མ་འོངས་པ་ལ་ཟློས་བསླངས་བྱེད་པ་ལས་ད་ལྟ་བ་ལ་གཅེས་འཛིན་བྱེད་པ་གལ་ཆེ།
ལེའུ་གསུམ་པ།
མི་རྟག་པ་ནི་མི་ཚེའི་ནུས་པ་ཡང་དག་པ་ཞིག་ལ་སྒྱུར་དགོས།
མི་མང་པོ་ལ་མཚོན་ནས་བཤད་ན་གཉེན་བྱམས་པས་བསྐོར་ཞིང་གྲོགས་དགའ་མཛའ་དང་འཛོམས་པའི་ཉིན་མོ་ནི་མཉེས་གཤིན་ཞིང་ལྟ་ན་སྡུག་པ་ཞིག་རེད། འོན་ཀྱང་འདི་དག་ཡོད་ཚད་མི་རྟག་པ་ལས་མི་འདའ་ཞིང་འདུས་མཐའ་འབྲལ་བ་ནི་གནའ་དེང་གང་དུ་ཡང་མི་འགྱུར་བའི་ཆོས་ཉིད་ཡིན། དེའི་ཕྱིར་ང་ཚོས་མིག་སྔོན་གྱི་སྐལ་བ་བཟང་པོ་ལ་གཅེས་སྤྲས་བཟང་པོ་བྱེད་དགོས་པ་ལས་གོ་སྐབས་ཤོར་ཟིན་རྗེས་གཟོད་དེའི་རིན་ཐང་ཤེས་པར་བྱེད་པ་ནི་ཅི་བས་ཀྱང་མི་རུང་ངོ་། །
ཉིན་ཁ་ཤས་ཀྱི་སྔོན་དུ་ང་རང་ཆུང་དུས་སྡོད་སའི་གནས་ཏེ་འབྲོག་པའི་དགུན་མཚེར་དུ་སོང་བ་ཡིན།
ང་རང་སློབ་ཆུང་ལ་འགྲོ་བའི་སྔོན་དུ་ང་ཚོའི་ཁྱིམ་ཚང་དགུན་ཁ་དེར་སྡོད་པ་རེད།ཕྱིས་སུ་ངས་སློབ་ཆུང་དང་སློབ་འབྲིང་དང་དགེ་ཐོན་སློབ་གྲྭ་བཏོན་ནས་རབ་ཏུ་བྱུང་།མི་ལོ་མང་པོ་དེ་དག་གི་རིང་དུ་གཏན་ནས་ཕྱིར་འཁོར་མ་མྱོང་།ཉིན་དེར་ང་རང་ནུ་བོ་སོགས་མི་ཁ་ཤས་དང་མཉམ་དུ་སོང་ཞིང་དེར་ཐོན་རྗེས་མི་ལོ་སུམ་ཅུའི་སྔོན་གྱི་རྣམ་པ་དལ་གྱིས་ངའི་མིག་སྔོན་དུ་ལྷགས་ཤིང་རྗེ་བས་ཇེ་གསལ་དུ་གྱུར།
ཆུང་དུས་ནས་ཡོད་པའི་གནས་འདི་ལ་འགྱུར་བ་ཆེན་པོ་མེད་རུང་ཉེ་འཁོར་གྱི་ཁྱིམ་མཚེས་དག་ནི་སྔོན་དང་གཏན་ནས་མི་འདྲ་བར་གྱུར་འདུགངས་མ་ཎི་བརྐོས་པའི་རྡོ་འགའ་ཞིག་མཐོང་ཞིང་དེ་དག་ནི་སློབ་ཆུང་འདོན་པའི་སྔོན་ནས་ངས་བརྐོས་པ་ཡིན་པ་དང་ད་དུང་ཡང་ཡིག་འབྲུ་གསལ་བོར་དོད་འདུག་པས་ཞོར་དུ་ཁ་ཤས་ཁྱེར་བ་ཡིན།
མི་ལོ་སུམ་ཅུའི་སྔོན་དུ་སྡོད་མྱོང་བའི་གནས་སུ་ཐེངས་གཅིག་སོང་བས་མི་རྟག་པའི་ཚོར་བ་ལ་དངོས་སུ་ཉམས་སུ་མྱངས།
སླར་མི་ལོ་བརྒྱ་འདས་པ་ན་ང་ཚོ་ཚང་མ་འཇིག་རྟེན་མི་ཡུལ་འདི་ལས་བྲལ་ཟིན་པ་ལ་ནི་ཐེ་ཚོམ་སྤུ་ཙམ་ཡང་མི་དགོས།
གྷོ་དྷེས་མི་སུ་དང་གང་ཡིན་རུང་དེའི་བདེ་སྐྱིད་ནི་མཐའ་ཅན་ཞིག་ཡིན་སྲིད་ཅིང་མཐའ་མཇུག་གི་ཉིན་མོ་ཡང་ལྷག་ཏུ་འོང་ངེས་ཞེས་ཟེར།༼མཆན།གྷོ་དྷེས།༡༧༤༩—༡༨༣༢འཇར་མན་གྱི་སྐད་གྲགས་ཤིན་ཏུ་ཆེ་བའི་བསམ་བློ་པ་དང་རྩོམ་པ་པོ།ཚན་རིག་པ་བཅས་ཡིན།༽ཁོས་ནང་ཆོས་མ་བསླབས་ཤིང་ཐེག་ཆེན་གྱི་མན་ངག་གི་སྒོམ་ཐབས་ཀྱིས་མི་རྟག་པ་མ་བསྒོམས་རུང་བདེ་སྐྱིད་གང་འདྲ་ཞིག་ཡིན་ཡང་ཡུན་རིང་དུ་མི་བརྟན་པ་ལ་ངེས་ཤེས་གསལ་པོ་ཡོད་འདུག་གོ།
ཚེ་སྲོག་ནི་རླུང་ནང་གི་མར་མེ་དང་འདྲ་བས་ནམ་ཡིན་རུང་འཇིག་པའི་ཉེན་ཁ་ལ་ཕྱོགས་ནས་ཡོད།མི་ལན་ཁུན་དྷེ་ར་ཡིས་འཚོ་བ་ནི་ཅི་ཡང་སྲིད་པའི་འབྲས་བུ་ཡིས་གང་བའི་ལྗོན་ཤིང་ཞིག་ཡིན་ཞེར་ཟེར།༼མཆན།མི་ལན་ཁུན་དྷེ་ར།༡༩༢༩ལོར་སྐྱེས་ཤིང་སྐད་གྲགས་ལྡན་པའི་བརྩམས་སྒྲུང་པ་ཞིག་ཡིན།༽སུ་གཅིག་གིས་ཀྱང་སྐད་ཅིག་ཕྱི་མར་ཅི་ཞིག་འབྱུང་མིན་ཤེས་ཤིན་ཏུ་དཀའ།དེ་བས་ང་ཚོས་མིག་སྔོན་གྱི་སྐལ་བ་བཟང་པོ་ལ་གཅེས་འཛིན་བྱེད་འོས་སོ།།
ཐང་རྒྱལ་རབས་སུ་བཙུན་པ་ཏོས་ཧྲོན་བྱ་བ་ཞིག་ཡོད་ཅིང་ཉིན་དཀར་རི་ལ་ཕེབས་ནས་ཞིང་རྨོས་ཏེ་ནམ་གུང་ལ་དགོན་པར་ལོག་ནས་མདོ་སྡེ་ཕལ་བོ་ཆེ་ཀློག་ཅིང་ཉིན་རྟག་པར་དེ་ལྟར་བྱེད་པ་རེད།བཙུན་པ་དེར་སློབ་མ་ཞིག་ཡོད་ཅིང་མི་ལོ་བཅུ་ལྷག་ལ་ཁོང་ལས་ཆོས་ནོད།དང་ཐོག་དད་པ་ཤིན་ཏུ་ཆེ་ཡང་དུས་ཡུན་རིང་མོ་སོང་རྗེས་སློབ་དཔོན་གྱིས་ཉིན་དཀར་ཞིང་རྨོ་བ་དང་
མཚན་མོར་མདོ་སྡེ་ཕལ་བོ་ཆེ་ཀློག་པར་བྱེད་པ་འདི་དག་ཡོན་ཏན་ཆེན་པོ་གང་ཡང་མ་ཡིན་པར་བསམས་པས་དེ་ལ་བསླབ་པར་བྱ་བ་གང་ཡང་མེད།དེ་ལས་དྭངས་བསིལ་རི་བོ་རྩེ་ལྔར་རྗེ་བཙུན་འཇམ་པའི་དབྱངས་མཇལ་ཞིང་ཤེས་རབ་ཀྱི་སྒོ་མོ་འབྱེད་པར་གསོལ་བ་བཏབ་ན་དགའ་སྙམ།
དེ་ནས་ཁོས་སློབ་དཔོན་ལ་རྒྱུ་མཚན་ཞུས།སློབ་དཔོན་གྱིས་འགྲོ་བའི་དགོས་པ་མེད།འདི་རུ་བསྡད་དེ་ཆོས་བསླབས་ན་རི་བོ་རྩེ་ལྔར་འཇམ་པའི་དབྱངས་མཇལ་བ་དང་ཁྱད་མེད་གསུངས།
ཁོས་སློབ་དཔོན་གྱི་རྒྱུ་མཚན་མ་གོ་ནས་ཡང་བསྐྱར་འདི་སྐད་ཞུས།སློབ་དཔོན་ལགས།ངས་རི་བོ་རྩེ་ལྔ་མཇལ་དུ་འགྲོ་བར་སྨོན་ལམ་བཏབ་ཅིང་བློ་ཐག་བཅད་ཟིན།ཁྱེད་ཀྱིས་ཐུགས་རྗེས་གཟིགས་ཏེ་ངའི་རེ་འདོད་སྐོང་རོགས་ཞེས་ཞུས།སློབ་དཔོན་གྱིས་ཁོ་འགྲོ་བར་བློ་ཐག་བཅད་ཟིན་པ་གཟིགས་པས་དབུ་ལྕོག་ལྡེམ་བཞིན་མོས་མཐུན་མཛད།
སློབ་མ་དེས་དཀའ་བ་བརྒྱ་ཕྲག་དུ་མ་ཕྲག་ཏུ་བླངས་ཤིང་བགྲོད་ལམ་རིང་མོ་བཅད་དེ་དྭངས་བསིལ་རི་བོ་རྩེ་ལྔར་སླེབས།གློ་བུར་དུ་རྒན་པོ་ཞིག་ལ་འཕྲད་ཅིང་དེས་ཁྱོད་རི་བོ་རྩེ་ལྔར་ཅི་ལ་ཡོང་ཞེས་དྲིས།
ཁོ་ན་རེ།རྗེ་བཙུན་འཇམ་པའི་དབྱངས་མཇལ་དུ་ཡོང་བ་ཡིན།
རྒན་པོ་དེས་ཁྱོད་ཀྱི་སློབ་དཔོན་དེ་ཉིད་རྗེ་བཙུན་འཇམ་པའི་དབྱངས་དངོས་ཡིན།སློབ་དཔོན་མི་མཇལ་བར་ལམ་ཐག་རིང་མོ་བཅད་དེ་འདི་རུ་ཡོང་བས་ཅི་བྱེད།དངོས་གནས་རྩ་བ་བོར་ནས་ཡལ་ག་ལ་འཐམ་པ་རེད།ཅེས་སྨྲས་ཏེ་རྗེས་མེད་དུ་ཡལ།
དེའི་ཚེ་ཁོ་རྨོངས་པ་ལས་སད་དེ་འཕྲལ་དུ་ཕྱིར་འཁོར་ནས་དགོན་པར་ལོགཡིན་ཡང་དགོན་པར་སླེབས་སྐབས་སློབ་དཔོན་མྱ་ངན་ལས་འདས་མ་ཐག་པ་དང་ཁེལ།
དངོས་ཡོད་དང་མི་མཐུན་པར་མ་འོངས་པ་ལ་རྟོག་བཏགས་བློས་བསླངས་མང་པོ་བྱེད་པ་ལས་ད་ལྟ་བ་ལ་གཅེས་འཛིན་བྱེད་པ་གལ་ཆེ།ད་ལྟ་བས་ངེད་ཅག་ལ་བསྩལ་བའི་ལེགས་སྐྱེས་ཧ་ཅང་མང་ཡང་ཡིད་ཕངས་པ་ཞིག་ལ་ཕལ་མོ་ཆེས་ངོས་མི་ཟིན་པར་མི་ཚེ་གཅིག་ཏུ་ཅི་ཞིགས་འཚོལ་སྒྲུབ་བྱེད་པ་དང་མངོན་དུ་འགྱུར་མི་སྲིད་པའི་རེ་འདོད་མང་པོའི་ཆེད་དུ་རྟག་ཏུ་ངལ་ཞིང་དུབ་ལ་འདུར་ཞིང་རྒྱུག
འདི་འདྲའི་མི་དག་གིས་དབུགས་འཆད་ཁར་ཡང་རང་ཉིད་ཀྱིས་འདོད་པའི་དངོས་པོ་རྙེད་མི་སྲིད་ན་ཡང་ཐང་།ཅིའི་ཕྱིར་ཞེ་ན།མངོན་འདོད་དེ་དག་ནི་སྔར་ནས་རང་ཉིད་དང་འཕྲད་ཅིང་བཞུད་ཟིན་པས་སོ།།