༡༡ སློབ་དཔོན་པདྨ་འབྱུང་གནས་བསྒོམས་ན་ལྷ་གཞན་ཁོང་ཁྲོ་བར་ཨེ་འགྱུར།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
དུས་གསུམ་གྱི་སངས་རྒྱས་ཐམས་ཅད་ཆོས་ཀྱི་དབྱིངས་སུ་ངོ་བོ་གཅིག་ཡིན་པས་སངས་རྒྱས་གཅིག་ཡིད་ལ་སྒོམ་ཚེ་སངས་རྒྱས་ཐམས་ཅད་དེ་ལ་ཐིམ་པར་སྒོམ་དགོས། དེ་ལྟར་ལྷ་གཅིག་བསྒོམས་པས་ལྷ་ཐམས་ཅད་བསྒོམས་པ་དང་མཉམ་མོ། །
གལ་སྲིད་ངས་སློབ་དཔོན་པདྨ་འབྱུང་གནས་ལ་གསོལ་བ་བཏབ་ན་སངས་རྒྱས་དང་བྱང་ཆུབ་སེམས་དཔའ་གཞན་མི་དགའ་བར་མི་འགྱུར་རམ། ངས་རྟག་ཏུ་བསྙེན་པར་བྱེད་པའི་འཕགས་མཆོག་སྤྱན་རས་གཟིགས་དབང་མི་དགའ་བར་མི་འགྱུར་རམ་ཞེས་རྟག་ཏུ་འདྲི་བཞིན་འདུག
དོན་དུ་མི་དགའ་བར་མི་འགྱུར་ཏེ། དུས་གསུམ་གྱི་སངས་རྒྱས་ཐམས་ཅད་ཆོས་ཀྱི་དབྱིངས་སུ་ངོ་བོ་གཅིག་ཡིན་པས་སངས་རྒྱས་གཅིག་ཡིད་ལ་སྒོམ་ཚེ་སངས་རྒྱས་ཐམས་ཅད་དེ་ལ་ཐིམ་པར་སྒོམ་དགོས། དེ་མཚུངས་སློབ་དཔོན་པདྨ་འབྱུང་གནས་སྒོམ་སྐབས་ཀྱང་དེ་ལྟར་སྒོམ་དགོས། སྔོན་འབྲུག་ཆེན་རིན་པོ་ཆེས་ཀྱང་སློབ་དཔོན་པདྨ་འབྱུང་གནས་སྒོམ་སྐབས་སངས་རྒྱས་ཐམས་ཅད་དང་བླ་མ་ཐམས་ཅད་དང་གཉིས་སུ་མ་མཆིས་པར་བསྒོམས་པར་བྱས་ན་བྱིན་རླབས་ཡང་དག་པ་དངོས་སུ་འཇུག་ནུས་ཞེས་གསུངས་པ་རེད།
ད་ལྟ་ནང་ཆོས་ལ་གསར་དུ་སྦྱོང་བའི་མི་འགའ་ཞིག་གི་སེམས་ལ་འགལ་བའི་ཁུར་ཆེན་པོ་ཡོད། ཁོ་ཚོས་ལྷ་འདི་ཁྱད་དུ་འཕགས་པར་སྙམ་ནས་འདི་སྒོམ་ཞིང་ལྷ་དེ་ཡང་ཤིན་ཏུ་སྙིང་རྗེབར་བསམས་ནས་དེ་སྒོས། ལྷ་བླ་མ་ཐམས་ཅད་སྒོམ་དགོས་སྣང་བྱས་ཏེ་སུ་གཅིག་གི་དགོངས་པ་དང་ཡང་མི་འགལ་བར་ཐམས་ཅད་ལ་འབྲེལ་བ་བཟང་པོ་འཇོག་དགོས་སྙམ། ཡིན་ཡང་དངོས་སུ་སྒོམ་སྐབས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྣམ་པ་ཐ་དད་དུ་བྱས་ནས་ངོ་བོ་གཅིག་ཏུ་འདུ་མི་རུང་བར་བསམས།
ལ་ལས་ཆོས་སྐོར་སྣ་ཚོགས་ཞུས་རྗེས་ཉིན་རྟག་པར་སྤྱན་རས་གཟིགས་དབང་དང་རྗེ་བཙུན་འཇམ་པའི་དབྱངས། རྡོ་རྗེ་སེམས་དཔའ། འོད་དཔག་མེད་སོགས་རིམ་གྱིས་བསྒོམས་ནས་ལུས་སེམས་མི་དལ་བ་ཙམ་དུ་བྱེད། སྔོན་གྱི་དུས་ཤིག་ཏུ་ང་འདི་ལྟ་བུའི་མི་ཞིག་ལ་འཕྲད་མྱོང་། ཁོའི་གློ་ཁུག་གཉིས་སུ་ཕྲེང་བ་རེ་རེ་བཞག་འདུག གཡོན་གྱི་དེ་དཔལ་ཡུལ་པའི་ཆོས་སྐོར་ཉམས་སུ་ལེན་སྐབས་སྤྱོད་ཅིང་གཡས་ཀྱི་དེ་རྫོགས་ཆེན་པའི་དབང་ཆོག་ཉམས་སུ་ལེན་སྐབས་སྤྱོད་བཞིན་འདུག ཁོས་སངས་རྒྱས་དང་བྱང་ཆུབ་སེམས་དཔའ་ཐམསཅད་ངོ་བོ་ཟླ་དད་དུ་འཛིན་ཞིང་བླ་མ་ཡང་ངོ་བོ་ཐ་དད་དུ་འཛིན་པ་དང་ཐ་ན་ཕྲེང་བ་ཡང་ཐ་དད་པ་རེ་སྤྱོད་པ་རེད།
ང་ད་དུང་མི་ཞིག་ལ་འཕྲད་མྱོང་། དེས་ཁྱིམ་དུ་ལྷ་ཁང་གཉིས་བསྒྲིགས་ནས་ལྷ་ཕན་ཚུན་ཞལ་མཇལ་ན་མི་དགའ་བར་དོགས་ཏེ་མདོ་ཕྱོགས་ཀྱི་ལྷ་རྣམས་གཅིག་ཏུ་འཁོད་ཅིང་གསང་བ་སྔགས་ཀྱི་ལྷ་རྣམས་གཞན་དུ་བཀོད་འདུག
བྱེད་སྟངས་འདི་དག་སོ་སོའི་སྐྱེ་བོའི་དངོས་འཛིན་གྱི་རྣམ་རྟོག་ཡིན་པས་དངོས་གནས་ནོར་བ་མཐར་ཐུག་པ་ཡིན། མདོ་སྔགས་ཀྱི་ལྷ་ཐམས་ཅད་ངོ་བོ་གཅིག་པ་ཡིན། ལྷག་ཏུ་འཛམ་བུ་གླིང་གི་ཤར་ཕྱོགས་ཀྱི་མི་དང་ནུབ་ཕྱོགས་ཀྱི་མི་རྣམས་ཁང་པ་གཅིག་གི་ནང་དུ་མཐུན་པོར་སྡོད་ནུས་ན་སངས་རྒྱས་དང་བྱང་ཆུབ་སེམས་དཔའ་རྣམས་སྨོས་ཅི་དགོས། ལྷ་བླ་མ་ཐམས་ཅད་ཕྱོགས་གཅིག་ཏུ་བཤམས་ན་འཛིང་རེས་བྱེད་པའམ་འགལ་བ་འབྱུང་བ་སོགས་གཏན་ནས་མི་སྲིད་པས་ལྷ་ཁང་གཉིས་སྒྲིག་དགོས་དོན་མེད། མདོ་ཕྱོགས་ཀྱི་ལྷ་ཁང་དུ་སློབ་དཔོན་པདྨ་འབྱུང་གནས་ཀྱི་སྐུ་བཤམས་ན་ཁྱོད་ལ་བར་ཆད་སོགས་ཅི་ཡང་འབྱུང་མི་སྲིད་ཁོ་ཐག་ཡིན། འདི་ལྟར་བཤད་པ་ནི་སློབ་དཔོན་པདྨ་འབྱུང་གནས་ཁོ་ན་སྒོམ་པ་ལས་གཞན་སྒོམ་མི་རུང་ཞེས་པའི་དོན་མ་ཡིན། ལྷ་སོ་སོའི་སྨོན་ལམ་གྱི་མཐུའི་རྟེན་ཅིང་འབྲེལ་བར་འབྱུང་བའི་དབང་གིས་རྗེ་བཙུན་འཇམ་པའི་དབྱངས་བསྒོམས་ན་ཤེས་རབ་འཕེལ་ཞིང་འཕགས་མཆོག་སྤྱན་རས་གཟིགས་དབང་བསྒོམས་ན་སྙིང་རྗེ་འཕེལ་བ་སོགས་ཡིན་པས་ནུས་པས་འདང་ན་ལྷ་ཐམས་ཅད་རྒྱས་པར་སྒོམ་ཆོག ཡིན་ཡང་ཤིན་ཏུ་བག་ཡོད་པར་བྱ་དགོས་ས་ཞིག་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ངོ་བོ་ཐ་དད་དུ་བསམ་མི་རུང་། ལྷ་གཅིག་སྒོམ་སྐབས་ལྷ་ཐམས་ཅད་དེར་གཉིས་སུ་མེད་པར་ཐིམ་ནས་རྣམ་དབྱེར་མ་མཆིས་པར་སྒོམ་དགོས། དེ་ལྟར་ལྷ་གཅིག་བསྒོམས་པས་ལྷ་ཐམས་ཅད་བསྒོམས་པ་དང་མཉམ་མོ། །
དེའི་ཕྱིར། ལྷ་སྒོམ་སྐབས་མན་ངག་ཡོད་པ་ཤིན་ཏུ་གལ་ཆེའོ། །