ཕ་མ་ལ་གུས་བཀུར་མ་བྱས་པས་བཅོམ་ལྡན་འདས་རྣམ་སྨིན་མྱངས་པའི་ཚུལ་མཛད།
ལེའུ་དྲུག་པ།
ཕ་མ་ལ་སྲི་ཞུ་སྒྲུབ་པའི་ཤེས་རབ།
བུ་བུ་མོ་རྣམས་ལ་མཚོན་ན་ཕ་མ་ལ་བརྙས་བཅོས་བྱེད་པ་ལས་ཚབས་ཆེ་བའི་ལས་ངན་པ་ཞིག་མེད།
འདུས་པ་རིན་པོ་ཆེའི་མཛོད་ལས་འདི་སྐད་ཅིག་གསུངས།
སྔོན་འདས་པའི་དུས་ཤིག་ན་སྟོན་པ་བཅོམ་ལྡན་འདས་རྒྱལ་པོའི་ཁབ་ཏུ་བཞུགས་ནས་དགེ་སློང་དག་ལ་དྲིན་ཆེན་པོ་ལྡན་པའི་ཕ་དང་མ་ལ་དངོས་པོ་ཕྲན་ཙམ་སྦྱིན་པ་ལ་ཡང་བསོད་ནམས་བསམ་གྱིས་མི་ཁྱབ་ཅིང་མཐའ་མེད།འགལ་བ་ཕྲན་ཙམ་བྱས་པ་ལས་ཀྱང་ཉེས་པ་རྒྱ་ཆེ་ཞིང་དཔག་ཏུ་མེད་པ་འབྱུང་ངོ་ཞེས་བཀའ་བསྩལ།
དགེ་སློང་དག་གིས་ལེགས་ཉེས་དེ་དག་གི་རྣམ་པར་སྨིན་པ་ནི་གང་ཡིན་ཞེས་གསོལ།
བཅོམ་ལྡན་འདས་ཀྱིས་བཀའ་བསྩལ་པ།སྔོན་འདས་པའི་དུས་ཤིག་ན་ཕོ་ལོ་ནའི་རྒྱལ་ཁམས་སུ་ཚེ་དང་ལྡན་པ་ཞིག་ཡོད་ཅིང་དེའི་བུ་ལ་བྱམས་པའི་གཞོན་ནུ་ཞེས་བྱ།ཚེ་དང་ལྡན་པ་དེ་སྔ་ནས་ཚེ་འཕོས་ནས་བྱམས་པའི་གཞོན་ནུ་ཡུམ་ཆེན་གྱིས་དཀའ་བ་བརྒྱ་ཕྲག་མྱངས་ནས་ཆེ་རུ་བསྐྱེད།ཆེ་རུ་ཕྱིན་རྗེས་ཁྱིམ་གྱི་རྒྱུ་ནོར་ཐམས་ཅད་ལུས་པ་མེད་པར་ཟད་པས་ཁོས་ཤིང་བཏུས་ནས་འཚོ་བ་བསྒྲུབས།ཐོག་མར་ཉིན་རེར་ཀརྴ་པ་ཎི་གཅིག་ཐོབ་ཅིང་དེ་ནས་དལ་གྱིས་བཞི་དང་བརྒྱད་དང་བཅུ་དྲུག་ཐོབ་པར་གྱུར།
མི་མང་པོས་ཁོ་རང་སྤྱང་གྲུང་ལྡན་པར་མཐོང་སྟེ་ཁྱོའི་ཡབ་ཚེ་དང་ལྡན་པ་འཚོ་ཞིང་བཞེས་སྐབས་རྟག་ཏུ་རྒྱ་མཚོར་ནོར་བུ་ལེན་དུ་འགྲོ་བས་ཅིའི་ཕྱིར་ཁྱོད་ཀྱིས་མི་ནུས་ཞེས་དྲིས།
བྱམས་པའི་གཞོན་ནུས་དེ་སྐད་ཐོས་རྗེས་ཡབ་ཚེ་དང་ལྡན་པ་དེས་རྒྱ་མཚོ་ལས་ནོར་བུ་ལེན་ནུས་ན་ངས་ཅིའི་ཕྱིར་མི་ནུས་ཞེས་ཡུམ་ལ་དྲིས།
ཡུམ་གྱིས་བུ་སྲི་ཞུ་ཅན་དུ་ཤེས་པས་རང་དང་ཁ་མི་འབྲལ་བར་བྱེད་ངེས་སྙམ་ནས་ཁྱོད་ཀྱང་འགྲོ་ལོས་ཆོག་ཅེས་ཀྱལ་ཀ་སྨྲས།
བུས་ཡུམ་ཆེན་གྱི་ཞལ་བཞེས་ཐོབ་རྗེས་འགྲོ་རྒྱུར་ཐག་བཅད་ནས་གྲོགས་དོན་མཐུན་འགའ་ཞིག་བཙལ་ཏེ་ཡུམ་ཆེན་ལ་གྱེས་ཕྱག་ཕུལ།ཡུམ་ཆེན་ཧང་སངས་ཏེ་ང་ལ་བུ་གཅིག་པུ་ཁྱོད་མ་གཏོགས་མེད།རྒྱ་མཚོར་ནོར་བུ་ལེན་དུ་འགྲོ་བའི་བྱ་བ་འདིར་ཉེན་ཁ་ཤིན་ཏུ་ཆེན་པོ་ཡོད་པས་མེས་པོ་གོང་མ་རྣམས་ཀྱང་སོང་ནས་ཕྱིར་མ་འཁོར་བ་རེད།ང་རང་ཤི་བར་གྱུར་ན་མ་གཏོགས་ཁྱོད་ཅིའི་ཕྱིར་གཏོང་སྟེ་མི་གཏོང་ངོ་ཞེས་སྨྲས།
བྱམས་པའི་གཞོན་ནུས་ཨུ་ཚུགས་ཀྱིས་མ་ཉན་ཞིང་གལ་སྲིད་ཁྱེད་ཀྱིས་དང་ཐོག་ཞལ་བཞེས་མ་མཛད་པ་ཡིན་ན་ང་རང་ཡང་འགྲོ་མི་ཕོད།ཡིན་ཡང་ཁྱེད་ཀྱིས་ཞལ་བཞེས་གནངས་ཟིན་པས་ཅིའི་ཕྱིར་སླར་ཡང་འགོག་པར་བྱེད།ང་ད་ལྟ་འགྲོ་ཁོ་ཐག་ཡིན་ཞེས་སྨྲས།
ཡུམ་ཆེན་གྱིས་འགོག་པའི་ཐབས་མེད་པར་མཐོང་ནས་གདུང་བས་ངུ་བཞིན་བུའི་རྐང་པ་ལ་འཐམ།ཡིན་ཡང་བུས་ཡུམ་ཆེན་གྱི་ལག་པ་བཀྲོལ་ཏེ་རྐང་པ་བཏོན་ནས་སོང་།དེའི་ཚེ་ཡུམ་ཆེན་གྱི་སྐྲ་ཉག་མ་བཅུ་བཅད།ཡུམ་ཆེན་གྱིས་བུ་ལ་སྲི་ཞུ་མི་སྒྲུབ་པའི་རྣམ་སྨིན་འཁོར་བར་འཇིགས་ནས་གཏོང་བ་ལས་འོས་མེད་པར་གྱུར།
བྱམས་པའི་གཞོན་ནུ་དང་གྲོགས་དོན་མཐུན་བཅས་གྲུར་བསྡད་ནས་རྒྱ་མཚོར་ཞུགས།
ཡིན་ཡང་རིན་པོ་ཆེ་བླངས་ནས་ཕྱིར་འཁོར་བའི་ལམ་དུ་ཐམས་ཅད་ཁ་འཐོར་ཞིང་བྱམས་པའི་གཞོན་ནུ་གཅིག་པུ་ཕྱོགས་བཞིར་འཁྱམས།འཁྱམས་འཁྱམས་པས་ལས་ཀྱི་དབང་གིས་ལྕགས་ཀྱི་གྲོང་ཞིག་མཐོང་བ་དང་དགའ་སྤྲོ་དང་བཅས་ཏེ་ནང་དུ་ཞུགས་ཤིང་མཐར་དེ་ནི་ཉི་ཚེ་བའི་དམྱལ་བ་ཡིན་པ་ཤེས།
ཁོས་མི་ཞིག་གི་དཔྲལ་བར་ལྕགས་ཀྱི་འཁོར་ལོ་མེ་འབར་བ་ཞིག་འཁོར་ནས་ཀླད་དཀར་ཕྱོགས་བཞིར་མཆེད་པ་མཐོང་།དེ་ལ་ཁོས་ལས་ཅི་ཞིག་བསགས་ཏེ་འདི་རུ་སྐྱེས་ནས་སྡུག་བསྔལ་མྱོང་ཞེས་དྲིས།དེས་ངས་སྔར་ཡུམ་ཆེན་ལ་གནོད་འཚེ་བྱས་པས་དེའི་འབྲས་བུས་འདི་ལྟ་བུ་ཞིག་མྱངས་ཞེས་སྨྲས།
བྱམས་པའི་གཞོན་ནུས་རང་གིས་ཀྱང་ཡུམ་ཆེན་ལ་གནོད་འཚེ་སྒྲུབ་མྱོང་བ་ཡིད་ལ་ཤར་ཞིང་ཤར་མ་ཐག་ལྕགས་ཀྱི་འཁོར་ལོ་མེ་འབར་བ་དེ་ཉིད་དཔྲལ་བར་ལྷུང་ཞིང་མི་དེ་དང་འདྲ་བར་ཀླད་དཀར་ཕྱོགས་ཕྱོགས་སུ་མཆེད།དེའི་ཚེ་ཁོས་འདི་སྐད་བསམས།འཁོར་བའི་ནང་དུ་ང་དང་ང་འདྲ་བར་ཡུམ་ཆེན་ལ་གནོད་འཚེ་བསྒྲུབས་ཏེ་སྡུག་བསྔལ་འདི་མྱོང་བཞིན་པའི་སེམས་ཅན་ད་དུང་མང་པོ་ཡོད་ངེས།དེ་དག་གི་སྡུག་བསྔལ་ཐམས་ཅད་བདག་གིས་ཚབ་བྱས་ཏེ་བདག་གི་ལུས་སྟེང་དུ་སྨིན་པར་གྱུར་ཅིག
སེམས་བསྐྱེད་འདི་སྐད་བྱས་མ་ཐག་ལྕགས་ཀྱི་འཁོར་ལོ་ནམ་མཁར་ཡལ་ནས་སྡུག་བསྔལ་དེ་ལས་ཐར།
བྱམས་པའི་གཞོན་ནུ་བྱ་བ་འདི་སུ་ཡིན་ཞེ་ན།བདག་ཅག་གི་སྟོན་པ་ཤཱཀྱ་ཐུབ་པ་ཉིད་སློབ་པ་ལམ་ན་གནས་པའི་སྐབས་ཡིན།འདས་པའི་དུས་སུ་བཅོམ་ལྡན་འདས་ལ་འཕྲད་པའི་མྱོང་བ་དེས་ཕ་མ་ལ་འགལ་བ་བྱས་ཤིང་གནོད་པ་བསྒྲུབས་ན་དེ་ནི་ཉེས་པ་ཚབས་ཆེན་ཇི་ལྟ་བུ་ཞིག་ཡིན་པ་རང་རེ་ཚོས་ཤེས་ཡོད་ལས་ཆེ།