༣ ལོ་ལོན་རྣམས་ལ་སྲི་ཞུ་སྒྲུབ་འདོད་ན་འཁོར་ལོ་སྐོར་བར་སློབ་དགོས།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
སློབ་དཔོན་པདྨ་འབྱུང་གནས་ཀྱིས་རིགས་ཀྱི་བུའམ་རིགས་ཀྱི་བུ་མོ་གང་ཞིག་བདེ་བ་ཅན་དུ་སྐྱེ་བར་འདོད་ན་འབད་པས་འཁོར་ལོ་འདི་སྐོར་བར་མཛོད་དང་། མཚམས་མེད་པའི་ལས་ལྔ་ཡང་དེ་ལ་བརྟེན་ནས་ཡོངས་སུ་འདག་ནུས་ཞེས་གསུངས།
རང་རེའི་བོད་དུ་རྒན་འཁོགས་ལོ་ན་ལྔ་བཅུ་དྲུག་ཅུར་སོན་སྐབས་ཁྱིམ་མི་རྣམས་ཀྱིས་བྱ་བ་གང་ཡང་སྒྲུབ་མི་དགོས་པར་ལས་འཁྱུར་བྱེད་དུ་བཅུག་ནས་བློ་རྩེ་གཅིག་སྒྲིལ་གྱིས་མ་ཎི་འདོན་པ་དང་འཁོར་ལོ་སྐོར་དུ་འཇུག་པ་རེད།
ཡིན་ཡང་རྒྱ་ནག་གི་གནས་ཚུལ་ནི་དེ་ལྟ་བུ་ཞིག་མ་ཡིན། མི་རྒས་རྗེས་སེམས་ངལ་བྱ་སའི་དོན་ཇེ་མང་དུ་འགྱུར་བས་དོན་དུ་འདི་ཡང་བུ་བུ་མོས་སྲི་ཞུ་ལ་མི་བརྩོན་པའི་རང་རྟགས་ཤིག་ཡིན། གལ་སྲིད་ཕ་མ་ལ་སྲི་ཞུ་ཡང་དག་པར་སྒྲུབ་འདོད་ན་ཁོང་ཅག་གི་ཚེ་ཕྱི་མ་ལ་བསམ་བློ་གཏོང་དགོས། ང་ཚོའི་བོད་དུ་སྲོལ་རྒྱུན་འདི་ལྟ་བུ་ཞིག་ཡོད། དེ་ཡང་གལ་སྲིད་བུ་རྒྱུད་སྲི་ཞུ་ཅན་ཞིག་ཡིན་ཚེ་ཐག་རིང་དུ་ལས་དོན་ལ་སོང་ནས་ཕྱིར་འཁོར་བ་ན་འཁོར་ལོ་ཉོས་ཏེ་ཕ་མར་བྱིན་པ་རེད། གང་ལྟར་ཕ་མ་ལོ་ན་མཐོན་པོར་ཕྱིན་ཞིང་ཁོང་ཅག་ལ་ཆེས་བཟང་བའི་བྱ་བ་ནི་མ་ཎི་དང་འོད་མཚན་མང་དུ་འདོན་པ་དང་འཁོར་ལོ་མང་དུ་བསྐོར་རྒྱུ་དེ་ཡིན།
དེའི་ཕྱིར། གལ་སྲིད་ཁྱིམ་གྱི་ལོ་ལོན་རྣམས་ལ་སྲི་ཞུ་སྒྲུབ་འདོད་ན་འཁོར་ལོ་སྐོར་བ་འདི་ངེས་པར་སློབ་དགོས།
དམ་པའི་སྐྱེས་ཆེན་རྣམས་ཀྱིས་ཀྱང་རྟག་ཏུ་འཁོར་ལོ་སྐོར་བ་རེད། དཔེར་ན་དཔལ་སྤྲུལ་རིན་པོ་ཆེ་གང་དུ་ཕེབས་ཀྱང་འཁོར་ལོ་ནག་པོ་ཞིག་ཡོད་ཅིང་། མི་ཕམ་རིན་པོ་ཆེའི་གཟིམས་ཤག་ཏུ་ཡང་རྟག་ཏུ་ལག་གིས་བསྐོར་རྒྱུའི་འཁོར་ལོ་ཞིག་ཡོད། ངའི་བླ་མ་ཆོས་རྗེ་ཡིད་བཞིན་ནོར་བུ་ལ་འཁོར་ལོ་ཆེ་ཆེ་ཆུང་ཆུང་མི་ཉུང་བ་ཞིག་ཡོད། ཐ་ན་ཨ་རི་དང་རྒྱ་གར་སོགས་རྒྱལ་ཁབ་གཞན་དུ་ཕེབ་སྐབས་ཀྱང་རྟག་ཏུ་འཁོར་ལོ་འབྲལ་མེད་དུ་བསྣམས་པས་ཁོམ་ལོང་འབྱུང་
སྐབས་སྐོར་བ་རེད།
སྔོན་བླ་མ་ཡིད་བཞིན་ནོར་བུས་བོད་ལ་སྐད་གྲགས་ཤིན་ཏུ་ཆེ་བའི་ཤུགས་གསེབ་མཁའ་འགྲོ་མ་༼བོད་ཀྱི་སྐྱེ་འམིའི་རྣམ་གཞག་ཅེས་པའི་ནང་གི་གླིང་སར་ཆོས་སྐྱིད་བྱ་བ་དེ་ཡིན།༽ བྱ་བ་ཞིག་ཡོད་ཅིང་ཁོང་རྟག་ཏུ་བར་དོར་འབྱོན་ཞིང་དམྱལ་ཁམས་བཅོ་བརྒྱད་དུ་ཡང་བྱོན་མྱོང་ཡང་གསོན་སྐབས་འཁོར་ལོ་སྐོར་བའི་མི་དམྱལ་བ་རུ་སྐྱེས་པ་གཏན་ནས་མཐོང་མ་མྱོང་བ་རེད་ཅེས་གསུངས།
སློབ་དཔོན་པདྨ་འབྱུང་གནས་ཀྱིས་རིགས་ཀྱི་བུའམ་རིགས་ཀྱི་བུ་མོ་གང་ཞིག་བདེ་བ་ཅན་དུ་སྐྱེ་བར་འདོད་ན་འབད་པས་འཁོར་ལོ་འདི་སྐོར་བར་མཛོད་དང་། མཚམས་མེད་པའི་ལས་ལྔ་ཡང་དེ་ལ་བརྟེན་ནས་ཡོངས་སུ་འདག་ནུས་ཞེས་གསུངས།
ང་རང་མི་སྒེར་ལ་མཚོན་ན་ཆུང་ནས་ད་ལྟའི་བར་དུ་འཁོར་ལོ་ལ་བརྩེ་བ་ཤིན་ཏུ་ཟབ།
ཆུང་དུས་རི་མགོར་ཕྱུགས་འཚོ་སྐབས་འཁོར་ལོ་ནག་པོ་ཆུང་ཆུང་ཞིག་ཡོད་པས་གངས་བབས་ཀྱང་རུང་ཆར་བབས་ཀྱང་རུང་རྐང་རྗེན་མར་ཕྱུགས་འཚོ་བཞིན་འཁོར་ལོ་སྐོར་བ་ཡིན། སློབ་གྲྭར་འགྲོ་སྐབས་སློབ་གྲྭའི་སྒྲིག་ཁྲིམས་ཤིན་ཏུ་དམ་ཡང་མཚན་མོ་ཉལ་ཁར་དལ་བུས་ཕྱི་རུ་བླངས་ནས་སྐོར་བ་ཡིན། རབ་ཏུ་བྱུང་རྗེས་ཆོས་ཀྱི་དོན་བྱ་ཧ་ཅང་མང་བས་ཆོས་ཁྲིད་ཡོད་སྐབས་མ་གཏོགས་རྒྱུན་པར་སྐོར་བའི་དུས་ཚོད་ཉུང་དུ་གྱུར་ཀྱང་ཁོམ་པ་དང་བསྟུན་ནས་རྟག་ཏུ་སྐོར་བཞིན་ཡོད། གཞན་ད་དུང་ངས་ཀྱང་འཁོར་ལོ་མང་པོ་ཉོས་ཡོད་པས་ཁྱིམ་དུ་མགྲོན་པོ་དམིགས་བསལ་བ་རེ་ཐོན་སྐབས་གཞན་ཅི་ཡང་མི་བྱིན་པར་འཁོར་ལོ་སྦྱིན་པ་ཡིན།
ད་སྐབས་གློག་བསྐུལ་འཁོར་ལོ་ཁྱབ་བདལ་དུ་ཕྱིན་ཞིང་འདི་ཡང་ཤིན་ཏུ་སྟབས་བདེ་བར་སྙམ་བཞིན་ཡོད། གློག་རིན་ཅུང་ཙམ་བྱིན་པས་ཉིན་མཚན་མེད་པར་སྐོར་ནུས་པས་རང་བཞིན་གྱིས་ཕན་ཡོན་རྒྱ་ཆེན་པོ་གསོག་ནུས། དེ་ལས་གཞན་ང་ཚོས་འཁོར་ལོ་ལག་པས་སྐོར་སྐབས་ངེས་པར་དུ་གཤམ་གྱི་དོན་འདི་དག་ལ་ཡིད་གཟབ་བྱེད་དགོས། ཅིས་ཀྱང་གཡས་འཁོར་བྱེད་དགོས་པ་དང་ནང་གི་གཟུངས་སྔགས་མགོ་མཇུག་ལྡོག་མི་རུང་ཞིང་གཟུངས་སྔགས་ཀྱི་འབྲུ་གསལ་བོར་དོད་དགོས། དེ་འདྲ་མིན་ན་ཉེས་པ་ཆེན་པོ་འབྱུང་བ་རེད། འཁོར་ལོ་བླུས་ཟིན་རྗེས་གལ་སྲིད་མཚན་ཉིད་ལྡན་པའི་དགེ་བའི་བཤེས་གཉེན་གྱི་རབ་གནས་ཐོབ་ན་བྱིན་རླབས་སྔར་བས་ཀྱང་ཆེ། གལ་སྲིད་ཡུལ་གྱི་ཆ་རྐྱེན་གྱིས་མ་འདང་བའམ་རྒྱུ་རྐྱེན་མ་འཛོམས་ན་རབ་གནས་མ་ཐོབ་པའི་འཁོར་ལོ་ཡང་སྐོར་ལོས་ཆོག