༤ འཁོར་ལོས་བསམ་དོན་ལྷུན་གྱིས་འགྲུབ། མཁན་པོ་བསོད་དར་རྒྱས་ཀྱིས།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
གནའ་བོའི་སྐྱེས་ཆེན་དག་གིས་གལ་སྲིད་འཁོར་ལོའི་ནང་དུ་སྤྱན་རས་གཟིགས་ཀྱི་བསྟེན་པ་ཁྲི་ཕྲག་གཅིག་ཡོད་ན་ལན་གཅིག་བསྐོར་བས་བསྙེན་པ་ཁྲི་ཕྲག་གཅིག་འགྲང་བའི་ཕན་ཡོན་ཡོད་ཅེས་གསུངས།
བོད་ཀྱི་མི་རྣམས་གནའ་བོའི་དུས་ནས་བཟུང་ནང་ཆོས་ལ་དད་པས་འཁོར་ལོ་སྐོར་བ་ཡང་སྤྱི་ཁྱབ་རང་བཞིན་ཅན་ཞིག་ཡིན།
བོད་ཀྱི་ས་ཆ་གང་ཞིག་ཏུ་ཡུལ་སྐོར་དུ་འགྲོ་བའམ་ཡང་ན་གློག་བརྙན་དང་དྲིལ་བསྒྲགས་འོས་སྦྱོར་སོགས་ལས་བོད་མི་རིགས་ཀྱིས་ནང་ཆོས་ལ་བཅངས་པའི་དད་མོས་དང་ཁྱད་པར་དུ་འཁོར་ལོའི་འཕྲིན་ལས་བོད་ཀྱི་ཡུལ་གྲུ་གང་སར་ཁྱབ་འདུག་པ་མཐོང་ཐུབ།
བོད་ཀྱི་དགོན་པ་གང་ཞིག་ཏུ་སོང་ཡང་ཆོས་འཁོར་ཆེན་པོ་ཡོད་པ་མཐོང་ནུས་ཤིང་མི་འགའ་ཞིག་གི་སྟོབས་ཤུགས་མཉམ་དུ་ཕྱུང་ན་ད་གདོད་སྐོར་ཐུབ། དགོན་པའི་མཐའ་བསྐོར་དུ་ཡང་བླ་རུང་སྒར་གྱི་སྒྱུ་འཕྲུལ་གྱི་འདབས་ལ་འཁོར་ལོ་ཧ་ཅང་མང་པོ་ཡོད་པ་དང་མཚུངས་པར་ལག་བསྐུལ་འཁོར་ལོ་འབྲིང་ཙམ་མང་པོ་ཡོད་པ་རེད། ད་དུང་ཁྱིམ་ཚང་གང་ཡིན་ཡང་ལོ་ལོན་གྱིས་འཁོར་ལོ་སྐོར་ཞིང་གཞོན་ནུ་རྣམས་ཀྱིས་ཀྱང་སྐོར་བ་དང་། ཞིང་ནང་གི་སོ་ནམ་པ་དང་རྩྭ་ཐང་སྟེང་གི་འབྲོག་པ་སོགས་མི་ཀུན་གྱི་ལག་ན་འཁོར་ལོ་རེ་ཡོད།
བོད་ཀྱི་དགོན་སྡེ་དང་དུད་ཚང་སོགས་ཀྱི་ཉེ་འཁོར་དུ་འཁོར་ལོ་ཇི་ཙམ་ཡོད་པ་ཀུན་གྱིས་ལྟོས་དང་ཆོག འཁོར་ལོ་ལ་མཐོང་ཐོས་དྲན་རེག་གི་སེམས་ཅན་ཐམས་ཅད་དངོས་སམ་བརྒྱུད་ནས་ཐར་བ་འཐོབ་པར་འགྱུར་ཞིང་འདི་ནི་མདོ་སྡེ་དག་གི་གསུང་བསླུ་བ་མེད་པ་ཞིག་ཡིན།
མ་ཎི་ལན་གཅིག་བགྲང་བའི་ཕན་ཡོན་བསམ་གྱིས་མི་ཁྱབ་ཅིང་འཁོར་ལོ་ལན་གཅིག་སྐོར་བའི་ཕན་ཡོན་ཡང་བསམ་གྱིས་མི་ཁྱབ། གནའ་བོའི་སྐྱེས་ཆེན་དག་གིས་གལ་སྲིད་འཁོར་ལོའི་ནང་དུ་སྤྱན་རས་གཟིགས་ཀྱི་བསྙེན་པ་ཁྲི་ཕྲག་གཅིག་ཡོད་ན་ལན་གཅིག་བསྐོར་བས་བསྙེན་པ་ཁྲི་ཕྲག་གཅིག་འགྲང་བའི་ཕན་ཡོན་ཡོད་ཅེས་གསུངས།
འགྲོ་འཆག་ཉལ་འདུག་སོགས་སྤྱོད་ལམ་གང་གི་སྐབས་སུ་ཡིན་རུང་འཁོར་ལོ་སྐོར་ཆོག་པས་དགེ་བ་འདི་སྟབས་བདེ་ཞིང་ཆོད་ཆེ་བས་ལས་སླ་མོའི་སྒོ་ནས་དགེ་བ་རླབས་པོ་ཆེ་རྫོགས་ནུས་སོ། །སྒོར་མོས་སྦྱིན་པ་གཏོང་བའམ་དགེ་འདུན་པར་ཡོ་བྱད་འབུལ་བ་སོགས་ཀྱི་ནུས་པ་ཁ་ཤས་ལ་མེད་ན་ཡང་ཐང་། མི་ལོ་མང་པོར་མཚམས་ལ་བསྡད་ནས་ཉམས་ལེན་བྱེད་པ་ལ་ཡང་དཀའ་བ་མང་པོ་ཡོད། ཡིན་ཡང་དུས་ཚོད་ཀྱི་ལོང་ཡོད་སྐབས་འཁོར་ལོ་བསྐོར་ན་རྩོལ་བ་མང་པོ་མི་དགོས་པར་ཚོགས་རྒྱ་ཆེན་པོ་ཟླུམ་ནུས། འཇིག་རྟེན་གྱི་ཕྱོགས་ནས་བཤད་ན་འཁོར་ལོ་བསྐོར་བས་དབང་གོ་ས་དང་རྒྱུ་ལོངས་སྤྱོད་དང་མཚན་སྙན་གྲགས་སོགས་ཐོབ་པར་བྱེད་ནུས་ཤིང་ཡིག་ཆ་ཧ་ཅང་མང་པོར་འདིའི་སྐོར་གྱི་དངོས་བྱུང་བགྲང་གིས་མི་ལང་།
འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་རང་རེའི་ཀུན་སློང་དང་ལུས་ངག་གི་ནུས་པ་ལ་རག་ལས། ལུས་ངག་གི་དགེ་བ་ཐམས་ཅད་ལས་འཁོར་ལོ་སྐོར་བའི་ཕན་ཡོན་ལས་ཆེ་བ་ཞིག་མེད། ང་ཚོས་ངག་གིས་རྡོ་རྗེ་གཅོད་པ་དང་འོད་མདོ་སོགས་ཁ་ཏོན་དུ་བྱས་ན་ཕན་ཡོན་ཤིན་ཏུ་ཆེ་ཞིང་ལུས་ཀྱིས་ཕྱག་འཚལ་བ་དང་བསྐོར་བ་བྱས་ན་ཡང་ཕན་ཡོན་མི་ཆུང་བ་ཡོད་ཀྱང་མདོ་སྡེ་རྣམས་ཀྱི་ལུང་ཚད་མར་བྱས་ན་ཕན་ཡོན་འདི་དག་འཁོར་ལོའི་ཕན་ཡོན་དང་བསྡུར་ན་སྔ་མ་ལས་ཕྱི་མའི་ཕན་ཡོན་རྒྱ་ཆེ་ཞིང་བསམ་གྱིས་མི་ཁྱབ་བོ། །
ང་རང་ལ་མཚོན་ན་རླངས་འཁོར་ནང་དུའམ་ཡང་ན་ཁྱིམ་དུ་ཉིན་རེར་འཁོར་ལོ་རེ་བསྐོར་ན་སེམས་ཀྱང་དགའ་ཡལ་ལེ་བར་འགྱུར་བ་དང་། གལ་སྲིད་ཉིན་གང་ཞིག་ལ་མ་བསྐོར་བའམ་ཡང་ན་ཁྱིམ་དུ་བརྗེད་པར་གྱུར་ན་སྟོང་ལྷང་ལྷང་གི་ཚོར་བ་ཞིག་ཡོང་གིན་འདུག སྤྱོད་པ་འདིས་ངའི་ཉེ་འཁོར་གྱི་མི་མང་པོ་ལ་དངོས་སམ་བརྒྱུད་ནས་ཤུགས་རྐྱེན་ཆུང་ཆུང་ཞིག་ཀྱང་ཐེབ་འདུག
ཁྱད་པར་དུ་མི་འཆི་བའི་སྐབས་གལ་སྲིད་འཕོ་བ་འདོན་པའི་དུས་ཚོད་མེད་པའམ་འཕོ་བ་འདོན་པའི་མི་མེད་པའམ་ཡང་ན་མི་དེ་ནང་ཆོས་ལ་དད་པ་མེད་ན་དེའི་མགོ་བོའི་ཉེ་འཁོར་དུ་འཁོར་ལོ་ཞིག་བཞག་ན་ངན་སོང་གི་སྐྱེ་སྒོ་ཁེག་པར་འགྱུར་བ་རེད། ངས་ང་རང་འཆི་བའི་ཚེ་ངའི་ཉེ་འཁོར་དུ་རྡོ་རྗེ་མཆེད་གྲོགས་ཨེ་ཡོད་མི་ཤེས་ཏེ། བརྒྱ་ལ་ཡོད་ན་དེ་ལ་ངའི་སྔས་ཟུར་དུ་འཁོར་ལོ་ཞིག་འཇོག་པའི་རེ་བ་འདོན་དགོས་ཞེས་རྟག་ཏུ་བསམ་བཞིན་ཡོད།
ད་ལྟ་རྒྱ་ནག་གི་མི་འགའ་ཞིག་གིས་འཁོར་ལོ་ནི་བོད་བརྒྱུད་ནང་བསྟན་གྱི་ཡོ་བྱད་ཅིག་རེད། ང་ཚོས་ཁོ་ཅག་གི་སྲོག་རྒྱུན་ལ་སློབ་པའི་དགོས་པ་མེད་ཅེས་སྨྲ།
སྐད་ཆ་འདི་སྐད་སྨྲ་བ་ནི་ཐོས་ཆུང་ཅོལ་ཆུང་ལས་མ་འདས། དོན་དུ་རྒྱ་ནག་ལ་ཡང་འཁོར་ལོའི་བརྒྱུད་པ་ཡོད། རྒྱ་ནག་གནའ་སྔ་མོའི་དུས་སུ་འཁོར་ལོ་ལ་འཁོར་མཛོད་ཅེས་ཟེར།
ནན་ཁྲོ་ལེན་རྒྱལ་རབས་སྐབས་ཀྱི་སྐྱེས་ཆེན་ཧྥོས་ཏ་ཧྲིས་སྲོལ་གཏོད་ཅིང་། ཤཱཀྱའི་འཇུག་ངོགས་དམ་པ་ཞེས་བྱ་བ་ལས་དད་གུས་ཅན་གྱིས་འཁོར་མཛོད་ལན་གཅིག་དེད་དེ་བསྐོར་ན་བཀའ་འགྱུར་རོ་ཅོག་བཀླགས་པའི་ཕན་ཡོན་དང་མཉམ་མོ་ཞེས་གསུངས་ཡོད། འཕགས་པ་དགེ་འདུན་པའི་རྣམ་ཐར་ཞེས་པ་ལས་བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་ཁ་ཅིག་གིས་འཁོར་མཛོད་དེད་དེ་བསྐོར་བར་བྱས་ན་གང་ཟག་དེས་མདོ་སྡེ་ཐམས་ཅད་བཀླགས་པའི་ཕན་ཡོན་དང་གཉིས་སུ་མེད་ཅེས་གསུངས་སོ། །
རྒྱ་ནག་གི་ལྷོ་ཕྱོགས་ནས་བྱང་རྒྱུད་བར་གྱི་དགོན་པ་རྙིང་པ་ཀུན་གྱིས་འཁོར་མཛོད་བསྒྲིགས་ཡོད་ཅིང་འཁོར་མཛོད་འདི་དག་བོད་ཀྱི་འཁོར་ཆེན་རྣམས་དང་ཁྱད་གང་ཡང་མི་འདུག འཁོར་མཛོད་དེད་དེ་སྐོར་ཆོག་ན་ལག་ཏུ་འཁོར་ལོ་བཟུང་ནས་སྐོར་མི་ཆོག་པའི་རྒྱུ་མཚན་ཅི་ཡོད། ལུང་གི་སྒྲུབ་བྱེད་མེད་ཅིང་སེམས་ཅན་ལ་འཚེ་བའི་ལས་ཤིག་ཡིན་ན་རང་རེས་མ་བསླབས་ན་ཆོག ཡིན་ཡང་རང་གཞན་གཉི་ག་ལ་ཕན་དངོས་སུ་ཐོགས་པའི་ལས་ཤིག་ཡིན་ན་ཅིའི་ཕྱིར་ཡིན་གཅིག་མིན་གཉིས་དགག་བྱར་འཛིན།
དེའི་ཕྱིར། མ་ཎི་འདོན་པ་དང་འཁོར་ལོ་སྐོར་བ་སོགས་ཕན་ཡོན་རྒྱ་ཆེན་པོ་ལྡན་པའི་དགེ་བའི་ལས་རྣམས་ང་ཚོས་ངེས་པར་སྒྲུབ་དགོས་སོ།།