བསོད་ནམས་ཡོངས་སུ་རྫོགས་ཀྱང་ཆ་གསུམ་ལས་ལོངས་སུ་སྤྱོད་མི་རུང་།
ལེའུ་བརྒྱད་པ།
ལྟ་ཚུལ་གྱིས་འཇིག་རྟེན་དུ་འཚོ་ཚུལ་ལ་འགྱུར་བ་གཏོང་ནུས།
ཁ་དཔེ་ཞིག་ལ་བསོད་ཟད་ཚེ་ཐུང་ཞེས་ཟེར། དེའི་ཕྱིར་རང་རེས་ཤིན་ཏུ་ཡུན་ཐུང་བའི་མི་ཚེའི་བརྒྱུད་རིམ་དུ་བདེ་བ་ཡུན་རིང་བོར་མྱོང་བསམ་པའམ་ཡུན་རིང་པོར་འཚོ་བསམས་ན་བསོད་ནམས་ལ་གཅེས་སྤྲས་བྱེད་དགོས།
མིའི་ཚེ་གཅིག་གི་བསོད་ནམས་ནི་ཚད་ཅན་ཡིན་ཞིང་དེ་ནི་དངུལ་ཁང་ནང་གི་བསགས་དངུལ་དང་འདྲ་བས།གལ་སྲིད་གཅེས་འཛིན་མ་བྱས་པར་རང་དགར་འཕྲོ་བརླག་ཏུ་བཏང་ན་ཉིན་ཞིག་བསོད་ནམས་ཡོངས་སུ་ཟད་ནས་མྱ་ངན་གྱིས་ནོན་པར་འགྱུར་བ་མ་ཟད་ཡུན་རིང་པོར་ཡང་འཚོ་མི་ནུས།
ཡོན་རྒྱལ་རབས་ཀྱི་སྐབས་སུ་གཙུག་ལག་སློབ་ཆེན་གྱི་སློབ་མ་གཉིས་ལོ་ཟླ་ཞག་དུས་གཟའ་སྐར་སོགས་གཅིག་ཏུ་སྐྱེས་པ་མ་ཟད་སྨེ་བ་སྤར་ཁ་སོགས་ཀྱང་གཅིག་མཚུངས་ཡིན། ཁོ་གཉིས་མཉམ་དུ་རྒྱུགས་འཕྲོད་ཅིང་ཉིན་གཅིག་ཏུ་དཔོན་གྱི་གོ་སར་དབང་། གཅིག་ཝེ་ཀྲུས་སུ་དཔོན་བྱས་ཤིང་གཅིག་ཤོས་ཧོང་ཀྲུས་སུ་བྱས།
ཡུན་རིང་མ་འགོར་བར་ཧོང་ཀྲུས་སུ་སྡོད་པའི་དཔོན་པོ་དེ་ཚེ་ལས་འདས་པས་ཝེ་ཀྲུས་སུ་སྡོད་མཁན་དེ་ཤིན་ཏུ་འཇིགས་ཏེ་ཁོ་ཡང་འཆི་རྒྱུ་ཡིན་པར་སྙམ་ནས་འཕྲལ་དུ་ཁ་ཆེམས་བཞག
ཡིན་ཡང་ཉིན་བདུན་འདས་ཀྱང་གཟུགས་ཕུང་སྔར་ལྟར་བརྟས་པ་ལས་གནས་ཚུལ་གང་ཡང་མ་བྱུང། དེ་ནས་ཁོ་སློབ་གྲོགས་རྙིང་པའི་སར་སོང་ནས་མྱ་ངན་ཞུས། ཁོ་སྐྱོ་གདུང་མི་བཟད་པས་མནར་ཏེ་དུ་ངག་དང་བཅས་ཏེ་ང་དང་ཁྱོད་གཉིས་ལོ་ཟླ་ཞག་དུས་དང་གཟའ་སྐར་ཚེས་གྲངས་གཅིག་ཏུ་མི་ཡུལ་དུ་ལྟེ་ཁྲག་འཐོར་ཞིང་ས་ཆ་ཡང་གཅིག་ཏུ་སྐྱེས། ཡིན་ཡང་ཁྱོད་སྔོན་དུ་འཇིག་རྟེན་ལས་ཁ་བྲལ་བས་ང་ད་ལྟ་ཉིད་དུ་ཚེ་འཕོས་རུང་ཁྱོད་ལས་ཉིན་འགའ་ཞིག་གིས་འཕྱི་བར་གྱུར། འདི་ཅིའི་ཕྱིར་ཡིན་པ་རེད། གལ་སྲིད་དོན་དུ་ལེགས་ཉེས་དཔྱོད་པའི་ལྷ་ཞིག་ཡོད་ན་རྨི་ལམ་དུ་རྒྱུ་མཚན་གསུང་བར་ཞུ་ཞེས་སྨྲས།
ནུབ་དེའི་མི་ལམ་དུ་ཚེ་ལས་འདས་པའི་ཧོང་ཀྲུས་ཀྱི་དཔོན་དེས་བྱ་བ་གང་ཡིན་ཡང་ཁྱོད་གྲོན་ཆུང་གིས་སྤྱོད་པར་མཁས་པས་ཚེ་ཐག་སྲིང་ཞིང་། བདག་ནི་ཚད་ལས་བརྒལ་བའི་སྒོ་ནས་དངོས་པོ་ལ་ལོངས་སུ་སྤྱད་དེ་བསོད་ནམས་ཡོངས་སུ་ཟད་པས་ཚེ་ཐག་བསྟུངས་པར་གྱུར་ཅེས་སྨྲས་པ་རེད།
ཁ་དཔེ་ཞིག་ལ་བསོད་ཟད་ཚེ་ཐུང་ཞེས་ཟེར།དེའི་ཕྱིར་རང་རེས་ཤིན་ཏུ་ཡུན་ཐུང་བའི་མི་ཚེའི་བརྒྱུད་རིམ་དུ་བདེ་བ་ཡུན་རིང་བོར་མྱོང་བསམ་པའམ་ཡུན་རིང་པོར་འཚོ་བསམས་ན་བསོད་ནམས་ལ་གཅེས་སྤྲས་བྱེད་དགོས།
ནང་པ་སངས་རྒྱས་པའི་དམ་པའི་སྐྱེས་ཆེན་རྣམས་ཀྱི་སྐུ་ཕྲེང་རིམ་བྱོན་ཐམས་ཅད་ཀྱིས་བསོད་ནམས་གཅེས་འཛིན་བྱེད་པ་ལ་ཤིན་ཏུ་མཐོང་ཆེན་མཛད་པ་རེད།ཁོང་རྣམས་ཟས་ཀྱིས་ལྟོ་འགྲང་ཙམ་དང་གོས་ཀྱིས་རྒྱབ་དྲོས་ཙམ་གྱིས་ཆོག་པར་འཛིན་པ་ལས་གཞན་རྣམས་ལ་དོ་སྣང་ཡེ་མི་མཛད།
དཔེར་ན་རྒྱ་ནག་གི་སློབ་དཔོན་ཆེན་མོ་ཧོང་དབྱི་ལྟ་བུ་སྟེ།ཐེངས་ཤིགསློབ་གསོ་བ་ཆེན་མོ་ཞ་མེན་ཙོན་སློབ་དཔོན་ཧོང་དབྱི་མཇལ་དུ་ཕྱིན།ཉིན་གུང་ཟ་མ་བཟའ་ཚེ་སློབ་དཔོན་གྱིས་ཚོད་མ་བསྙལ་མ་ཞིག་གསོལ་བ་མཐོང་།ཞ་མེན་ཙོན་སེམས་ཀྱིས་མ་བཟོད་དེ་ཁྱེད་ཀྱི་ཚོད་མ་འདི་ཧ་ཅང་ལན་ཚ་བ་ཞིག་མ་ཡིན་ནམ་ཞེས་སྨྲས།
སློབ་དཔོན་ཧོང་དབྱིས་ལན་ཚ་བ་ལ་ལན་ཚ་བའི་བྲོ་བ་ཡོད་ཅེས་གསུངས།
ཅུང་འགོར་རྗེས་སློབ་དཔོན་གྱིས་ཟ་མ་བཞེས་ཟིན་ནས་ལག་ཏུ་ཆུ་ཁོལ་ཞིག་བསྣམས་འདུག་པ་མཐོང་།སྐུ་ཞབས་ཞ་ལགས་ཀྱིས་སླར་ཡང་སྨིན་མ་བསྡུས་ཏེ་ཁྱེད་ལ་ཇ་ལོ་མེད་དམ།
ཉིན་རྟག་པར་ཆུ་ཁོལ་དཀྱུས་མ་ཙམ་བཞེས་པས་ག་ལ་ཆོག་ཅེས་སྨྲས།
སློབ་དཔོན་ཧོང་དབྱིས་འཛུམ་དམུལ་བཞིན་ཆུ་ཁོལ་དཀྱུས་མ་ཙམ་ཡིན་རུང་དཀྱུས་མ་ལ་ཡང་དཀྱུས་མའི་བྲོ་བ་ཡོད་ཅེས་གསུངས།
བསོད་ནམས་ལ་གཅེས་འཛིན་བྱེད་ཤེས་ན་བསོད་ནམས་ཆུ་བོ་ཆེན་པོའི་རྒྱུན་ལྟར་རིང་བ་རེད།དོན་དུ་ན་མི་སུ་ཞིག་ཡིན་རུང་འཇིག་རྟེན་དུ་འགྲན་པའི་ཟླ་དང་བྲལ་བའི་དངོས་པོ་བགྲང་གིས་མི་ལང་བ་ལ་བདག་གིར་དབང་རུང་ལོངས་སུ་སྤྱོད་ཐུབ་པ་ལ་ནི་ཉུང་ཉུང་ཞིག་ལས་མེད།
ཇི་སྐད་དུ་ས་ཞིང་དཔག་ཚད་སྟོང་ལས་བརྒལ་བ་ཡོད་རུང་ཉིན་རེར་འབོ་གསུམ་ལས་མི་བཟའ།ཁང་བཟང་འབུམ་ཕྲག་བཅུ་ལས་མང་བ་ཡོད་རུང་མཚན་མོར་མལ་ཁྲི་གཅིག་ལས་མི་ཉལ་ཞེས་ཟེར།དེའི་ཕྱིར་ཚང་མས་མཁོ་ངེས་ཀྱི་འཚོ་བའི་ཡོ་བྱད་ཁོ་ན་རྒྱུན་སྐྱོང་ཐུབ་ན་ཤིན་ཏུ་བཟང་བ་ལས་ཐོབ་ཅིང་འོང་བར་དཀའ་བའི་རང་ཉིད་ཀྱི་བསོད་ནམས་རང་གར་རྡོག་པས་རྫི་མི་རིགས།
བསོད་ནམས་ཀྱི་དཀྱིལ་འཁོར་ཡོངས་སུ་རྫོགས་ཀྱང་ཆ་གསུམ་ལས་ལོངས་སུ་མི་སྤྱོད་པར་ལྷག་ལུས་རྣམས་ཕྱིས་སུ་སྤྱོད་པས་ཆོག་པར་བྱེད་དགོས།
གལ་སྲིད་བྱང་ཆུབ་ཀྱི་སེམས་ཆེན་པོ་བསྐྱེད་དེ་བསོད་ནམས་ཐམས་ཅད་ཀྱིས་སེམས་ཅན་ཡོངས་ལ་གཏན་པ་མེད་པའི་མཆོད་སྦྱིན་སྒྲུབ་ནུས་ན་ངང་ངམ་ཤུགས་ཀྱིས་བསོད་ནམས་ཡར་ངོའི་ཟླ་བ་ལྟར་འཕེལ་ཞིང་བདེ་བ་དམ་པ་ཡང་འཛད་པའི་དུས་མེད་པར་འགྱུར་རོ།།