མི་རྒས་རྗེས་སངས་རྒྱས་འོད་དཔག་མེད་ལ་སྐྱབས་ཞུས་ན་ཆེས་དོན་སྙིང་ལྡན

༨  མི་རྒས་རྗེས་སངས་རྒྱས་འོད་དཔག་མེད་ལ་སྐྱབས་ཞུས་ན་ཆེས་དོན་སྙིང་ལྡན།

བདེ་བ་ཅན་དུ་སྐྱེ་བ་ལ་སངས་རྒྱས་འོད་དཔག་ཏུ་མེད་པའི་བྱིན་རླབས་ལས་ད་དུང་རང་ཉིད་ཀྱི་ཡིད་ཆེས་ཀྱི་དད་པ་དང་སྨོན་ལམ་ཡོད་དགོས། གལ་ཏེ་རང་ཉིད་སྐྱེ་མ་འདོད་ན་སངས་རྒྱས་འོད་དཔག་མེད་ཀྱི་བྱིན་རླབས་བསམ་གྱིས་མི་ཁྱབ་རུང་སྤྱི་གཙུག་གི་སྐྲ་ལས་བདེ་བ་ཅན་དུ་འཐེན་མི་ཐུབ།

ལར་མི་རྒས་རྗེས་རང་ཉིད་ཀྱི་ཆེད་དུ་ཚེ་སྲོག་གི་གནས་མལ་ཞིག་འཚོལ་བར་བྱེད་དགོས། གནས་མལ་ཡོད་དོ་ཅོག་ལས་སངས་རྒྱས་འོད་དཔག་ཏུ་མེད་པ་ལ་སྐྱབས་འཇུག་ཞུ་བ་ནི་ཆེས་དོན་སྙིང་དང་ལྡན་པ་ཞིག་ཡིན། བོད་དུ་རྒན་འཁོགས་རྣམས་ཀྱིས་མི་འབྲལ་བ་གསུམ་སྒྲུབ་ནུས་ཏེ་དེ་ཡང་ངག་སངས་རྒྱས་ཀྱི་མཚན་དང་གཟུངས་སྔགས་དང་མི་འབྲལ་བ་དང་། ལག་གཡོན་ཕྲེང་བ་དང་མི་འབྲལ་བ། ལག་གཡས་འཁོར་ལོ་དང་མི་འབྲལ་བ་བཅས་སོ། །འོན་ཀྱང་རྒྱ་ནག་གི་རྒན་འཁོགས་མང་པོ་དག་ནི་དེ་ལྟར་མ་ཡིན་པར་ཁོ་ཚོ་དང་མི་འབྲལ་བའི་བྱ་བ་ཅི་ཞིག་ཡིན་པ་ཀུན་གྱིས་གསལ་བོར་ཤེས་ལས་ཆེ།

ལ་ལས་སངས་རྒྱས་ཀྱི་མཚན་བརྗོད་དེ་ཆོས་སྒྲུབ་པ་ནི་ཁྱིམ་དུ་སྒྲུབ་རུང་བ་ལས་ཕྱི་རོལ་ཏུ་སླེབས་སྐབས་སྒྲུབ་མི་རུང་ཞེས་སྨྲ། དོན་དུ་དེ་ལྟར་མ་ཡིན་པར་ང་ཚོས་འགྲོ་འཆག་ཉལ་འདུག་སོགས་སྤྱོད་ལམ་ཐམས་ཅད་དུ་ངག་སངས་རྒྱས་ཀྱི་མཚན་དང་མི་འབྲལ་བ་བྱེད་དགོས།

དག་ཞིང་པའི་སྐྱེས་ཆེན་གྱི་བྱུང་བ་ལས་གཏམ་རྒྱུད་ཤིན་ཏུ་ལེགས་པོ་ཞིག་བཤད་འདུག  

ཆེན་རྒྱལ་རབས་ཀྱི་སྐབས་སུ་ཧང་ཀྲུས་ལ་རབ་བྱུང་བ་ཞིག་ཡོད། ཁོང་ནམ་རྒྱུན་ལྷོ་ཀུབ་བཟའ་རྒྱུར་དགའ་བས་བཙུན་པ་ལྷོ་ཀུབ་ཅེས་ཀུན་གྱིས་བཏགས།

བཙུན་པ་ལྷོ་ཀུབ་རྒྱུན་ལྡན་སྨྲ་བ་ཉུང་ལ་ཉིན་རེའི་ཟ་མ་གསོལ་རྗེས་སྲང་ལམ་དུ་འོད་མཚན་བརྗོད་བཞིན་འཆམ་འཆམ་དུ་འབྱོན་རྒྱུར་མོས། དགོང་ཁར་ཁྱིམ་དུ་ལྡོག་རྗེས་ཀྱང་འོད་མཚན་བརྗོད་པས་ངག་མི་དལ་བ་རེད། འདི་ལྟར་དབྱར་དགུན་མེད་པར་མི་ལོ་བཅུ་ཕྲག་འགའ་ཞིག་ཏུ་སངས་རྒྱས་འོད་དཔག་ཏུ་མེད་པའི་མཚན་ཁོ་ན་ངག་ནས་གསུངས། ཁོང་ལ་སློབ་དཔོན་མཁྱེན་གཟིགས་བྱ་བའི་གྲོགས་པོ་ཞིག་ཡོད། དེས་བཙུན་པ་ལྷོ་ཀུབ་ཉིན་རྟག་པར་སྲང་ལམ་དུ་

འགྲོ་འོང་བྱེད་བཞིན་འདུག་པ་མཐོང་སྐབས་བཙུན་པ་ལྷོ་ཀུབ་ཀྱིས་ཉམས་ལེན་ལ་བརྩོན་བཞིན་མི་འདུག་སྙམ་ཡང་དེ་ནི་ཁོང་གི་གོམས་གཤིས་ཤིག་ཡིན་པ་ཤེས་པས་ཅི་ཡང་མ་སྨྲས།

ཉིན་ཞིག བཙུན་པ་ལྷོ་ཀུབ་ཀྱིས་སློབ་དཔོན་མཁྱེན་གཟིགས་ལ་ལོ་ཕྱི་མའི་ཟླ་དང་པོའི་ཚེས་དྲུག་ཏུ་ང་རང་བདེ་བ་ཅན་དུ་འགྲོ་རྒྱུ་ཡིན། ཁྱེད་ཀྱིས་སྐྱེལ་མ་བྱས་ན་ཆོག་གམ་ཞུས། སློབ་དཔོན་མཁྱེན་གཟིགས་ཀྱིས་དེས་ཀུ་རེའི་གཏམ་ཙམ་བཤད་པ་རེད་སྙམ་སྟེ་རྩ་བ་ནས་ཡིད་མ་ཆེས་ཀྱང་ཐབས་ཟད་དེ་ཁས་ལེན་བྱས།

ལོ་རྗེས་མའི་ཟླ་དང་པོའི་ཚེས་དྲུག་ཏུ་སློབ་དཔོན་མཁྱེན་གཟིགས་བཙུན་པ་ལྷོ་ཀུབ་ཀྱི་གཟིམས་ཤག་ཏུ་སོང་ཡང་ཁོང་གདུགས་ཚོད་ལ་ཕེབས་པས་བཞུགས་མེད་པ་རེད། སློབ་དཔོན་མཁྱེན་གཟིགས་ཀྱི་སེམས་སུ་གྲ་སྒྲིག་གང་ཡང་མེད་པར་ད་དུང་བདེ་བ་ཅན་དུ་སྐྱེ་རྒྱུ་ཡིན་སྐད་སྨྲ། འདི་འདྲའི་གནས་ལུགས་ཤིག་གང་ན་ཡོད་སྙམ།

བཙུན་པ་ལྷོ་ཀུབ་གདུགས་ཚོད་བཞེས་རྗེས་ཕྱིར་ཕེབས་ནས་སློབ་དཔོན་མཁྱེན་གཟིགས་མཐོང་བས་ང་འཚོལ་བ་ཅི་ཞིག་གི་ཆེད་དུ་ཡིན་ཞེས་དྲིས། སློབ་དཔོན་མཁྱེན་གཟིགས་ཀྱིས་ཁྱེད་ཀྱིས་ད་ལོའི་ཟླ་དང་པོའི་ཚེས་དྲུག་ཏུ་བདེ་བ་ཅན་དུ་འགྲོ་རྒྱུ་ཡིན་པས་ང་རང་སྐྱེལ་མ་རུ་ཡོང་དགོས་ཞེས་མ་སྨྲས་སམ། ཁྱེད་ཀྱིས་བརྗེད་སོང་བ་ཡིན་ནམ། ཞེས་ལན་སྨྲས།

བཙུན་པ་ལྷོ་ནུབ་ཀྱིས་དབུ་ལ་ཐལ་ལྕག་ཅིག་གཞུས་ནས། ཨ་ཙི། ཁྱེད་ཀྱིས་དྲན་སྐུལ་བྱས་པ་བཟང་། ངས་ཅུང་མིན་པར་བརྗེད་སོང་། ཞེས་སྨྲས་རྗེས་བཙུན་པ་ཁྲུས་ལ་ཞུགས་ཤིང་སྤོས་མཆོད་པ་དང་སྟོན་པའི་སྐུ་མདུན་དུ་གུས་ཕྱག་ཕུལ། དེ་ནས་བཙུན་པས་སློབ་དཔོན་མཁྱེན་གཟིགས་ལ། 

རྟག་ཏུ་ཁྲོམ་ལ་འཁྱམས་ཀྱང་། །

ངག་ཏུ་བརྗོད་པས་མི་དལ། །

འཇིག་རྟེན་སྐྱེ་བོ་ཕལ་བས། །

ང་ཡི་སྤྱོད་ཡུལ་མི་རྟོགས། །

ཞེས་པའི་ཚིགས་བཅད་ཅིག་སྨྲས་ནས་སྐུ་ནི་བར་གཤེགས།

བཙུན་པ་ལྷོ་ཀུབ་ཞུ་བ་འདི་ཉིད་ཕྱི་ཚུལ་ལ་རྟག་ཏུ་སྲང་ཁྲོམ་ཉུལ་ཡང་སེམས་སུ་ནི་སངས་རྒྱས་འོད་དཔག་ཏུ་མེད་པའི་མཚན་བརྗོད་པ་དང་མ་བྲལ་ཞིང་སངས་རྒྱས་ཀྱི་མཚན་བརྗོད་པ་དེ་ཉིད་ཀྱིས་ཁོང་གི་སྤྱོད་ལམ་ཡོད་ཚད་ཟིན་ཏོ། །སྐྱེ་བོ་སུ་ཞིག་གིས་ཁོང་དང་འདྲ་བར་དུས་དང་རྣམ་པ་ཀུན་ཏུ་སངས་རྒྱས་ཀྱི་མཚན་བརྗོད་པའི་བགྱི་བ་མི་བརྗེད་ཅིང་སངས་རྒྱས་འོད་དཔག་ཏུ་མེད་པ་ལ་ཕྱིར་མི་ལྡོག་པའི་དད་པ་ལྡན་ན་ཇི་ལྟར་བླུན་རུང་ཐར་པའི་ལམ་སྣ་ཟིན་ངེས་ཅན་ཡིན་ནོ། །

ཇི་སྐད་དུ་བརྟག་གཉིས་ལས། 

བླུན་པོར་དད་པ་བརྟན་ལྡན་ན། །

དེ་ཡིས་དངོས་གྲུབ་ཐོབ་པར་འགྱུར། །ཞེས་གསུངས་སོ། །

སུ་ཞིག་གིས་དེང་རབས་ཀྱི་ཚན་རྩལ་རྩེ་མོར་སོན་པ་དག་མ་ཤེས་རུང་ལ་སངས་རྒྱས་པའི་རིགས་པ་མང་པོ་མ་ཤེས་ཀྱང་རུང་། སེམས་སུ་དད་པ་བསླད་མེད་པ་ཞིག་ཡོད་ཅིང་བདེ་བ་ཅན་གྱི་ཡོན་ཏན་ཐོས་སྐབས་བརྒྱ་ཆ་བརྒྱ་ཐམ་པས་ཡིད་ཆེས་ཏེ་ནུབ་ཕྱོགས་སུ་བདེ་བ་ཅན་ཡོད་ངེས་ཅན་རེད། ང་རང་ཡིན་གཅིག་མིན་གཉིས་བདེ་བ་ཅན་དུ་སྐྱེ་དགོས་སྙམ་དུ་བསམས་པའི་དད་པ་ཙམ་ལྡན་ན་ཡང་དེ་ལ་བརྟེན་ནས་ཕན་པ་ཆེན་པོ་འཐོབ་བོ། །

གང་ལྟར་ཡང་བདེ་བ་ཅན་དུ་སྐྱེ་བ་ལ་སངས་རྒྱས་འོད་དཔག་ཏུ་མེད་པའི་བྱིན་རླབས་ལས་ད་དུང་རང་ཉིད་ཀྱི་ཡིད་ཆེས་ཀྱི་དད་པ་དང་སྨོན་ལམ་ཡོད་དགོས། གལ་ཏེ་རང་ཉིད་སྐྱེ་མ་འདོད་ན་སངས་རྒྱས་འོད་དཔག་མེད་ཀྱི་བྱིན་རླབས་བསམ་གྱིས་མི་ཁྱབ་རུང་སྤྱི་གཙུག་གི་སྐྲ་ལས་བདེ་བ་ཅན་དུ་འཐེན་མི་སྲིད།

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

 
འདི་ནས་ལན་གཅིག་གནོན་རོགས།👇