༨ མི་རྟག་པ་མང་དུ་བསྒོམས་ན་སངས་རྒྱས་ཀྱིས་དབུགས་དབྱུང་བ་ཡིན་ནོ། །
ལེའུ་གསུམ་པ།
མི་རྟག་པ་ནི་མི་ཚེའི་ནུས་པ་ཡང་དག་པ་ཞིག་ལ་སྒྱུར་དགོས།
སྟོན་པ་བཅོམ་ལྡན་འདས་ཀྱིས་མི་རྟག་པ་སྒོམ་པ་ལ་བསྟོད་བསྔགས་འདི་སྐད་མཛད་ཡོད། མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱིས་དབུགས་དབྱུང་བ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱིས་ལུང་བསྟན་པ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ཡིན་ནོ། །དཔེར་ན་རྗེས་རྣམས་ཀྱི་ནང་ན་གླང་པོ་ཆེའི་རྗེས་མཆོག་ཡིན་ནོ། །དེ་བཞིན་དུ་ནང་པ་སངས་རྒྱས་པའི་སྒོམ་ཐམས་ཅད་ཀྱི་ནང་ན་མི་རྟག་པ་བསྒོམ་པའི་འདུ་ཤེས་ཁོ་ན་མཆོག་ཡིན་ནོ། །ཞེས་གསུངས་སོ། །
མཉམ་མེད་དྭགས་པོ་རིན་པོ་ཆེས་གནད་གསུམ་ཚང་བའི་སྒོ་ནས་རྗེས་འཇུག་པ་རྣམས་ལ་འདི་སྐད་གསུངས།
ཐོག་མར་སྐྱེ་འཆི་ལ་ཤིན་ཏུ་འཇིགས་ནས་ཤྭ་བ་གཟེབ་ལས་ཐར་བ་བཞིན་ཕྱིར་ལྟ་མེད་པར་སྒོམ་དགོས། གལ་སྲིད་འདི་ལྟ་བུའི་ངེས་པར་འབྱུང་བའི་སེམས་མེད་ན་འཇིག་རྟེན་གྱི་བྱ་བ་ལས་ཐར་བའི་ཐབས་ནམ་ཡང་མེད་དོ། །
བར་དུ་ཞིང་པས་འབད་པ་ཆེན་པོས་ཞིང་རྨོ་བར་བྱེད་པ་དང་མཚུངས་པར་མ་འོངས་པ་ལ་གདེང་ཚོད་ངེས་ཅན་དགོས་ཤིང་ཤི་ཡང་མི་འགྱོད་པ་བྱེད་དགོས།
མཐའ་མར་དོན་རྨད་པོ་ཆེ་འགྲུབ་པའི་སྐྱེས་བུ་ལྟར་བློ་བག་ཕེབ་དགོས་ཞེས་གསུངས།
ཇི་སྐད་དུ་བླ་མ་ཡིད་བཞིན་ནོར་བུའི་ཞལ་སྔ་ནས་མཛད་པའི་སྐྱིད་གླུ་བྱིས་པ་དགྱེས་པའི་དགའ་སྟོན་ལས།
གསོན་ཡང་དགའ་སྟེ་བསྟན་འགྲོའི་དོན་ཆེན་འགྲུབ་འདུག །
ཤི་ཡང་དགའ་སྟེ་བདེ་ལྡན་ཞིང་དུ་འགྲོ་ངེས། །
ཇི་ལྟར་བྱས་ཀྱང་བདེ་དགའི་ངང་དུ་འདུག་པ། །
འཇམ་དཔལ་ཡེ་ཤེས་སེམས་དཔའི་བཀའ་དྲིན་ཡིན་ནོ། །ཞེས་གསུངས་པ་ལྟར་འགྲུབ་དགོས་སོ། །
འདི་དང་མཚུངས་པའི་གདེང་མ་རྙེད་ཀྱི་བར་དུ་ང་ཚོས་ངེས་པར་དུ་འཆི་བ་མི་རྟག་པ་ཁོ་ན་སྒོམ་དགོས། དགེ་བཤེས་ཕུ་ཆུང་བས་ཞོགས་པར་མི་རྟག་པའི་འདུ་ཤེས་མེད་ན་ཉིན་གྱི་དུས་ཚོད་སྟོང་ཟད་དུ་གྱུར་ཅིང་དགོང་ཁར་མི་རྟག་པའི་བསམ་པ་མེད་ན་མཚན་གྱི་དུས་ཚོད་སྟོང་ཟད་དུ་འགྱུར་བ་རེད་ཅེས་གསུངས།
མི་ལ་ལ་ཞིག་ནམ་རྒྱུན་རྣམ་རྟོག་ཧ་ཅང་མང་བས་རྟག་ཏུ་མི་དྲན་དགུ་དྲན་བྱ་རྒྱུར་དགའ། སྐད་ཅིག་སྔ་མ་ལ་འདི་དྲན་ཞིང་ཕྱི་མ་ལ་དེ་དྲན་པར་བྱེད་པས་སེམས་ཡུད་ཙམ་དུ་ཡང་གནས་མི་ཐུབ་པས་སྡུག་གིས་མནར། དོན་དུ་སེམས་སུ་ཅི་ཞིག་དྲན་པར་དགའ་ཞེ་ན། མི་རྟག་པ་དྲན་པར་བྱས་ན་ཤིན་ཏུ་བཟང་སྟེ། རི་བོ་མི་རྟག་པ་ཡིན་ཞིང་གཙང་པོ་དག་ཀྱང་མི་རྟག་པ་ཡིན། ང་མི་རྟག་པ་ཡིན་ལ་ཁྱོད་ཀྱང་མི་རྟག་པ་ཡིན། མཇུག་མཐར་ང་འཆི་ལ་ཁྱོད་ཀྱང་འཆི་བར་འགྱུར་ཞེས་བསམ་དགོས། དེ་ལས་གཞན་པའི་མན་ངག་མཆོག་ཏུ་གྱུར་པ་ཞིག་མེད་དོ། །
སྔོན་སློབ་དཔོན་ཆེན་མོ་དབྱིན་ཀོང་གིས་མཆོད་ཁང་དུ་འཆི་ཞེས་པའི་ཡིག་འབྲུ་ཆེན་པོ་ཞིག་བྲིས་ནས་གྱང་ངོས་སུ་སྦྱར་བ་རེད། རང་ཉིད་འཆི་རྒྱུ་རེད་ཅེས་བསམས་ན་འཇིག་རྟེན་འདིར་ད་དུང་བློ་ཡིས་མི་ཐོང་བའི་དངོས་པོ་གང་ཞིག་ཡོད། ཤི་རྗེས་དངོས་པོ་ཅི་ཞིག་འཁྱེར་ནུས། དེའི་ཕྱིར་འཆི་བ་མི་རྟག་པ་སྒོམ་པ་ལ་ཤིན་ཏུ་གཙིགས་ཆེན་མཛད་ཅིང་འདི་ནི་དམ་པ་གོང་མ་རྣམས་ཀྱི་ཉམས་ལེན་ལམ་དུ་འགྲོ་བའི་མན་ངག་སྟོབས་དང་ལྡན་པ་ཞིག་ཡིན་པར་གདོན་མི་ཟ།
སུང་རྒྱལ་རབས་ཀྱི་སྐབས་སུ་ཝོ་ཤིང་ཟོ་བྱ་བའི་མི་ཞིག་ཡོད། ཁོ་རིག་པ་རྣོ་ཞིང་ཐོས་རྒྱ་ཆེ་ལ་ཆོས་དད་ཀྱང་ཤིན་ཏུ་ཆེ། གོང་མའི་ཕོ་བྲང་དུ་གོ་ས་མཐོན་པོར་བཞུགས་ཀྱང་ཆོས་ཐམས་ཅད་མི་རྟག་པ་ཡིན་པའི་ཆོས་ཉིད་ལ་ངེས་ཤེས་གཏིང་ཚུགས་པ་ལྡན་པས་རྒྱུ་ནོར་དང་དབང་ཁེ་གྲགས་ལ་གཏན་ནས་ཡིད་སྨོན་མི་བྱེད་པ་རེད།
ཁོས་ཉིན་མཚན་མེད་པར་མི་རྟག་པ་སྒོམ་ཞིང་ཤིང་བཟོ་གདན་འདྲེན་ཞུས་ནས་རང་ཉིད་ཀྱི་ཆེད་དུ་རོ་སྒམ་ཞིག་ལས་སུ་བཅུག་ཅིང་མཚན་མོ་རོ་སྒམ་དེའི་ནང་དུ་ཉལ་བ་རེད། གདུགས་ཕྱི་མའི་སྐྱ་རེངས་འཐེན་སྐབས་གཡོག་པོས་རྟག་ཏུ་རོ་སྒམ་དལ་མོས་བརྡུངས་ནས། ཝོ་ཤིང་ཟོ། ལྡོག་ཅིག ཁམས་གསུམ་འཁོར་བ་སྡོད་སའི་གནས་མ་ཡིན། །ནུབ་ཀྱི་ཞིང་དུ་བརྫུས་ཏེ་སྐྱེ་བར་ཤོག། ལྡོག་ཅིག། ཅེས་འབོད་དུ་གཞུག་པ་རེད།
ཕྱིས་སུ་ཉིན་ཞིག ཁོས་སངས་རྒྱས་འོད་དཔག་ཏུ་མེད་པའི་མཚན་རྗོད་བཞིན་པའི་སྐབས་སུ་ཁྱིམ་མི་དག་གིས་བར་སྣང་ལས་ལྷའི་རོལ་མོའི་སྒྲ་གྲགས་པ་ཐོས། ཁོས་ཁྱིམ་མི་ཀུན་ལ་གསེར་གྱི་པདྨའི་གདན་སླེབས་ཟིན། ད་ང་ཡང་འགྲོ་རན་སོང་ཞེས་བཤད་རྗེས་ཟུག་རྔུ་གང་ཡང་མེད་པར་ཚེ་འཕོས་སོ། །
ང་ཚོ་མི་ཡོད་དོ་ཅོག་གི་ཚེ་སྲོག་ཤིན་ཏུ་མི་རྟག་པས་དུས་ནམ་ཞིག་ཏུ་འཆི་རྒྱུ་ཡིན་པ་སུས་ཀྱང་སྔོན་དཔག་བྱེད་མི་ནུས། གཉེན་གྲོགས་སོགས་ཇི་ལྟར་སྨོན་འདྲིན་དུ་གྱུར་ཀྱང་ཤི་རྗེས་གཅིག་ཀྱང་འཁྲིད་མི་ཐུབ། རྒྱུ་ནོར་ལ་བསླུ་བྲིད་ཇི་ལྟར་ལྡན་ཡང་ཤི་རྗེས་མར་ལས་སྤུ་བཏོན་པ་ལྟར་ཐམས་ཅད་ཤུལ་དུ་སྐྱུར་དགོས། ལུས་པོ་ལ་འཁྲེང་ཞེན་ཇི་ལྟར་ཆེ་རུང་ཤི་རྗེས་ལྷམ་རྙིང་བཞིན་དུ་འདོར་དགོས། དེའི་ཕྱིར་ཏཱ་མིང་རྒྱལ་རབས་སྐབས་ཀྱི་སློབ་དཔོན་ཆེན་མོ་དབྱི་ཡོན་གྱིས།
འཆི་བ་མི་རྟག་དུས་ལ་ཁོམ་ལོང་མེད། །
འོད་མཚན་སྟོང་འབར་སྐད་ཅིག་ཉིད་དུ་སྒྲུབ། །
སྒེའུ་ཁུང་འདབས་ཀྱི་ཉི་ཟེར་ཡུད་ཀྱིས་འདའ། །
མི་ཡི་ཚེ་ལ་ལོང་ཡོད་འགྱུར་རམ་ཅི། །ཞེས་གསུངས་སོ། །
འོན་ཀྱང་ཡིད་ཕངས་པ་ཞིག་ནི་མི་ཕལ་མོ་ཆེར་མཚོན་ན་མི་རྟག་པ་ཏག་ཏག་མིག་སྔོན་དུ་སླེབས་ཀྱང་ལྡོག་སྟེ་ཐམས་ཅད་རྟག་པར་འཛིན་ཅིང་། རྒ་བ་མགོ་ཐོག་ཏུ་མངོན་པར་སླེབས་ཀྱང་ད་དུང་རང་ཉིད་ན་ཚོད་གཞོན་པར་བརློམས་ཤིང་སྡུག་བསྔལ་མི་བཟད་པས་མནར་ཡང་ད་དུང་ཅི་ཞིག་གི་རྐྱེན་གྱིས་ཡིན་པ་མི་ཤེས་སོ། །