འུ་ཐུག་ཐབས་ཟད་དུ་གྱུར་སྐབས་ནང་ཆོས་ལ་ཚོད་ལྟ་ཞིག་བྱས་ན་མི་བཟང་ངམ།
༡༣ འུ་ཐུག་ཐབས་ཟད་དུ་གྱུར་སྐབས་ནང་ཆོས་ལ་ཚོད་ལྟ་ཞིག་བྱས་ན་མི་བཟང་ངམ།
མི་སུ་ཡིན་རུང་སྐྱེ་རྒ་ན་འཆི་ལས་ཐར་མི་སྲིད།ཡིན་ཡང་ནང་ཆོས་ཀྱི་གཞུང་དུ་ཏག་ཏག་གནད་དོན་འདི་དག་ལ་གདོང་ལེན་བྱེད་པའི་མན་ངག་ཆེས་བཟང་པོ་ཡོད། གལ་སྲིད་ཐབས་གཞན་དག་བཙལ་ཀྱང་ཕན་གང་ཡང་མ་ཐོགས་པ་དེ་ལྟ་ན་ནང་ཆོས་ལ་ཚོད་ལྟ་ཞིག་གྱིས་དང་།དེ་ལ་མི་བཟང་བ་ཅི་ཞིག་ཡོད།
ད་ལྟ་སྐྱེ་བོ་མི་ཉུང་བ་ཞིག་གིས་བདེ་བ་ཅན་དང་དམྱལ་བ་ངས་མ་མཐོང་བས་དོན་དུ་མེད་ངེས་ཅན་རེད་ཅེས་རྟག་ཏུ་སྨྲ་བ་རེད།
འདི་ནི་ཧ་ཅང་དགོད་བྲོ་བའི་རིགས་པ་ཞིག་ཡིན།གལ་སྲིད་རང་ཉིད་ཀྱིས་མ་མཐོང་བའི་རྐྱེན་གྱིས་མེད་པར་སྨྲ་ཆོག་པ་དེ་ལྟ་ན་འཇིག་རྟེན་འདིར་མཐོང་མ་མྱོང་བའི་དངོས་པོ་ཤིན་ཏུ་མང་བས་དེ་དག་ཀྱང་མེད་པར་འདོད་དགོས་སམ།
དོན་དུ་དངོས་པོ་ཞིག་དགག་དགོས་ན་ངེས་པར་སྒྲུབ་བྱེད་སྟོབས་ལྡན་ཡོད་དགོས་པ་ལས་དེ་ལས་གཞན་དུ་གྱུར་ན་འཁྲུལ་རྟོག་ཙམ་དུ་ཟད།རིག་གསར་གྱི་སྐབས་སུ་རབ་བྱུང་བ་རྒས་པ་ཞིག་ལ་འཐབ་རྩོད་བརྒྱབས།མགོ་ཁྲིད་ཅིག་གིས་འཐབ་རྩོད་རྒྱག་བཞིན་ཁྱོད་ཅག་ནང་པའི་རྗེས་འཇུག་པ་དག་གིས་བདེ་བ་ཅན་གྱི་ཞིང་ཁམས་དང་དམྱལ་བ་ཡོད་པ་ཁ་ཐོགས་ཚད་ཀྱིས་བཤད་པ་རེད།གལ་སྲིད་ཡོད་ན་ཁྱོས་ང་ལ་མཛུབ་མོས་སྟོན་དང་ཞེས་བསྡིགས།
རབ་བྱུང་བ་རྒས་པ་དེས་ཡོད་པའི་དངོས་པོ་ཐམས་ཅད་མཛུབ་མོས་སྟོན་དགོས་པའི་ངེས་པ་མེད་ཅེས་སྨྲས།མགོ་ཁྲིད་དེས་ངེས་པར་དུ་ང་ལ་མཛུབ་མོས་སྟོན་དགོས་ཞེས་བཤད།རབ་བྱུང་བ་རྒས་པ་དེས་ཁྱོད་ཅག་གིས་ཉིན་རྟག་པར་ཨ་རི་བཙན་རྒྱལ་རིང་ལུགས་ཞེས་སྡིག་བཞིན་འདུགའོ་ན་ཨ་རི་ཡོད་དམ།གལ་ཏེ་ཡོད་ན་ང་ལ་མཛུབ་མོས་སྟོན་རོགས་ཞེས་ལན་སྨྲས།མགོ་ཁྲིད་དེ་ཉིད་ཤིན་ཏུ་ཁྲོས་ཏེ་ཅི་བཤད་མེད་པར་གྱུར་ནས་ཁུ་ཚུར་གྱིས་སྡུག་ཐག་ཆོད་ཅིག་བརྒྱབས།རབ་བྱུང་རྒན་པ་དེས་དགོད་བཞིན་ན་རེ།ད་ཤེས་ཨེ་སོང་།མིག་གིས་མ་མཐོང་ཡང་མེད་པའི་ངེས་པ་མེད་ཅིང་མ་མཐོང་རུང་དོན་དུ་གྲུབ་པའི་དངོས་པོ་ཧ་ཅང་གིས་མང་ངོ་ཞེས་སྨྲས།
མ་མཐོང་བའི་རྐྱེན་གྱིས་མེད་པར་འདོད་པའི་རིགས་པ་འདི་ནི་ཧ་ཅང་དགོད་བྲོ་བའི་རིགས་པ་ཞིག་ཡིན།སོ་སོའི་སྐྱེ་བོའི་ཤའི་མིག་གི་ནུས་པ་ནི་གདོད་མ་ནས་ཚད་ཅན་ཡིན་པས་ཤའི་མིག་གིས་མ་མཐོང་བ་ཙམ་གྱིས་མེད་པར་མཚོན་མི་ནུས།དཔེར་ན་མཁའ་དབུགས་དང་གློག་རླབས།ཕྲ་ཕུང་ལྟ་བུ་སོགས་ཡིན་པས་ང་ཚོས་མཐོང་ཡང་མི་ནུས་ལ་རེག་ཀྱང་མི་ནུས།འོན་ཀྱང་དེ་ཙམ་གྱིས་མེད་པར་སྒྲུབ་མི་ནུས།དག་པའི་ཞིང་ཁམས་དང་སངས་རྒྱས་འོད་དཔག་མེད་སོགས་སྨྲ་མ་དགོས་པར་ཐ་ན་གྲོག་རོང་ཆུང་ཆུང་ཞིག་གི་ནང་དུ་མཐོང་མ་མྱོང་བའི་
དངོས་པོ་ཧ་ཅང་མང་པོ་ཡོད་ཅིང་མི་ཚོགས་ཀྱི་ཁྲོད་དུ་ཡང་མཐོང་མ་མྱོང་བའི་མི་ཡོད།དེའི་ཕྱིར་ང་ཚོས་མ་མཐོང་བའི་རྒྱུ་མཚན་ཙམ་གྱིས་དངོས་པོ་གཞན་དོན་དུ་གྲུབ་པ་ཇི་ལྟར་འགོག་ནུས་ཏེ་མི་ནུས་སོ།།
དེ་ཡང་ལོས་ཡིན་ཏེ་ཆོས་ལ་དད་མི་དད་ནི་རང་དབང་ཡིན་པས་བཙན་པོའི་སྦྱོར་བ་ནི་ཏིལ་ཙམ་ཡང་མེད།བདག་ཅག་གི་སྟོན་པས་ཀྱང་ཆོས་ལ་མི་དད་པའི་གང་ཟག་ལ་བཙན་གྱིས་ཆོས་འཆད་པའི་དགོས་པ་གང་ཡང་མེད་ཅེས་གསུངས།དེ་ལྟ་ན་ཡང་མི་སུ་ཡིན་རུང་སྐྱེ་རྒ་ན་འཆི་ལས་ཐར་མི་སྲིད།ནང་ཆོས་ཀྱི་གཞུང་དུ་ཏག་ཏག་གནད་དོན་འདི་དག་ལ་གདོང་ལེན་བྱེད་པའི་མན་ངག་ཆེས་བཟང་པོ་ཡོད།གལ་སྲིད་ཐབས་གཞན་དག་བཙལ་ཀྱང་ཕན་གང་ཡང་མ་ཐོགས་པ་དེ་ལྟ་ན་ནང་ཆོས་ལ་ཚོད་ལྟ་ཞིག་གྱིས་དང་།དེ་ལ་མི་བཟང་བ་ཅི་ཞིག་ཡོད།