རྒྱལ་བ་ཀུན་འདུས་པདྨ་ཀ་ར། པདྨ་རིག་འཛིན། ༧

རྫ་རྒྱལ་སྒྲ་མཛོད་འཕྲིན་སྟེགས།扎嘉音仓平台

མཛད་པ་པོ།

༧ཆོས་རྗེ་འཇིགས་མེད་ཕུན་ཚོགས་འབྱུང་གནས།

ལེན་མཁན།

པདྨ་རིག་འཇིན།

རྒྱལ་བ་ཀུན་འདུས་པདྨ་ཀ་ར། །

རྒྱལ་བ་ཀུན་འདུས་པདྨ་ཀ་ར། །

བདག་སྙིང་ཆུ་སྐྱེས་གདན་ལ་བཞུགས་དང་། །

གཟུར་གནས་བློ་ལྡན་དོན་གཉེར་ཚོགས་ལ། །

དུས་སུ་བབ་པའི་གཏམ་འདི་སྨྲའོ། །

རིག་འཛིན་མ་ཚོགས་བྱེ་བའི་གྲལ་དུ། །

ངོ་མཚར་གནས་ཀྱི་སྒོ་ཆེན་འབྱེད་པའི། །

ཕྲིན་ལས་བྱེད་པོ་ཁྱེད་ཀྱིས་གྱིས་ཞེས། །

གསུང་སྙན་དབུགས་དབྱུང་གནང་བ་དྲན་བྱུང་། །

བཀའ་དྲིན་མཚུངས་མེད་མཚོ་སྐྱེས་རྡོ་རྗེའི། །

བཀའ་འདི་གྱི་ནར་འཇོག་སྙམ་མེད་ཀྱང་། །

མ་རུང་བདུད་ཀྱི་ལོག་སྨོན་ངན་པའི། །

བར་ཆད་བདུད་ལས་བརྒལ་ཐབས་མ་བྱུང་། །

སྐྱེས་མ་ཐག་ཏུ་ཆོས་དང་འཕྲད་ཅིང་། །

ཚེ་གང་བསྟན་འགྲོའི་དོན་ལ་བརྩོན་ཀྱང་། །

ཚེ་མཐར་བླ་མའི་བཀའ་ལས་འགོང་བའི། །

ལས་ངན་མྱོང་དགོས་འདི་འདྲ་ཅི་ཞིག །

ཚུལ་འདིའི་རྐྱེན་གྱིས་སྙིང་རླུང་ལངས་ཏེ། །

ཚོགས་མཆོག་དགེ་འདུན་འདུས་པའི་དབུས་སུ། །

མིག་ནས་མཆི་མའི་རྒྱུན་ཆེན་འབེབས་བཞིན། །

སྨྲེ་སྔགས་གདུང་ཡུས་ཚིག་གསུམ་ཤོར་སོང་། །

ཚེ་འདིར་གནས་སྒོ་འབྱེད་མ་ནུས་ཀྱང་། །

སྐྱེ་བའི་ཕྲེང་བ་གང་རུང་ཞིག་ཏུ། །

དག་པའི་ཞིང་གི་སྒོ་འཕར་ཕྱེས་ནས། །

འགྲོ་ལ་ཕན་བདེ་འགྱེད་པར་སྨོན་ནོ། །

བླ་མ་དགྲར་བཟུང་དགེ་འདུན་སྡེ་དཀྲུགས། །

བཤད་སྒྲུབ་བསྟན་ལ་གནོད་ཚབས་ཆེར་བྱས། །

འབྲེལ་ཚད་སྐྱེ་བོ་ལོག་ལམ་ཁྲིད་པའི། །

ལས་ངན་གང་ཟག་འགའ་དང་འགའ་ཞིག །

བཟོད་དཀའ་མནར་མེད་མེ་ཡིས་གདུང་ཚེ། །

བདག་གི་བསོད་ནམས་སྤྲིན་ལས་བྱུང་བའི། །

ཕན་དང་བདེ་བའི་ཆར་རྒྱུན་བསིལ་མོས། །

ལུས་སེམས་དགའ་བདེས་བརླན་པར་སྨོན་ནོ། །

དཀོན་མཆོག་རྗེས་སུ་དྲན་པའི་མདོ།

བུ་ཕྲུག་ཚོས་ཕ་མ་ལ་དྲིན་ལོག་མ་བྱེད་རོགས།

རྫ་རྒྱལ་སྒྲ་མཛོད་འཕྲིན་སྟེགས་སུ་ཕེབས་པར་དགའ་བསུ་ཞུ།