སངས་རྒྱས་ལ་བསྟི་སྟང་བྱས་ན་བསོད་ནམས་ཀྱི་ཚོགས་རླབས་ཆེན་རྫོགས་ནུས།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
སངས་རྒྱས་ནི་བསོད་ནམས་ཀྱི་ཞིང་ཐམས་ཅད་ལས་ཞིང་ཆེས་མཆོག་ཏུ་གྱུར་པ་ཡིན་པས། གལ་སྲིད་བསོད་ནམས་ཀྱི་ཚོགས་རླབས་པོ་ཆེ་གསོག་འདོད་ན་བརྩོན་པ་ཆེན་པོས་སངས་རྒྱས་ལ་བསྟི་སྟང་བྱེད་དགོས། ད་ལྟ་དེ་བཞིན་གཤེགས་པའི་སྐུ་དངོས་མཐོང་མི་ནུས་རུང་གལ་ཏེ་དེ་བཞིན་གཤེགས་པའི་སྐུ་བརྙན་གྱི་མདུན་དུ་བསྙེན་བཀུར་བྱས་ན་གོང་དང་འདྲ་བའི་ཕན་ཡོན་འཐོབ་བོ།།
མི་ལ་ལ་ཞིག་གིས་སྒོ་གསུམ་གུས་པ་ཆེན་པོས་སངས་རྒྱས་ལ་བསྙེན་བཀུར་མཆོད་པ་བྱས་པས་ཡོན་ཏན་ངོ་མཚར་བ་མང་པོ་བྱུང་འདུག
ཀྲུང་དབྱང་བརྙན་འཕྲིན་ཁང་གིས་ཤི་རྗེས་ལུས་མ་ཞིག་པའི་ཤོང་ཧི་རྒན་མོ་ཞེས་པའི་གནས་ཚུལ་ཞིག་སྔོན་དུས་བརྒྱུད་སྒྲོག་བྱེད་མྱོང་། རྒན་མོ་དེ་ལ་ཀྲུས་གླིང་ཁྲིང་ཞེས་བྱ་ཞིང་མོ་ནི་སྤྱིར་བཏང་གི་ཞིང་པ་བུད་མེད་ཅིག་ཡིན། ༡༩༩༢ ལོའི་ཟླ་༡༡ཚེས་༢༤ཉིན་ཚེ་འཕོས་ཤིང་འཇིག་རྟེན་དུ་བགྲང་བྱ་གྱ་བརྒྱད་དུ་བསྡད། རྒན་མོ་ཚེ་འཕོས་རྗེས་ཁྱིམ་མི་རྣམས་ཀྱིས་རྒན་མོའི་ཁ་ཆེམས་ལྟར་ཕུང་པོ་ཕ་ཡུལ་གྱི་ས་ཐབ་སྟེང་དུ་བདེ་བར་བསྐྱལ། རུལ་འགོག་གི་བྱེད་ཐབས་གང་ཡང་མ་བྱས་པའི་གནས་ཚུལ་འོག་མི་ལོ་བཅུ་གཉིས་སུ་བཞག་ཀྱང་རྒན་མོའི་ཕུང་པོ་
མ་རུལ་བར་ལུས་པས་མི་ཧ་ཅང་མང་པོས་དེ་ནི་གསང་བ་ཞིག་ཡིན་པར་བསམས།
དོན་དུ་རྒན་མོ་ཀྲུས་ཧྥིང་ཁྲིང་ནི་དད་མོས་ཤིན་ཏུ་ཆེ་བའི་ནང་པའི་རྗེས་འཇུག་པ་ཞིག་ཡིན། རྒན་མོ་གསོན་པོར་འཚོ་སྐབས་གོམ་གཤིས་དམིགས་བསལ་བ་ཞིག་ཡོད་དེ་སྔ་གུང་ནུབ་གསུམ་དུ་སངས་རྒྱས་སྐུ་བརྙན་གྱི་མདུན་དུ་བསྙེན་བཀུར་བསྟི་སྟང་བྱེད་ཅིང་ཚེ་གཅིག་ཏུ་ཡང་རྒྱུན་གཅོད་མ་མྱོང་།
རྒན་མོའི་ཚེ་མཇུག་ཏུ་འགྲོ་འདུག་མི་བདེ་བར་གྱུར་ཀྱང་སྒེའུ་ཁུང་དང་ཙོག་ཙེ་སོགས་ལ་བརྟེན་ནས་གོམ་པ་རེ་རེ་བཞིན་མཆོད་ཁྲིའི་མདུན་དུ་ནུད་ནས་བསྙེན་བཀུར་བྱེད་ཅིང་། གཏན་ནས་གཡོ་འགུལ་མི་ནུས་པའི་ཚེ་མལ་ཁྲིའི་སྟེང་ནས་སྤོས་ཟུར་གསུམ་སྦར་ནས་ཡང་ཚ་མོ་ལ་སངས་རྒྱས་ཀྱི་སྐུ་མདུན་དུ་མཆོད་འཇུག་པ་རེད། མི་གཞན་གྱིས་སིལ་ཏོག་གམ་ཁྱེའུ་ཟས་སྟེར་བའམ་ཡང་ན་རྒྱ་ཤུག་གཅིག་ཁོ་ན་བྱིན་ཡང་རྒན་མོས་ཐོག་མར་སངས་རྒྱས་ལ་མཆོད་ཅིང་དེ་ནས་རང་གིས་ཟ། མི་ལོ་བཅུ་ཕྲག་དུ་མའི་ཆར་རླུང་བརྒྱུད་ཀྱང་སངས་རྒྱས་ལ་མཆོད་པ་ནམ་ཡང་གཅོད་མ་མྱོང་།
དེའི་ཕྱིར། བསོད་ནམས་ཀྱི་ཚོགས་གསོག་པ་ལ་སྒོར་མོའི་མང་ཉུང་མེད་པར་གཙོ་བོ་སེམས་ལ་རག་ལས། བསྙེན་བཀུར་ཞུ་བའི་སེམས་ཡོད་ན་བསོད་ནམས་ཀྱི་ཚོགས་གསོག་པའི་གོ་སྐབས་ཆེས་ཆེར་ལྡན་པ་རེད། གལ་སྲིད་ལ་ལ་དག་ནོར་གྱིས་ཕོངས་ཏེ་དངོས་འབྱོར་གྱིས་བསྙེན་བཀུར་བྱེད་མ་ཐུབ་རུང་མེ་ཏོག་དང་ཆུ་གཙང་། གནམ་སྔོན་པོ། སྤྲིན་དཀར་པོ་སོགས་མཛེས་ལྗོངས་ཀྱི་མཆོད་པ་འབུལ་ཆོག ཐ་ན་སེམས་དག་ན་ཡིད་སྤྲུལ་གྱི་མཆོད་པ་སྟེ་ས་རྡོ་སོགས་མཆོད་པ་རུ་དངོས་སུ་བསྒོམས་ནས་བསྙེན་བཀུར་བར་བྱས་ན་ཡང་བསོད་ནམས་རྒྱ་ཆེན་པོ་གསོག་ནུས།
སྔོན་འདས་པའི་དུས་ན་བཅོམ་ལྡན་འདས་ཀུན་དགའ་བོ་དང་ལྷན་ཅིག་བསོད་སྙོམས་ལ་གཤེགས་པ་ལས་ལམ་ཁ་ན་བྱིས་པ་གཉིས་ཀྱིས་རྩེད་མོ་རྩེ་བཞིན་གནས། ཁོ་ཚོས་བྱེ་མས་སྡོད་ཁང་བརྩེགས་ཤིང་ས་འབུར་རེ་ལ་མཛུབ་མོ་འཛུགས་བཞིན་འདི་ཁང་བུའོ། །འདི་བང་མཛོད་དོ། །འདི་རིན་པོ་ཆེའོ་ཞེས་བཤད།
དེའི་ཚེ་ཁྱེའུ་གཅིག་གིས་སངས་རྒྱས་རྒྱང་མ་ནས་གཤེགས་པ་མཐོང་ནས་རབ་ཏུ་དགའ་སྟེ་རིན་པོ་ཆེར་བྱས་པའི་ས་ལས་སྙིམ་པ་གང་བླངས་ནས་སངས་རྒྱས་ལ་འབུལ་བ་བྱ་བར་བསམས། ཁྱེའུ་དེ་ཆུང་ཆེས་པས་མ་སླེབས་ནས་གྲོགས་ཁྱེའུ་གཅིག་ལ་ཁྱོད་ལུས་པོ་སྒུར་བར་གྱིས་ཤིག ང་ཁྱོད་ཀྱི་སྟེང་དུ་འགྲེངས་ནས་རིན་པོ་ཆེ་བཅོམ་ལྡན་འདས་ལ་འབུལ་བར་བསམ་མོ་ཞེས་སྨྲས། གྲོགས་ཁྱེའུ་དེས་དེ་བཞིན་དུ་བྱས་ཏེ་དེའི་ཕྲག་པ་ལ་འཛེགས་ནས་ས་སྙིམ་པ་གང་སངས་རྒྱས་ལ་འབུལ་བར་གཟས། བཅོམ་ལྡན་འདས་ཀྱིས་ཀྱང་ལྷུང་བཟེད་སྨད་པས་བྱེའུས་ས་སྙིམ་པ་གང་ལྷུང་བཟེད་དུ་བླུགས་ཤིང་སངས་རྒྱས་ཀྱིས་ཕུལ་བ་བཞེས།
བཅོམ་ལྡན་འདས་ཀྱིས་ལྷུང་བཟེད་ཀུན་དགའ་བོ་ལ་གཏད་དེ་ས་འདི་འཇིམ་པ་གྱིས་ལ་གཙུག་ལག་ཁང་ལ་སྐུས་ཤིག་ཅེས་བཀའ་བསྩལ། དེ་ནས་ཡང་བཀའ་བསྩལ་པ། ཀུན་དགའ་བོ་བྱིས་པ་ཆུང་ངུས་དགའ་བའི་སེམས་ཀྱིས་ད་ལྟ་ང་ལ་ཕུལ་ཞིང་གཙུག་ལག་ཁང་ལ་བསྐུས་པའི་བསོད་ནམས་ཀྱིས་ང་མྱ་ངན་ལས་འདས་ཏེ་ལོ་བརྒྱ་ལོན་པའི་འོག་ཏུ་རྒྱལ་པོ་ཨ་ཤོ་ཀ་བྱ་བར་འགྱུར་རོ་ཞེས་གསུངས་པ་དང་། ཁྱེའུ་གཅིག་ཤོས་ནི་དེའི་བློན་པོར་གྱུར་ཏེ་རྒྱལ་པོ་ཨ་ཤོ་ཀས་འཛམ་བུ་གླིང་དུ་མཆོད་རྟེན་བརྒྱད་ཁྲི་བཞི་སྟོང་ཅིག་ཆར་བྱེད་དོ་ཞེས་ལུང་བསྟན་ཏོ། །
ཕྱིས་སུ་བཅོམ་ལྡན་འདས་ཀྱིས་ལུང་བསྟན་པ་ལྟར་སངས་རྒྱས་མྱ་ངན་ལས་འདས་ནས་ལོ་བརྒྱ་ལོན་པ་ན་རྒྱ་གར་དུ་རྒྱལ་པོ་ཨ་ཤོ་ཀ་སྐྱེས་ནས་སངས་རྒྱས་ཀྱི་བསྟན་པ་ལ་བྱ་བ་རྒྱ་ཆེན་པོ་བྱས་ཤིང་མཆོད་རྟེན་བརྒྱད་ཁྲི་བཞི་སྟོང་བཞེངས་པ་དང་། ད་དུང་ནང་པའི་གནས་ཆེན་ཁག་དུ་མར་རྗེས་དྲན་གྱི་རྡོ་རིང་ཡང་བསླངས་ཡོད།
ད་སྐབས་རྒྱ་གར་ལ་སོང་ན་རྡོའི་ཀ་བ་འདི་དག་ད་དུང་རང་རེས་དངོས་སུ་མཇལ་རྒྱུ་ཡོད་པ་རེད།