༢ བདེ་བ་ལ་རྟག་པ་གང་ཡང་མེད། མཁན་པོ་བསོད་དར་རྒྱས་ཀྱིས་བརྩམས།

ལེའུ་གཉིས་པ།

གུ་ཡངས་བློ་བདེ་ཡི་ངང་ནས། །མགོ་ནག་སྐྱིད་སྡུག་དེ་གླེང་ངོ་། །

༢. བདེ་བ་ལ་རྟག་པ་གང་ཡང་མེད།

འཇིག་རྟེན་འདིར་སྡུག་བསྔལ་གྱིས་མ་ཁྱབ་པ་གང་དུ་ཡང་མེད། དགའ་བཞིན་སྤྲོ་བཞིན་དུ་གནས་ཀྱང་བསམ་ལོང་དྲན་ལོང་མེད་པར་གློ་བུར་དུ་རྒྱུ་ནོར་ཡོད་ཚད་སྟོར་བའམ་ནད་གདོན་གྱིས་ཟིན་པ་སོགས་སྡུག་བསྔལ་སྣ་ཚོགས་པ་གཅིག་རྗེས་གཉིས་མཐུད་ཀྱིས་ལྡང་སྲིད་།

ད་ལྟ་རང་ཉིད་ལ་དབང་བའི་བདེ་བ་ལ་བསམ་བློ་ཞིག་ཐོང་དང་། དེ་ནི་འགྱུར་བ་མང་དུ་འགྲོ་བ་ཞིག་མ་ཡིན་ནམ། རང་ཉིད་ཀྱིས་རྟོག་བརྟགས་བྱས་པ་ལྟར་གྱི་ཡིད་འཚེངས་པོ་ཞིག་དང་ཡུན་རིང་དུ་བརྟན་པ་ཞིག་མ་ཡིན་པར་ཐ་ན་མིག་རྡེབ་པའི་ཡུན་ཙམ་ལ་ཡང་སྡུག་བསྔལ་དུ་འགྱུར་སྲིད། དཔེར་ན་ཟས་ཀྱིས་འགྲང་ཞིང་བཏུང་བས་ངོམས་ཏེ་སེམས་དགའ་ཡལ་ལེ་བའི་ངང་དུ་སྡོད་སྐབས་འཕྲལ་དུ་ཟས་དུག་ཕོག་སྟེ་གྲོད་ཁོག་བཤལ་ནས་སྡུག་བསྔལ་མི་བཟོད་པ་མྱོང་བ་དང་། གཟུགས་ཕུང་བདེ་བར་ཡོད་སྐབས་བརྟག་དཔྱད་བྱས་པས་གློ་བུར་དུ་ཁྲག་མགོ་མཐོ་བ་དང་གཅིན་མངར་ནད་དང་ཐ་ན་ངན་སྐྲན་སོགས་ཕོག་པ་ཤེས་སྐབས་ཀྱང་སྡུག་བསྔལ་ཆེན་པོ་མྱོང་བ་རེད།

འཇིག་རྟེན་འདིའི་སྟེང་གི་བདེ་བ་ལ་རྟག་པ་གང་ཡང་མེད་པས་ཡུད་ཙམ་གྱིས་སྡུག་བསྔལ་དུ་འགྱུར་བས་དེ་ལ་འགྱུར་བའི་སྡུག་བསྔལ་ཞེས་བྱ་ཞིང་འཇིག་པའི་སྡུག་བསྔལ་ཞེས་ཀྱང་ཟེར།

གསེར་མདོག་གི་རྟོགས་བརྗོད་ལས་ལོ་རྒྱུས་ཤིག་གསུངས་ཡོད།

དེ་ཡང་ཚོང་བདག་རྣ་བཟང་འབྱོར་ཕྱུག་ལྡན་པས་འཇིག་རྟེན་གྱི་སྐྱེ་བོ་སུ་ཞིག་གིས་ཀྱང་དོ་ཟླ་མི་ཕེར། འོན་ཀྱང་བུ་བཙས་པ་ནས་བཟུང་ལྟས་ངན་པ་སྣ་ཚོགས་པ་བྱུང་ཞིང་གློ་བུར་དུ་ཁང་བཟང་ཡང་མེ་སྐྱོན་ཤོར་ནས་རྒྱུ་ནོར་ཡོད་དོ་ཅོག་བསྲེགས་ནས་ཐལ་བ་སྤར་གང་དུ་གྱུར། དང་ཐོག་ཁྱིམ་ཚང་འདིའི་འཚོ་བ་ཤིན་ཏུ་བདེ་ཞིང་སྐྱིད་པ་ལྷ་དང་འདྲ་ཡང་ཡུད་ཙམ་དུ་མི་རྟག་པས་ཁྱེར་ནས་སློང་མོ་བར་གྱུར་ཏེ་འཚོ་བ་ཧ་ཅང་དབུལ་བོར་སོང་།

འགྱུར་བའི་སྡུག་བསྔལ་མྱོང་བའི་དཔེར་བརྗོད་དངོས་ཡོད་འཚོ་བའི་ནང་དུ་ཡང་ཧ་ཅང་གིས་མང་། ཅུང་སྔོན་དུ་ང་རང་བུད་མེད་ཅིག་དང་འཕྲད། དང་ཐོག་མོའི་ཁྱིམ་ཚང་བདེ་ཞིང་སྐྱིད་ཀྱང་། བསམ་ཡུལ་ལས་འདས་པ་ཞིག་ལ་ལོ་འགའ་ཞིག་གི་སྔོན་དུ་སྡོད་ཁང་མེ་རུ་འབར་བས་རྒྱུ་ནོར་ཡོངས་རྫོགས་མེ་ལྕེས་ཁྱུར་མིད་བྱས། དེ་ནས་ཡུན་རིང་མ་འགོར་བར་ཁྱོ་ག་ཡང་བཙོན་དུ་བཟུང་། མོ་རང་དབུལ་པོ་ཅི་ཡང་མེད་པ་ཞིག་ཏུ་གྱུར་པས་ཕྲུ་གུ་ཁྲིད་དེ་གང་སར་འཁྱམས། ད་ལྟ་ཕྲུ་གུ་སློབ་གྲྭར་འགྲོ་ཐབས་མེད་པས་ཤེས་རབ་བྱམས་བརྩེའི་སློབ་གྲྭར་བསྡད་ན་ཆོག་གམ་ཞེས་ང་ལ་རེ་བ་བརྒྱབས་པས་ངས་ཀྱང་དང་ལེན་བྱས་པ་ཡིན།

ད་དུང་ཕྱུག་པོ་དང་དཔོན་པོ་འགའ་ཞིག་སྔོན་འདས་པའི་དུས་སུ་གཟི་བརྗིད་བླ་ན་མེད་ཅིང་ལག་གཅིག་གིས་ནམ་མཁའ་སྒྲིབ་པར་བྱེད་ཀྱང་མཐར་རྒྱུ་རྐྱེན་སྣ་ཚོགས་པས་ཡོད་ཚད་མདང་སུམ་གྱི་རྨི་ལམ་ལྟ་བུར་གྱུར། ཐ་ན་ལ་ལ་དག་ཤིན་ཏུ་ཡ་ང་བའི་ངང་དུ་འཇིག་རྟེན་མི་ཡུལ་འདི་ལས་ཁ་བྲལ་བ་རེད།

ལོ་འགའ་ཞིག་གི་སྔོན་དུ་གོ་ལ་ཧྲིལ་བོར་དངུལ་རྩའི་ཉེན་ཁ་གློ་བུར་དུ་བྱུང་བས་ཤར་ནུབ་ཀྱི་ཕྱུག་པོ་མང་པོ་གཅིག་རྗེས་གཉིས་མཐུད་ཀྱིས་འུ་ཐུག་གི་གཡང་དུ་ལྷུང་། དཔེར་ན་འཇར་མན་གྱི་ཕྱུག་རྒན་ཨང་ལྔ་པ་མོ་ཁི་ལི་སྟེ་སྔོན་ཨ་སྒོར་དུང་ཕྱུར་༩༢ཀྱི་འཛའ་ཐང་གིས་༢༠༠༨ལོའི་ཧྥོར་བྷི་སིའི་ཚོང་ལས་དུས་དེབ་ཁང་གིས་བསྒྲིགས་པའི་གོ་ལ་ཧྲིལ་བོའི་ཕྱུག་རྒན་བསྒྲིག་པང་དུ་ཨང་༩༤པར་བསྡད་ཀྱང་དངུལ་རྩའི་དྲག་རླུང་དེས་ཁོའི་ཚོང་ལས་བཙན་རྒྱལ་དེ་ཉིད་གཡང་ས་རུ་བརྡིབས་པར་བྱས། མཐར་མོ་ཁི་ལི་མྱུར་འགྲོས་ཀྱིས་བསྐྱོད་པའི་མེ་འཁོར་སྔུན་གྱི་བསྟར་ལམ་དུ་ཉལ་ནས་རང་ཤི་བརྒྱབས་པ་རེད། གཞན་ཡང་སྐབས་ཤིག་ཏུ་ཡོ་སྒོར་དུང་ཕྱུར་ལྔ་ཡོད་པའི་ཨེར་ལན་རྒྱལ་ཁབ་ཀྱི་ས་ནོར་འབྱོར་ལྡན་ལོ་ཁ་ཡིས་ཀྱང་མ་རྩ་གཏོང་བར་ཕམ་ཁ་བྱུང་སྟེ་ཨེར་ལན་རྒྱལ་ཁབ་ཀྱི་དངུལ་ཁང་ཨང་གསུམ་པ་མ་རྩ་བརྡིབས་པའི་དོན་དངོས་དང་ལེན་བྱེད་མ་ཐུབ་ནས་སྤྲོ་ཁང་དུ་མེ་མདས་རང་ཤི་བརྒྱབས། འདི་འདྲའི་གནས་ཚུལ་ནི་བགྲང་གིས་མི་ལང་།

མིའི་མི་ཚེའི་ནང་གི་བདེ་བ་ནི་ཡུན་ཧ་ཅང་ཐུང་ལ་གནས་སྐབས་སུ་རང་ལ་དབང་བའི་རྒྱུ་ནོར་དང་གོ་ས། སྙན་གྲགས་སོགས་ལ་ཡང་རྟག་བརྟན་དང་སྲ་བརྟན་གྱི་རང་བཞིན་སྤུ་ཙམ་མེད། ཇི་སྐད་དུ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་དོན་གསལ་བྱེད་ལས། ༼མཆན། རྒྱ་ནག་ཐང་ཞོན་ཙང་གི་སློབ་མ་ཁོས་རྩིས་བྱ་བས་མཛད་ཅིང་རྒྱ་བརྒྱུད་ནང་བསྟན་སེམས་ཙམ་པའི་སློབ་དཔོན་ཞིག་གོ། ༽འཇིག་རྟེན་འཁོར་བའི་བདེ་བ་ཡོད་དོ་ཅོག་མཐར་ཅིས་ཀྱང་འཇིག་པ་ཡིན་ནོ་ཞེས་གསུངས། ད་དུང་མགུར་གླུ་འགའ་ཞིག་ལས་ཀྱང་བདེ་དགའ་ནི་སྤུ་ཉག་ལྟར་ཕྲ་ཞིང་ཉམ་ཆུང་བས་དུས་ནམ་ཞིག་ཏུ་འཆད་རྒྱུ་ཡིན་པ་སུ་ཞིག་གིས་ཤེས་ཞེས་གསུངས་ཡོད།

དེ་ཡང་ལོས་ཡིན་ཏེ་ནང་ཆོས་ལ་སློབ་མ་མྱོང་བའི་མི་ལ་གློ་བུར་གྱི་འགྱུར་བ་རེ་བྱུང་བ་ན་ཡོད་ཚད་ལ་རེ་ཐག་ཆད་དེ་སེམས་པ་ཕུགས་བརྡིབས་སུ་སོང་ནས་ལས་རྒྱུ་འབྲས་ལ་དྲང་བདེན་མེད་པར་སྙམ་ཞིང་ཉིན་རྟག་པར་མྱ་ངག་གི་ཀློང་དུ་འཚོ་བ་རེད། ཡིན་ཡང་ཆོས་ལ་ཉམས་ལེན་ཕྲན་ཙམ་བྱེད་མྱོང་མཁན་གྱི་མི་ནི་དེ་ལྟར་མ་ཡིན་པར་བར་ཆད་དང་འགྱུར་བ་གང་འདྲ་ཞིག་དང་འཕྲད་རུང་བློ་བདེ་གུ་ཡངས་ཀྱི་ངང་ནས་དང་ལེན་བྱེད་ཐུབ་བོ། །

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

 
འདི་ནས་ལན་གཅིག་གནོན་རོགས།👇