ཞལ་གདམས་བླང་དོར་ལམ་སྟོན། པདྨ་རིག་འཛིན། ༣

རྫ་རྒྱལ་སྒྲ་མཛོད་འཕྲིན་སྟེགས།扎嘉音仓平台

མཛད་པ་པོ།

༧ཆོས་རྗེ་འཇིགས་མེད་ཕུན་ཚོགས་འབྱུང་གནས།

ལེན་མཁན།

པདྨ་རིག་འཇིན།

༄༅། །ཞལ་གདམས་བླང་དོར་ལམ་སྟོན།

རྒྱལ་ཀུན་ཡབ་གཅིག་རྒྱལ་སྲས་གཞོན་ནུའི་ཚུལ། །

དྲན་པ་ཡིས་ཀྱང་སྲིད་པའི་མུན་སེལ་བ། །

དམར་སེར་རལ་གྲི་འཆང་བ་གང་དེ་ཡིས། །

ཁྱོད་ལ་ཤེས་པའི་མེ་ཏོག་འཐོར་གྱུར་ཅིག །

དལ་འབྱོར་རྙེད་དཀའ་ཚེ་ལ་ལོང་མེད་ཅིང་། །

ལས་འབྲས་བསླུ་མེད་འཁོར་བའི་སྡུག་བསྔལ་རྣམས། །

ཡང་ཡང་བསམ་ཏེ་སྲིད་པའིཕུན་ཚོགས་ལ། །

ཡིད་སྨོན་མེད་པའི་ངེས་འབྱུང་རྒྱུད་ལ་སྟེན། །

ཆོས་དང་སྲིད་ཀྱི་ཡོན་ཏན་མཐའ་དག་གི །

སྙིང་པོ་མཐར་ཐུག་བསམ་པ་བཟང་པོ་ཡིན། །

འདི་མེད་ཡོན་ཏན་གཞན་ལ་རེ་ཐག་ཆད། །

འདི་ཉིད་ཁོ་ན་ཐུགས་ཀྱི་རྒྱན་དུ་ཆོངས། །

ཤེས་རབ་ཚུལ་ཁྲིམས་མིག་དང་རྐང་པ་འདྲ། །

ཡ་བྲལ་རེ་རེས་མངོན་མཐོ་ངེས་ལེགས་ཀྱི། །

ཉམས་དགའི་གླིང་དུ་བགྲོད་པའི་ཐབས་མེད་པས། །

དུས་ཀུན་འདི་གཉིས་ཟུང་དུ་ཚོགས་པར་མཛོད། །

བྱིས་པའི་དུས་ན་ཕ་མའི་དབང་དུ་གྱུར། །

དར་ལ་བབ་ཚེ་རྗེ་བོའི་དབང་གྱུར་ཅིང་། །

རྒས་པའི་སྐབས་ན་བུ་ཚའི་དབང་གྱུར་པའི། །

བླུན་པོ་རང་དབང་བྲལ་རྣམས་ཤིན་ཏུ་སྡུག །

དེ་ཕྱིར་རྟག་ཏུ་རང་དབང་ཡོད་གྱིས་ལ། །

ནོར་བཟང་རྟག་ཏུ་ངུ་ཡི་རྣམ་ཐར་བཞིན། །

བླ་མ་བསྟེན་དང་གདམས་ངག་འཚོལ་བ་ལ། །

ཞུམ་པ་མེད་པའི་སྙིང་སྟོབས་སྙིང་ལ་སྟེན། །

སྙིགས་མའི་དུས་འདིར་ཚེ་ཐུང་ནང་མང་ཞིང་། །

རྐྱེན་ངན་སྣ་ཚོགས་རླུང་ལྟར་འཚུབས་པས་ན། །

ལུང་རིགས་མཐའ་རྒྱ་ཆོད་པ་དཀའ་མོད་ཀྱང་། །

མན་ངག་སྙིང་པོས་རང་རྒྱུད་འདུལ་བར་མཛོད། །

མདོར་ན་སྤྱོད་ལམ་སྣ་ཚོགས་ཅི་བྱེད་ཀྱང་། །

དྲན་ཤེས་བག་ཡོད་སེམས་ཀྱིས་རྒྱུད་བསྡམས་ནས། །

རང་གི་བཤེས་གཉེན་རང་གིས་མཛད་ནས་ཀྱང་། །

བྱ་བ་ཐམས་ཅད་དོན་དང་ལྡན་པར་མཛོད། །

བློ་གསལ་ཐར་འདོད་བསྟན་འཛིན་རྒྱ་མཚོ་ཡིས། །

འདི་འདྲ་བྲིས་ཞེས་སྐུལ་མ་བྱུང་མོད་ཀྱང་། །

རྒས་པ་གཞོན་ནུས་གར་ཁྲིད་སར་སོང་ན། །

རང་ཉིད་ངལ་ཞིང་གཞན་གྱིས་ཁྲེལ་བའི་རྒྱུ། །

འོན་ཀྱང་གསར་དུ་འགྲོགས་པའི་སློབ་བུ་ཡི། །

བཞེད་པ་བསྐངས་ནས་ཡུན་རིང་འགྲོགས་ཕྱིར་དུ། །

གནས་མཆོག་རི་བོ་རྩེ་ལྔའི་ཞིང་ཁམས་སུ། །

འཆོལ་རྒན་ཁ་ནས་འཆོལ་གཏམ་དེ་སྐད་རྡོལ། །

དཀོན་མཆོག་རྗེས་སུ་དྲན་པའི་མདོ།

བུ་ཕྲུག་ཚོས་ཕ་མ་ལ་དྲིན་ལོག་མ་བྱེད་རོགས།

རྫ་རྒྱལ་སྒྲ་མཛོད་འཕྲིན་སྟེགས་སུ་ཕེབས་པར་དགའ་བསུ་ཞུ།