༢ དགེ་སེམས་སྐད་ཅིག་ནི་སྨན་མཆོག་འབུམ་ཕྲག་ལས་ཀྱང་བཟང་ངོ་། །
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
རྒྱུད་ལ་སྐྱེས་པའི་དགེ་སེམས་གང་ཡིན་རུང་ཡུན་སྐད་ཅིག་མ་ཙམ་དུ་སྐྱེས་ཀྱང་དེ་ནི་སངས་རྒྱས་ཀྱི་བྱིན་གྱིས་རླབས་ཀྱི་དབང་གིས་ཡིན་ཞིང་དགེ་སེམས་དེ་དག་ནི་སྐྱེ་ཡང་ཧ་ཅང་དཀོན་པོ་ཡིན།
ཁོར་ཡུག་གང་ཞིག་ཏུ་བསྡད་རུང་ང་ཚོས་རྟག་ཏུ་སྨོན་ལམ་བཟང་པོ་རྒྱག་པའམ་དགེ་བ་བཟང་པོ་བསྒྲུབས་ནས་དགེ་བའི་ཡང་དག་འཇོག་ཏུ་གནས་པར་བྱེད་ནུས་ན་ཤིན་ཏུ་ལེགས།འདི་འདྲའི་དགེ་སེམས་དེ་ལ་ནུས་པ་ཆེན་པོ་ལྡན་པས་གཞན་མི་སྨོས་པར་བདེ་ཐང་ཙམ་གྱི་དབང་དུ་བཏང་རུང་ཕན་པ་རྒྱ་ཆེན་པོ་ཡོད།
འཇར་པན་གསར་འགྱུར་སྡེ་ཁག་གིས་བརྒྱུད་བསྒྲགས་བྱས་པ་ལྟར་ན།ཧྲན་ཁོས་རྫོང་གི་རྒས་གསོ་ཁང་ཞིག་གི་སྨན་ཞབས་པས་མདོ་སྡེ་བཤུའབྲི་བྱས་ན་ལོ་ལོན་གླེན་འགྱུར་ལ་སྔོན་འགོག་བྱེད་ཐུབ་པར་མཐོང་།ཕྱིས་སུ་འཇར་པན་གྱི་སློབ་ཆེན་ཞིག་གི་སློབ་དཔོན་ཆེན་མོས་རྒན་འཁོགས་སྟོང་ཕྲག་གཅིག་ལ་ཚོད་ལྟ་བྱས།དེའི་མཇུག་འབྲས་ཀྱིས་མདོ་སྡེ་བཤུ་འབྲི་བྱེད་པས་རྒན་འཁོགས་ཀྱི་ཀླད་ཆེན་གྱི་ནུས་ཤུགས་ལ་སྐུལ་སློང་བྱས་ཏེ་རྒན་འཁོགས་ཀྱི་བདེ་ཐང་ལ་ཡང་ཕན་པ་རྒྱ་ཆེན་པོ་ཡོད་པར་འདུག་ཅེས་བདེན་དཔང་བྱས་པ་རེད།
འཇར་པན་ནི་བགྲེས་འགྱུར་ཚད་ལས་བརྒལ་བའི་སྤྱི་ཚོགས་ཤིག་ཡིན་པས་ཞིབ་འཇུག་འབྲས་བུ་འདི་སྤྱི་བསྒྲགས་བྱས་རྗེས་སྡེ་ཁག་སོ་སོའི་མཐོང་ཆེན་ཐོབ་ཅིང་མི་ཤིན་ཏུ་མང་པོས་སྤྲོ་སེམས་འཁོར་བས་བརྒྱུད་བསྒྲགས་དང་བརྒྱུད་སྤྲེལ་བྱས།དོན་དུ་མདོ་སྡེ་ཡི་གེར་འབྲི་བ་ནི་སེམས་དགེ་བའི་ཡང་དག་འཇོག་ཏུ་གནས་པར་བྱེད་ཐུབ་པའི་ཐབས་མཆོག་ཅིག་ཡིན་པས་ཞིབ་འཇུག་འདིས་ཀྱང་དགེ་བའི་སྟོབས་ཤུགས་ལ་ཡང་བདེན་དཔང་རྨ་མེད་པ་བྱས་པ་རེད།
ངས་ཀྱང་དེ་འདྲའི་གནས་ཚུལ་མཐོང་མྱོང་སྟེ་དམ་པའི་སྐྱེས་ཆེན་དང་ཆོས་སྒྲུབ་པའི་རྒན་པོ་དགུང་ལོ་ཤིན་ཏུ་མཐོན་པོར་ཕྱིན་ཡང་དྲན་པ་ཧ་ཅང་གསལ་བ་དང་གཟུགས་ཕུང་ཡང་བདེ་ཞིང་ཐང་།
དེའི་ཕྱིར་གལ་སྲིད་ཀུན་གྱིས་ཚེ་རིང་བ་དང་བདེ་ཞིང་ཐང་བར་འདོད་ན་དགེ་བའི་འདུ་ཤེས་ཤིག་ཏུ་རྒྱུན་དུ་ངེས་པར་གནས་ཐུབ་དགོས།
བོད་དུ་ཆོས་པས་ཕན་ཚུན་ཁམས་འདྲི་བྱེད་སྐབས་བདེ་བ་ཅན་དུ་སྐྱེ་བར་ཤོག་ཅེས་སྨྲ་བ་རེད།རྒྱ་ནག་ཏུ་ཡང་ནང་པའི་རྗེས་འཇུག་པས་ཁ་གྲགས་པ་ན་ཨ་མི་ཏཱ་བྷ་ཞེས་ཟེར་ཞིང་ཁ་པར་གཏོང་སྐབས་ཀྱང་ཨ་མི་ཏ་བྷ།ཁྱོད་གང་དུ་ཡོད་ཅེས་པའམ་ཨ་མི་ཏཱ་བྷ།ཁྱོད་ཀྱི་གཟུགས་ཕུང་བདེའམ་ཞེས་ཟེར། ཆོས་གསུངས་སྐབས་ཀྱང་ཨ་མི་ཏཱ་བྷཚེ། ཚང་མ་བདེ་མོ་ཞེས་ཟེར་ཞིང་གསུངས་ཚར་རྗེས་ཀྱང་བཀའ་དྲིན་ཆེ།ཨམི་ཏཱ་བྷ་ཞེས་ཟེར་བ་རེད།དེ་འདྲའི་སྨོན་འདུན་དང་
ཁམས་འབྲི་བྱེད་པའི་རྟེན་འབྲེལ་ཤིན་ཏུ་བཟང་ཞིང་ནང་སེམས་ཀྱི་དད་པ་མཚོན་པར་བྱེད་པའི་རྣམ་པ་ཞིག་ཀྱང་ཡིན།
གལ་ཁྲིད་འགྲོ་འཆག་ཉལ་འདུག་སོགས་སྤྱོད་ལམ་ཐམས་ཅད་དུ་སངས་རྒྱས་འོད་དཔག་མེད་ཡིད་ལ་བྱས་ན་གནས་གང་ཞིག་ཏུ་བསྡད་རུང་སངས་རྒྱས་ཀྱི་བྱིན་རླབས་འཇུག་ཅིང་གཟུགས་ཕུང་བདེ་ཞིང་ཐང་བས་མི་ཚད་ཐ་ན་ཡོན་ཏན་ཁྱད་དུ་འཕགས་པ་དག་ཀྱང་འཐོབ་སྲིད་པ་དང་བདེ་བ་ཅན་དུ་སྐྱེ་བ་ལ་ཡང་རེ་བ་ཆེན་པོ་ཡོད་དོ།།