི་སེམས་སྒུལ་ཤེས་པའི་གསང་བ་ཡོད་ངེས་ན། ངའི་གླུ་ལའང་གླུ་ཡི་སྒྱུ་རྩལ་ཡོད་ངེས་ཏེ། ངོ་མཚར་ཚིག་གི་མཚོན་ཐབས་གསར་བ། སྤྱི་ཚོགས་འཚོ་བའི་སྣང་བརྙན་མངོན་པ། ཚིག་གི་སྡེབ་སྦྱོར་ལ་དགའ་སྐྱོ་ཆགས་སྡང་གི་ཉམས་འགྱུར་རྫོགས་པ། དབྱངས་འགྲོས་དང་སེམས་ཁམས་ཀྱི་འདེགས་འཇོག་མཉམ་པ་སོགས་སོ།། ང་ལ་གླུ་ཞིག་ལེན་དུ་ཆུགས་དང་། ངས་སྒྱུ་རྩལ་གྱི་གསང་བ་རེ་རེ་མཐོ་རུ་བཏེག་ན་འདོད།

ཚང་མས་གོ་དགོས་པའི་དོ་དམ་པའི་གསལ་བཤད།   

འཕྲིན་སྟེགས་ཀྱི་ཁེ་དབང་གཙོ་སྒྲུབ་པ་ཨ་ཙརྱ་ལ་དབང་བས།  

འདི་གར་དོ་དམ་པ་རང་ཉིད་ཀྱིས་ཆེད་དུ་བསྒྲིགས་པའི་ནང་དོན་དག་ཕྲིན་སྟེགས་གཞན་པས་གང་འདོད་དུ་ནང་དོན་དང་ཁ་བྱང་རྐུ་བཤུ་བྱེད་མི་ཆོག་པར་མ་ཟད།  གལ་ཏེ་ནང་དོན་རྐུ་མཁན་ཡོད་ན་རང་ཉིད་ལ་ཁྲིམས་ཀྱི་ཆད་པ་ཕོག་ངེས་པས་དེ་ལུགས་ཐུགས་འཇགས་འཚལ།

ཨ་ཙརྱ་རིག་གཞུང་འཕྲིན་སྟེགས།

ཨ་ཙརྱ་རིག་གཞུང་འཕྲིན་སྟེགས་ནི་བོད་ཁུལ་དེང་རབས་ཀྱི་བརྡ་འཕྲིན་བརྒྱུད་ལམ་ཞིག་ཡིན་ལ། འདིར་བོད་ཀྱི་རིགས་གནས་སློབ་གསོ་དང་འཚོ་བའི་དགོས་མཁོར་དམིགས་པའི་སྒྲ་གཟིགས་སྣ་ཚོགས་རོལ་མྱོང་བྱེད་ཐུབ་ལ། མ་ཟད་དགའ་སྤྲོའི་སྣང་བ་གསོ་བའི་གླུ་གར་བྲོ་གསུམ་སྣ་ཚོགས་ལོངས་སུ་སྤྱོད་ཐུབ་ལ།  དེང་རབས་ཀྱི་གླུ་གཞས་དང་བཞད་གར་སོགས་སྔོན་དང་ད་ལྟའི་རིང་གི་བོད་ཀྱི་ངག་ཐོག་རིག་གནས་གང་མང་དྲིལ་སྒྲོག་དང་གསོག་ཉར་གྱི་ནུས་པ་ཐོན་བཞིན་ཡོད། མདོར་ན་འཕྲིན་སྟེགས་འདི་ནི་གནའ་དེང་གི་རིག་གནས་སྣ་ཚོགས་རོལ་མྱོང་དང་རྒྱུས་ལོན་གནང་སའི་བརྡ་འཕྲིན་གྱི་འཇིག་རྟེན་ཆེན་པོ་ཞིག་ཡིན་ཞིང་ཡིད་འོང་གི་གར་སྟེགས་ཆེན་པོ་ཞིག་ཀྱང་ཅི་ལ་མིན།

ཁྱེད་ཉིད་ཨ་ཙརྱའི་རིག་གཞུང་འཕྲིན་སྟེགས་སུ་ཕེབས་པར་དགའ་བསུ་ཞུ།

ཉིད་ཀྱིས་ཕྲན་ལ་རྒྱབ་སྐྱོར་དང་དོ་ཁུར་གནང་བར་སྙིང་ནས་བཀའ་དྲིན་ཆེ་ཞུ་བ་ཡིན།

གཞན་ཁྱོད་ལ་འཕྲིན་སྟེགས་འདིར་འགོད་དགོས་པའི་རྩོམ་ཡིག་དང་།

གསལ་བརྡ།

ཚོང་ལས་བརྡ་ཁྱབ་ཡོད་ན།

དོ་དམ་པར་སྒེར་ལ་འབྲེལ་བ་བྱོས་དང་རིན་ཧ་ཅང་སླ་བོའི་སྒོ་ནས་ཁྱོད་ལ་རྒྱབ་སྐྱོར་བྱེད།

 སྒྲིག་སྦྱོར་པ་ཨ་ཙརྱ།