བརྩེ་དུང་ལ་ཞེན་ཆགས་བྱེད་པ་འདི་ཚེ་སྔོན་མར་འཁོན་པར་གྱུར་པའི་ལན་ཆགས
ལེའུ་གསུམ་པ།
མི་རྟག་པ་ནི་མི་ཚེའི་ནུས་པ་ཡང་དག་པ་ཞིག་ལ་སྒྱུར་དགོས།
སྐྱེ་བ་འདིའི་དབང་དུ་བྱས་རུང་གཉེན་ཉེ་སྡང་དགྲ་མི་རྟག་པ་ཡིན་ཞིང་དེ་རིང་མཉམ་དུ་གནས་ཐབས་མེད་པའི་དགྲ་བོ་ཆེན་པོ་ཡིན་རུང་སང་ཉིན་བསམ་བློ་གཅིག་ཏུ་མཐུན་པའི་གྲོགས་པོ་མཉེས་གཤེན་འདྲིས་ཟབ་ཅན་ཞིག་ཏུ་འགྱུར་ཡང་སྲིད། འདི་འདྲའི་གནས་ཚུལ་ཡང་འཚོ་བའི་ནང་དུ་མི་ཉུང་བ་བྱུང་ཡོད།
སྐྱེ་བ་སྔོན་མར་ཤིན་ཏུ་མཐུན་ཞིང་སྐལ་བ་བཟང་བའི་མི་གཉིས་སྐྱེ་བ་འདིར་འཁོན་འཛིན་ཅན་དུ་འགྱུར་སྲིད་ཅིང་། སྐྱེ་བ་འདིར་འབྲལ་མི་ཕོད་པ་ལྟ་བུར་གྱུར་པའི་མི་ཡང་ཏག་ཏག་སྔོན་མའི་དགྲ་སྡང་བའི་ལན་ཆགས་ཤིག་ཡིན་ཡང་སྲིད། དེའི་ཕྱིར་ནང་ཆོས་ཀྱི་རིགས་པས་བརྟག་དཔྱད་བྱས་ན་གལ་སྲིད་མི་ཞིག་ལ་ཤིན་ཏུ་ཆགས་ན་དེ་ནི་སྔོན་ཁྱོད་ཀྱི་སྡང་དགྲ་བོ་ཡིན་ཡང་སྲིད་པ་རེད།
རྟག་ཏུ་ན་གཞོན་རྣམས་ཀྱིས་ང་རང་ག་གེ་མོ་ཞིག་དང་ཤིན་ཏུ་མཐུན་པ་དང་དེ་མེད་ན་ང་རང་སྡོད་མི་ཚུགས་ཤིང་ཉིན་རྟག་པར་སེམས་སུ་ཝ་ལེར་དྲན་བཞིན་འདུག ཁྱེད་ཀྱིས་སོམས་དང་། ང་ཚོ་ཚེ་སྔོན་མར་དུང་ཟབ་ཅན་གྱི་ཁྱོ་ཤུག་ཡིན་ནམ་ཞེས་ང་ལ་འདྲི་ཞིང་། ངས་རྟག་ཏུ་ཁྱོད་གཉིས་སྔོན་སྡང་དགྲ་བོ་ཡིན་རྒྱུ་རེད་ཅེས་ལན་སྨྲ་བཞིན་ཡོད།
འདི་ནི་ཁུངས་མེད་ལོང་གཏམ་ཙམ་མ་ཡིན། ཚེ་འདིར་ཁྱོད་ལ་མི་དེ་མེད་པར་གྱུར་ན་གསོན་མི་འདོད་ཅིང་། ཐོག་ཁང་ལས་མཆོངས་ཏེ་རང་གསོད་བྱེད་པས་འདི་འདྲའི་བརྩེ་དུང་གི་ཞེན་ཆགས་དེ་ནི་སྔོན་མར་ཞེ་འཁོན་པར་གྱུར་པའི་ལན་ཆགས་ཡིན་ངེས་ཅན་ཡིན། རྒྱ་ནག་གི་ཕལ་ཆེན་པའི་ཤིང་རྟ་ལྔའི་བྱུང་བ་ཞེས་པ་རུ་ལོ་རྒྱུས་འདི་སྐད་ཅིག་བཀོད་འདུག
ཐང་རྒྱལ་རབས་སྐབས་ཀྱི་བཙུན་པ་ཏོས་ཧྲོན་བྱ་བ་ཐེངས་ཤིག་ཕྱི་རོལ་ཏུ་བསོད་སྙོམ་ལ་ཕེབས། སྦྱིན་བདག་ཅིག་གིས་ཕྲུ་གུ་པང་དུ་བཟུང་ནས་བཙུན་པ་ལ་ཚེ་ཡི་བར་ཆད་ལས་གྲོལ་བའི་སྐྱབས་འཇུག་ཞུས།
བཙུན་པས་ཕྲུ་གུ་དེར་འབུར་ཚུགས་སུ་ཡུན་རིང་དུ་གཟིགས་ནས་ཕྲུ་གུ་འདི་སྔར་ཁྱོད་ཀྱི་ལྡང་བའི་དགྲ་ཡིན་པས་ད་ལྟ་དེའི་ཆེད་དུ་བཤགས་པ་བྱས་ན་བཟང་ཞེས་གསུངས།
གདུགས་ཚོད་བཞེས་ཟིན་རྗེས་བཙུན་པས་སྦྱིན་བདག་དེར་ཕྲུ་གུ་གཙང་འགྲམ་ཞིག་ཏུ་ཁྱེར་ཤོག་པར་བསྒོས་ཤིང་ཕྲུ་གུ་བླངས་ནས་གཙང་པོར་གཡུགས། དེའི་ཚེ་སྦྱིན་བདག་ཁྱོ་ཤུག་ཟུང་གིས་བྲང་རྡེབ་བཞིན་སྐད་ཆེན་པོས་ངུས།
བཙུན་པ་ན་རེ། ལྟོས་དང་། ཁྱོད་ཅག་གི་ཕྲུ་གུ་ཤི་མི་འདུག་ཅེས་གསུངས་ནས་མཛུབ་མོ་བཙུགས་པས་ཕྲུ་གུ་འཕྲལ་དུ་བོངས་ཚད་ལ་ཁྲེ་ཙི་དྲུག་ཙམ་གྱི་སྐྱེས་པ་ཞིག་ཏུ་གྱུར་ནས་གཙང་པོའི་རླབས་རྩེར་འགྲེངས་ཤིང་སྡང་མིག་གིས་སྦྱིན་བདག་ལ་བལྟས་ནས་ཚེ་སྔོན་མར་ཁྱོས་ངའི་རྒྱུ་ཆས་འཕྲོག་ཅིང་ད་དུང་བསད་ནས་གཙང་པོར་གཡུགས། གལ་སྲིད་བྱང་ཆུབ་སེམས་དཔའ་འདིས་འཁོན་ཞུ་བར་མ་མཛད་ན་ངས་མི་སྐྱུར་ཁོ་ཐག་ཡིན་ཞེས་ཟེར་ཏེ་རྗེས་མེད་དུ་ཡལ།
ཚེ་སྔོན་མ་མི་བཤད་པར་སྐྱེ་བ་འདིའི་དབང་དུ་བྱས་རུང་གཉེན་ཉེ་སྡང་དགྲ་མི་རྟག་པ་ཡིན་ཞིང་དེ་རིང་མཉམ་དུ་གནས་ཐབས་མེད་པའི་དགྲ་བོ་ཆེན་པོ་ཡིན་རུང་སང་ཉིན་བསམ་བློ་གཅིག་ཏུ་མཐུན་པའི་གྲོགས་པོ་མཉེས་གཤེན་འདྲིས་ཟབ་ཅན་ཞིག་ཏུ་འགྱུར་ཡང་སྲིད། འདི་འདྲའི་གནས་ཚུལ་ཡང་འཚོ་བའི་ནང་དུ་མི་ཉུང་བ་བྱུང་ཡོད།
འཇིག་རྟེན་འཁོར་བ་པའི་བརྩེ་དུང་འགྱུར་སླ་བས་བྱ་བ་ངན་པ་ཞིག་ལ་འཕྲད་མི་དགོས།
ཁོང་ཚོས་བརྩེ་བ་འཛུགས་སླ་བ་ཡང་ཡིན་ཏེ་རྒྱུ་ནོར་འགའ་ཞིག་བྱིན་པའམ་ཚིག་སྙན་པོ་འགའ་སྨྲ་བའམ་ཡང་ན་འཛུམ་ཅུང་ཙམ་དམུལ་བས་སྦ་གསང་གང་ཡང་མེད་པའི་མཛའ་གྲོགས་སུ་འགྱུར་ནུས། བརྩེ་དུང་འཇིག་ཀྱང་སླ་བ་ཡིན་ཞིང་སྔར་སྐད་ཅིག་ཏུ་ཡང་འབྲལ་མི་ཕོད་པའི་མཛའ་གྲོགས་ཡིན་ཡང་བར་ཚིགས་སུ་གོ་ལོག་ཕྲན་ཙམ་སྟེ་དཔེར་ན་གཅིག་ལ་དཀའ་ངལ་འཕྲད་སྐབས་གཅིག་ཤོས་ཀྱིས་དབུགས་དབྱུང་མ་བསྩལ་བའམ་ཡང་ན་གཅིག་གིས་སྐད་ཆ་བཤད་སྐབས་ཚིག་ཡག་པོ་བེད་སྤྱོད་མ་ནུས་པའི་རྐྱེན་གྱིས་གཅིག་ཤོས་ཁྲོས་ཤིང་འཁྲུགས་པར་གྱུར་ཏེ་དེ་ནས་བཟུང་ཁ་ཡ་མི་བྱེད་པ་ལྟ་བུའོ། །
དེའི་ཕྱིར་གཉེན་ཉེ་གྲོགས་པོ་དང་སྡང་བའི་དགྲ་བོ་གང་ཡིན་ཡང་ཐམས་ཅད་མི་རྟག་པ་སྟེ་འགྱུར་བའི་རང་བཞིན་ཅན་ཡིན། འདི་ནི་དངོས་ཡོད་གནས་ཚུལ་ཡིན་ཞིང་མི་ཧ་ཅང་མང་པོས་རང་ཉིད་ཀྱི་ལུས་སྟེང་ནས་ཀྱང་ངོ་འཕྲོད་ནུས། དེ་ལྟ་ན་ང་ཚོས་རང་ཕྱོགས་ལ་ཆགས་འཛིན་དང་གཞན་ཕྱོགས་ལ་སྡང་བ་བྱེད་མི་རུང་བར་བྱམས་དང་སྙིང་རྗེ་ལྡན་པའི་སེམས་ཤིག་གིས་འདྲ་མཉམ་གྱི་སྒོ་ནས་སྲོག་ལྡན་ཡོད་དོ་ཅོག་ལ་གཅེས་སྐྱོང་བྱེད་དགོས་སོ། །