སངས་རྒྱས་ཀྱི་མཚན་ལན་གཅིག་བརྗོད་པ་ལ་ཕན་ཡོན་བསམ་གྱིས་མི་ཁྱབ་པ་ཡོད།

༩ སངས་རྒྱས་ཀྱི་མཚན་ལན་གཅིག་བརྗོད་པ་ལ་ཡང་ཕན་ཡོན་བསམ་གྱིས་མི་ཁྱབ་པ་ཡོད།

སངས་རྒྱས་ཀྱི་མཚན་མི་འདྲ་བ་ལ་ཕན་ཡོན་ཡང་མི་འདྲ་བ་རེ་ཡོད། དེ་ནི་འཇིག་རྟེན་འདིའི་སྟེང་གི་སྨན་རེ་རེ་ལ་ནད་རིགས་མི་འདྲ་བ་རེ་འཆོས་པའི་ནུས་པ་ལྡན་པ་དང་ཤིན་ཏུ་མཚུངས། དོན་དུ་སངས་རྒྱས་ཀྱི་མཚན་བརྗོད་པའི་མི་རྒས་པ་ཡིན་རུང་། ན་གཞོན་ཡིན་རུང་། གོ་ས་མཐོན་པོར་བཞུགས་པ་ཡིན་རུང་། རྒྱུ་ནོར་གྱིས་ཕྱུག་རུང་། མི་རྒྱུད་སེར་པོ་ཡིན་རུང་། མི་རྒྱུད་དཀར་པོ་ཡིན་རུང་སུ་ཞིག་གིས་བརྗོད་ཀྱང་ཐམས་ཅད་ལ་ཕན་ཡོན་རྒྱ་ཆེན་པོ་འབྱུང་ངོ་། །

ཁམས་དབང་དང་མོས་པ་ལྡན་པའི་མི་འགའ་ཞིག་ལ་མཚོན་ན་སངས་རྒྱས་འོད་དཔག་ཏུ་མེད་པའི་མཚན་བརྗོད་པ་ཁོ་ནས་གྲུབ་པའི་སར་གཤེགས་ནུས། འོན་ཀྱང་སངས་རྒྱས་ཀྱི་མཚན་གཞན་དག་གི་ཕན་ཡོན་ལ་ནི་སྣང་མེད་བྱེད་མི་རུང་།

སེམས་ཅན་གྱི་ཁམས་དབང་དང་མོས་པ་བསམ་གྱིས་མི་ཁྱབ་པས་ལ་ལ་སངས་རྒྱས་འོད་དཔག་མེད་ཀྱི་མཚན་བརྗོད་པས་གྲོལ་ནུས་ཤིང་ལ་ལ་དག་ནི་སངས་རྒྱས་ཀྱི་མཚན་གཞན་གྱིས་འགྲོལ་དགོས། ཐ་ན་ཁ་ཅིག་གིས་སངས་རྒྱས་མང་པོའི་མཚན་བརྗོད་དགོས་པས་གནས་ཚུལ་འདྲ་མིན་སྣ་ཚོགས་ཡོད། དེའི་ཕྱིར་བྱ་བ་ཡོད་ཚད་གླུ་བརྒྱ་ངག་གཅིག་གིས་ཐག་གཅོད་མི་རུང་། དེ་ལྟར་མ་ཡིན་ན་སྔོན་སྟོན་པ་བཅོམ་ལྡན་འདས་ཀྱིས་སེམས་ཅན་གྱི་ཁམས་དབང་སྣ་ཚོགས་ལ་གཞིགས་ནས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་རྒྱ་ཆེར་ཕྱེ་བར་མི་མཛད་དོ།

ས་སྙིང་འཁོར་ལོའི་མདོ་ལས་ཀྱང་སངས་རྒྱས་གཅིག་གི་མཚན་བརྗོད་པ་ལ་ཕན་ཡོན་བསམ་གྱིས་མི་ཁྱབ་པས་སངས་རྒྱས་རབ་ཏུ་མང་པོའི་མཚན་བརྗོད་ན་ལྟ་ཅི་སྨོས་ཞེས་གསུངས་པས་གསུང་འདིས་སངས་རྒྱས་ཀྱི་མཚན་བརྗོད་སྐབས་མཚན་གཅིག་ཁོ་ན་བརྗོད་དགོས་པ་མ་ཡིན་པར་མཚན་མང་པོ་བརྗོད་ཆོག་པ་ལ་གསལ་བཤད་བྱས་པ་རེད།

དཔེར་ན། ཁ་ཅིག་ས་ཡོམ་དང་གངས་གནོད། མཚོ་འཕྱུར། རིམས་ནད་སོགས་ཀྱི་འཇིགས་པ་འབྱུང་བ་ལ་སྐྲག་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་དབང་ཕྱུག་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། ཞེས་བགྲང་ཆོག ལ་ལ་དག་བགེགས་དང་འདྲེ་ལ་སྐྲག་ནས་མཚན་མོར་གཅིག་པུར་ཆབ་ཁང་ནང་དུ་འགྲོ་མ་ཕོད་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་དང་ཟླ་བའི་སྒྲོན་མ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ་ཞེས་འདོན་དགོས། ད་དུང་མི་ལ་ལ་མཛེས་ཆོས་ལ་དགའ་ཞིང་བྱད་གཟུགས་གཟི་བརྗིད་དང་ལྡན་པར་འདོད་ན་ཡུན་རིང་མོར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་གོམ་འགྲོས་ཅན་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ་ཞེས་འདོན་ཆོག་གོ།

མདོར་ན་སངས་རྒྱས་ཀྱི་མཚན་མི་འདྲ་བ་ལ་ཕན་ཡོན་ཡང་མི་འདྲ་བ་རེ་ཡོད། དེ་ནི་འཇིག་རྟེན་འདིའི་སྟེང་གི་སྨན་རེ་རེ་ལ་ནད་རིགས་མི་འདྲ་བ་རེ་འཆོས་པའི་ནུས་པ་ལྡན་པ་དང་ཤིན་ཏུ་མཚུངས།

འོན་ཀྱང་སངས་རྒྱས་གང་ཞིག་གི་མཚན་བརྗོད་ཀྱང་ཕན་ཡོན་བསམ་གྱིས་མི་ཁྱབ། མདོ་སྡེ་མྱང་འདས་ལས་བདག་ཅག་གི་སྟོན་པས་རྒྱལ་པོ་ཆེན་པོ་ལ་བཀའ་བསྩལ་པ། ཁྱོད་ཀྱིས་རྒྱལ་པོའི་བང་མཛོད་ཕྱེས་ཏེ་ཟླ་གཅིག་ཏུ་གསེར་དང་དངུལ། རིན་པོ་ཆེ་སོགས་སེམས་ཅན་ཐམས་ཅད་ལ་སྦྱིན་པ་བྱིན་པ་ལ་ཕན་ཡོན་བསམ་གྱིས་མི་ཁྱབ་པ་ལྡན་ཞིང་དེས་ལ་ལ་དག་གིས་སངས་རྒྱས་ཀྱི་མཚན་ལན་གཅིག་བརྗོད་པའི་ཕན་ཡོན་གྱི་ཆར་ཡང་མི་ཕོད་དོ་ཞེས་གསུངས་སོ། །

ཐ་ན་སངས་རྒྱས་ཞེས་མ་བརྗོད་པར་ཕྱག་འཚལ་ལོ་ཞེས་བརྗོད་པ་ཙམ་ལ་ཡང་ཕན་ཡོན་ཆེན་པོ་ཡོད། མདོ་སྡེ་ལུང་ཕྲན་ཚེགས་སུ་འདི་སྐད་ཅིག་གསུངས་ཡོད། དེ་ཡང་ལྷས་སྦྱིན་གྱིས་སྟོན་པ་བཅོམ་ལྡན་འདས་ལ་མཐོ་བཙམས་ནས་མཚམས་མེད་པའི་ལས་གསུམ་བསགས་པས་ཚེ་འཕོས་མ་ཐག་ཏུ་དམྱལ་བར་སྐྱེས་པས་འཇིགས་སྐྲག་ཆེན་པོས་མནར། གཞན་གྱིས་སངས་རྒྱས་ལ་ཕྱག་འཚལ་ལོ་ཞེས་བརྗོད་པར་བསྐུལ་ཀྱང་སྟོན་པ་ལ་ཕྲག་དོག་ཤུགས་ཆེན་ལྡན་པའི་རྐྱེན་གྱིས་སངས་རྒྱས་ཞེས་བརྗོད་མ་འདོད་དེ་ཕྱག་འཚལ་ལོ་ཁོ་ན་བརྗོད་པས་དེའི་ཕན་ཡོན་གྱིས་བདག་ཅག་གི་སྟོན་པས་མ་འོངས་པར་དེ་བཞིན་གཤེགས་པ་རང་སངས་རྒྱས་ལ་ཕྱག་འཚལ་ལོ་ཞེས་བྱ་བར་འགྱུར་བར་ལུང་བསྟན་པ་རེད།

དོན་དུ་སངས་རྒྱས་ཀྱི་མཚན་བརྗོད་པའི་མི་རྒས་པ་ཡིན་རུང་། ན་གཞོན་ཡིན་རུང་། གོ་ས་མཐོན་པོར་བཞུགས་པ་ཡིན་རུང་། རྒྱུ་ནོར་གྱིས་ཕྱུག་རུང་། མི་རྒྱུད་སེར་པོ་ཡིན་རུང་། མི་རྒྱུད་དཀར་པོ་ཡིན་རུང་། སུ་ཞིག་གིས་བརྗོད་ཀྱང་ཐམས་ཅད་ལ་ཕན་ཡོན་རྒྱ་ཆེན་པོ་འབྱུང་ངོ་། །དུད་འགྲོ་ཡིན་རུང་འཕག་འཚག་རྒྱག་བཞིན་ཚེ་འཕོ་སྐབས་དེའི་རྣ་ལམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ་ཞེས་བརྗོད་ན་དེས་ཕན་ཡོན་རྒྱ་

ཆེན་པོ་འཐོབ་པར་འགྱུར་བ་རེད།

ངས་སྔོན་མི་ཕམ་རིན་པོ་ཆེས་མཛད་པའི་སངས་རྒྱས་དང་བྱང་སེམས་ཀྱི་མཚན་གྱི་སྡེ་ཚན་ཞེས་པ་རྒྱ་ཡིག་ཏུ་བསྒྱུར་བའི་ནང་དུ་སངས་རྒྱས་དང་བྱང་ཆུབ་སེམས་དཔའི་མཚན་མང་པོ་བཀོད་དེ་དེ་དག་སོ་སོའི་ཕན་ཡོན་ཞིབ་མོར་གསུངས་ཡོད་པས་དུས་ཚོད་ཀྱི་ཁོམ་ལོང་ཡོད་ན་ཚང་མས་རྒྱུན་པར་བཀླགས་ན་ཤིན་ཏུ་བཟང་། གལ་སྲིད་ལ་ལ་རྒ་བའི་ཁུར་གྱིས་མནན་ཏེ་སངས་རྒྱས་ཀྱི་མཚན་མང་པོ་བརྗོད་མ་ཐུབ་རུང་དེ་དག་གི་ནང་ལས་སངས་རྒྱས་ཀྱི་མཚན་གཅིག་གམ་གཉིས་སམ་གསུམ་སོགས་རང་ནུས་ཅི་ལྕོགས་ཀྱིས་བརྗོད་པས་ཆོག 

མི་རུ་ལན་གཅིག་སྐྱེས་པའི་སྐལ་བ་འདིར་སངས་རྒྱས་ཀྱི་མཚན་འདི་དག་ལ་འཕྲད་ཅིང་མིག་གིས་ལྟ་བའམ་ངག་ཏུ་འདོན་པའམ་ཡང་ན་གཞན་གྱིས་བརྗོད་པ་རང་ཉིད་ཀྱིས་ཐོས་པ་སོགས་ནི་བསོད་ནམས་རླབས་པོ་ཆེ་ལྡན་པའི་རྐྱེན་གྱིས་ཡིན་ནོ། །

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

 
འདི་ནས་ལན་གཅིག་གནོན་རོགས།👇