语言传承（音频）| 徐琏：婶娘的选择（上海话，诵读：史素瑛）

由于微信公众号平台推出新功能，“语言资源快讯”左边显示的名称并非原作者，而是公众号管理者，原作者将于大标题和文末显示，感谢各位读者的谅解！

婶娘的选择

看到《上海老年报》浪有一则乡村养老院个广告，心里向勿由得一震，勿就是婶娘住搿家养老院吗？我忒熟悉唻，每趟回乡，我侪要去探望婶娘个。

搿家由农家乐改建个养老院环境勿错，而且价格适中。婶娘搭一位远房表亲同住一室，每日天有医生、护士查房，三餐搭吃个药物由护工送到身边。窗外头有淋勿着雨个长廊，勒阳光照耀下头个木条椅子浪，一些已经衰老却安详、健谈或者言语少个同伴闲坐勒上头。

婶娘有得三个儿子，到养老院去是伊自家作出个选择。年轻辰光，勒外头行船个堂叔，死勒一场沉船事故里，要强个婶娘靠操持一家小小个裁缝店，一家头抚育三个儿子，直到伊拉陆陆续续成年了。

后首来，有热心人张罗，搭婶娘介绍了一个同样丧偶的黄昏伴侣，是浦东一个退休工人，婶娘是心动个。伊拉打算去领证办婚事个辰光，受到了儿子拉个强烈反对。当时个农村，啊勿像现在搿能介开放，寡妇再嫁拨看作是见勿得人的事体，儿子怕坍台。最终，婶娘打消了再嫁个念头。

儿子伊拉侪成家了以后，老长一段日脚，婶娘侪是一家头生活个。裁缝店老早就关脱了，婶娘邪气能干，学会了做农民生活。平常，伊拿自家个宅院收作得邪气清爽。前头个院子里种满了各种各样个鲜花，一年四季侪有开放个。秋天介，宅子南面个柿子树浪火辣辣个红，宅子北面个柑子树沉郁郁个绿。宅子后头个自留地呢，也打理得邪气齐整，种出来个蔬菜，总归比別人家个水灵。

岁月勒勒勿断个流逝，婶娘逐渐老了。伊个行动变得越来越邪气迟缓，出门常庄忘记脱带钥匙；炉灶浪向炖勒海个食物焦脱了也勿关脱；长远勿收作个田园，变成杂草从生个荒地。婶娘个生活慢慢叫勿能自理了。按农村人个规矩，伊开始勒三个儿子屋里轮流住，一个号头调一家。

过了呒没多少辰光，姊娘拿三个儿子叫勒一道，搭伊拉讲要到养老院去。现在个养老院已经勿像过去，只接纳孤寡老人，国家政策开始鼓励扶持民营养老院。只不过勒农村，有子女个老人还是固守养儿防老个旧观念，多数勿愿意到养老院去养老。婶娘能作出搿能介个选择，真个是勇气非凡呀。

（来源：上海老年报，沪语改写：丁迪蒙）

本期编辑 | 熊欣玉

本期审读 | 熊欣玉

责任编辑 | 甘于恩

投稿邮箱 | [e-mail]

往期推荐：

做语言资源保护公众号不容易，每天更新公众号不容易，而每天提供新语料尤其不容易。很多读者还没养成打赏习惯，提倡每个月打赏一元，积少成多，我们的事业就有希望。谢谢各位！