ཤི་བོ་ནི་ཤི་ཟིན་པས་དེ་ལ་སྟུག་གི་ཁ་སྣོན་མ་བྱེད།
ལེའུ་བདུན་པ།
ནང་པ་སངས་རྒྱས་པའི་འཆི་ཁའི་བྱམས་སྐྱོང་།
མི་ཤི་རྗེས་ཁྱིམ་མི་རྩ་ལག་རྣམས་ཀྱིས་ཆོས་ཀྱི་གླེགས་བམ་ཀློག་པ་སོགས་ཀྱི་རིམ་གྲོ་བྱེད་ནུས་ན་ཤི་བོ་ལ་ཕན་ཤིན་ཏུ་ཆེ། དེ་ལས་ལྡོག་སྟེ་དེའི་ཆེད་དུ་མི་དགེ་བའི་ལས་སྒྲུབ་པ་སྟེ་དམར་མཆོད་བྱེད་པ་ལྟ་བུ་ནི་ཤི་བོ་དེའི་ཁུར་པོ་དང་སྡུག་བསྔལ་གྱི་སྣོན་མ་ཁོ་ནར་འགྱུར་འགྲོ།
མདོ་ལས་གཏམ་རྒྱུད་འདི་སྐད་ཅིག་གསུངས་འདུག
ཐེངས་ཤིག སྟོན་པ་བཅོམ་ལྡན་འདས་དང་ཀུན་དགའ་བོ་ལྷན་ཅིག་གཙང་འགྲམ་དུ་འཆམ་འཆམ་དུ་འབྱོན་ཚེ་ཡི་དྭགས་ལྔ་བརྒྱ་དགའ་བཞིན་ལམ་དུ་དེངས་པ་གཟིགས། སྟོན་པ་བཅོམ་ལྡན་འདས་ལ་ཀུན་དགའ་བོས་དེའི་རྐྱེན་ཅི་ཞེས་གསོལ། སྟོན་པས་བཀའ་བསྩལ་པ། ཡི་དྭགས་འདི་དག་གི་བུ་རབས་ཚ་རྒྱུད་རྣམས་ཀྱིས་དེ་དག་གི་ཆེད་དུ་དགེ་བའི་བསོད་ནམས་བསགས་ཤིང་སྡུག་བསྔལ་གྱི་རྒྱ་མཚོ་ལས་ཐར་ལ་ཉེ་བས་ཤིན་ཏུ་དགའ་བར་གྱུར་པ་རེད་ཅེས་གསུངས།
ཕྱིས་སུ་སླར་ཡང་ཡི་དྭགས་བརྒྱ་ཕྲག་འགའ་ཞིག་གཟིགས་ཤིང་སྡུག་གི་མཆི་མ་འདོན་བཞིན་སོང་། ཀུན་དགའ་བོས་སླར་ཡང་དེའི་རྐྱེན་ཅི་ཞེས་གསོལ། སྟོན་པས་བཀའ་བསྩལ་པ། ཡི་དྭགས་དེ་དག་གི་བུ་རབས་ཚ་རྒྱུད་རྣམས་ཀྱིས་ཁོ་ཚོའི་ཆེད་དུ་དམར་མཆོད་སྒྲུབ་བཞིན་ཡོད་པའི་རྐྱེན་གྱིས་དེ་དག་གི་རྒྱབ་ཏུ་མེ་ཆེན་པོས་གདུང་ནས་དེད་པས་དུས་ཀུན་ཏུ་ངུ་འབོད་ཆེན་པོ་བྱེད་དོ། །ཞེས་གསུངས།
སའི་སྙིང་པོའི་མདོ་ལས་མིའི་ཚེ་འཕོས་རྗེས་དེའི་ཕྱིར་དུ་སེམས་ཅན་གྱི་སྲོག་བཅད་ནས་མཐུ་བོ་ཆེ་རྣམས་ལ་མཆོད་སྦྱིན་བསྒྲུབ་པར་མི་བྱའོ། །དེས་ཕྱི་མར་གྱུར་པ་དེ་དག་ལ་སྡིག་པའི་ལས་སྣོན་པར་བྱེད་པ་ལས་ཕན་གང་ཡང་མི་འབྱུང་། འཇིག་རྟེན་ཕྱི་མར་གྱུར་པ་དེ་དག་ཐོག་མར་མཐོ་རིས་སུ་སྐྱེ་བར་རིགས་ཀྱང་ཉེ་བའི་རྩ་ལག་དག་གིས་སྲོག་གཅོད་པའི་ལས་འདུ་བྱས་པས་ངན་འགྲོར་ལྟུང་ངོ་ཞེས་གསུངས།
སྔོན་རུས་ཅིང་ཅན་གྱི་མི་ཞིག་ཡོད་ཅིང་རྟག་ཏུ་སྨྱུང་གནས་ཡན་ལག་བརྒྱད་སྲུང་པ་དང་སྲོག་གཅོད་པའི་ལས་སྤངས་ཤིང་ཡིད་མོས་གུས་ཤིན་ཏུ་ཆེ། དེ་ཚེ་འཕོས་རྗེས་རྣམ་ཤེས་ཕྲུ་གུ་ཞིག་གི་ཁོག་ཏུ་ཞུགས་ནས་ཆུང་མ་ལ་སྔར་དགེ་བའི་ཚོགས་ཆེན་པོ་མ་རྫོགས་པའི་རྐྱེན་གྱིས་དག་པའི་ཞིང་དུ་མ་སྐྱེས་ཀྱང་བར་དོ་རུ་འགྲོ་འོང་ཐམས་ཅད་ལ་རང་དབང་ལྡན་པས་གཞན་ལ་ལྟོས་ན་ཤིན་ཏུ་སྐྱིད་ཅེས་སྨྲས།
ཉིན་ཞིག་གློ་བུར་དུ་ཆུང་མ་ལ་ངའི་དུར་སའི་སྔོན་དུ་ཅིའི་ཕྱིར་བྱ་བསད་དེ་དམར་མཆོད་བྱེད་པ་རེད། དེ་རིང་འགྲོ་འདུག་སྔར་ལྟ་བུའི་རང་དབང་མེད་པར་གྱུར་ནས་འཆིང་རྒྱ་ཐེབས་སོང་ཞེས་སྨྲས་ནས་གཤེ་གཤེ་བཏང་།
དེའི་ཕྱིར་མི་ཚེ་འཕོས་རྗེས་མི་དགེ་བའི་ལས་བསྒྲུབས་ནས་དམར་མཆོད་བྱས་ན་ཤི་བོ་ལ་སྡུག་གི་སྣོན་མར་འགྱུར་བས་གཏན་ནས་བྱེད་མི་རུང་། བོད་དུ་གལ་སྲིད་པ་མ་ཚེ་ལས་འདས་རྗེས་བུ་རྒྱུད་ཀྱིས་རྟག་ཏུ་སྲོག་གཅོད་པ་དང་མི་དགེ་བའི་ལས་བྱས་ན་མི་རྣམས་ཀྱིས་ཁྱིམ་ཚང་དེས་བུ་རྒྱུད་ཅི་འདྲའི་མ་རུངས་པ་ཞིག་ཤུལ་དུ་བསྐྱུར་འདུག ད་དུང་ཡང་མི་དགེ་བ་བར་མ་ཆད་དུ་གསོག་བཞིན་འདུག་པས་དེ་ཚོའི་ཕ་མ་འདས་པོ་དེ་དག་སྙིང་རེ་རྗེ་ཞེས་སྨྲ་བ་རེད།
དེའི་ཕྱིར་འདི་དག་ལ་ཕ་རྒད་པོ་དང་མ་རྒན་མོ་དག་གིས་དོ་སྣང་ཆེན་པོ་བྱེད་དགོས་ཤིང་། རང་ཉིད་ཚེ་མ་རྫོགས་པའི་གོང་དུ་བུ་རྒྱུད་དག་ལ་ཅི་ནུས་གང་ནུས་ཀྱིས་དགེ་བའི་ལས་སྒྲུབ་པར་གོ་འགུགས་བསྐུལ་མ་གཏོང་དགོས། དེ་ལྟ་ན་ཁྱོད་ཀྱི་ཚེ་འདི་ཕྱི་གཉིས་ག་ལ་བློ་བག་ཕེབ་པོ་འབྱུང་ངོ་། །