བར་ཆད་འཕྲད་སྐབས་པདྨ་འབྱུང་གནས་ལ་གསོལ་བ་གདབ་རྒྱུ་ཤིན་ཏུ་གལ་ཆེ།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
སློབ་དཔོན་པདྨ་འབྱུང་གནས་ནི་འདས་མ་འོངས་ད་ལྟ་དུས་གསུམ་གྱི་སངས་རྒྱས་ཐམས་ཅད་ཀྱི་སྤྱི་གཟུགས་ཡིན། ཁྱད་པར་དེང་སྐབས་ཀྱི་དུས་རབས་འདིར་ཁོང་ནི་ལྷ་འདྲེ་གདོན་བགེགས་མ་ལུས་པ་འདུལ་བའི་ཡི་དམ་ལྷག་པའི་ལྷ་མཆོག་ཡིན།
ང་རང་ཆུང་བྱིས་པའི་དུས་ནས་བཟུང་སློབ་དཔོན་པདྨ་འབྱུང་གནས་ལ་དུང་བ་ཟབ་མོ་ཡོད། རང་ཉིད་ཀྱིས་ཆོས་སློབ་པའི་བརྒྱུད་རིམ་འདི་དག་ལ་ཕྱིར་ལྟ་ཞིག་བྱས་ན་བར་ཆད་རྐྱེན་ངན་སེལ་བ་ལ་སློབ་དཔོན་པདྨ་འབྱུང་གནས་ཀྱི་བྱིན་རླབས་ཀྱི་ཚན་ཁ་དངོས་གནས་ཤིན་ཏུ་མྱུར།
སློབ་དཔོན་པདྨ་འབྱུང་གནས་ཀྱི་གསོལ་འདེབས་རྒྱུན་འཁྱེར་སོགས་བགྲང་གིས་མི་ལང་།
ཡིན་ཡང་གསོལ་འདེབས་ཐམས་ཅད་ཀྱི་རྒྱལ་པོ་ནི་ཚིག་བདུན་གསོལ་འདེབས་ཡིན། དེ་ནི་སློབ་དཔོན་ཁོང་གིས་མཛད་པ་མ་ཡིན་པར་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་སློབ་དཔོན་པདྨ་འབྱུང་གནས་ལ་གསོལ་བ་འདེབས་པའི་ཚིགས་སུ་བཅད་པ་ཞིག་ཡིན། ཚིག་རྐང་བདུན་ལས་མེད་རུང་དོན་དུ་དེའི་ཕན་ཡོན་ཡིད་བཞིན་གྱི་ནོར་བུ་དང་གཉིས་སུ་མེད།
པདྨ་བཀའ་ཐང་མཁའ་འགྲོའི་ཞུས་ལན་ལས་རེ་བ་དང་འདུན་པ་ཇི་ལྟ་བུ་ཞིག་ཡོད་རུང་གལ་སྲིད་པད་འབྱུང་ལ་གསོལ་བ་བཏབ་ན་ཐམས་ཅད་ཡིད་བཞིན་དུ་འགྲུབ་བོ་ཞེས་གསུངས་སོ། །ང་ཚོར་ཐག་གཅོད་བྱེད་མི་ཐུབ་པའི་དཀའ་ངལ་དང་འཕྲད་སྐབས་ཚིག་བདུན་གསོལ་འདེབས་བཏོན་ནས་རྩེ་གཅིག་གིས་གསོལ་བ་བཏབ་ན་སློབ་དཔོན་པད་མ་འབྱུང་གནས་ཀྱིས་རེ་འདོད་ཐམས་ཅད་སྐོང་ངེས་ཅན་ཡིན།
ཅིའི་ཕྱིར་ཞེ་ན། དེ་ནི་སློབ་དཔོན་པདྨ་འབྱུང་གནས་ཀྱི་ཞལ་བཞེས་ཡིན་ཏེ། བུ་སྡུག་པས་ངུ་ངག་གིས་མ་ལ་བོས་ན་མས་བརྩེ་བ་ཆེན་པོས་མི་འདོར་བ་ལྟར་སུ་ཞིག་གིས་མོས་གུས་དང་ལྡན་པས་ཚིག་བདུན་གསོལ་འདེབས་བཀླགས་ན་པད་འབྱུང་ང་དངོས་སུ་བྱོན་ནས་རྟག་ཏུ་དབུགས་དབྱུང་སྩོལ་ཞིང་བྱིན་རླབས་བྱེད་དོ་ཞེས་གསུངས་ཡོད་པ་རེད།
སྔོན་ང་རང་རབ་ཏུ་འབྱུང་སྐབས་བར་ཆད་མང་པོ་དང་འཕྲད་ཅིང་རྟགས་སྣ་ཚོགས་ལ་བལྟས་ན་ཕལ་ཆེར་ལམ་དུ་མི་འགྲོ་བ་ལྟར་ཡོད། དེ་ནས་ངས་དུས་ཚོད་འགའ་ཞིག་ཆེད་དུ་བཏང་ནས་ཚིག་བདུན་གསོལ་འདེབས་བཏོན་པ་ཡིན། དེའི་ནང་གི་སྒོམ་ཐབས་སོགས་ཆེར་མ་ཤེས་ཀྱང་རྒན་རབས་དང་བླ་མ་མང་པོའི་ངག་ནས་གལ་སྲིད་ཚིག་བདུན་གསོལ་འདེབས་ཀྱི་སྒོ་ནས་སློབ་དཔོན་པད་མ་འབྱུང་གནས་ལ་གསོལ་བ་བཏབ་ན་ཅི་བསམ་ལྷུན་གྱིས་འགྲུབ་པར་ཐོས་པས་དེ་ལ་ཡིད་ཆེས་ཆེན་པོ་ཡོད་པ་ཡིན། དེ་རྗེས་མོས་གུས་རྩེ་གཅིག་གིས་གསོལ་འདེབས་བྱས་པས་བར་ཆད་ཐམས་ཅད་ཡ་མཚར་བའི་ངང་དུ་སེལ་ནས་རབ་ཏུ་འབྱུང་རྒྱུ་ཡང་ལམ་དུ་སོང་བས་སློབ་དཔོན་པད་འབྱུང་གི་བྱིན་རླབས་དངོས་གནས་བསམ་གྱིས་མི་ཁྱབ།
ཆོས་ལ་མི་དད་པའི་མི་རྣམས་ཀྱིས་ངས་བསམ་གཟས་ཏེ་འུད་སྒྲོག་བྱས་པ་རེད་ཅེས་ལོས་སྙམ། ཡིན་ཡང་མི་ལོ་མང་པོའི་རིང་གི་ཉམས་ལེན་དང་གསོལ་འདེབས་ཀྱིས་ངས་ཡང་ནས་བསྐྱར་དུ་དེའི་རྨད་དུ་བྱུང་བའི་སྟོབས་ཤུགས་ལ་དངོས་སུ་ཉམས་སུ་མྱངས་པ་ཡིན།
ལྷག་པར་སྙིགས་མའི་དུས་ངན་འདིར་སེམས་ཅན་རྣམས་གྲུབ་པ་ཐོབ་དཀའ་ཞིང་བྱ་བ་ཞིག་བསྒྲུབས་ཀྱང་ནུས་པ་ཐོན་དཀའ། བྱ་གཞག་གལ་ཆེན་ཞིག་སྒྲུབ་བསམས་རུང་རྟག་ཏུ་བར་ཆད་བྱུང་ནས་མི་འགྲུབ། དེའི་ཚེ་གལ་སྲིད་སློབ་དཔོན་པདྨ་འབྱུང་གནས་ལ་གསོལ་བ་འདེབས་ནུས་ན་འདོད་པ་ཐམས་ཅད་འགྲུབ་ཤིན་ཏུ་སླ་བ་ཡིན།
གལ་ཏེ་སློབ་དཔོན་པདྨ་འབྱུང་གནས་ལ་མོས་གུས་ལྡན་རུང་ཚིག་བདུན་གསོལ་འདེབས་འདོན་མ་ཤེས་ན་སློབ་དཔོན་གྱི་བསྙེན་པ་ཨོཾ་ཨཱ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཞེས་པ་མང་དུ་འདོན་དགོས།
ངའི་ཕ་ཡུལ་ཉེ་འཁོར་གྱི་བླ་མ་དང་རབ་བྱུང་དང་ཁྱིམ་པ་སོགས་ཀུན་གྱིས་གུ་རུའི་བསྙེན་པ་གསོག་རྒྱུར་དགའ། ངའི་ཨ་ཕ་ནི་ཡིག་རྨོངས་ཡིན་པས་ཡིག་འབྲུ་ན་གཅིག་མི་ཤེས་ཀྱང་རྟག་ཏུ་གུ་རུའི་བསྙེན་པ་ཟློ་ཞིང་འཆི་ཁར་ཡང་མཚམས་མ་ཆད། ངས་དྲན་སོས་པ་ཞིག་ནི་ཕ་འདས་པོས་ལོ་རེར་བསྙེན་གྲངས་ས་ཡ་རེ་ཁས་ལེན་བྱེད་ཅིང་ཆུང་ནས་བཟུང་དུས་རྒྱུན་དུ་གང་ཙམ་ཞིག་བཏོན་ཟིན་ཞེས་འདྲི་བ་དང་སྐབས་ལ་ལར་ཁོང་ལ་གྲོགས་བྱས་ཏེ་ཕྲེང་བའི་སྟེང་གི་བསྙེན་གྲངས་ཀྱང་སྡོམ་པར་བྱེད་པ་ཡིན།
སློབ་དཔོན་པདྨ་འབྱུང་གནས་ཀྱི་བསྙེན་པ་བགྲང་བ་ལ་ཕན་ཡོན་བསམ་གྱིས་མི་ཁྱབ། ཡིན་ཡང་མི་ཤིན་ཏུ་མང་པོའི་སྒྲ་གདངས་མི་མཚུངས། ལ་ལས་ཨོཾ་ཨཱ་ཧཱུྃ་འབེ་ཛ་གུ་རུ་པདྨ་སིདྡྷི་ཧཱུྃཿ ཞེས་བཟླ་ཞིང་ལ་ལས་ཨོཾ་ཨཱ་ཧཱུྃ་འབའ་འཛར་གུ་རུ་པདྨ་སིདྡྷི་ཧཱུྃཿ ཞེས་ཟློ་བས་གཅིག་གྱུར་ཡོང་དཀའ་ཡང་སྤྱིའི་ཆ་ནས་བཤད་ན་བསམ་པ་རྣམ་པར་དག་ན་ཇི་ལྟར་བཟླས་རུང་བྱིན་རླབས་འཇུག་ནུས།
སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་རླབས་ཐོབ་པར་བྱེད་པ་ནི་ཤིན་ཏུ་གལ་ཆེན་ཞིག་ཡིན་པ་ངས་སྐབས་ཀུན་ཏུ་བསམས་ཤིང་གལ་སྲིད་དེ་ལྟ་བུའི་བྱིན་རླབས་འཇུག་པར་གྱུར་ན་རང་ཉིད་ལ་འགྱུར་བ་གཏོང་ཐུབ་པ་མ་ཟད་གཞན་ལ་ཡང་འགྱུར་བ་གཏོང་ནུས་སོ། །