古诗《江南》2016年秋季人教版小学一年级语文上册 改编 麦小姐 朗读 岑然周

古诗《江南》2016年秋季人教版小学一年级语文上册

改编  麦小姐   朗读  岑然周

江南

汉乐府

江南可采莲，

莲叶何田田。

鱼戏莲叶间。

鱼戏莲叶东，

鱼戏莲叶西，

鱼戏莲叶南，

鱼戏莲叶北。

注释：

田田：荷叶茂盛个样子。

可：搿搭个“可”，有“适合” 、“ 正好”个意思。

译文：

江南又到适合采莲个季节了，重重叠叠个莲叶浮出水面，又莽又轧，迎风招展。一层一层个荷叶像只大盖头，小鱼拉就辣搿只大盖头底下头游来游去游孛相，赛过是“野猫猫”。歇歇辣迭头，歇歇又游勒伊头去，也弄伊勿清爽到底辣辣东面，还是辣西面，是辣辣南面，还是辣辣北面。

赏析：

搿是首采莲歌，反映了采莲辰光个场景脱采莲人欢乐个心情。辣汉乐府民歌当中，具有独特个风味。

民歌用简洁明快个语言，循环反复个调头，优美隽永个意境，清新自然个格调，为我伲描绘了一副生动有趣个画面。碧绿生青个荷叶，一眼望勿着头，荷叶下头，小鱼拉自由自在，游来游去。采莲人俹船而来，歌声笑声忒周转环境相映成趣，画面感十足，真真是一派秀丽个江南好风光！

让我伲再从文学角度来欣赏搿首诗，会得发现，其实，搿是首情歌，当中隐含了男女青年互相嬉戏，追求爱情个意思。侬看牌小鱼，辣荷叶之间游过来游过去，叫人联想着了北方人讲个“大姑娘跑进青纱帐”。

读罢搿首诗，像煞有股热天介个清新之风扑面而来，想想也觉着适意。我伲一头感受诗人个恬适悠然，一头，自家个身心也松落落了。

虽然整首诗里呒没一个字是写人个，但让我伲感受到了一股青春个生机忒活力，采莲人个快活忒自由，还有男女之间甜蜜个爱情，真真式式是“如闻其声、如见其人、如临其境”。搿就是凝结了古代劳动人民生活智慧个民歌，既朴素又永恒个生命力了。

作者简介：

汉乐府：本生是汉初采诗制乐个官署，后头又专指汉代个府诗。辣惠帝个辰光，有乐府令一官，可能当时已设有乐府。到汉武帝个辰光，乐府规模扩大，成为一只专设个官署，掌管郊祀、巡行、朝会、宴飨辰光个音乐，兼管采集民间歌谣，以供统治者观察民俗了解民情。搿种采集得来个歌，脱其他经乐府配曲入乐个诗，就拨后人称为“乐府诗歌”。