其他
【学上海话】金山话《滩渡》作者、朗读:阿小庆配乐:神死恸瞑、岑然周早呛呒没水龙头呃辰光,老百姓呃生活用水是用井水及河水呃。井水清爽,做饮用水。河水邋耐,就作为生活用水。今朝呢奴就想讲讲嗱门前搿只老滩渡及滩渡上发生啦呃事体。嗱门前有条朝东朝西啦呃小河浜,河浜北半爿有只滩渡,是嗱个屋头上老祖宗埠啦呃。老祖宗钞票呒,就介敲两根桩头咯约莫着弄弄。河南陈家也一只滩渡,贴对嗱老屋西南间(嗱只滩渡有啦嗱老屋西南间再朝西南耐方向)。伊哒老祖宗有铜钿,只滩渡用五跋(块)一公尺領转(超出)呃青石埠,看起来介是蛮好看呃。奴记得奴小嗨里㑚一个屋头上人蛮多呃,别个屋头上也分出带家(好几家),休息啦么侪相信梗上(自留地)跑跑、屋里出池出池(打扫打扫),闲不落来。乃么个滩渡上也闹热来海万。前头河水么也清,逐样(每样)要拿到河里去汏。汏菜、淘米、汏衣裳、浴身还加个倒马桶。哦哟搿个倒马桶么真叫人命势(很累、很烦的意思),污倒到屋后底坑缸里仔(坑缸一般侪摆啦屋后底)还要拎倒屋门前滩渡上,轧踏轧踏(拟声词)拿马桶嚯筅肖。弗看山水呃人么想着倒马桶么就倒哩,介咯相骂侪啦去(所以这件事很容易引起吵架)。不过小嗨里还是开心呃日脚多。碰着一日天大家侪休息,天气亦好,乃么河里岸上真叫闹热。妇女啦囤几脚桶衣裳讲讲笑笑啦滩渡上汏衣裳;路上何人家踏点老式脚踏车嘎吱嘎吱街上买菜回转;埂上老头老太拿起点铁打锄头塌塌弄弄(锄草翻地的大致描写);场上小囡跑转跑转(跑来跑去)拱(音意字,意思是打闹嬉戏,原字不知)来一身汗还弗肯停落来,男人啦么老家生拿出来敲敲打打;鸡棚里鸡拆蛋啊哩咯咯哒咯咯哒叫去捡蛋呀!日头实啊哩(快吃中饭了)。何人家饭镬香啊哩。眼乌珠一夹,老伏鸡(老母鸡)变雄鸭,奴今年也三十岁啊哩。再看看搿将(现在)呃屋头上(泛指小时候家乡的这些人)。人也走完啊哩侪剩点老人,河水老早混来用弗得啊哩。滩渡,也坍来差弗多啊哩!作者、朗读者简介阿小庆老师简介:金山农村的一个普通青年,爱好上海本土的文史,对沪语金山话的现状表示深深忧虑,希望在将来能联合市区和各郊区方言做一些保护性工作。△阿小庆老师配乐者简介岑然周老师简介:“沪语推广积极人士,有深厚的沪语背景和文化底蕴,热衷于沪语振兴,特别致力于开拓沪语翻译这一新领域。多年在新世界语言学校从事成人及企业的沪语培训,获得师生好评。在文艺哲史方面也有浓厚兴趣,曾受辅仁读书会邀请做了系列《聊斋》专题赏析讲座。”△岑然周老师欣赏岑然周先生朗读的更多文章,可直接点击以下链接!欣赏岑然周先生朗读的更多文章,可直接点击以下链接!【学上海话】永生永世记得