༥ འདུ་ཤེས་འཛིན་སྟངས་བསྒྱུར་ན་རེ་བ་གསར་པ་རྙེད་སྲིད།

འཇིག་རྟེན་འདིའི་སྟེང་གི་སྐྱེ་བོ་མི་ཉུང་བ་ཞིག་གིས་འཆི་བའི་མཐིལ་རྟོགས་པས་འཆི་བ་ལ་མི་འཇིགས་པར་རློམ་ཞིང་ནམ་རྒྱུན་ཁ་ནས་མཆིལ་མའི་ཝུ་བ་འཐོར་བཞིན་ངོམ་སྒྲོག་བྱེད་ཀྱང་། འཆི་བ་དངོས་སུ་མགོ་ཐོག་ཏུ་ལྷུང་ཚེ་འཇིགས་སྐྲག་ཆེན་པོས་མནར་ནས་ཅི་བྱེད་འདི་བྱེད་མེད་པར་འགྱུར། ཡིན་ཡང་ཡིག་ངོ་མི་ཆོད་པའི་ཨ་ཡེས་དང་ཨ་སྐྱེ་རྒན་འཁོགས་འགའ་ཞིག་གིས་ནི་རྒྱུན་པར་གུས་པ་ཆེན་པོ་དང་བློ་སེམས་རྩེ་གཅིག་གིས་འོད་མཚན་འདོན་ཞིང་ཆོས་བསྒྲུབས་པས་འཆི་བ་མདུན་དུ་སླེབས་སྐབས་བདེ་བ་ཅན་དུ་སྐྱེ་བ་ལ་ཡིད་ཆེས་ཀྱིས་ཁེངས་ཡོད།

ནང་ཆོས་ལ་དད་མོས་ལྡན་པའི་མི་ནི་ཤི་ཡང་སྐྱིད་ལ་གསོན་ཡང་སྐྱིད་པས་བདེ་སྡུག་ཡོད་ཚད་ལམ་དུ་འཁྱེར་ནུས།

༡༩༧༦ལོར། ཨ་རིའི་བུད་མེད་ཅིག་རྡོ་གྲུབ་སྐུ་ཕྲེང་བཞི་པ་མཇལ་དུ་ནེའུ་ཡོག་གྲོང་ཁྱེར་ལ་སོང་། མོ་དང་ཐོག་ནང་ཆོས་ལ་དགའ་བ་ཅི་ཡང་མེད་ཅིང་ནད་ཚབས་ཆེན་ཞིག་ཕོག་པའི་རྐྱེན་གྱིས་རེ་བ་ཐམས་ཅད་སྟོང་ཟད་དུ་གྱུར་པས་བོད་ཀྱི་བླ་མ་འདི་ལ་སྐྱོབ་པའི་ཐབས་ཡོད་མེད་ལྟ་རུ་སོང་པ་རེད།

མོ་གཟིམས་ཁང་ནང་དུ་སོང་ནས་རྡོ་གྲུབ་ཆེན་གྱི་བྱམས་བརྩེ་ལྡན་ཞིང་སྙིང་ཉེ་བའི་རྣམ་པ་མཇལ་སྐབས་མིག་ཆུ་རང་དབང་མེད་པར་ཤོར་ཞིང་མགྲིན་པ་ཕྱེས་ནས་ང་རང་ཟླ་བ་ཁ་ཤས་ཙམ་ལས་འཚོ་མི་ནུས། ཁྱེད་ཀྱིས་ང་སྐྱོབ་ནུས་སམ། ང་རང་མྱུར་དུ་འཆི་ལ་ཉེ་བཞིན་ཡོད་ཅེས་ཞུས།

དེའི་ཚེ་རྡོ་གྲུབ་ཆེན་གྱིས་བྱམས་པ་ཆེན་པོས་འཛུམ་ཕྱུང་ནས་ལྷོད་བབ་ཀྱིས་དུས་ཀྱི་སྔ་འཕྱི་ཙམ་ལས་ཁྱོད་མ་ཟད་ང་ཚོ་ཚང་མས་འཆི་བ་ལ་སྒུག་བཞིན་ཡོད། ཅེས་གསུངས།

གྲུབ་ཆེན་གྱི་གསུང་དེ་ཐོས་པ་ན་མོའི་དོགས་འཚེར་ཐོལ་གྱིས་ཡལ་ནས་རང་ཉིད་ནད་ལས་ཐར་བའི་རེ་བ་ཡོད་པ་རེད་བསམས། དེ་ནས་མོ་རང་ནང་པའི་ཆོས་སྒོར་ཞུགས་ཏེ་གྲུབ་ཆེན་རིན་པོ་ཆེའི་མདུན་ནས་འཆི་བ་ལ་གདོང་ལེན་བྱེད་པའི་མན་ངག་བསླབས། མཇུག་མཐར་མོས་བློ་སེམས་ཡོད་ཚད་ཧྲིལ་གྱིས་བསྒྲིམས་ནས་ཉམས་ལེན་གནད་དུ་སྨིན་པ་བྱས་ཤིང་ནད་ཀྱང་ཡ་མཚར་བའི་ངང་ནས་སངས་དྲག་ཏུ་སོང་ངོ་། །

དེའི་ཕྱིར། ནད་ངན་གྱིས་བཟུང་བའི་ནད་པ་འགའ་ཞིག་སྨན་པས་འཆི་ངེས་རེད་ཅེས་ཐག་བཅད་ཀྱང་ནང་ཆོས་ཀྱི་བསྒོམ་གྱི་མན་ངག་འགའ་ཞིག་ལ་བསླབས་ན་ཟློས་གར་རང་བཞིན་ཅན་གྱི་སྨན་བཅོས་ཀྱི་ནུས་པ་ཡང་ཐོན་སྲིད།

དེ་ཡང་ལོས་ཡིན་ཏེ་ཐབས་འདིས་ནད་ཡོད་ཚད་འཆོས་ག་ལ་ནུས། འོན་ཀྱང་འཆོས་མ་ནུས་རུང་ནང་ཆོས་ལས་བསྟན་པའི་དོན་རྟོགས་རྗེས། འཆི་བ་དངོས་སུ་མགོ་ཐོག་ཏུ་བབས་རུང་ནང་སེམས་སུ་འཇིགས་སྐྲག་ཆེན་པོ་མི་སྐྱེ་བ་རེད།

རང་རེ་འཇིག་རྟེན་མི་ཡུལ་ལས་ཁ་འབྲལ་བ་འདི་ནི་རྒྱུན་ལྡན་གྱི་གནས་ཚུལ་ཞིག་ཡིན་པས་རེ་ཆད་བྱེད་དགོས་དོན་མེད་ཅིང་བྱས་ཀྱང་ཕན་གང་ཡང་མི་ཐོགས། དེའི་ཕྱིར་གསོལ་འདེབས་ཡག་པོ་བྱེད་པ་དང་སྨོན་ལམ་རྒྱག་པ། འོད་མཚན་བརྗོད་པ་སོགས་བྱས་ན་ད་གདོད་ཆེས་བཟང་བའི་ཟབས་ལམ་ཡིན་པ་རེད། ངས་སློབ་ཆེན་སློབ་མ་ཞིག་ངོ་ཤེས་ཤིང་མོ་ལ་ངན་སྐྲན་ཕོག་འདུག ཕྱིས་སུ་མོས་ཡོད་ཚད་བློས་གཏོང་བྱས་ཏེ་འཆི་ཁར་ཡིད་གཅིག་གིས་འོད་མཚན་བཏོན་པས་མཐར་ངན་སྐྲན་ཡང་ཡ་མཚར་བའི་ངང་ནས་མེད་པར་གྱུར་པ་རེད།

འཇིག་རྟེན་གྱི་མི་ཕལ་བ་ལ་མཚོན་ནས་བཤད་ན་རང་ཉིད་འཆི་བའི་གནས་ཚུལ་ཐོས་འཕྲལ་ཤིན་ཏུ་ཡ་ང་བ་དང་རབ་ཏུ་གདུང་བར་འགྱུར་ཞིང་མུ་མཐུད་གསོན་ནས་དགོས་པར་སྙམ། ཡིན་ཡང་ནང་ཆོས་ལ་དད་མོས་ལྡན་པའི་མི་ནི་ཤི་ཡང་སྐྱིད་ལ་གསོན་ཡང་སྐྱིད་པས་བདེ་སྡུག་ཡོད་ཚད་ལམ་དུ་འཁྱེར་ནུས།

དེའི་ཕྱིར། འཆི་བའི་གནད་དོན་འདི་ལ་གདོང་ལེན་བྱེད་སྐབས་ཆོས་ལ་སློབ་པའི་མི་དང་ཆོས་ལ་མི་སློབ་པའི་མིའི་བར་དུ་ཧེ་བག་ཆེན་པོ་ཡོད་དོ། །

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

 
འདི་ནས་ལན་གཅིག་གནོན་རོགས།👇