༤ མི་ཞིག་བྱེད་པར་བསམ་པ་བཟང་དགོས། བསོད་དར་རྒྱས་ཀྱིས་བརྩམས།
ལེའུ་བཞི་པ།
རྒྱུ་འབྲས་ལ་བླང་དོར་ཤེས་པའི་མི་ནི་བསོད་ནམས་ཆེ།
གལ་སྲིད་ཁྱོད་ཀྱིས་ནུས་པ་ཡོད་རྒུ་སྤྲུགས་ནས་གཞན་ལ་ཚིག་མཚོན་བཏབ་ན་རང་ཉིད་སྙིང་རྗེ་མེད་པའི་མི་ཞིག་ཏུ་འགྱུར་ཞིང་། འདི་འདྲའི་སྙིང་རྗེ་མེད་པ་ལས་བྱུང་བའི་གཟུགས་མེད་ཀྱི་ནུས་པས་མི་ཚེའི་བརྒྱུད་རིམ་དུ་དཀའ་སྡུག་མང་པོ་ལ་འཕྲད་པར་བྱེད་དོ། །
མི་ལ་ལ་ཞིག་གིས་གཞན་ལ་གཤེ་བའམ་མཚང་འདྲུ་སྐབས་ཚིག་ཤིན་ཏུ་རྣོ་ཞིང་ཁ་རུ་ཅི་ཡོང་བཤད། གནས་ཚུལ་གང་ཞིག་གམ་བྱ་བ་ཅི་ཞིག་ཡིན་རུང་ཕྲན་ཙམ་མི་འགྲིག་པ་བྱུང་ཚེ་དྲག་ཏུ་སྤྱོ་ཞིང་གནས་ཚུལ་ལ་རྒྱུས་ལོན་ཡོད་ཀྱང་རུང་མེད་ཀྱང་རུང་ཐོག་མར་གཤེ་གཤེ་ནན་མོ་ཞིག་བྱེད་པ་རེད། ཁྱད་པར་དུ་ད་ལྟའི་དྲྭ་ཐོག་ཐ་སྙད་ཀྱི་དྲག་སྤྱོད་ནི་ཉིན་རེ་བཞིན་ཇེ་ཐུ་རུ་འགྲོ་བཞིན་འདུག་ཅིང་ཐ་ན་ལ་ལས་དེ་ནི་ལོངས་སྤྱོད་ཅིག་གམ་ལས་རིགས་ཤིག་ཏུ་རྩི།
དེ་ཡང་ལོས་ཡིན་ཏེ་སྐད་ཆ་ཅི་ཞིག་བཤད་པ་ནི་རང་དབང་ཡིན། འོན་ཀྱང་གལ་སྲིད་ཁྱོད་ཀྱིས་ནུས་པ་ཡོད་རྒུ་སྤྲུགས་ནས་གཞན་ལ་ཚིག་མཚོན་བཏབ་ན་རང་ཉིད་སྙིང་རྗེ་མེད་པའི་མི་ཞིག་ཏུ་འགྱུར་ཞིང་། འདི་འདྲའི་སྙིང་རྗེ་མེད་པ་ལས་བྱུང་བའི་གཟུགས་མེད་ཀྱི་ནུས་པས་མི་ཚེའི་བརྒྱུད་རིམ་དུ་དཀའ་སྡུག་མང་པོ་ལ་འཕྲད་པར་བྱེད་དོ།།
ཇི་སྐད་དུ་སློབ་དཔོན་ཆེན་མོ་ཧན་ཧྲན་གྱིས།
འཆལ་བའི་ངག་གིས་མི་མཐུན་ཆག་སྒོ་སློང་། །
བརྩེ་བ་མེད་པས་རྐྱེན་ངན་ཐོག་ཏུ་ལངས། །ཞེས་གསུངས་སོ། །
ཏཱ་མིང་རྒྱལ་རབས་སྐབས་སུ་ཧན་ཀྲུས་ལ་ཝང་ཧྲིང་བྱ་བའི་མི་ཞིག་ཡོད་ཅིང་གཞན་གྱི་སྐྱོན་མཚང་འདྲུ་རྒྱུར་ཤིན་ཏུ་དགའ། ཁྱིམ་མཚེས་ཀྱི་ཕྲུ་གུ་ཤི་བ་ན་ཁོས་ཁྱོད་ཀྱིས་ལས་ངན་ཚབས་ཆེན་བསགས་པས་འདི་འདྲའི་རྣམ་སྨིན་འཁོར་བ་རེད་ཅེས་ཟེར་ཏེ་སྐྱོན་བརྗོད་བྱས།
ཡིན་ཡང་ཡུན་རིང་མ་འགོར་བར་ཁོའི་ཕྲུ་གུ་གཉིས་པོ་ཤི་བས། ཁྱིམ་མཚེས་ཀྱིས་ང་ལས་ཀྱང་ཁྱོད་ཀྱིས་བསགས་པའི་ལས་ངན་དེ་ཚབས་ཆེ་བ་ཞིག་མ་ཡིན་ནམ་ཞེས་ཟུར་ཟ་བྱས།
ཡང་ཐེངས་ཤིག་ཁོའི་གཉེན་ཉེ་ཞིག་གིས་རྒྱུགས་སྤྲད་དེ་ཨང་རིམ་བཞི་པ་ལོན།ཝང་ཧྲིང་གིས་ཁྱོད་ཀྱིས་བྲིས་པའི་རྩོམ་དེ་ཕྱིན་ཅི་ལོག་ཏུ་གྱུར་པས་རྒྱུགས་འབྲས་ལེགས་པོ་ཞིག་ག་ལ་འཐོབ་ཅེས་སྐྱོན་བརྗོད་བྱས། ལོ་གཅིག་གི་རྗེས་ཁོས་རྒྱུགས་སྤྲད་པས་ཨང་རིམ་ལྔ་པ་ལོན་པས་གཉེན་ཉེ་དེས་ཤ་ཉེས་བྲིས་པའི་རྩོམ་ཡིག་དེ་ང་ལས་ཀྱང་ཕྱིན་ཅི་ལོག་ཏུ་མ་གྱུར་ཏམ་ཞེས་ཟུར་ཟ་བྱས་སྐད།
དེའི་ཕྱིར་གཞན་ལ་གཤེ་བའི་མི་ལ་གཞན་གྱིས་རྟག་ཏུ་སླར་གཤེ་བར་བྱེད་ཅིང་གཞན་ལ་སྤྱོ་བའི་མི་ལ་གཞན་གྱིས་སླར་སྤྱོ་བར་བྱེད་པ་རེད། རང་རེས་གཞན་ལ་སྐྱོན་བརྗོད་བྱེད་སྐབས་ཐོག་མར་རང་ཉིད་ལ་སྐྱོན་དེ་ཡོད་མེད་རྟོག་དགོས། གལ་སྲིད་རང་ཉིད་སྐྱོན་གྱི་གོང་བུ་རུ་གྱུར་འདུག་ན་གཞན་ལ་འདི་མིན་དེ་མིན་གྱི་སྐད་ཅ་བཤད་པའི་ཐོབ་ཐང་ག་ལ་ཡོད།
སྔོན་དཔེ་ཆ་བ་རྒས་པ་ཞིག་ཡོད། ཁོའི་གཤིས་ཀོ་བ་ལྟར་གྱོང་ཞིང་རེངས། མི་བཟང་པོ་དང་བྱ་བ་བཟང་པོ་གང་ཡིན་ཡང་གླགས་བཙལ་ནས་གཤེ་གཤེ་གཏོང་བས་མིང་ལ་ཡང་ཧྲང་ཡང་གཉིས་པ་ཞེས་ཐོགས།
ལོ་རྒྱུས་ཁང་གི་རྩོམ་སྒྲིག་པ་སྐུ་ཞབས་ཆིང་ཏོན་ཟང་ཚེ་ལས་འདས་རྗེས་དེའི་སློབ་མ་རྣམས་ཀྱིས་སྒོར་མོའི་ཞལ་འདེབས་བསྒྲུབས་ཤིང་པུར་སྒམ་བསྒྲིགས་ཏེ་གཤིན་ཆོག་བྱས་པ་དང་དགེ་རྒན་གྱི་ཆུང་མ་བུ་རྒྱུད་སོགས་ལ་བདག་སྐྱོང་ལེགས་པོ་བྱས། བྱ་བ་ཐམས་ཅད་ཡུལ་ཆོས་དང་མཐུན་པར་བྱས་ཀྱང་ཧྲང་ཡང་གཉིས་པས་འཇིག་རྟེན་འདིར་དེ་འདྲའི་བསམ་བཟང་ཅན་གྱི་མི་ཞིག་ག་ལ་ཡོད། ཁོ་ཚོས་གོ་སྐབས་དེ་ལ་བརྟེན་ནས་མཚན་སྙན་སྒྲུབ་འདོད་པ་གསལ་པོ་རེད། གཞན་གྱིས་ཁོ་ཚོའི་བསམ་བཟང་ལ་བསྟོད་བསྔགས་ཕུལ་ན་གོ་ས་མཐོན་པོར་བཞུགས་པའི་དཔོན་ཆེན་དག་གིས་ཁོ་ཚོའི་སྤྱོད་བཟང་ཤེས་སུ་བཅུག་སྟེ་མ་འོངས་པར་དབང་ཆ་འཐོབ་ཏུ་རེ་བ་རེད་ཅེས་སྨྲས།
ཞིང་པ་དབུལ་པོ་ཞིག་གི་ཨ་མ་ལམ་འགྲམ་དུ་ཚེ་འཕོས་པས་ཞིང་པ་དེས་མ་རྒན་གྱི་ཕུང་པོའི་མདུན་དུ་ལུས་མོ་བཙུགས་ནས་གྲོང་མི་དག་ལ་ཕུར་སྒམ་ཉོ་བྱེད་ཀྱི་སྒོར་མོ་བསླངས།ཞིང་པ་དབུལ་པོ་དེ་ཉིད་གཟི་མདངས་ཉམས་ཤིང་ལུས་ཀྱང་སྐམ་རིད་དུ་གྱུར་འདུག་ལ་སྐད་ངག་ཀྱང་གཅོམ་ཆུང་ངུར་གྱུར་འདུག་པས་མི་མང་པོས་སྐྱོ་བའི་མཆི་མ་བཏང་ནས་དེ་ལ་སྒོར་མོ་ཁ་ཤས་བྱིན། ཡིན་ཡང་ཧྲང་ཡང་གཉིས་པས་མི་འདིས་ནི་མི་རོ་ལ་བརྟེན་ནས་སྒོར་མོ་སྒྲུབ་བསམ་པ་རེད། ས་རུ་ཉལ་བའི་མི་དེ་ཁོའི་ཨ་མ་ཨེ་ཡིན་སུ་ཞིག་གིས་ཤེས། སྲི་ཞུ་ཅན་གྱི་བུ་ཞིག་ག་ལ་ཡིན། གཞན་ལ་མགོ་བསྐོར་གཏོང་ཐུབ་རུང་ང་ལ་མགོ་བསྐོར་གཏོང་མི་ཐུབ་ཅེས་སྨྲས།
ཡང་ཐེངས་ཤིག་ཧྲང་ཡང་གཉིས་པ་བུད་མེད་སྤྱོད་གཙང་ཅན་ཞིག་ལ་ཕུལ་བའི་རྟ་བབས་ཤིག་ནས་བརྒྱུད་དེ་འགྲོ་སྐབས་མགོ་བོ་བཏེག་ནས་ཤིང་བྱང་ཐོག་གི་ཡི་གེ་བཀླགས་རྗེས་ལྕམ་འདི་ཉིད་གསོན་སྐབས་ནོར་གྱིས་ཕྱུག་ཅིང་ཁྱིམ་དུ་ཡང་གཡོག་མང་པོ་ཡོད་འདུག་པས་དེའི་ཁྲོད་དུ་ཆིན་ཀོང་དང་ཧྥིང་ཙི་ཏོས་ལྟ་བུའི་མི་མེད་དམ། དོན་འདི་ལ་ད་དུང་ཞིབ་མོས་དཔྱད་དགོས། ངས་བུད་མེད་འདི་སྤྱོད་གཙང་ཅན་ཞིག་མ་རེད་ཅེས་ཐག་གཅོད་བྱེད་མི་ཕོད་ཅིང་རེད་ཅེས་ཀྱང་ཐག་གཅོད་བྱེད་མི་ཕོད་ཅེས་སྨྲས།
ཧྲང་ཡང་གཉིས་པས་སྨྲས་པའི་ཚིག་ཐམས་ཅད་འདི་ལྟར་གྱོང་ཞིང་གནག་པས་ཀུན་གྱི་ཡིད་སུན་ཏེ་གཡོལ་ཐབས་དག་དག་བྱེད་པ་དང་དཔེ་ཆ་འཁྲིད་པར་གདན་འདྲེན་བྱེད་ཕོད་མཁན་ཡང་མེད་པར་གྱུར། དེའི་རྐྱེན་གྱིས་ཁོ་ལ་ཚེ་གཅིག་ཏུ་ལས་གང་ཡང་མེད་ཅིང་མཐར་ཟས་གོས་ཀྱིས་ཕོངས་ཤིང་ཡི་མུག་སྟེ་ཤི་བ་རེད།
དཔེ་ཆ་བ་རྒས་པ་འདིས་ཚེ་གཅིག་ཏུ་ལས་ངན་ཚབས་ཆེན་གང་ཡང་བསགས་མ་མྱོང་ཡང་རྟག་ཏུ་གཞན་ལས་ལྷག་པའི་ལྟ་བ་འདོན་སྙམ་བྱེད་པས་ཤེས་མེད་ཚོར་མེད་ཀྱི་ངང་ནས་འདི་འདྲའི་ཡ་ང་བའི་གནས་སུ་ལྷུང་། རང་རེས་ཀྱང་འདི་རང་ཉིད་ལ་ལྟ་བའི་མེ་ལོང་དུ་བྱས་ཏེ་སྔ་འགྱོད་ཕྱི་སྡོམ་བྱེད་དགོས།
ང་ཚོས་ཤེས་དགོས་པ་ཞིག་ནི་ཚིག་ངན་གཅིག་གིས་འཇིག་རྟེན་གྱི་འཆམ་མཐུན་དཀྲུགས་ཤིང་བྱ་ངན་གཅིག་གིས་ཚེ་གཅིག་གི་ཆག་སྒོ་སློང་སྲིད། རྒྱུན་པར་སྐད་ཆ་བཤད་སྐབས་བསམ་པ་བཟང་དགོས་ཤིང་ངག་གི་སྦྱོར་ངན་ལ་གཟབ་དགོས་པ་དང་སེམས་སུ་དྲན་ཚད་ཁ་རུ་ལེན་མི་རུང་།
ད་ལྟ་མི་ལ་ལས་གཞན་དང་འབྲེལ་འདྲིས་བྱེད་སྐབས་སྐད་ཆའི་སྒྱུ་རྩལ་ལ་ནང་བྱན་ཆུབ་ཅིང་སྐད་ཆ་སྨྲ་བའི་རིགས་པ་ལ་ཞིབ་འཇུག་བྱ་རྒྱུར་དགའ། ཡིན་ཡང་དོན་དངོས་སུ་ཆེས་བཟང་བའི་སྐད་ཆ་སྨྲ་བའི་རིགས་པ་འདི་ནི་སྐད་ཆ་ཇི་ལྟར་སྨྲ་བ་ལ་སྦྱོང་བརྡར་བྱེད་དགོས་པ་ཙམ་མ་ཡིན་པར་མི་ཞིག་ཇི་ལྟར་བྱེད་པའི་སྤྱོད་བཟང་ལ་རག་ལས།
མིའི་བསམ་པ་བཟང་དགོས་ཤིང་རྣམ་པར་དག་དགོས། ཡོན་ཏན་འདི་དག་དང་ལྡན་ན་སྐད་ཆ་ལེགས་པོར་ཅུང་སྨྲ་མ་ཤེས་རུང་ཀུན་གྱི་མགུ་བ་ཐོབ་སྲིད། གལ་སྲིད་བསམ་པ་མ་བཟང་ན་ཁ་བཤད་ཇི་ལྟར་མཁས་རུང་གནས་སྐབས་སུ་གཞན་མགོ་སྐོར་ཐུབ་རུང་གཞན་ནི་ནམ་ཡང་གཡོ་འོག་ཏུ་ཚུད་མི་སྲིད།
མི་ཞིག་བྱེད་པ་ལ་བསམ་པ་བཟང་དགོས།