语言传承（音频）| 王坚忍：上海人，啥人呒没用过假领头（上海话，诵读：史素瑛）【转发】

“语言资源快讯”左边显示的名称并非原作者，而是公众号管理者，原作者将于大标题和文末显示，感谢各位读者的谅解！

上海人，啥人呒没用过假领头

原创：夜光杯

作者：王坚忍

改写：郭莉

朗读：史素瑛

推荐：丁迪蒙

（朗读者近照）

啥个叫“时尚”？要讲起来，还真个就是：一场经典个轮回。

侬就拿“假领头”来讲，老底子勒勒上海，啥人呒没戴过用过呢？

迭只物事，商店里牌价浪，写个是“学名”，叫“节约领”，但是呢，大家侪邪气实惠叫伊“假领头”。稍微有眼年纪个上海人，应该侪晓得个。伊只有挺括个衬衫领头，呒没袖子管，更加呒没前后衣片个“服饰”，搭仔“袖套”一样，侪是时代个产物。勒当年，布料、肥皂咾啥侪是要凭票子供应个，假使用“的确良”个边角料做只假领头，省布料勿算，汏起来还省肥皂，所以勒一段日脚里向，假领头成为了上海最流行个日常服饰。

当年我还年轻，勒一只渔船浪想做船员。平常辰光，我身边通常是带好五只假领头来替换：白个、蓝个、米黄个、灰个，还有一只是两种颜色拼接个——露勒外头个领片是白底蓝格子个，套勒胳肢窝下头个“领脚”是粉红个。搿是我姆妈个创意，“领脚”用阿妹做衬衫剩下来个边角料做，也算是变废为宝伐。

迭歇辰光年轻人侪梦想做个诗人，我当然也勿例外。每趟出海，总归熬勿牢要尝试搨个几笔，写眼现在看来实在是幼稚个诗歌。记得有一年，局里开“赛诗会”——迭个也是当年老行（hhang）个，我作为海上第一线个作者，居然也拨邀请参加了。就去参加活动个辰光，我到底是戴阿里只假领头呢？考虑再三，我选了蓝格子个，因为露勒上装外头比较文气，端庄大方，搭赛诗会个气氛老相配个。

想清爽以后，我就戴好假领头，外头套了件草绿色个军装出发了。轮到我上台了，读到最后一段个辰光，情绪邪气高涨、激动，血脉贲张，我竟然勿由自主个解开了军装上头个两粒纽子。哎呀！乃末僵脱了，一个大男人，竟然拿假领头下半截个粉红色“领脚”，侪暴露勒大庭广众之下！台下当然是哄堂大笑咾！我个面孔辣霍霍发烫，自家心里有数，搿记洋腔是出大了呀！

我最终获得了鼓励奖。上台领奖后返回到座位，旁边有个姑娘搭我寻开心：侬还应该得只“滑稽奖”奖。

没想到啊，过脱了三四十年，老早就一件拨淘汰个假领头重出江湖了。上海有媒体报道，秋冬换季个辰光，中、老年顾客侪跑来买假领头，弄得好几家商店个假领头供勿应求，其中，顶顶吃香个是“开司米”假领头。我想，大概是“开司米”领头软熟、暖热，汏起来又比较便当伐！

看看假领头现在介抢手，我想起一句老有道理个言话：“时尚，就是一场经典个轮回”，翻旧个效果，往往就是出新啊！

（本文来自“吳越小豬”公众号）

本期编辑 | 王怡美

本期审读 |王宇坤

责任编辑 | 甘于恩

投稿邮箱：[e-mail]

欢迎关注“语言资源快讯”

往期推荐

说说咱的家乡话（音频） | 陈怡：松江话中特殊的语气词之“哩”（上海松江话）

（做语言资源保护公众号不容易，每天更新公众号更不容易，而每天提供新语料尤其不容易。很多读者还没养成打赏习惯，提倡每个月打赏一元钱，积少成多，我们的事业就有希望。谢谢各位！）